1 K'ogbe wanẹ, ọtọhmnọng kw'ọd-ọnang ọvaar Phero kw'Ijip atuk, ọmaana oyok kw'od-osi ọchattọhk ọnang-ẹ, mapinẹ otte kwabẹ. 2 Phero okwu ọdọk-ẹ ọmaana aso mbo afa, p'ade oso kw'anọng p'ad-anang ọvaarnọng atuk, ọmaana oso kw'anọng p'ad-asi brẹd anang ọvaarnọng. 3 Ọtọka bẹ ọd-ọgbak z'ọgbakkọhbhisọhm kw'odidennọng kw'akker-agbakkọhbhinọng, za ch'iwa magbakẹ Josẹph. 4 Odidennọng kw'ọgbakkọhbhisọhm nwo ọtọka bẹ ọnang Josẹph bẹ́, okkerẹ bẹ.

Ch'nkk'aninga ny'ọgbakkọhbhiter k'ogbe, 5 k'orungiwu wanẹ, oyok nwo kw'ọd-ọnang ọvaarnọng atuk, ọmaana oyok kw'od-osi ọchattọhk, mattaara ọdachen. Idachen kpenamkpen iyen ẹyaakẹ chẹ.

6 Ch'Josẹph okwu ọbaana bẹ ch'ewu kk'esobha, oze bẹ́, nttem iyakẹ bẹ odik. 7 Ofona nya, ọbọbh bẹ bẹ́, "Ode yen kw'mad-akkerẹ mach'ọttọhk ọyakẹ bọnga odik o?"

8 Mapọhn-ẹ bẹ́, "Chena k'erungọ, mina anọng afa, ọnọng-ọnọng ọttaar idachen sẹ. Okenaka, m'ọnọng koze kw'osi ẹyaakẹ ch'ọdachen mvo."

Josẹph ọpọhna bẹ bẹ́, "Mazonga bẹ́, Ibinọkpaabyi wọ ọd-ọyaakẹ ọdachen ọnang anọng. Màtek-m ọdachen f'mattaar."

9 Nya o, oso kw'anọng p'ad-anang Phero atuk otek Josẹph idachen sẹ bẹ́, "Nttaar, ch'nze echi ch'grep ch'ebe-m ny'ititika. 10 Echi ndo eyen abọhnga attaan. K'ose kw'abọhnga mbo mayinẹ, minna kw'esi agbok, ẹwọm achiduk p'makorọ ny'eninga ndo. 11 Minna kw'ntim ibhok s'Phero ny'ọbọhk, mmyana achiduk mbo nke nya, pira n'ntọk nke Phero ny'ọbọhk."

12 Josẹph oben-ẹ bẹ́, "Achibọhnga mbo attaan, mayinẹ iwu ittaan. 13 Kw'oyinẹ bẹ́, iwu ittaan mọ̀kpan, Phero m'ọrọhbh-ọ ma, akpa nnam z'ọtọhm fọ k'ose kw'uwa akkikken ade. 14 Okenaka, kaam kàzaama k'ogbe kw'idik m'ijibh inang-ọ. Si-m ejibha agbaak odik kwaam anang Phero, ọfha ọrọhbh-m m'mgbakkọhbhọ nja. 15 Wa mabọk-m k'ẹfa z'izek s'aHiburu atima akwu m'obhon nwa. Ch'mbira nninga m'Ijip, itama kpenamkpen kinsi s'wura isi-m nyima mgbakkọhbhọ."

16 Ọtọhmnọng kw'od-osi ọchattọhk okwu oze bẹ́, ẹyaakẹ ch'Josẹph osi k'idachen s'oyok ede ọkkọkka, kẹ oben Josẹph bẹ́, "Kaam mbira nttaara idachen e. Z'idachen, ntọhk ọkariba ọttaan f'ọchattọhk. 17 Z'ikariba s'ikpa nso, nkk'ẹchakpo k'akira k'akira py'Phero ayika nya, okenaka, ọnọhn f'iwokọ okebha nya osorọ otima ofona."

18 Josẹph oben-ẹ bẹ́, "Tte ntek-ọ ose kw'idachen njo iyinẹ. Ọkariba mvo ọttaan, oyinẹ iwu ittaan. 19 Iwu ittaan mọ̀kpan, Phero m'ọpọ-ọ eso, ọtọk-ọ orena k'echi, ọnọhn mach'attẹrẹ, m'akebha obukọ nwo nya, masorọ maphyir."

20 Ny'ewu ndo ch'ettong ittaan, Phero osi odidaama kw'ẹmmaanawu chẹ ọnang atọhmnọng pẹ maphyir. Ọtọka ọtọhmnọng kw'ọd-ọnang-ẹ atuk, ọmaana oyok kw'od-osi ọchattọhk, ọkọhka atọhmnọng mboza ny'ọyaankpa. 21 Okwu oben ọtọhmnọng nwo kw'od-ọnang-ẹ atuk bẹ́, ọkpa nnam z'ọtọhm fẹ, 22 ọtọka oyok kw'od-osi ọchattọhk oren-ẹ edik, k'ose kw'Josẹph ikk'ẹyaakẹ ch'idachen sẹ ọsa.

23 Chibhẹ nya, ọtọhmnọng nwo kw'ọd-ọnang Phero atuk, ọzaama Josẹph.