1 Nwonya ọsa nya o, Ọvaar Ibinọkpaabyi oyin okebha Abram, oben-ẹ bẹ́,

"Abram, oning-ọ ojor,

kaam m'nkker-ọ ọfha ọttọhk oning-ọ osi,

kaam m'mbira nsi ẹtaam chiden nnang-ọ."

2 Abram ọbhaang nya o, oben bẹ́, "O Ọvaar Ibinọkpaabyi kw'Ẹfa maphyir, bọng-ọttọhk f'ikọ im'anang-m ch'kaam ina nnwa nyen? Ọnọng kw'im'ochi obo kwaam ode Eliyeza kw'ofon Damaskọs." 3 Abram obir oben bẹ́, "Kọ kaam nnwa kanangẹ. Oyinẹ bẹ́, ọtọhmnọng kw'ikaam k'ọsọhm wọ im'ochi obo kwaam."

4 Pira Ọvaar Ibinọkpaabyi obir ọgbaak odik, oben Abram bẹ́, "Mma e, minna mòde. Ọtọhmnọng nwa azang wọ im'ochi obo kwọ. Nnwa kwọ oyene, kw'ofon ny'ikọ k'adima, kẹ wọ im'ochi obo kwọ." 5 Pira Ibinọkpaabyi otima Abram oyin k'iyaan, ọkọhk-ẹ ndidorọ z'ọrọngkpakpa, oben-ẹ bẹ́, "Kk'aza k'ose kw'ndidorọ isaabhẹ za, ọnọng kode kw'im'okpo obhik. Minna kw'kwuna iva p'iva pọ mm'asaabh."

6 Abram ochera ọmaana Ọvaar Ibinọkpaabyi. Ofona nya, Ibinọkpaabyi ọtọk-ẹ mach'ọnọng kw'otor-otor.

7 Ọvaar Ibinọkpaabyi obir oben Abram bẹ́, "Kaam wọ nde Ọvaar Ibinọkpaabyi, kw'ọtọk-ọ z'Ur z'ẹbhaakẹ ch'anọng p'Kaldi bẹ́, nnang-ọ izek nja ayena."

8 Abram ọpọhn-ẹ bẹ́, "O Ọvaar Ibinọkpaabyi, kaam m'nsi yen pira nzonga bẹ́, izek njoma m'ide saam?"

9 Ọvaar Ibinọkpaabyi oben-ẹ bẹ́, "Chen-m ọbhaamkwa, ọmaana ovukwa, ọttara ọrọkimaandim kw'ode icho ittaan-ittaan k'atam, ọmaana ikpommuka, ọttara igbe."

10 Abram otima nten njo ochena Ibinọkpaabyi, ọkpaara jẹ akwuma afa-afa, otobha jẹ ikkerẹ ayok ititika. Ṉ́nòde ọnọhn, akwuma afa kọkpaar. 11 Nya o, attẹrẹ asaka bẹ́, makwu achi aforbukọ p'nten njo, Abram o, okwubh bẹ.

12 K'ose kw'ewu ẹd-ẹsaka ny'ẹsọhka, Abram ọttaabha ọda maa, ọmọm. Orungibanga kw'opyi bẹ́ kkang, obir ojor-ojora, obubh-ẹ. 13 Nya o, Ọvaar Ibinọkpaabyi oben Abram bẹ́, "Zonga k'odik ọkkọkka bẹ́, iva p'iva pọ, mm'ade akikennọng k'ẹkọma ch'anọng. Bẹ mm'aninga k'ebira, mm'abir anang bẹ irem, k'icho minna ẹnọhna. 14 Okenaka, kaam m'nnang ẹkọma ch'esok bẹ ebira irem. K'okpongannamgbe, bẹ mm'atima oyena kwiden abina arik ẹkọma ndo. 15 Ṉ́nòde kọ, m'aninga akpen matẹtẹmaa atam, pira ape ator ab'atte k'ọdaam. 16 K'ipemaanitor s'ittong nna, iva p'iva pọ m'akpa nnam m'izek nja, okurọ bẹ́, ogbe otima opyira kw'im'nkwubh anọng p'Amọr okurọ mpyibha sabẹ."

17 K'ogbe kw'ewu ikk'ẹsa, ebir epyi bẹ́ kkang, izọhka s'itim izizong, ọmaana akpondaak, iyin izenga ny'atenkwuma mbo. 18 Ny'ewu ndo, Ọvaar Ibinọkpaabyi osi echekẹ ọmaana Abram. Oben-ẹ bẹ́, "Iva p'iva pọ bọ p'm'nnang izek nja, tọma z'ọraanga kw'Ijip maa, pyirẹ z'ọraanga kwiden kw'Yupharetes. 19 Madidaanma, ibhon s'itim irukọ m'izek njoma, ide Ken, ọmaana Keniz, ọmaana Kadamọn, 20 ọmaana Hit, ọmaana Periz, ọmaana Rẹphayim, 21 ọmaana Amọr, ọmaana Kenaan, ọmaana Girgash, ọttara ayok p'Jebus."