1 Nya o, Jekọb ochina ororo ny'ozenga nwo maa, opyirẹ ny'izek s'anọng p'ẹbhaakẹ ch'ewuchen ed-eyin. 2 Okwu oze esipe ch'edong-odong ny'ẹgba, ọmaana etirakpo nkaana nttaan s'iyim inyọma nya, okurọ ch'ode nya kw'uwa ed-egwo asi. Wa ẹtakpa ẹbar-ọbar ch'ebubh esipe ndo ny'ẹmma.

3 K'ogbe kw'etirakpo mbyo ikk'ẹkwa ettonga nya, akker-arọkimaan mbo, mad-abingẹ ẹtakpa ndo ny'ẹmma ch'esipe ndo, makaabha asi anang etirakpo mbyo, pira mabir abingẹ chẹ, mabubha esipe ndo.

4 Jekọb ọbọbh akker-arọkimaan mbo bẹ́, "Abayi, bọnga mafon men o?"

Bẹ mapọhn-ẹ bẹ́, "Mina mofon Haran."

5 Obir ọbọbh bẹ bẹ́, "Mazong ojinọng kw'okpen Laban, kw'Nahọr obhonọ ma o?"

Mabir apọhn-ẹ bẹ́, "Iye e, mozong-ẹ ma."

6 Nya kw'Jekọb nọbọbh bẹ bẹ́, "Ma, ọsẹ-ẹ yen za?"

Mapọhn-ẹ bẹ́, "Oning za k'ọkkọkka. Kirẹ Rachẹl kw'ode ominanwa kwẹ wọ od-otera okwu kina ọmaana arọkimaan e."

7 Jekọb oben bẹ bẹ́, "Kirẹ e, echekira etim ẹgaang-ọgaangẹ. M'arọkimaan mbo k'ibyi majanẹ kakponga atobha. Màtera nang bẹ asi, màtima bẹ akpa nnam za ch'mm'achi azizaarẹ."

8 Mapọhn-ẹ bẹ́, "Mina mminna mokpo osi, oye bẹ́, arọkimaan mboza maphyir kk'nnam akpa, mabir abingẹ ẹtakpa ndo ny'ẹmma ch'esipe, pira mọkaabha asi ọnang arọkimaan mbo."

9 Ch'Jekọb otim ọgbaak odik ọgbaak ọnang bẹ, Rachẹl otima arọkimaan p'otte opyirẹ nya. Wa Rachẹl ode okker-arọkimaan. 10 Jekọb oze Rachẹl kw'ode ominanwa kw'Laban kw'ode ọgbaanọkka kw'ọkka ch'od-ozenga ọmaana arọkimaan p'Laban. Ọzẹ-ẹ nya o, ofona od-obingẹ ẹtakpa ndo ny'ẹmma ch'esipe ndo, ọkaabha asi ọnang arọkimaan p'ọgbaanọkka kw'ọkka. 11 Nya o, Jekọb ọbaaka Rachẹl, obhom ẹmọng k'ẹrọng. 12 Jekọb otek Rachẹl bẹ́, kẹ Jekọb ọttara Laban kw'ode otte kw'ikẹ Rachẹl, makaang ochi, kẹ Jekọb obir ode ojinọngnwa kw'Rẹbẹka. Ofona nya, Rachẹl otima ẹbhar, od-otek otte.

13 Laban ọbhaang nya bẹ́, Jekọb kw'ode nnwa kw'ọgbaanọkka kw'kwanọng kk'opyira, otima ẹbhar okebh-ẹ z'eden, ọbaak-ẹ, pira notim-ẹ ochina z'ọsọhm. Jekọb ọgbaak Laban idik njo maphyir s'iyinẹ. 14 Laban o, oben-ẹ bẹ́, "Kaam ọttara kọ mode echimma madanẹ k'odik ọkkọkka!"

Ch'Jekọb ikk'oninga ọmaana Laban k'ophe kibungọ, 15 Laban oben-ẹ bẹ́, "Zaabẹ́ kọ ọmaana kaam mode echimma madanẹ, nya zang im'osi kọ asi-m ọtọhm k'ajaaka. Tek-m ọttọhk f'imin'atọka k'ọtọhm fọ."

