1 तेबे राजा सुलैमाने इस्राएली लोका रे बुजुर्ग लोक ओर गोत्रा रे सारे खास मर्द जो इस्राएली लोका रे बुजुर्गा रे करानेया रे परदान थे, सेयो बी यरूशलेम शईरो दे आपू गे एते इच्छा ते कट्ठे कित्ते, ताकि सेयो यहोवे री वाचा रा सन्दूक दाऊदो रे शईरो ते मतलब सिय्योनो ते ऊबे लई आओ।* 2 तेबे सारे इस्राएली लोक एतानीम सातुए मीन्ने दे त्योआरो रे बखते सुलैमान राजे गे कट्ठे ऊए। 3 जेबे सारे इस्राएली बुजुर्ग आए, तेबे पुरोईते सन्दूक चकी ता। 4 ओर यहोवे री वाचा रा सन्दूक, ओर मिलणे वाल़ा तम्बू ओर जितणे पवित्र पांडे तेते शईरो दे थे, तिना सारेया खे लेवी ओर पुरोईत लोक ऊबे लईगे। 5 ओर सुलैमान राजा ओर सारी इस्राएली मण्डल़ी, जो तेसगे कट्ठी ऊई थी, सेयो सारे सन्दूको सामणे इतणिया पेडा ओर बल़द बलि करने लगी रे थे, जिना री गिणती किंयाँ पनि ऊई सको थी। 6 तेबे पुरोईते यहोवे री वाचा रा सन्दूक तेसरी जगा खे मतलब मन्दरो दे पवित्र जगा दे, जो परम पवित्र जगा ए, पऊँचाई की करूबा निठे राखी ता। 7 करूबे तो सन्दूको री जगा पाँदे पंख एड़े फैलाई राखे थे कि तिने पाँदा ते सन्दूक ओर तेतेरे डण्डे टकी राखे थे। 8 सेयो डण्डे तो इतणे लाम्बे थे कि तिना रे सिरे तेसा परम पवित्र जगा रे सामणे ते दिशी जाओ थे, पर ओर केथा ते नि दिशो थे। ओर तदुए ते सेयो तेथी ए। 9 सन्दूको दे कुछ नि था, तिना दुँईं पात्थरो रिया पट्टिया खे छाडी की जो मूसे होरेबो दे तेतेरे पीतरे तेस बखते राखिया, जेबे यहोवे इस्राएली लोका रे मिस्रो ते निकल़ने रे बखते तिना साथे वाचा बानी थी।

10 जेबे पुरोईत पवित्र जगा ते निकल़े, तेबे यहोवे रा मन्दर बादल़ो साथे परीगा था। 11 ओर बादल़ो रिया बजअ ते पुरोईत सेवा-टईल करने खे खड़े नि रयी सके, कऊँकि यहोवे री महिमा रा तेज यहोवे रे मन्दरो दे परी गा था।

12 तेबे सुलैमान प्रार्थना करने लगेया, "यहोवे बोलेया था कि मां अन्दकूप न्हेरे वाल़े बादल़ो दे वास करना। 13 सच्ची मैं ताखे एक रणे खे जगा, बल्कि एड़ी मजबूत जगा बणाई, जिदे तूँ जुगो-जुगो तक बणेया दा रये।" 14 तेबे राजे इस्राएलो री पूरी सभा री तरफा खे मूँ फेरी की तिना खे आशीर्वाद दित्तेया; ओर पूरी सभा खड़ी रई। 15 ओर तिने बोलेया, "तन्य ए इस्राएलो रा यहोवा परमेशर! जिने आपणे मुंए ते मेरे बाओ दाऊदो खे ये वचन दित्तेया था ओर आपणे आथो साथे से पूरा कित्तेया, 16 ‘जेस दिनो ते आऊँ आपणी इस्राएल प्रजा खे मिस्रो ते निकयाल़ी की ल्याया, तदुओ ते मैं केसी इस्राएल गोत्रो रा कोई शईर नि चूणेया, जिदे मेरे नाओं रे रणे खे मन्दर बणाया जाओ; पर मैं दाऊद चूणी ला, ताकि से मेरी इस्राएल प्रजा रा अधिकारी ओ।’ 