1 Wa ijọhk jọ iyọhng ẹgbaten kpenamkpen k'nkkaar ny'mgba-nten s'Ọvaar Ibinọkpaabyi ikk'ọsa. Ijọhk njo ibọbh kwanọng bẹ́, "Ma, Ibinọkpaabyi obenẹ bọnga majijik bẹ́, maning ochiduk kw'echi kpenamkpen m'owonọ nwa achi o?"

2 Kwanọng nwo ọpọhn-ẹ bẹ́, "Ibinọkpaabyi otte mina ọbọhk bẹ́, mochi achiduk mba maphyir, 3 okenaka, obenẹ bẹ́, moning achiduk p'echi ndo ch'ebe ny'ewonittem ochi, moning ọbọhk obir otwu. Ó̱de m'oyom, mm'opope."

4 Ijọhk njo iben kwanọng nwo bẹ́, "M'op'pe màpe, 5 kirẹ, Ibinọkpaabyi ozong bẹ́, óde machi, achen m'attaanẹ bọnga, mm'abir ade mach'ikẹ Ibinọkpaabyi, mazonga f'ode ejibha, ọmaana f'ode itama."

6 Ch'kwanọng nwo oze bẹ́, ochiduk nwo ojibhẹ ekkerẹ, obir ọbaana ẹcha, obir ọdaak-ẹ bẹ́, wura ochi ọfha ozonga odik, ọpha aduk banẹ ochi, obir ọtọka banẹ ọnang odim kwẹ, odim obir ochi. 7 Machi nya o, achen attaanẹ bẹ, mazonga bẹ́, matim erinikwum. Ofona nya o, makwum akwongitọhng p'fig matima abubha ifor sabẹ.

8 Okwu opyirẹ k'ẹsọhka, ojinọng nwo ọmaana kwanọng kwẹ mabhaanga ntọkọ s'Ọvaar Ibinọkpaabyi ch'od-ozenga ny'owonọ nwo. Mabhaang nya, marọbh atubha ny'nchi s'owonọ nwo. 9 Okenaka, Ọvaar Ibinọkpaabyi owon ojinọng nwo bẹ́, "Aning men o?"

10 Kẹ ọpọhna bẹ́, "Kaam mmaang ntọkọ sọ ch'ad-azenga ny'owonọ, ojora osi-m, okurọ ch'ntim erinikwum. Kẹ wọ osi ntubha."

11 Ibinọkpaabyi ọbọbh-ẹ bẹ́, "Anyi wọ otek-ọ bẹ́, atim erinikwum? Ma, nkk'ochiduk nwo acha kw'ntọrọ bọnga itọhng bẹ́, maning achi o?"

12 Ojinọng nwo ọpọhn-ẹ bẹ́, "Kwanọng nwo kw'anang-m bẹ́, mọtọn oninga ma, kẹ wọ ọnang-m achiduk banẹ p'afon ny'echi ndo, nchi e."

13 Nya o, Ọvaar Ibinọkpaabyi oben kwanọng nwo bẹ́, "Bọng-ọttọhk f'asi ma?"

Kwanọng nwo oben bẹ́, "Ijọhk jọ ibọhr-m, pira nchi."

14 Nya o, Ọvaar Ibinọkpaabyi oben ijọhk bẹ́,

"Okurọ ch'ikk'asa minna, nnang-ọ ẹmma ch'ẹyọhng ch'etirakpo maphyir

ọmaana mgbaten maphyir.

Kọ min'ad-atima ẹbhọr azenga,

m'abira achi izek k'akpen pọ maphyir.

15 Kaam m'nsi kọ ọttara kwanọng maninga k'iwawuna,

iva pẹ ọttara iva pọ, mm'abira awuna ayok.

Kẹ m'ọvọhk-ọ eso,

kọ m'abir agaak-ẹ k'ebhokọhrọ."

16 Ibinọkpaabyi oben kwanọng bẹ́,

"Kaam m'nttar-ọ irem siden k'ogbe kw'ọmaan,

kọ min'ad-atọka irem k'ogbe kw'im'amaan iva.

Zaabẹ́ aze irem yen, m'ọdaak-ọ z'ettem bẹ́, agbaka ifor amaana odim,

kẹ m'obir ọbaabh-ọ."

17 Ibinọkpaabyi oben Adam bẹ́, "Kọ ayong itọhng k'odik kw'kwanọng kwọ, achi ochiduk nwo kw'ntor-ọ itọhng bẹ́, aning achi.

Ofona nya, kk'izek ẹmma nnanga okurọ kọ.

M'atọka irem pira achi ọttọhk f'ofon ny'izek njo,

k'akpen pọ maphyir.

18 Akkaangẹ ọmaana azizaaritama m'amen ny'izek,

kọ m'abir achi akwongitọhng p'ẹgba.

19 Kọ min'ad-asi ọtọhm maa, arunga,

pira ayena ọchattọhk,

matẹtẹma opyirẹ k'ogbe kw'im'akpa nnam z'izek.

Kirẹ, matim izek asọ-ọ,

ny'izek jọ s'im'abir akpa nnam."

20 Wa Adam* okpe kwanọng kwẹ bẹ́, Iv*, okurọ bẹ́, kẹ wọ im'okwu ode ọkka kw'anọng maphyir p'aning akpen.

21 Ọvaar Ibinọkpaabyi otima ntenkpa osi ẹfọrakpo ọnang Adam ọttara kwanọng kwẹ bẹ́, matima abubha erinikwum chabẹ.

22 Nya o, Ọvaar Ibinọkpaabyi oben bẹ́, "Oyokinọng node mach'amina. Kẹ kk'ejibha ọmaana itama ozonga. M'ikẹ ọbọhk mòtte onemẹ ọbọhk ọpha oduk kw'echi ch'akpen ochi, obir oruk akpen ttattampe." 23 Ofona nya o, Ọvaar Ibinọkpaabyi okwubh Adam ny'owonọ kw'Iden, bẹ́, od-otubh owonọ ny'izek njo s'otim ọsẹ-ẹ. 24 Okwubh ojinọng nwo nya o, ọtọka acherubim osok ny'ebhumma ch'owonọ nwo kw'Iden, z'ẹbhaakẹ ch'ewuchen ed-eyin, obir osok ọkkangkkang kw'oyen ekpondaak kw'ọd-ọbhakẹ ẹmma okkerẹ k'ibyi kpenamkpen, mfha ọnọng oning odimẹ opyirẹ za ch'echi ndo ch'akpen ening.