16 Laban obhonọ panọngva afa: ocheden okpen Lea, oyok kw'otor-ẹ okpena Rachẹl. 17 Ny'bẹ anọng mbo afa, Lea oyen adaakẹ-chen, Rachẹl oyena idaakẹ-for, obir ojibh kwanọng. 18 Wa Rachẹl okwu ọdaak Jekọb. Ofona nya, oben otte kw'Rachẹl bẹ́, "Atte, óde im'achera bẹ́, atọka Rachẹl kw'ode ominanwa kwọ kw'ikarẹ anang-m k'ọbada, kaam m'nsọ-ọ ọtọhm k'icho ichenọmfa."

19 Laban oben-ẹ bẹ́, "Oter ojibh ọtam bẹ́, ntọk-ẹ nnang-ọ ọyọhnga bẹ́, ntọk-ẹ nnang ọnọng ọdọk-ọdọk. Ninga ma maan-m." 20 Nya o, Jekọb osi oyonga-tọhm k'icho ichenọmfa ọfha ọtọka Rachẹl. Okenaka, ocho mvo kẹ ọttọhk kokerẹ okurọ ọdaakẹ kw'oyen ọmaana Rachẹl.

21 Opyirẹ ny'ogbe nwo kw'Jekọb m'ọtọka Rachẹl k'ọbada, Jekọb oben Laban bẹ́, "Kaam kk'oyonga-tọhm faam nchera, nang-m kwanọng kwaam ọfha nyim-ẹ ábẹ̀."

22 Nya o, Laban osok eninga, ọphyẹ anọng maphyir p'ibyi njo. 23 Ewu epyi nya, Laban ọd-ọtọka Lea ochena Jekọb, oyim-ẹ ábẹ̀. 24 Laban obir ọtọka ọtọhmnọng kwẹ Zilpa, ọnang Lea mach'itọhmọ sẹ.

25 Ewu esobh nya o, Jekọb oze bẹ́, Lea wọ kw'otim oyima nya. Ofona nya, od-oben Laban bẹ́, "Bọng-ọttọhk f'asi-m minna? Rachẹl azang kw'nzeng ábẹ̀ nsọ-ọ ọtọhm o? Osi yen kw'abọhr-m o?"

26 Laban ọpọhn-ẹ bẹ́, "Ẹmmaana chamina azang bẹ́, mọtọka ominanwa kw'ikarẹ ọnang k'ọbada, ch'ocheden ina odim otima ọba e. 27 Ninga tik, mochera eninga nda ch'ọbada m'ẹphyawu nda, ntọka Rachẹl nnang-ọ, óde m'achera bẹ́, abir asi-m ọtọhm k'icho ichenọmfa."

28 Jekọb ochera ọmaan-ẹ. Ẹphyawu ndo ch'odidaama ẹsa nya, Laban ọtọka ominanwa kwẹ Rachẹl ọnang Jekọb k'ọbada. 29 Laban obir ọtọka ọtọhmnọng kwẹ Bilha, ọnang Rachẹl mach'itọhmọ sẹ. 30 Jekọb obir oyima ọmaana Rachẹl. Rachẹl ọdaak-ẹ ọyọhnga Lea. Jekọb obir okwu osi Laban oyonga-tọhm k'icho ichenọmfa.

31 Ch'Ibinọkpaabyi nokwu oze bẹ́, Rachẹl ọdaakẹ Jekọb ọtam ọyọhnga Lea, osi Lea ọmaan iva, osi Rachẹl ọkpaana. 32 Lea okwu otima ibhọr, ọmaan ojinọngnwa. Ọkpẹ-ẹ Reubẹn, okurọ ch'obenẹ bẹ́, "Ọvaar Ibinọkpaabyi kk'irem saam ọza. M'ofona m'nnwa nwoma ndaak odim kwaam."

33 Lea obir otima ibhọr, ọmaan ojinọngnwa. Oben bẹ́, "Ọvaar Ibinọkpaabyi ọnang-m nnwa nwoma okurọ ch'ọbhaang bẹ́, Jekọb kindaakẹ." Ofona nya, ọkpẹ-ẹ Simeọn.

34 Lea obir otima ibhọr ọmaan ojinọngnwa. Oben bẹ́, "Mọkpanda, odim kwaam min'ọnyọm-m k'ifọr okurọ ch'ikk'ẹ ajinọngva attaan mmaana." Ofona nya, ọkpẹ-ẹ Lẹvi.

35 Lea obir otima ibhọr ọmaan ojinọngnwa. Ofona nya, oben bẹ́, "Mọkpanda, m'mkpobha Ọvaar Ibinọkpaabyi." Lea okpe nnwa nwo Juda. Minna kw'ozeng ọkpọka ọmaan.