17 मेरे बाओ दाऊदो री ये इच्छा तो थी कि इस्राएलो रे परमेशर यहोवे रे नाओं रा एक मन्दर बणाओ। 18 पर यहोवे मेरे बाओ दाऊदो खे बोलेया, ‘ये जो तेरी इच्छा ए कि मेरे नाओं री महिमा करने रिया तँईं एक मन्दर बणाए, एड़ी इच्छा करी की तैं खरा कित्तेया; 19 तेबे बी तां से मन्दर नि बनाणा; तेरा जो आपणा पाऊ ऊणा, तेस ई मेरे नाओं रा मन्दर बनाणा।’ 20 ये जो वचन यहोवे बोलेया था, तिने से पूरा बी कित्तेया ओर आऊँ आपणे बाओ दाऊदो री जगा पाँदे उठी की, यहोवे रे वचनो रे मुताबिक इस्राएलो री गद्दिया पाँदे विराजमान ए ओर इस्राएलो रे परमेशर यहोवे रे नाओं ते ये मन्दर बणाई राखेया। 21 ओर इदे मैं एक जगा तेस सन्दूको खे बणाई राखी, जिदे यहोवे री से वाचा ए, जो तिने म्हारे बुजुर्गा खे मिस्र देशो ते काडणे रे बखते तिना साथे बानी थी।"

22 तेबे सुलैमान इस्राएलो री पूरी सभा सामणे यहोवे री बेदिया सामणे खड़ा ऊआ ओर आपणे आथ स्वर्गो रिया तरफा खे फैलाई की बोलेया, "ओ यहोवा! 23 ओ इस्राएलो रे परमेशर! तां जेड़ा ना तो ऊबे स्वर्गो दे ओर ना थाले तरतिया पाँदे कोई परमेशर ए, तेरे जो दास आपणे पूरे मनो ते आपू खे तां सामणे जाणी की हांडोए, तिना खे तूँ आपणी वाचा पूरी करेया ओर करूणा करदा रएया।" 24 जो वचन तैं मेरे बाओ दाऊदो खे दित्तेया था, तेतेरा तैं पालण करी राखेया, जेड़ा तैं आपणे मुंए ते बोलेया था, तेड़ा ई से आपणे आथो साथे पूरा कित्तेया, जेड़ा कि आज ए। 25 इजी री खातर एबे ओ इस्राएलो रे यहोवा परमेशर! एस वचनो खे बी पूरा कर, जो तैं आपणे दास मेरे बाओ दाऊदो खे दित्तेया था, तेरे कुलो दे, मां सामणे इस्राएलो री गद्दिया पाँदे बैठणे वाल़े सदा बणे दे रणे, इतणा ओ कि जिंयाँ तूँ आपू खे मां सामणे जाणी की चलदा रया, तिंयाँ ई तेरे कुलो रे लोक आपणे चाल चलणो दे एड़ी चौकसी करो। 26 इजी री खातर एबे ओ इस्राएलो रे परमेशर आपणा जो वचन तैं आपणे परोसे जोगे दास मेरे बाओ दाऊदो खे दित्तेया था तेतेखे सच्चा सिद्ध कर।

27 क्या परमेशरो सच्ची तरतिया पाँदे वास करना, सर्गो दे, बल्कि ऊबे स्वर्गो दे बी तूँ नि समांदा, तेबे मेरे बणाए रे एस मन्दरो दे किंयाँ समाणा? 28 तेबे बी ओ मेरे यहोवा परमेशर! आपणे दासो री प्रार्थना ओर गिड़गिड़ाणे रिया तरफा खे कान लगा, मेरा चींगणा ओर ये प्रार्थना सुण! जो आज आऊँ तां सामणे करने लगी रा; 29 तेरी आख एस मन्दरो रिया तरफा खे रात दिन खुली दी रओ जेते जगा रे बारे दे बोलेया, "मेरा नाओं तेथी रणा," ताकि जो प्रार्थना तेरा दास एसा जगा रिया तरफा खे करो, तिजी खे तूँ सुणी लो। 