Arca da aliança

Ẹkkọhbhọ ch’Echekẹ

10 "Tte matima agbaaka p’akasiya masi ẹkkọhbhọ ch’mm’ayoma adum pẹ ntọkọ nttaan ọmaana akaana osowanẹ, ẹkpa chẹ ede ntọkọ mfa ọmaana akaana attaan, agoriji pẹ m’ade ntọkọ mfa ọmaana akaana attaan. 11 Màtima gol ọkkọkka bhọrọ ẹkkọhbhọ ndo maphyir z’ẹtaanga, ọttara k’iyaan, màbir atima gol adoka jẹ akọbha. 12 Màtima gol rabha aringẹ anna, make ny’mmo sẹ nna. Aringẹ afa maninga k’ẹbhaakẹ danẹ, mboza afa maninga z’ẹbhaakẹ ndoza. 13 Màtima nchi s’akasiya si achiva p’adum-odum, matima gol abhọrọ jẹ. 14 Màyika nchi njo ny’aringẹ p’abem p’ẹkkọhbhọ ndo, ọfha mad-atima atinẹ jẹ. 15 Achiva mbo p’adum-odum m’ayika ny’aringẹ p’ẹkkọhbhọ ndo mach’mayik nya, mmàrọbha. 16 Ó̱de ikk’asa minna, tọka ata p’apaanga p’im’nnang-ọ, yika ny’Ẹkkọhbhọ ndo ch’Echekẹ.

17 "Màtima gol ọkkọkka rabha ẹkkọhbhọkpa ch’efokọ. Adum pẹ m’ade ntọkọ nttaan ọmaana akaana osowanẹ, ẹkpa chẹ m’ede ntọkọ mfa ọmaana akaana attaan. 18 Màbira tima gol kw’nkk’aduka si acherubim afa, mammin ny’aso p’ẹkkọbhọkpa ndo. 19 Cherub wanẹ m’oninga k’eso danẹ, nwoza oninga z’eso ndoza. Màsi acherubim mbo gbaka ny’ẹkkọhbhọkpa ndo, ny’aso mbo afa. 20 Mbubaang s’acherubim mbo m’imaama ichina ẹrọng-ẹrọng, ibubha ẹkkọhbhọkpa ndo ch’efokọ. Acherubim mbo maninga akkerẹ ayok ititika, marọn ny’ẹkkọhbhọkpa ndo. 21 Màtọka ẹkkọhbhọkpa ndo nana ny’Ẹkkọhbhọ ch’Echekẹ, màbir atọka atakpa p’apaanga p’m’nnang bọnga, mayika ny’ẹtaanga.

22 Ny’ẹrọng kw’ọkpa nwo, ny’njeka kw’acherubim mbo afa p’abubh Ẹkkọhbhọ ch’Echekẹ, nya wọ kw’im’nkebh-ọ, nnang-ọ asana paam maphyir anang anọng p’Israẹl.

Ẹkkọhbhọ ch’Echekẹ

1 Wa Bẹzalẹl otim echi ch’akasiya osi Ẹkkọhbhọ ch’Echekẹ. Adum pẹ ade ntọkọ nttaan ọmaana akaana attaan, ẹkpa ọmaana agoriji pẹ made ntọkọ mfa ọmaana akaana attaan.

Ettima ch’iruk-byi s’Ibinọkpaabyi

1 Nya o, Ọvaar Ibinọkpaabyi oben Mosẹs bẹ́, 2 "K’echedenwu ch’ochedenphe, ttima iruk-byi s’Ibinọkpaabyi, kw’ode ikkira s’etobha. 3 Sok Ẹkkọhbhọ ch’Echekẹ z’ẹtaanga, abir atima ibara s’ọmma abubh-ẹ.

20 Ọtọka ata p’makkẹrẹ Asana, oyika ny’Ẹkkọhbhọ ch’Echekẹ. Ọtọka achiva p’adum-odum, ọnọhma ny’Ẹkkọhbhọ ndo, pira ọtọka efokọkpa obubha nya. 21 Minna kw’ọtọk Ẹkkọhbhọ ndo ch’Echekẹ, osok z’iruk-byi s’Ibinọkpaabyi, ọgbana ibara s’ọmma s’ikpa Ẹkkọhbhọ ch’Asana ayik, k’ose kw’Ọvaar Ibinọkpaabyi ikk’ẹ obena.

