1 Nya o, Isaak oyerẹ Jekọb, obir ọsẹ-ẹ ittabọhng, oben-ẹ bẹ́, "Kwanọng kw'ofon m'ẹkọma ch'Kenaan kàtọka k'ọbada o. 2 Tera zọhng z'Padan-Aram, z'ọsọhm kw'Bẹtuẹl kw'ode atte kw'akka. Ny'panọngva p'Laban kw'ode ọgbaanọkka kw'akka, nya kw'm'atọka oyok wanẹ k'ọbada. 3 Tte Ọvaar Ibinọkpaabyi kw'Ẹfa maphyir ọdọ-ọ, obir ọnang-ọ iva k'ọsaabh maa, asi nkọma s'isaabh-ọsaabh. 4 Tte Ibinọkpaabyi ọnang kọ ọttara iva p'iva pọ ẹdase ch'iwa ọnang Abraham, ọfha atọka izek nja s'aning ma mach'okikennọng ayena. Izek njo jọ ide izek s'Ibinọkpaabyi ọnang Abraham." 5 Minna kw'Isaak ọtọhmọ Jekọb z'Padan-Aram bẹ́, od-okebha Laban kw'ode nnwa kw'Bẹtuẹl kw'ofon Aram, kw'ode ọgbaanọkka kw'Rẹbẹka kw'ode ọkka kw'Jekọb ọmaana Ẹsau.

6 Ẹsau okwu ozonga bẹ́, Isaak kk'Jekọb ittabọhng ọsa, obir ọtọhm-ẹ z'Padan-Aram bẹ́, ọd-ọtọka kwanọng kw'im'ọba za, obir ọtọr-ẹ itọhng bẹ́, oning kwanọng kw'ofon ny'Kenaan ọtọk, 7 obir oze bẹ́, Jekọb kk'nttọhna s'otte ọttara s'ọkka ọtọka, ochina z'Padan-Aram. 8 Kẹ Ẹsau okwu ozonga bẹ́, aminava p'Kenaan m'otte idik kadaakẹ. 9 Nya o, obina okebha Ishimayẹl kw'ode nnwa kw'Abraham za, ọtọka ominanwa wanẹ kwẹ kw'okpen Mahalat, kw'ode ọgbaanotte kw'Nẹbayọt k'ọbada, ọttara z'panọng mboza p'okkikken oyena.

10 Jekọb obina z'Beershẹba, ozenga ochina z'Haran. 11 Okwu opyirẹ k'ibyi janẹ o, oyima nya okurọ ch'ewu kk'ẹpya. Odunga ọta kw'ọnyọm-ẹ nya ọnana eso ọttaabha. 12 Ọttaabh ọda nya o, ọttaara ch'oze abhuka p'abin m'izek apyirẹ z'obhon kw'Ibinọkpaabyi. Oze azeng-eden p'Ibinọkpaabyi ch'nd-azenga nya avura, mabir azenga asaka. 13 Ọvaar Ibinọkpaabyi oninga z'abhuka mbo ẹrọng, ọgbaak odik oben bẹ́, "Kaam wọ nde Ọvaar Ibinọkpaabyi kw'ab'atte Abraham ọttara Isaak makpobh. Kaam m'nnang kọ ọttara iva p'iva pọ izek njo s'ayim nya. 14 Iva p'iva pọ m'asaabh mach'oyiyeng kw'izek, mm'abir anyaamẹ, tọma za ch'ewuchen ed-eyin, pyirẹ za ch'ewuchen ed-edimẹ, maa, pyirẹ z'ebir-ebir, ọmaana z'ẹwọn-ẹwọna. Kaam m'nzenga ny'ikọ ọttara iva p'iva pọ, ndo nkọma s'iyagbin maphyir. 15 Kaam m'nninga mmaan-ọ, m'mbir nkker-ọ k'ibyi kpenamkpen s'ata. M'mbir ntim-ọ bẹ́ bẹẹm, mkpa nnam m'izek nja. Kaam kọ ọbọhk mìntte, oye bẹ́, kaam kk'nsa k'ose kw'nchekẹ nnang-ọ."

16 Jekọb ọphyabh nya o, oben bẹ́, "K'odik ọkkọkka, Ibinọkpaabyi oning m'ibyi nja kaam kinzong!" 17 Ojor-ẹ, oben bẹ́, "Tcha! Bọng-ibyi jọ ijor minna! Ibyi nja m'ide ọsọhm kw'Ibinọkpaabyi; ebhumma ch'obhon kw'Ibinọkpaabyi dọ ma e."

18 Ewu esobh nya o, Jekọb obina ny'ekpikpebha, otinẹ ọta nwo kw'oyim ọnana eso, omin obe-obe, pira nobyeng-ẹ ana p'matim oliv asi. 19 Jekọb okpe ibyi njo bẹ́, Bẹtẹl. Ibyi njo wa ichi eden ikpena Luz.

20 Nya o, Jekọb ọtọka nwọhngọ k'ititika s'Ibinọkpaabyi, oben bẹ́, "Ó̱de kọ Ibinọkpaabyi aning amaan-m, akker-m m'ozenga nwa, anang-m ọchattọhk ọmaana ekpo py'ẹfọra, 21 abir atim-m bẹ́ bẹẹm mkpa nnam z'atte kwaam k'osọhm, k'odik ọkkọkka, kọ Ọvaar Ibinọkpaabyi m'ade Ibinọkpaabyi kw'kaam m'mkpobha. 22 Ọta nwa kw'ikk'mmina wọ im'ode ọsọhm kw'Ibinọkpaabyi. Kaam m'nkebh ọttọhk kpenamkpen f'ikọ Ibinọkpaabyi anang-m k'ibyi ijobh, ntọka okebh mavanẹ nnang-ọ."