30 ओर तूँ आपणे दास ओर आपणी इस्राएली प्रजा री प्रार्थना जेतेखे सेयो एसा जगा रिया तरफा खे गिड़गिड़ाई की करो से सुणनी, बल्कि स्वर्गो ते जो तेरी रणे री जगा ए सुणी लया ओर सुणी की माफ करना। 31 जेबे कोई माणूं केसी दूजे माणूंए रा अपराध करो ओर तेसखे कसम खुल़ाई जाओ ओर से आई की एस मन्दरो दे तेरी बेदिया सामणे कसम खाओ, 32 तेबे तूँ स्वर्गो ते सुणी की, मतलब आपणे दासो रा न्याय करी की दुष्टो खे दुष्ट ठईरा ओर तेसरी चाल तेसरे ई सिरो पाँदे वापस करी दे ओर निर्दोषो खे निर्दोष ठराई की, तेसरे तर्मो रे मुताबिक तेसखे फल देणा। 33 तेबे जेबे तेरी प्रजा इस्राएल तेरे खलाफ पाप करने रिया बजअ ते आपणे दुश्मणा ते आरी जाओ ओर तेरी तरफा खे फिरी की तेरा नाओं लओ ओर एते मन्दरो दे आई की तांते गिड़गिड़ाई की प्रार्थना करो, 34 तेबे तैं स्वर्गो ते सुणी की आपणी इस्राएली प्रजा रा पाप माफ करना: ओर सेयो एते देशो दे वापस लई आऊणे, जो तैं तिना रे बुजुर्गा खे दित्तेया था। 35 फेर जेबे सेयो तेरे खलाफ पाप करो ओर इजी बजअ ते सर्ग बन्द ऊई जाओ, ताकि बर्खा नि ओ, एड़े बखते जे सेयो एसा जगा रिया तरफा खे प्रार्थना करी की तेरे नाओं खे मानो जेबे तूँ तिना खे दु:ख देया ओर सेयो पापो ते फिरो, तो तैं स्वर्गो दे सुणी की माफ करना, 36 ओर आपणे दासा खे, आपणी इस्राएली प्रजा रा पाप माफ करना; तूँ जो तिना खे खरी बाट दखाएया, जेते पाँदे तिना खे चलणा चाईयो, इजी री खातर आपणे एस देशो पाँदे, जो तैं आपणी प्रजा रा इस्सा करी ता रा, पाणी बरसायी देया। 37 जेबे एते देशो दे अकाल़, मरी, झुलस ओ या गेरुई या टिड्डिया या कीड़े लगो या तिना रे दुश्मण तिना रे देशो रे बड़े द्वारो गे तिना खे केरी देयो या कोई बमारी या मुसीबत कऊँ नि ओ, 38 तेबे जे कोई माणूं या तेरी इस्राएली प्रजा रे लोक ये जाणी की कि तिने पाप करी राखेया, सेयो तेरे मन्दरो रिया तरफा खे आथ चको ओर गिड़गिड़ाई की प्रार्थना करो, 39 तो तैं आपणे स्वर्गो दे रणे रिया जगा ते सुणी की माफ करना ओर एड़ा करना कि एकी-एकी रे मनो खे जाणी की तेसरी सारी चाला रे मुताबिक तेसखे फल देणा। तूँ ई तो सारे माणूंआ रे मनो रा पेत जाणने वाल़ा ए। 40 तेबे सेयो जितणे दिन तक एते देशो दे रओ, जो तैं तिना रे बुजुर्गा खे दित्तेया था, तितणे दिना तक तेरा डर मानदे रओ। 