14 K’ogbe kw’anọng mbo nabin z’ibhinga-byi bẹ́, mad-ajeka Jọrdan, afọhn-ẹja mbo p’atọhk Ẹkkọhbhọ ch’Echekẹ makwu achi bẹ eden. 15 Wa ọraanga kw’Jọrdan ọnwa-ọnwa ny’ọpha-gbe maphyir. Okenaka, k’ose kw’afọhn-ẹja mbo p’atọhk Ẹkkọhbhọ ch’Echekẹ mapyirẹ ny’Jọrdan, mmokpatọkọ sabẹ ibira itwu esimma, 16 minna kw’ebhobh ch’efon z’ebir-ebir ẹkpọk. Asi mbo makwu atobha k’ibyi majanẹ, mabe k’ibyi s’ibhirẹ eden mawuriji, z’obhon kw’mayerẹ Adam, kw’oning z’mbọr-mbọr s’Zaretan. Ebhobh ch’ẹwọn-ẹwọna ẹkpaara kibungọ, ed-etto z’ọraanga kwiden kw’Araba, (kw’ode Ọraanga kw’Obo). Minna kw’anọng mbo majek z’okwubha, za ch’okkerẹ Jẹriko. 17 Afọhn-ẹja mbo p’atọhk Ẹkkọhbhọ ch’Echekẹ ch’Ọvaar Ibinọkpaabyi, mad-abe ny’ottem kw’Jọrdan k’izek s’igwo-ogwu. Anọng p’Israẹl maphyir makwu akpan maa, ẹkọma ndo kibungọ, ezenga ny’izek s’igwo-ogwu, ejeka maa, machera.

18 Minna kw’afọhn-ẹja mbo matim Ẹkkọhbhọ ch’Echekẹ ch’Ọvaar Ibinọkpaabyi mabina ny’ọraanga kw’Jọrdan, mavura z’ogbin. Mabubarẹ mmokpatọkọ sabẹ nya ch’ogwo-ogwu z’ogbin, minna kw’asi p’ọraanga kw’Jọrdan makpa nnam. Mabhobh ọttara ẹnwanwa k’ose kw’mad-akkikken abhobh.

1 Wa mazeng anọng p’Israẹl abẹ, magbak mbhumma s’Jẹriko maa, igaangẹ. Ọnọng k’iyaan koyinẹ, ọnọng z’ẹtaanga kobir odim.

2 Nya o, Ọvaar Ibinọkpaabyi oben Joshua bẹ́, "Kirẹ e, kaam kk’Jẹriko, ọmaana ọvaarnọng kwẹ, ọttara arimanọng pẹ, ntọka nkk’ọ ny’mbọhk. 3 Tima agbongnọng pọ maphyir zenga kọbha ebhondim ndo ogbe mawanẹ. Si minna k’iwu ichadanẹ. 4 Tte afọhn-ẹja achenọmfa màtima nsa s’abhik p’attongoro màchi ẹkkọhbhọ ch’echekẹ eden. Ny’ewu ttong ichenọmfa, màzenga kọbha ebhondim ndo igbedim ichenọmfa, ọmaana nsa s’afọhn-ẹja mm’aje. 5 K’ogbe kw’mabhaang nsa njo s’maje atọr-ọtọr, tte agbongnọng kibungọ makwọhrọ ẹmọng k’ẹrọng. Minna kw’etumọ ch’ebhondim ndo im’etto, ogbongnọng kpenamkpen ọzọhng odim z’ẹtaanga."

