Ichedendik 48

Jekọb osi iva p’Josẹph ittabọhng

1 K’ogbe wanẹ z’ititika, matekẹ Josẹph bẹ́, "Atte kwọ ọmmẹ-ẹ ọmma." Minna kw’Josẹph otim ajinọngva afa pẹ p’ade Manasẹ ọmaana Ephraim od-oze otte. 2 Jekọb ọbhaang nya bẹ́, nnwa kwẹ Josẹph kk’ọkwa, okonga obina oninga ẹwọr ny’ebin.

3 Jekọb oben Josẹph bẹ́, "Ibinọkpaabyi kw’Ẹfa maphyir oyinẹ okebh-m z’Luz, z’izek s’Kenaan, osi-m ittabọhng. 4 Obira oben-m bẹ́, ‘Kaam m’nsọ-ọ asi obhon mawuriji, abira ayena iva k’ọsaabh. Iva pọ m’akwu ade ẹkọma chiden. M’mbira ntọka izek nja nnang iva p’iva pọ, mayena ttattampe.’

5 "Ofona nya, Manasẹ ọmaana Ephraim p’ade ajinọngva afa p’abhonọ m’Ijip pira nkwu ma, mm’ade iva paam, k’ose kw’Reubẹn ọmaana Simeọn made iva paam. 6 Iva ọdọk-ọdọk p’m’abhon, mm’ade pọ. Bẹ mm’ayena okebh ny’izek s’Manasẹ ọmaana Ephraim. 7 Ch’iwa mbin z’Padan-Aram d’nkwun-okwuna, ọttọhk f’osi-m okwo ode bẹ́, Rachẹl ope-m z’ẹkọma ch’Kenaan, ch’ẹnyọm Ẹphrat. Nya o, ntọk-ẹ nnọhnga nyọma ny’eden ch’echin Ẹphrat (kw’ode Bẹtẹlẹhẹm)."

8 K’ogbe kw’Jekọb oze ajinọngva p’Josẹph nya o, ọbọbh bẹ́, "Ma bọng-anọng bọ ma?"

9 Josẹph ọpọhn-ẹ bẹ́, "Iva paam p’Ibinọkpaabyi kk’aam ọnanga m’Ijip bọ e."

Jekọb oben bẹ́, "Tima bẹ kwu ọfha nsi bẹ ittabọhng."

10 Wa Jekọb ọdọk iyaan mawuriji koze okurọ ch’ikk’ọtama. Josẹph otima ajinọngva mbo pẹ okebh-ẹ, pira Jekọb nọbaak bẹ.

11 Jekọb oben Josẹph bẹ́, "Kaam ichen kinsokọ bẹ́, m’mbira nzọ-ọ, okenaka, Ibinọkpaabyi kk’ọsa bẹ́, mbira nze iva pọ ọdọk."

12 Nya o, Josẹph ọrọhbha bẹ z’ntaak s’Jekọb, ọraka eso k’ikpukpobha ọnang-ẹ. 13 Ọtọka Ephraim osok z’odimbọhk kwẹ, kw’ode obhurubọhk kw’Jekọb, obira ọtọka Manasẹ osok z’obhurubọhk kwẹ, kw’ode odimbọhk kw’Jekọb. Osok bẹ manyọm-ẹ z’ifor. 14 Jekọb ozema mbọhk sẹ, ọtọka odimbọhk kwẹ ọnana Ephraim k’eso, chibhẹ ch’ode kẹ wọ ode nnwanwa. Ọnana Manasẹ obhurubọhk kwẹ k’eso, chibhẹ ch’ode kẹ wọ ode odidennọng.

15 Minna kw’osi Josẹph ittabọhng, oben bẹ́,

"Tte Ọvaar Ibinọkpaabyi kw’ab’atte paam, Abraham ọmaana Isaak akpobh,

Ibinọkpaabyi nwo kw’ikk’aam okkera

k’akpen paam maphyir maa pyirẹ menda,

16 tte ozeng-eden kw’Ibinọkpaabyi

kw’ikk’aam ọkkaana k’itama kpenamkpen,

odo iva mba.

Tte ofona m’ajinọngva mba,

eche chaam ọmaana ache p’ab’atte paam, Abraham ọmaana Isaak, akpobha achina ororo.

Tte m’asaabh ayọhng-ọyọhnga m’iyagbin."

17 Ch’Josẹph oze bẹ́, odimbọhk kw’otte otera ọnana Ephraim k’eso, kẹ obhem ettem, od-otinẹ ọbọhk nwo, ọnana z’Manasẹ k’eso. 18 Josẹph oben otte bẹ́, "Mma e, atte. Oyok nwa wọ ode ocheden e. Kẹ kw’m’anana odimbọhk kwọ k’eso e."

19 Otte obhum, oben bẹ́, "Nnwa kwaam, kaam nzong ọttọhk f’nd-nsi ma e. Nzong ma bẹ́, kwuna iva p’iva p’Manasẹ mm’ade ẹkọma, mabir ayin eche. Okenaka, ọgbaanọkka kw’ikarẹ m’oyin eche ọyọhng-ẹ, obhon fẹ m’okwu osi nkọma k’ẹkaan." 20 Minna kw’ozeng osi bẹ ittabọhng ny’ewu ndo, oben bẹ́,

"Kwuna anọng p’Israẹl mm’ad-atima eche chọ asi ayok ittabọhng bẹ́,

‘Tte Ibinọkpaabyi ọdọ-ọ mach’Ephraim ọmaana Manasẹ.’ "

Minna kw’Jekọb osi Ephraim oso kw’Manasẹ.

21 Nya o, Israẹl oben Josẹph bẹ́, "Ebo-wu chaam kk’ẹnyọma. Ọvaar Ibinọkpaabyi m’oninga ọmaana bọnga, obira otima bọnga ọkpa nnam z’izek s’ab’ttatta pabọnga. 22 Ṉ́nòde kọ, mgbaarẹ ayok njẹ, nnang-ọ izek ọkkọkka njo s’agbe, s’iwa ntim ọkkangkkang ọmaana oyuk nna anọng p’Amọr."