1 K'ogbe kw'Jekọb ọbhaang bẹ́, ọchattọhk oning z'Ijip, oben iva pẹ bẹ́, "Ode yen kw'mad-aninga ma akkerẹ ayok minna?" 2 Obir obenẹ bẹ bẹ́, "Mmaang bẹ́, ọchattọhk oning z'Ijip. Màzọhng debh tima kwu, ọfha moning ope k'okwo."

3 Nya o, ivotte p'Josẹph anọng ijobh, mabina bẹ́, mad-adebh ọchattọhk z'Ijip. 4 Wa Jekọb kocher bẹ́, Bẹnjamin kw'ode ọgbaanọkka kw'Josẹph, otor ayok, okurọ ch'ojor-ẹ bẹ́, odiktama oning ch'oyinẹ ọmaan-ẹ za. 5 Wa iva p'Jekọb attar k'anọng p'achin z'Ijip bẹ́, mad-adebh ọchattohk, okurọ bẹ́, wa okwo mvo ọnyaamẹ maa, opyirẹ z'Kenaan.

6 Wa ny'ogbe nwo, Josẹph notim ediden ny'Ijip, od-okpe ọchattọhk ọnang anọng. Ivotte pẹ apyirẹ nya o, maraka attima nso z'izek anang-ẹ. 7 Josẹph oze ivotte pẹ nya o, otin bẹ, okenaka, osi mach'ina bẹ ozong. Otima ẹfa-ẹfa ọbọbh bẹ bẹ́, "Mafon memma?"

Mapọhn-ẹ bẹ́, "Mobin z'obhon kw'Kenaan bẹ́, mokwu odebh ọchattọhk."

8 Chibhẹ ch'Josẹph ikk'ivotte otina, bẹ m'kẹ katinẹ. 9 Nya o, okwu ojima ọdachen f'iwa ọttaar ọmaana bẹ. Pira oben bẹ bẹ́, "Bọnga made anọng p'makwu bẹ́, mabaana ibyi s'obhon kwamina otte eje."

10 Mapọhn-ẹ bẹ́, "Mma o, atte! Atọhmnọng pọ akwu bẹ́, makwu adebh ọchattọhk e. 11 Atte mawanẹ wọ obhonọ mina. Mina moyen ẹmmaana ọkkọkka. M'obhon obubaana kokwu."

12 Josẹph oben bẹ bẹ́, "Masi afọra! Makwu bẹ́, mabaana ibyi s'obhon kwamina otte eje."

13 Mapọhna Josẹph bẹ́, "Ttatta, mina atọhmnọng pọ mode nso ijobh kkamfa kw'atte mawanẹ obhonọ mina z'obhon kw'Kenaan. Okpongannam kwamina oning za ọmaana atte kwamina, oyok wanẹ ọdọk k'akpen kode."

14 Josẹph ochina ororo oben bẹ bẹ́, "K'odik ọkkọkka, makwu bẹ́, makwu abaana ibyi s'obhon kwamina otte eje! 15 M'nnang bọnga eyoma. Eyoma ede bẹ́, k'eche ch'Phero, bọnga m'ibyi màta, oyebẹ okpongannam kwabọnga kk'ọkwa ma. 16 Màtọhm ọnọng wanẹ ma, ọd-ọtọka okpongannam kwabọnga otima okwu; bọnga ayok mboza, mm'aninga m'ọgbakkọhbhisọhm, ọfha mozonga óde magbaak odik ọkkọkka. Ó̱de mágbaak afọra, k'eche ch'Phero, mm'ozonga bẹ́, makwu bẹ́, mabaana obhon kwamina!" 17 Ọtọka bẹ osok z'ọgbakkọhbhisọhm k'iwu ittaan.

18 Ottong iwu ittaan nya o, Josẹph obenẹ bẹ bẹ́, "Kaam nyen ojora f'Ibinọkpaabyi. Màsi ọttọhk f'ntekẹ bọnga bẹ́, masi, mfha maruk akpen. 19 Ó̱de bọnga mad-agbaak odik ọkkọkka, tte ọnọng wanẹ kwabọnga oninga m'ọgbakkọhbhiter, ayok mboza atima ọchattọhk achena ayok p'okwo oning za ọkaam z'oter. 20 Màtima okpongannam kwabọnga chen-m, ọfha nze óde magbaak odik ọkkọkka, mfha maning ape." Bẹ machera, masi k'ose kw'obenẹ bẹ.

21 Mabhakẹ aben ayok bẹ́, "K'odik ọkkọkka, irem s'mọd-ọtọka ma, ifon k'itama s'iwa mosi ọnang agbaanatte kwamina. Chibhẹ ch'iwa okwukọ mina, m'ikẹ itọhng koyong."