6 Minna kw’Joshua kw’Nun obhonọ, oyerẹ afọhn-ẹja mbo, oben bẹ bẹ́, "Màtinẹ Ẹkkọhbhọ ch’Echekẹ ch’Ọvaar Ibinọkpaabyi. Tte afọhn-ẹja achenọmfa m’atima nsa machi chẹ eden." 7 Joshua oke agbongnọng mbo ẹfa bẹ́, "Màchina ititika-ititika! Màzenga kọbha ebhondim ndo. Tte akker-ibyi p’atim mkpon màchi Ẹkkọhbhọ ch’Echekẹ ch’Ọvaar Ibinọkpaabyi eden."

20 K’ogbe kw’nsa njo ije, agbongnọng akwọhrọ ẹmọng, nsa ibir ije, agbongnọng ado akwọhrọ k’ẹrọng, etumọ ndo etto. Minna kw’ọnọng kpenamkpen odimẹ z’ebhondim ndo ẹtaanga. Ọnọng-ọnọng oje etum, odim z’ẹtaanga, matọka ebhondim ndo kibungọ.

2 APhilistiya matọhm agbongnọng pabẹ k’ọsaabh bẹ́, makebha Israẹl. K’ose kw’egbong ndo ẹnyaamẹ, aPhilistiya makema anọng p’Israẹl, mafhọ anọng p’mm’apyirẹ nnọhna ijobh z’igbongtitika.

3 K’ogbe kw’agbongnọng p’arọbhọ anaanga makpa nnam z’ibhinga-byi sabẹ, asogbọhkọnọng p’Israẹl abọbh ayok bẹ́, "Osempira Ọvaar Ibinọkpaabyi otte aPhilistiya ọbọhk makema mina minna menda? Matte mọd-ọtọka Ẹkkọhbhọ ch’Echekẹ z’Shilo ọfha etor mina mofona, ebira ẹkkaana mina k’mbọhk s’awawunanọng pamina."

4 Minna kw’anọng mbo matọhm ajinọng z’Shilo, matima Ẹkkọhbhọ ch’Echekẹ ch’Ọvaar Ibinọkpaabyi kw’Ẹfa maphyir akwuna, ọnana ẹvaar-ẹvaar ny’njeka kw’acherubim. Iva afa p’Ẹli p’ade Hophni ọmaana Phinẹhas maninga nya amaana Ẹkkọhbhọ ch’Echekẹ ch’Ibinọkpaabyi.

5 K’ogbe kw’Ẹkkọhbhọ ndo ch’Echekẹ epyirẹ z’ibhinga-byi s’Israẹl, makwọhrọ amọng maa, izek inyengẹ. 6 K’ose kw’anọng p’Philistiya mabhaang izozo njo, mabọbh bẹ́, "Bọng-izozo s’nd-mbhaanga kina ekwurọ ch’aHiburu?"

Ch’makwu azonga bẹ́, Ẹkkọhbhọ ch’Echekẹ kk’ekwuna z’ibhinga-byi s’anọng p’Israẹl, 7 aPhilistiya mbo ojor bẹ. Maben bẹ́, "Ọka vanẹ kk’ọkwa ny’abẹ k’ekwurọ. Nn’oning k’odik ma e! M’odikse nwoma otim ọd-ọza o! 8 Kk’opyibha ọnang mina! Anyi wọ im’ọrọhbha mina k’mbọhk s’ọka f’oyen ẹfa minna? Aka mbo bọ asi anọng p’Ijip itama k’akira k’akira k’ogbe kw’maning z’ibyi s’anọng nna arukọ e. 9 Bọnga anọng p’Philistiya, màgaangẹ ifor o. Màdo ifor mach’ajinọng, ini minna ode, mm’akwu ade abira anang aHiburu, k’ose kw’bẹ nkk’abira ada anang bọnga. Màgaangẹ ifor mach’ajinọng, màsi erima!"

10 Minna kw’aPhilistiya mbo marim egbong amaana anọng p’Israẹl, makema anọng p’Israẹl. Ọnọng-ọnọng ọrọbh od-odim z’ikẹ k’ikkira. Anọng p’uwa mafhọ nya makem ẹsaabha. Agbongnọng p’izek p’Israẹl p’uwa mape nya, made nnọhna arọbh attaan okwuma ichi. 11 Wa aPhilistiya mabọka Ẹkkọhbhọ ch’Echekẹ; iva afa p’Ẹli, p’ade Hophni ọmaana Phinẹhas, mape nya.

