1 Wa Sarai kw'ode kwanọng kw'Abram, ọkpaan-ọkpaana, nnwa kọmaanẹ ọnang Abram. Okenaka, wa Sarai oyen obira kwanọng wanẹ kw'ofon Ijip kw'okpen Hagar. 2 Sarai oben Abram bẹ́, "Ọvaar Ibinọkpaabyi kk'aam ọmaan ọrama. Zọhng tor obira nwa kwaam eyima. Ṉ́nòsi m'nzenga ny'ikẹ, nyena echimma."

Abram ochera odik kw'Sarai ọgbaakẹ. 3 Ch'Abram kk'oruka ny'Kenaan k'icho ijobh, nya kw'Sarai ọtọk Hagar, obira-kwanọng kwẹ kw'ofon Ijip, ọnang odim bẹ́, ọba. 4 Abram oyima ọmaana Hagar, Hagar otima ibhọr.

K'ogbe kw'Hagar ozong bẹ́, kk'ibhọr otima, ọtọma Sarai kw'ode ọkka kwẹ olulukọ. 5 Nya o, Sarai oben Abram bẹ́, "Kọ wọ ajẹ odik nwa kw'id-ntọka irem sẹ ma. Ntọk obira kwaam nkọ-ọ ny'mbọhk. Ma ch'inozong bẹ́, kk'ibhọr otima, kẹ nọmyan-m ọmyana. Tte Ọvaar Ibinọkpaabyi osi aponga p'kaam ọttara kọ."

6 Abram oben-ẹ bẹ́, "Obira-nwa nwoma otim ode nnwa kwọ e. Sẹ-ẹ k'ose kw'ọdaak-ọ." Tọma ny'ogbe nwo, Sarai ọdọk Hagar mawuriji kotim. Ofona nya o, Hagar ọrọbh.

7 Hagar ọrọbhọ nya o, ozeng-eden kw'Ibinọkpaabyi, oyin okebh-ẹ ny'esipe danẹ ch'ening ẹnyọma ibyi s'anọng nna arukọ. Esipe ndo ening etuma eden ch'echin z'Shur. 8 Ozeng-eden nwo, oben Hagar bẹ́, "Kọ Hagar kw'ade obira kw'Sarai, afon memma? M'abir ata men?" Hagar, ọpọhn-ẹ bẹ́, "Nd-nrọbh-ọrọbh z'mbọhk s'nna kwaam ma, kw'ode Sarai."

9 Ozeng-eden nwo kw'Ọvaar Ibinọkpaabyi, oben Hagar bẹ́, "Kpa nnam tor akka, abir akpobh-ẹ." 10 Obir oben-ẹ bẹ́, "Kaam m'nsi iva p'iva pọ masaabh maa, maning obhika ade."

11 Ozeng-eden nwo obir oben-ẹ bẹ́,

"Ibhọr njo s'atim nya,

m'amaan ojinọngnwa;

m'akpẹ-ẹ Ishimayẹl*,

okurọ bẹ́, Ọvaar Ibinọkpaabyi k'ẹmọng ch'irem sọ ọbhaanga.

12 Kẹ m'osi ẹjagbara mach'ẹnyanya ch'nna otitir atirẹ,

kẹ m'ode ọwawunanọng kw'anọng maphyir,

anọng maphyir mabir awun-ẹ;

m'oruk akọhr-kpen ọmaana ivotte maphyir."

13 Hagar okpe Ọvaar Ibinọkpaabyi kw'ọgbaak-ẹ odik bẹ́, "Kọ wọ ade Ibinọkpaabyi kw'oze-m. Kaam kk'ọnọng nza kw'od-oze-m." 14 Kẹ wọ osi wa mayerẹ esipe ndo bẹ́, Beer-Lahai-Roi*. Esipe ndo etim ening ny'njeka kw'Kadẹsh ọmaana Bẹrẹd.

15 Minna kw'Hagar ọmaanẹ Abram ojinọngnwa. Abram ọkpẹ-ẹ Ishimayẹl. 16 Wa Abram ode icho arọbh anna okwuma ichadanẹ k'atam k'ogbe kw'Hagar ọmaanẹ Abram ojinọngnwa.