22 Reubẹn ọpọhna bẹ bẹ́, "Wa ntekẹ bọnga bẹ́, maning nnwa nwo itama asi. M'kaam itọhng kayong! Ma, node ogbe kw'mm'otuk izẹ sẹ s'mokibhẹ." 23 Wa bẹ nkazong bẹ́, Josẹph ọbhaang bẹ za, okurọ bẹ́, wa od-otima ọnọng osi ẹyaakẹ k'ebhon ch'od-otima ọgbaak odik ọnang bẹ.

24 Josẹph ọbhakẹ ititika okkerẹ z'okwubha, ọsọrọ asen. K'ogbe kw'ikẹ ottona, obira ọkpa nnam ọgbaak odik ọmaana bẹ. Ọnang anọng pẹ ẹfa bẹ́, mabọka Simeọn adabh-ẹ ndik ny'abẹ k'ititika.

25 Josẹph ọnang atọhmnọng pẹ ẹfa bẹ́, make ọchattọhk z'abẹ k'mkpa, mabira ake bẹ akpuka mbo p'matim akwu adebh ọchattọhk z'mkpa, mabira anang bẹ ọchattọhk f'mm'achi z'eden. Ch'nkk'asa minna o, 26 matọka ọchattọhk mvo madabh z'nnyanya sabẹ, mabhana.

27 Mápyirẹ ny'ibyi s'mm'abhing ch'ewu ikk'ẹpya, oyok wanẹ ọchaarẹ ẹkpa chẹ, ọfha ọnang ẹnyanya chẹ ọchattọhk, oze akpuka pẹ ny'ẹkpamma. 28 Oben ayok bẹ́, "Nkk'akpuka paam anwọhnga anang-m e. Kirẹ bẹ m'kaam k'ẹkpa e!"

Nttem irọbh. Mabọbh ayok bẹ́, "Ma, bọng-ọttọhk-kira f'Ibinọkpaabyi osi ọnang mina ma o?"

29 Mápyirẹ z'Kenaan, makebha otte Jekọb, matek-ẹ idik maphyir s'iyinẹ ikebha bẹ. Maben-ẹ bẹ́, 30 "Ọnọng kw'ọbaabh ẹkọma ch'Ijip ọgbaak odik akkaam-akkaam ọmaana mina, obira ọtọka mina mach'anọng p'makwu obhon obubaana. 31 Mina motek-ẹ bẹ́, ‘Mina moyen ẹmmaana ọkkọkka, m'obhon obubaana kokwu. 32 Wa mode iva ijobh kkamfa p'atte mawanẹ obhonọ, wanẹ ọdọk kode, okpongannam oning za ọmaana atte kwamina z'Kenaan.’

33 "Ọnọng nwo kw'otim ediden ch'Ijip oben mina bẹ́, ‘Eden ch'im'ntima nzonga óde bọnga made anọng ọkkọkka ede bẹ́, màtte agbaanatte wanẹ kwabọnga ọbọhk nang-m, bọnga màtọka ọchattọhk chena ẹsọhmmọr chabọnga ch'eyim okwo. 34 Okenaka, màtima okpongannam nwo kwabọnga chen-m, ọfha ntima nzonga bẹ́, made anọng ọkkọkka, m'obhon obubaana kakwu. Ṉ́kk'asa minna, kaam m'ntte agbaanatte kwabọnga ọbọhk nnang bọnga, mbira ntte bọnga ọbọhk mazenga mphya m'izek nja.’ "

35 K'ogbe kw'nnad-awonga mkpa sabẹ, ọnọng-ọnọng oze bẹ́, okpuka kw'otim od-odebh ọchattọhk oning za. K'ose kw'otte ọmaana bẹ maze akpuka mbo ny'mkpa njo, ojora ọbọka bẹ. 36 Jekọb kw'ode otte kwabẹ, oben bẹ bẹ́, "Bọnga nkk'aam asa ngwaana iva paam maphyir. Josẹph ọdọk kode, Simeọn ọdọk kode. Ma, nna abira akwu bẹ́, matima Bẹnjamin afona. Kaam wọ ma kw'iyagbin ikpẹkẹ o!"

37 Reubẹn oben otte bẹ́, "Tte Bẹnjamin ọbọhk nang-m. Ó̱de ina kẹ ntim mkpa nnam nchen-ọ, fhọ ajinọngva paam afa."

38 Jekọb ochina ororo oben bẹ́, "Kaam Bẹnjamin ọbọhk mìntte otor bọnga. Ọgbaanọkka kwẹ kk'ọpa, orik kẹ-kẹ. Ó̱de itama iyinẹ imaan-ẹ ny'ozenga nwo, m'isi-m mpe k'atam mmaana isen k'ettem."