41 फेर परदेशी बी जो तेरी प्रजा इस्राएलो रा नि ओ, जेबे से तेरा नाओं सुणी की दूर देशो ते आओ, 42 से तो तेरे बड़े नाओं, ओर तेरी सामर्थ ओर तेरी तागती रे बारे दे सुणी की; इजी री खातर जेबे एड़ा कोई आई की एस मन्दरो रिया तरफा खे प्रार्थना करो, 43 तेबे तैं आपणे स्वर्गो दे रणे रिया जगा ते सुणना ओर जेसा गल्ला खे एड़ा परदेशी ताखे आका पाओ, तेतेरे ई मुताबिक बर्ताओ करना जेते कि तरतिया रे सारे देशो रे लोक तेरा नाओं जाणी की तेरी इस्राएली प्रजा जेड़े तेरा डर मानो ओर पक्का जाणी लो कि ये मन्दर जो मैं बणाई राखेया, से तेरा ईए। 44 जेबे तेरी प्रजा रे लोक जेती केथी तूँ तिना खे पेजे, तेथी आपणे दुश्मणा साथे लड़ाई करने खे निकल़ो ओर एस शईरो रिया तरफा खे, जो तैं चूणी राखेया, जो मैं तेरे नाओं पाँदे बणाई राखेया, यहोवे ते प्रार्थना करो, 45 तेबे तैं स्वर्गो ते तिना री प्रार्थना ओर गिड़गिड़ाणा सुणी की तिना रा न्याय करना। 46 निष्पाप कोई माणूं नि ए, जे यो बी तेरे खलाफ पाप करो ओर तूँ तिना पाँदे कोप करी की तिना खे दुश्मणा रे आथो रे करी दे ओर सेयो तिना खे बन्दी बणाई की आपणे देशो खे चाए से दूर ओ, चाए नेड़े लई जाओ, 47 ओर जे सेयो गुलामिया रे देशो दे सोच-बिचार करो ओर फिरी की आपणे गुलामिया रे देशो दे गिड़गिड़ाई की बोलो, आसे पाप करी राखेया ओर बुराई ओर दुष्टता करी राखी; 48 ओर जे सेयो आपणे तिना दुश्मणा रे देशो दे जो तिना खे बन्दी बणाई की लईगे ओ, आपणे पूरे मन ओर पूरे प्राणो साथे तेरी तरफा खे फिरो ओर आपणे एस देशो रिया तरफा खे जो तैं तिना रे बुजुर्गा खे दित्तेया था ओर एस शईरो रिया तरफा खे जो तैं चूणी राखेया ओर एस मन्दरो रिया तरफा खे जो मैं तेरे नाओं रा बणाई राखेया, तांते प्रार्थना करो, 49 तेबे तैं आपणे स्वर्गो दे रणे रिया जगा ते तिना री प्रार्थना ओर गिड़गिड़ाणा सुणना; ओर तिना रा न्याय करना, 50 आपणे लोका रे सबी पापा खे माफ करी दे ओर तूँ आपणे खलाफो दे ऊए दे पापा खे माफ करी की तिना रे दुश्मणा खे तिना रिया तँईं दयालु बणा। 51 कऊँकि सेयो तेरे आपणे नीज पाअग ओर तेरे आपणे लोक ए जिना खे तूँ मानो लोए री पट्ठिया बीचा ते, मतलब मिस्र देशो ते निकयाल़ी की ल्याई राखेया। 52 इजी री खातर तेरिया आखी तेरे दासो रे गिड़गिड़ाणे ओर तेरी प्रजा इस्राएलो रे गिड़गिड़ाणे रिया तरफा खे खुली रिया रओ, ताकि जेबे-जेबे सेयो ताखे आका पाओ, तेबे-तेबे तूँ तिना री सुणी लो। 53 कऊँकि तूँ ओ प्रभु यहोवा आपणे तेस वचनो रे मुताबिक, जो तैं म्हारे बुजुर्गा खे मिस्रो ते काडणे रे बखते आपणे दास मूसे रे जरीये दित्तेया था, तैं इना लोका खे आपणा निज इस्सा ऊणे खे तरतिया री सारी जातिया ते लग करी राखेया।