6 Wa Ọvaar Ibinọkpaabyi ọnang anọng p’Ashdọd ọttara ayok-nkọma irem s’ibar-ọbar mawuriji; osi bẹ itama siden, obir ọtọhbh bẹ ebirakpo. 7 K’ogbe kw’anọng p’Ashdọd maze idik s’id-iyin nya, maben bẹ́, "Ẹkkọhbhọ ch’ọka f’anọng p’Israẹl kẹbaan bẹ́, eninga ma ẹmaana mina, okurọ bẹ́, kk’mina ọttara Dagọn kw’ode ọka famina irem siden ẹnanga." 8 Minna kw’mayerẹ asogbọhkọnọng p’Philistiya mabọbh bẹ bẹ́, "Mm’osi yen ọmaana Ẹkkọhbhọ ch’Echekẹ ch’ọka f’Israẹl?"

Mapọhna bẹ́, "Màtinẹ Ẹkkọhbhọ ch’Echekẹ ch’ọka f’Israẹl tima zeng z’obhon kw’Gat." Minna kw’matinẹ Ẹkkọhbhọ ch’Echekẹ ch’Ọvaar Ibinọkpaabyi kw’Israẹl atima achina z’Gat.

9 Okenaka, ch’nkk’Ẹkkọhbhọ ndo atina, wa Ọvaar Ibinọkpaabyi ọtọhmọ itama ọnang anọng p’obhon nwo, oke bẹ k’ojora fiden. Osi anọng p’ebhondim ndo itama mawuriji, tọma ny’ivava pyirẹ z’ataminọng, ọjẹ bẹ ebubuka ch’ebirakpo. 10 Minna kw’matọk Ẹkkọhbhọ ndo ch’Ibinọkpaabyi mad-arik z’Ẹkrọn.

K’ose kw’mad-atima Ẹkkọhbhọ ndo adim ny’Ẹkrọn, anọng p’Ẹkrọn abina amọng k’ẹrọng, mabhom bẹ́, "Nkk’Ẹkkọhbhọ ch’ọka f’Israẹl atọka achena mina bẹ́, ọfhọ mina ọttara anọng pamina."

11 Minna kw’mayerẹ asonọng p’Philistiya maphyir mattonga, maben bẹ́, "Màtima Ẹkkọhbhọ ch’ọka f’Israẹl bina ma, tte ẹkpa nnam z’ibyi sẹ; ini minna ode, m’ẹfhọ mina ọttara anọng pamina." Ny’ogbe nwo, wa ojora f’obo kk’ebhondim ndo ọbọka mawuriji, Ibinọkpaabyi obir ọnang bẹ irem siden.

Ẹkkọhbhọ ch’Echekẹ ch’Ọvaar Ibinọkpaabyi ekwun z’Israẹl

1 K’ogbe kw’Ẹkkọhbhọ ch’Echekẹ ch’Ibinọkpaabyi ikk’eninga z’ẹbhaakẹ ch’Philistiya k’aphe achenọmfa, 2 anọng p’Philistiya mayerẹ afọhn-nja pabẹ ọttara abọhnganọng, maben bẹ bẹ́, "Bọng-ọttọhk f’mm’osi ọmaana Ẹkkọhbhọ ch’Echekẹ ch’Ọvaar Ibinọkpaabyi? Màtek mina ose kw’mm’ozenga od-orik Ẹkkọhbhọ ndo z’ibyi sẹ."

3 Mapọhna bẹ́, "Ó̱de mad-arik Ẹkkọhbhọ ch’Echekẹ ch’Ọvaar Ibinọkpaabyi kw’Israẹl, m’mbọhk-mbọhk kàrik o. K’eden kpenamkpen, màrik chẹ ttara ẹnanga ch’matim atuk epyibha ch’masi. Nya wọ kw’mm’abina k’ikọhmaana sabọnga, mabir azonga ọttọhk f’Ibinọkpaabyi ozeng ábẹ̀ ọd-ọnang bọnga irem."

