1 Ọvaar Ibinọkpaabyi okwu oben Noa bẹ́, "Tima ẹsọhmmọr chọ kibungọ dim ny'ọkpaar nwo; kaam kk'nza bẹ́, m'iyagbin maphyir, kọ-kọ wọ asi idik s'itor-otor. 2 Tọka nten mfa-mfa k'ibyi ichenọmfa s'otenkira kpenamkpen kw'ọbaan k'ẹja ofufọhnọ, odim kwẹ ọmaana ikwakwẹ, ọttara nten mfa s'otenkira kpenamkpen kw'ina k'ẹja ofufọhnọ, ọbaan, 3 abir atọka ọnọhn ọfa-ọfa k'ibyi ichenọmfa f'ọnọhnkira kpenamkpen, odimkwẹ ọttara ikwakwẹ, atima adim za, mfha otenkira kpenamkpen oninga akpen m'iyagbin maphyir. 4 Ó̱de iwu ichenọmfa ikk'ikpana, kaam m'ntebh ẹrọng m'iyagbin k'iwu arọbh afa, ọmaana irungiwu arọbh afa, mbir ndimẹ ọttọhk kpenamkpen f'oning akpen f'ikk'nsa m'iyagbin."

5 Noa osi ọttọhk kpenamkpen mbengana k'ose kw'Ọvaar Ibinọkpaabyi ọtọhn-ẹ.

6 Wa Noa ode icho ẹnọhna okwuma arọbh ijobh k'atam, k'ogbe kw'asi achi iyagbin. 7 Noa ọmaana ajinọngva pẹ, ọmaana kwanọng kwẹ, ọmaana panọng p'iva pẹ, madim ny'ọkpaar nwo, mfha manaanga ny'ẹnwanwa ndo. 8 Nten mfa-mfa s'ibaan k'ẹja ofufọhnọ, ọmaana ọnọhn, ọttara ekpo maphyir py'ezeng m'izek, 9 adimpẹ ọmaana ipapẹ, ekwu etor Noa edim ny'ọkpaar nwo k'ose kw'Ibinọkpaabyi ikk'Noa ọtọhna. 10 Iwu njo ichenọmfa ikpanẹ nya o, ẹnwanwa ndo ekwu ẹbhọrọ iyagbin.

11 K'ogbe kw'Noa node icho ẹnọhna okwuma arọbh ijobh k'atam; k'iwu ichi kkamfa s'ophe kw'ottong afa, ny'ewu ndo dọ ch'asi ayinẹ z'izek bẹ́ porr, ọrọngkpakpa obir owonga, ẹrọng ewona k'izek bẹ́ wọọọọ. 12 Ẹrọng etebh k'iwu arọbh afa ọmaana irungiwu arọbh afa.

13 Ny'ewu ndo dọ ch'Noa otim ajinọngva pẹ p'ade Shẹm, ọmaana Ham, ọmaana Japhẹt, ọmaana kwanọng kwẹ, ọttara panọng p'iva pẹ attaan, madim z'ọkpaar. 14 Matima ẹgbaten kpenamkpen k'okira kwẹ, ọmaana etirakpo maphyir k'okira kwabẹ, ọmaana ọttọhk kpenamkpen f'ozeng m'izek k'okira kwẹ, ọmaana inọhn kpenamkpen k'okira kwẹ, ọttara ọttọhk kpenamkpen f'omenẹ mbubaang. 15 Ekpo mbyo maphyir py'eruk akpen ezenga ẹfa-ẹfa etor Noa madim z'ọkpaar. 16 Nten s'iwa id-idim nya maphyir ide adimpẹ ọmaana ipapẹ p'etenkira kpenamkpen, tor k'ose kw'Ibinọkpaabyi obenẹ. Ch'nkk'adima z'ẹtaanga, Ọvaar Ibinọkpaabyi obhen-ẹ ọmma.

17 Ẹnwanwa echina ororo k'iwu arọbh afa. K'ose kw'asi mbo anwa, minna kw'matinẹ ọkpaar nwo z'izek owok ny'asi ẹrọng. 18 Asi mbo anwa mach'manwa nya maa, malorọ. Ọkpaar nwo nowok ny'asi ẹrọng. 19 Asi mbo anwa mawuriji ny'iyagbin maa, mabhọrọ agbeso maphyir p'aning k'izek. 20 Asi mbo anwa maa, mabhọrọ agbe maphyir, adongiji pabẹ tọma ny'agbeso, mayọhnga ntọkọ ẹrọbh. 21 Ọttọhk kpenamkpen f'orukọ akpen ope: ọnọhn ọmaana etirakpo, ọmaana mgbaten, ọmaana ekpo maphyir py'efu m'izek, ọttara ayokinọng maphyir. 22 Ọttọhk kpenamkpen m'iyagbin f'ọgwọkọ iwọhng, ope. 23 Minna kw'Ibinọkpaabyi odimẹ ọttọhk kpenamkpen f'oning akpen m'iyagbin. Ayokinọng ọmaana nten, ozeng k'ọjọhk ọttara ọnọhn f'ẹrọng, ọfhọ bẹ maphyir. Ọnọng bung-bungọ kw'uwa orikẹ ode Noa ọmaana ayok mboza p'aning amaan-ẹ z'ọkpaar ẹtaanga.

24 Ẹnwanwa ndo ẹbhọrọ iyagbin k'iwu arọbh achenọmfa okwuma ijobh.