54 सुलैमान आपणे जानूआ रे पारे यहोवे रे सामणे ऊआ ओर आथ स्वर्गो रिया तरफा खे चकी की प्रार्थना कित्ती। प्रार्थना करने ते बाद सुलैमान खड़ा ऊआ, 55 ओर खड़े ऊई की सारी इस्राएली सभा खे ऊच्ची आवाजा दे ये बोली की आशीर्वाद दित्तेया, 56 "तन्य ए यहोवा, जिने ठीक आपणे कईणे रे मुताबिक आपणी इस्राएली प्रजा खे राम दित्तेया, जितणी पलाईया रिया गल्ला तिने आपणे दास मूसे रे जरीये बोलिया थिया, तिना बीचा ते एक बी गल्ल बिना पूरी ऊए नि रई। 57 म्हारा यहोवा परमेशर जिंयाँ म्हारे बुजुर्गा साथे रओ था, तिंयाँ ई आसा साथे बी रओ, से आसा खे छाडो नि ओर ना ई आसा खे त्यागो। 58 से म्हारे मन आपणी तरफा खे एड़े फिराओ कि आसे तेसरी सारी बाटा दे चलदे रऊँ ओर तेसरी आज्ञा ओर बिदिया ओर नियम जो तिने म्हारे बुजुर्गा खे दित्ते थे, सदा मानेया करुँ। 59 ओर मेरिया यो गल्ला जिना री मैं यहोवे रे सामणे बिनती करी राखी, सेयो रात-दिन म्हारे परमेशर यहोवे रे मनो रे बणिया रिया रओ ओर जेड़ी हर दिन जरूरत ओ, तेड़ा ई से आपणे दासो रा ओर आपणी प्रजा इस्राएलो रा बी न्याय करेया करो, 60 ओर इजी ते तरतिया रिया सारिया जातिया ये जाणी लओ कि यहोवा ई परमेशर ए; ओर कोई दूजा नि ए। 61 तो तुसा रा मन म्हारे परमेशर यहोवे दे एड़ा पूरी रीतिया ते लगेया रा रओ, ताकि जेड़े आज तेसरी बिदिया ओर आज्ञा पाँदे हांडोए, तेड़े ई बादो ते बी मानदे रओ।"

62 तेबे राजा सारे इस्राएली लोका समेत यहोवे रे सामणे मेलबलि चढ़ाणे लगेया। 63 ओर सुलैमाने जो डांगर यहोवे खे मेलबलि करी की चढ़ाए, सेयो 22,000 बल़द ओर 120,000 पेडा थिया। ईंयाँ राजे सारे इस्राएली लोका समेत यहोवे रे मन्दरो री प्रतिष्ठा कित्ती। 64 तेस दिने राजे यहोवे रे मन्दरो रे सामणे वाल़े आँगणो बीचे बी एक जगा पवित्र कित्ती ओर होमबलि ओर नज्जो री बलि ओर मेलबलिया री चर्बी तेथी चढ़ाई; कऊँकि जो पीतल़ी री बेदी यहोवे सामणे थी, से तिना खे छोटी थी। 65 सुलैमाने ओर तेस साथे सारे इस्राएलो री एक बड़ी सभा ते बाद साता दिना तक चूँगड़िया रा त्यार बणाया जेतेरिया तँईं उत्तर दिशा दे हमातो रिया काट्टिया ते लई की दक्खणा दे मिस्रो रे नाल़े तक रे सारे देशो ते कट्ठी ऊई थी, दो अफ़्ते तक, मतलब चौदा दिन तक म्हारे परमेशर यहोवे सामणे त्योआर मनाया। 66 तेबे आगले दिने तिने प्रजा रे लोक बिदा कित्ते ओर सेयो राजे खे तन्य, तन्य, बोली की तेसा सारी पलाईया रिया बजअ ते जो यहोवे आपणे दास दाऊदो साथे ओर आपणी प्रजा इस्राएलो साथे कित्ती थी, खुश ओर मगन ऊई की आपणे-आपणे डेरेया खे चली गे।