10 Nya o, masi k’ose kw’matọhnọ bẹ. Matọka abhaam mbo afa p’atim anang iva ẹba, agbana ny’ọkpaar nwo, matọka abhaamva mbo mad-ayika z’ọpa kwabẹ. 11 Manana Ẹkkọhbhọ ch’Echekẹ ch’Ọvaar Ibinọkpaabyi ny’ọkpaar nwo, ọttara ikwukwu s’itọhk agbomma ọmaana ebirakpo py’matim gol asi. 12 Nya o, abhaam mbo atta bẹ́ gbẹẹng machina z’ẹbhaakẹ ch’Bẹt-Shẹmẹsh, mad-abok amọng k’ose kw’mazeng ny’eden. M’odimbọhk ọttara obhurubọhk kabhakẹ. Wa abaabh p’Philistiya ator bẹ maa, mapyirẹ z’enem ch’Bẹt-Shẹmẹsh.

13 M’ogbe nwa, wa anọng p’Bẹt-Shẹmẹsh maning z’ilokodo mad-asi ipha s’wit. K’ose kw’matinẹ achen aze Ẹkkọhbhọ ndo za, nttem idaam bẹ. 14 Ọkpaar nwo okwu opyirẹ z’owonọ kw’Joshua kw’ofon Bẹt-Shẹmẹsh, ọkpọka nya ch’ọnyọm ẹtakpa chiden. Minna kw’anọng mbo atim agbaaka p’ọkpaar nwo akọma ekpon, matima abhaam mbo afọhnọ ẹja ch’ẹkwọmọ anang Ọvaar Ibinọkpaabyi. 15 Anọng p’efona ch’Lẹvi asaka Ẹkkọhbhọ ch’Echekẹ ch’Ọvaar Ibinọkpaabyi, matọka chẹ ọmaana ikwukwu s’ekpo mbyo py’gol eyik, mabera ny’ẹtakpa ndo. Ny’ewu ndo, anọng p’Bẹt-Shẹmẹsh manang nnanga s’ẹkwọmọ, mabir afọhnọ nja anang Ọvaar Ibinọkpaabyi.

1 Minna kw’anọng p’Kiriyat-Jẹrim azeng akwu atọka Ẹkkọhbhọ ch’Echekẹ ch’Ọvaar Ibinọkpaabyi. Matọka atima achina z’Abinadab k’ọsọhm kw’oning k’egbe, marọbha Eleaza kw’ode nnwa kwẹ, masok-ẹ k’ọtọhm f’m’okkerẹ Ẹkkọhbhọ ch’Echekẹ ch’Ọvaar Ibinọkpaabyi.

Samwẹl otim anọng p’Israẹl eden

2 Wa ogbe kk’obhira mawuriji kw’Ẹkkọhbhọ ch’Echekẹ ening z’Kiriyat-Jẹrim. Kibung-kibungọ, wa ode icho ẹrọbh. Anọng p’Israẹl maninga k’ikwosisi, mabira aror eden ch’mm’anyọma Ọvaar Ibinọkpaabyi k’ifor.

12 Nya o, matek ọvaar Devid bẹ́, "Ọvaar Ibinọkpaabyi kk’ẹsọhmmọr ch’Ọbẹd-Edom ọda, ttara ọttọhk kpenamkpen f’oyen okurọ Ẹkkọhbhọ ch’Echekẹ ch’Ibinọkpaabyi." Ofona nya, Devid otima odidaama obina bẹ́, od-otinẹ Ẹkkọhbhọ ndo z’ọsọhm kw’Ọbẹd-Edom otima ochina z’ebhondim ch’Devid. 13 K’ogbe kw’ayok p’atọhk Ẹkkọhbhọ ndo ch’Ọvaar Ibinọkpaabyi nkk’ntọkọ ichadanẹ asọbha, otima ọbhaamdim, ọmaana ọbhaamnwa kw’ode ifor ma dọrọdọrọ, ọfọhnọ ẹja. 14 Devid ọfọra ẹphọd, pira notim ẹfa chẹ maphyir otubh ebin ny’ititika s’Ọvaar Ibinọkpaabyi. 15 Kẹ, ọmaana anọng p’Israẹl maphyir mad-akwọhrọ amọng, mabir aje nnyisa, matima Ẹkkọhbhọ ch’Echekẹ ch’Ọvaar Ibinọkpaabyi akwuna.

