1 Wa Abraham obir ọtọka kwanọng ọdọk-ọdọk kw'okpen Kẹtura. 2 Kẹtura ọmaan-ẹ Zimran, ọmaana Jọkshan, ọmaana Medan, ọmaana Midiyan, ọmaana Ishbak, ọttara Shua. 3 Jọkshan wọ wa obhonọ Shẹba ọttara Dedan; ẹnọmma ch'Dedan ede ab'Ashur, ọmaana ab'Lẹtush ọttara ab'Leum. 4 Ajinọngva p'Midiyan wa made Ẹpha, ọmaana Ẹphẹr, ọmaana Hanọk, ọmaana Abida, ọttara Ẹlda. Anọng mba maphyir bọ mafon k'ntaak s'Kẹtura.

5 Wa Abraham otte oyena kwẹ maphyir ọbọhk ọnang Isaak. 6 Okenaka, k'ogbe kw'uwa otim orukọ akpen, Abraham okebh nnanga ọnang iva p'ayokinọng pẹ, obir okwubh bẹ machina z'ẹbhaakẹ ch'ewuchen ed-eyin, mfha marik nnwa kwẹ Isaak obhokọ.

7 K'akpen pẹ maphyir, wa Abraham orukọ icho arọbh ochenọnttaan okwuma ichi. 8 Nya o, Abraham okwu ope ch'ikk'ọtama, otor ab'ttatta pẹ z'izek. 9 Iva pẹ, p'ade Isaak ọmaana Ishimayẹl, manọhng-ẹ z'ọtakpamma kw'Makpẹla kw'ọnyọm Mamrẹ z'ẹbhaakẹ ch'ewuchen ed-eyin, z'izek s'Ẹpharọn kw'ode nnwa kw'Zoha kw'ofon Het. 10 Wa Abraham odebhẹ izek njo k'mbọhk s'anọng p'Het. Wa manọhng Abraham ny'ibyi njo s'iwa manọhng kwanọng kwẹ Sara. 11 K'ogbe kw'Abraham ikk'ọpa, Ibinọkpaabyi odo nnwa kwẹ, Isaak, kw'uwa norukọ ọnyọma esipe ch'Beer-Lahai-Roi.

12 Ma wọ ode efonamma ch'Ishimayẹl kw'uwa Abraham obhonọ k'ntaak s'Hagar kw'ofon Ijip, kw'uwa ode obira kw'Sara.

13 Ma wọ ode ache p'iva p'Ishimayẹl k'ose kw'mazeng ammaana: ocheden ode Nẹbayọt. Ayok p'ator-ẹ ade Kẹda, ọmaana Adbẹl, ọmaana Mibsam, 14 ọmaana Mishma, ọmaana Duma, ọmaana Masa, 15 ọmaana Hadad, ọmaana Tẹma, ọmaana Jetur, ọmaana Naphish ọttara Kẹdẹma. 16 Ma wọ ode ajinọngva p'Ishimayẹl p'mabaabh nkọma ijobh kkamfa, s'ikpen ache ibhina bẹ, atorọ k'obhingabyi fabẹ. 17 K'akpen pẹ kibungọ, wa Ishimayẹl orukọ icho arọbh achadanẹ okwuma ichi kkamfa pira nope. Manọhng-ẹ, otor ab'ttatta pẹ z'izek. 18 Wa masi oruk kwabẹ tọma ny'ẹbhaakẹ ch'Havila pyirẹ z'Shur kw'oning okkerẹ Ijip z'ẹbhaakẹ ch'Asiriya. Wa marukọ k'iwawuna amaana ivotte pabẹ maphyir.

19 Ma wọ ode efonamma ch'Isaak. Abraham wọ uwa obhonọ Isaak.

20 K'ogbe kw'uwa Isaak node icho arọbh afa, nya kw'ọtọk Rẹbẹka k'ọbada. Rẹbẹka nwo ode nnwa kw'Bẹtuẹl kw'ofon Padan-Aram, obira ode ọgbaanọkka kw'Laban kw'ofon Aram.

21 Isaak oze njọm k'eso ch'kwanọng kwẹ okurọ ch'ọkpaan-ọkpaana. Ọvaar Ibinọkpaabyi ọbhaanga njọm sẹ, osi Rẹbẹka otima ibhọr. 22 Iva afa p'aning-ẹ z'ẹbhọr marima ayok ábẹ̀, pira ọkka ọbọbh bẹ́, "Bọng-odik wọ od-oyin ọmaan-m ma yirẹ?" Minna kw'ofon ọd-ọbọbh Ọvaar Ibinọkpaabyi.

23 Ọvaar Ibinọkpaabyi ọpọhn-ẹ bẹ́,

"Nkọma mfa jọ ining-ọ ny'ẹbhọr.

Nkọma njo mfa s'ining-ọ ny'ẹbhọr, m'ibhaangẹ ayok.

Ẹkọma danẹ m'eyena ẹfa ẹyọhnga ndoza,

ẹkọma ndo ch'echi eden ẹmmaana, m'ẹraka eso ẹnang ch'ikarẹ."

24 Okwu opyirẹ k'ogbe kw'im'ọmaan, ajinọngva afa bọ aning-ẹ z'ẹbhọr. 25 Oyok kw'ochi eden otto okor-okor, ifor sẹ ide mach'ibara s'isaabhẹ iphyabha. Ofona nya, makpẹ-ẹ bẹ́, Ẹsau. 26 Ogbe kobhirẹ, ọgbaanọkka obira otto, ọgbana Ẹsau ny'ebhokọhrọ. Nya o, makpẹ-ẹ, Jekọb. Wa Isaak node icho arọbh attaan k'atam k'ogbe kw'Rẹbẹka ọmaanẹ iva mbo.

27 K'ose kw'ajinọngva mbo mabeng k'icho, Ẹsau okwu ode ọgbaaji, kw'orukọ ayaankpa-kpen; Jekọb ode ọnọng kw'odirẹ ẹmaana, kw'ọd-ọkọhng eninga k'ọsọhm. 28 Wa Isaak ode ọnọng kw'ẹgbaten ẹd-ẹdaak-ẹ ẹcha, ofona nya, Ẹsau kw'ode ọgbaaji ọdaak-ẹ idik. Okenaka, Jekọb ọdaak Rẹbẹka idik.

29 K'ogbe wanẹ kw'uwa Jekọb ọd-ọwọhn ọchattọhk, Ẹsau okwuna eyina ọmaana okwo f'ikk'ẹ ọkaam mawuriji. 30 Minna kw'obenẹ Jekọb bẹ́, "Mek-m ẹwa-kora ndo, kirẹ okwo ọkaam-m ọkpan!" (Kẹ wọ osi pira wa mabira ayerẹ Ẹsau bẹ́, Edom.*)

31 Jekọb o, ọpọhn-ẹ bẹ́, "Kọ chi eden kpe ediden chọ anang-m."

32 Ẹsau ọpọhn-ẹ bẹ́, "Bọng-ọttọhk vọ ode ediden ch'okwo min'ọfhọ-m ma?"

33 Jekọb oben-ẹ bẹ́, "Chi eden chekẹ nang-m bẹ́, m'atte ediden chọ ọbọhk anang-m." Minna kw'Ẹsau ochekẹ, ọtọka ediden chẹ okpe ọnang Jekọb.

34 Ofona nya o, Jekọb ọtọka brẹd ọttara awa mbo ọnang-ẹ. Ochi, obira ogwo maa ọdọhbh, obina ofona. Minna kw'uwa Ẹsau ozeng olukọ ediden chẹ.