1 तेबे यहोवे मूसे खे बोलेया, 2 "नए सालो रे पईले मीन्ने रे पईले दिने तैं मिलणे वाल़ा तम्बू खड़ा करी देणा। 3 तिदे वाचा रा सन्दूक राखी की बीचले पड़दे पीछे राखी देणा। 4 ओर मेज पीतरे लई जायी की जो कुछ तिदे सजाणा ओगा से सजाई देणा; तेबे दिऊए राखणे री फट्टी पीतरे लई जायी की तिजी रे दिऊए बाल़ी देणे। 5 फेर सूईने री तूपो री बेदी वाचा रे सन्दूको सामणे राखणी ओर मिलणे वाल़े तम्बूए रे द्धारो रे पड़दे लगाई देणे। 6 ओर मिलणे वाल़े तम्बूए रे द्धारो रे सामणे होमबलिया री बेदी राखणी। 7 ओर मिलणे वाल़े तम्बू ओर बेदिया बीचे अऊदी राखी की तिदे पाणी परना। 8 ओर चऊँ तरफा रे आँगणो री कनात खड़ी करनी ओर तेस आँगणो रे द्धारो पाँदे पड़दे लटकाई देणे। 9 ओर अभिषेको रा तेल लई की मिलणे वाल़े तम्बूए खे ओर जो कुछ तिदे ऊणा सबी रा अभिषेक करना ओर सारे समानो समेत से पवित्र करना, तेबे से पवित्र ठईरना। 10 फेर सारे समानो समेत होमबलिया री बेदिया रा अभिषेक करी की से पवित्र करनी; तेबे से परम पवित्र ठईरनी। 11 पावे समेत अऊदिया रा बी अभिषेक करी की से पवित्र करनी। 12 तेबे हारूण ओर तेसरे पाऊ मिलणे वाल़े तम्बूए रे द्धारो पाँदे लई जायी की पाणिए साथे नुल़ाणे। 13 फेर हारूणो खे पवित्र टाल्ले पन्याई की तेसरा अभिषेक करी की से पवित्र करना, ताकि से मेरिया तँईं पुरोईतो रा काम करो। 14 ओर तेसरे पाऊ लई जायी की तिना खे टाल्ले पन्याणे। 15 ओर जिंयाँ तैं तिना रे बाओ रा अभिषेक कित्तेया तिंयाँ ई तिना रा बी अभिषेक करना, ताकि सेयो मेरिया तँईं पुरोईतो रा काम करो ओर तिना रा अभिषेक तिना री पीढ़िया-पीढ़िया खे सदा पुरोईतो रे पदो रा चिह्न ठईरना।"

16 मूसे जो-जो आज्ञा यहोवे दित्ती तिजी रेई मुताबिक कित्तेया। 17 ओर दूजे सालो रे पईले मीन्ने रे पईले दिने तम्बू खड़ा कित्तेया। 18 जेबे मूसे मिलणे वाल़ा तम्बू खड़ा करवाया तेबे तिने तेतेरे हर तख़्ते रे पावे लगाई की तिना रे बिंडे पाए ओर तिना रे खम्बे खड़े कित्ते। 19 फेर तिने मिलणे वाल़े तम्बूए पाँदे तम्बू फैलाया ओर तिने तम्बूए पाँदे टकणा लगाया, जिंयाँ यहोवे मूसे खे आज्ञा दित्ती थी। 20 मूसे गवाईया री चिट्ठी लई की वाचा रे सन्दूको रे राखिया ओर सन्दूको रे डण्डे लगाई की तिजी पाँदे दया आसण राखी ता; 21 फेर तेबे मूसे वाचा रा सन्दूक मिलणे वाल़े तम्बूए रे पऊँचाया ओर बीचला पड़दा लटकवाई की गवाईया रा सन्दूक तेतेरे पीतरे राखेया, जिंयाँ यहोवे मूसे खे आज्ञा दित्ती थी। 22 ओर तिने मिलणे वाल़े तम्बूए री जगा रे उत्तरो रिया तरफा खे बीचले पड़दे ते बारे मेज लगवाई। 23 ओर तिजी पाँदे तिने यहोवे रे सामणे रोटी सजायी की राखी, जिंयाँ यहोवे मूसे खे आज्ञा दित्ती थी। 24 फेर मूसे रे काम करने वाल़ेया मिलणे वाल़े तम्बूए रे मेजो रे सामणे दक्खणो रिया तरफा खे दिऊए राखणे री फट्टी राखी। 25 ओर तेबे तिने दिऊए यहोवे रे सामणे बाल़ी ते जिंयाँ यहोवे मूसे खे आज्ञा दित्ती थी। 26 मूसे मिलणे वाल़े तम्बूए रे बीचले पड़दे रे सामणे सूईने री बेदी राखी 27 ओर तिने तिजी पाँदे खुशबूदार तूप बाल़ेया, जिंयाँ यहोवे मूसे खे आज्ञा दित्ती थी। 28 फेर तिने मिलणे वाल़े तम्बूए रे द्धारो पाँदे पड़दे लगाए। 29 फेर तिने मिलणे वाल़े तम्बूए रे द्धारो पाँदे होमबलि राखी की तिजी पाँदे होमबलि ओर नज्जो री बलिया री पेंट चढ़ाई; जिंयाँ यहोवे मूसे खे आज्ञा दित्ती थी। 30 ओर तिने मिलणे वाल़े तम्बू ओर बेदिया बीचे अऊदी राखी ओर तिदे तोणे खे पाणी पाया, 31 ओर तेबे मूसे, हारूणे ओर तेसरे पाऊए तिदे आपणे-आपणे आथ पैर तोये; 32 जेबे-जेबे सेयो मिलणे वाल़े तम्बूए गे या बेदिया गे जाओ थे, तेबे-तेबे सेयो आथ-पैर तोओ थे; जिंयाँ यहोवे मूसे खे आज्ञा दित्ती थी। 33 फेर मूसे मिलणे वाल़े तम्बूए रे चऊँ कनारे ओर बेदिया रे नेड़े-तेड़े आँगणो रे पड़दे लगवाए ओर आँगणो रे द्धारो रा पड़दा लटकाई ता। ईंयाँ मूसे सारा काम पूरा करी ता।

34 तेबे बादल़ मिलणे वाल़े तम्बूए पाँदे छाईगा ओर यहोवे रा तेज मिलणे वाल़े तम्बूए रे परी गा। 35 ओर जो बादल़ मिलणे वाल़े तम्बूए पाँदे ठईरी गा ओर यहोवे रा तेज मिलणे वाल़े तम्बूए रे परी गा, इजी बजअ ते मूसा तिदे जाई नि सकेया। 36 इस्राएलिया री सारी यात्रा रे एड़ा ओ था कि जेबे-जेबे बादल़ तम्बूए पाँदा ते उठी जाओ था तेबे-तेबे इस्राएली चली पड़ो थे 37 ओर जेस दिने से बादल़ नि उठो था, तो जदुओ तक से नि उठो था तदुओ तक सेयो नि जाओ थे। 38 ईंयाँ इस्राएलो रे सारे कराने री यात्रा रे दिनो खे तो यहोवे रा बादल़ मिलणे वाल़े तम्बूए पाँदे रओ था ओर राती तेस ई बादल़ो रे तिना सबी खे आग दिखो थी।