Matim Ẹkkọhbhọ ch’Echekẹ akwu k’Ọsọhm kw’Ibinọkpaabyi

1 Wa ọvaar Sọlọmọn oyerẹ asogbọhkọnọng p’Israẹl ny’Jẹrusalẹm, ọmaana aso p’mfonamma maphyir, ọttara avaar p’nnọmma s’Israẹl bẹ́, makwu, mfha matinẹ Ẹkkọhbhọ ch’Echekẹ ch’Ọvaar Ibinọkpaabyi z’Zayọn, kw’ode ebhondim ch’Devid. 2 Ajinọng p’Israẹl maphyir makwu attonga z’ọvaar Sọlọmọn k’ogbe kw’odidaama, k’ophe kw’Ẹtanim, kw’ode ophe kw’ottong achenọmfa k’icho.

3 K’ogbe kw’asogbọhkọnọng p’Israẹl maphyir nkk’attonga, afọhn-ẹja atinẹ Ẹkkọhbhọ ndo ch’Echekẹ. 4 Matima Ẹkkọhbhọ ndo, ọmaana ikkira s’etobha, ọttara ekpo py’awuriji maphyir py’ening ny’ẹtaanga, akwu z’Ọsọhm kw’Ibinọkpaabyi. Afọhn-ẹja ọttara aLẹvi, matinẹ byẹ. 5 Ọvaar Sọlọmọn ọmaana anọng p’Israẹl maphyir p’nkk’attonga nya amaan-ẹ ny’ititika s’Ẹkkọhbhọ ch’Echekẹ, matima arọkimaan k’ọsaabh, ọmaana adamogbodo p’nna obhika ade, mafọhnọ ẹja.

6 Afọhn-ẹja mbo matinẹ Ẹkkọhbhọ ndo ch’Echekẹ ch’Ọvaar Ibinọkpaabyi, mad-anana z’ibyi sẹ, z’ẹtaanga kw’ibyi s’awuriji z’Ọsọhm kw’Ibinọkpaabyi, kw’ode Ibyi s’Awuriji p’Ayọhng. Masok Ẹkkọhbhọ ndo k’izek-izek kw’mbubang s’cherubim. 7 Achẹrubim mbo ammaama mbubang sabẹ abubha ibyi njo maphyir s’Ẹkkọhbhọ ch’Echekẹ ening, ọttara nzemachi s’nd-atima atọhk-ẹ. 8 Wa nzemachi nja idumọ mawuriji. Ọnọng ẹkpọka chabẹ mokpo oze, oye bẹ́, od-obe za ch’Ibyi s’Iwur-owur ining, ny’ititika kw’Ibyi s’Awuriji. Nchi njo itim ining za maa, pyirẹ menda. 9 Wa ọttọhk kpenamkpen ny’Ẹkkọhbhọ ch’Echekẹ kode, kw’ọkpanẹ anwẹrta afa p’uwa Mosẹs oyik ny’ẹtaanga, ch’iwa oning z’egbe ch’Horẹb, ny’ogbe kw’uwa Ọvaar Ibinọkpaabyi osi echekẹ ọmaana anọng p’Israẹl ch’nkk’abina z’Ijip.

10 K’ogbe kw’afọhn-ẹja mayibhẹ ny’Ibyi s’Awuriji, ebonọ ebubha Ọsọhm kw’Ọvaar Ibinọkpaabyi. 11 Ebonọ ndo ẹwọhkọ afọhn-ẹja m’ọdọk ọtọhm fabẹ kakpo asi, okurọ ch’abarada p’Ọvaar Ibinọkpaabyi mafu Ọsọhm kw’Ibinọkpaabyi.