1 जेबे सारे इस्राएली लोक यरदन नदिया ते पार निकल़ी चुके, तेबे परमेशरे यहोशूए खे बोलेया, 2 "इना लोका बीचा ते बारा मर्द, मतलब हर गोत्रो ते एक मर्द 3 तूँ तिना खे बोल कि तुसे यरदन नदिया बीचे जेती पुरोईत खड़ी रे थे तेथा ते बारा पात्थर चकी की आपू साथे पार लई चलो ओर जेती आज की रात रूकणे सेयो पात्थर तेथी राखी देणे।" 4 तेबे यहोशूए सेयो बारा मर्द, जो तिने इस्राएली लोका रे हर एक गोत्रो ते छाँटी की ठराई राखे थे बुलाए, 5 तिना खे आपू गे बुलाई की बोलेया, "तुसे आपणे परमेशर यहोवे रे सन्दूको ते आगे यरदन नदिया बीचे जाई की इस्राएली लोका रे गोत्रो री गिणतिया रे मुताबिक एक-एक पात्थर चकी की आपणी-आपणी कान्दा पाँदे राखो, 6 जेते कि ये तुसा लोका बीचे नशाणी ठईरो ओर बादो ते जेबे तुसा रे बच्चे पूछो कि इना पात्थरा रा क्या मतलब ए? 7 तेबे तुसे तिना खे ये ज्वाब देयो कि यरदन नदिया रा पाणी परमेशरो रे वादे रे सन्दूको सामणे बइणा बन्द ऊईगा था, कऊँकि जेबे पुरोईत वादे रे सन्दूको खे यरदन नदिया ते पार ल्याऊणे लगी रे थे, तेबे यरदन नदिया रा पाणी बइणा बन्द ऊईगा। तो यो पात्थर इस्राएली लोका खे हमेशा याद दलाणे वाल़े ऊणे कि एती क्या ऊआ था।"

8 यहोशूए री एसा आज्ञा रे मुताबिक इस्राएली लोके तेड़ा ई कित्तेया, जेड़ा परमेशरे यहोशूए खे बोलेया था तेड़ा ई तिने इस्राएली लोका रे गोत्रो री गिणतिया रे मुताबिक बारा पात्थर यरदन नदिया बीचा ते चकी ले ओर सेयो आपू साथे लई की जेती सेयो राथियो खे रूके थे, तेती राखी ते। 9 ओर यरदन नदिया बीचे जेती पुरोईत वादे रा सन्दूक चकी की खड़े थे तेती यहोशूए बी बारा पात्थर खड़े करवाए, सेयो आजो तक तेथी आए। 10 ओर पुरोईत सन्दूक चकी की तेस बखतो तक यरदन नदिया बीचे खड़े रे रये, जदुओ तक सेयो सारिया गल्ला पुरिया नि ऊई चुकिया, जिना खे परमेशरे मूसे रे जरीये यहोशूए खे लोका खे करने री आज्ञा दित्ती थी। तेबे सारे लोक चटचट पार निकल़ी गे। 11 ओर जेबे सारे लोक पार निकल़ी चुके, तेबे पुरोईत परमेशरो रे सन्दूको खे बी तिना सामणे निकाल़ी की पार लईगे। 12 ओर रूबेनी, गादी गोत्रो रे लोक ओर मनश्शे गोत्रो रे आदे लोक मूसे रे कईणे रे मुताबिक इस्राएली लोका ते आगे अथियार बानी की पार गये, 13 मतलब कोई 40,000 सैनिक युद्धो रे अथियार लई की युद्ध करने खे परमेशरो रे सामणे ते आगे पार निकल़ी की यरीहो शईरो रे नेड़े एक खुले मैदानो दे पऊँचे।

14 सबी इस्राएलिये तेस दिने देखेया कि परमेशरे किंयाँ यहोशूए रा आदर कित्तेया, जदुए तक यहोशू जिऊँदा रया तेसरा बी आदर करदे रये, जेड़ा सेयो इजी ते पईले मूसे रा आदर करो थे। 15 ओर परमेशरे यहोशूए खे बोलेया, 16 "वादे रा सन्दूक चकणे वाल़े पुरोईता खे आज्ञा दे कि यरदन नदिया बीचा ते निकल़ी की आई जाओ।" 17 तेबे यहोशूए पुरोईता खे आज्ञा दित्ती, "कि यरदन नदिया बीचा ते निकल़ी की बारे आई जाओ।" 18 ओर जिंयाँ ई परमेशरो रे वादे रा सन्दूक चकणे वाल़े पुरोईत यरदन नदिया बीचा ते निकल़ी की आए ओर तिना रे पैर जमीना दे पड़े, तिंयाँ ई यरदन नदिया रा पाणी आपणी जगा दे आया ओर पईले जेड़ा कनारे पाँदे बह्ईणे लगेया।

19 पईले मीन्ने* रे दसुए दिने लोके यरदन नदिया ते निकल़ी की यरीहो शईरो रे पूर्वी बन्ने पाँदे गिलगाल जगा दे आपणे डेरे लगाए। 20 ओर जो बारा पात्थर यरदन नदिया ते निकयाल़े थे, सेयो यहोशूए गिलगाल जगा दे खड़े करवाए। 21 तेबे तिने इस्राएली लोका खे बोलेया, "बादो ते जेबे तुसा रे बाल-बच्चे आपणे-आपणे माये-बाओ ते पूछो कि इना पात्थरा रा क्या मतलब ए?" 22 तेबे तुसे ये बोली की तिना खे समजयाणा कि इस्राएली यरदन नदिया दे पैदल चली की पार एते जगा दे आए थे। 23 कऊँकि जिंयाँ म्हारे यहोवा परमेशरे लाल समुद्र म्हारे पार पऊँचणे तक आसा सामणे ते टाई की दो इस्सा करिता था, तिंयाँ ई तिने यरदन नदिया रा पाणी बी म्हारे पार पऊँछणे तक आसा सामणे ते टाई की टेर बणाईता था; 24 ये इजी खे ऊआ कि तरतिया रे सबी देशा रे लोक जाणी लो कि प्रभु केड़ा महान ए ओर तुसे सदा आपणे प्रभु परमेशरो रा आदर करदे रओ।