1 Ny'ogbe nwo, wa Amaraphẹl wọ ode ọvaarnọng kw'Shina, Ariyok ode ọvaarnọng kw'Ẹlasa, Kedor-laomer ode ọvaarnọng kw'Ẹlam, Tidal ode ọvaarnọng kw'Goyim. 2 Wa avaarnọng mba anna, mabin mad-arima egbong amaana Bera kw'ode ọvaarnọng kw'Sọdọm, ọmaana Birasha kw'ode ọvaarnọng kw'Gọmọra, ọmaana Shinab kw'ode ọvaarnọng kw'Adama, ọmaana Shemebẹr kw'ode ọvaarnọng kw'Zeboyim, ọttara ọvaarnọng kw'Bẹla, kw'obir okpena Zoar. 3 Wa avaarnọng mba achen, magbaka ifor ọmaana ayok z'ilokodo s'Sidim, kw'ode Ọraanga kw'Onung. 4 K'icho ijobh kkamfa, maning k'ẹbaabha ch'Kedor-laomer. Ottong icho ijobh kkanttaan, mabhum ẹbaabha chẹ.

5 Okwu opyirẹ icho osowanẹ kw'ichi, Kedor-laomer, ọttara avaarnọng p'agbak ifor amaan-ẹ, makema egbong ch'marim ọmaana anọng p'Rẹpha z'ẹbhaakẹ ch'Ashterọt-Karnayim, ọmaana anọng p'Zuz z'ẹbhaakẹ ch'Ham, ọmaana ẹkọma ch'Ẹm z'ẹbhaakẹ ch'Shavẹ-Kiriyatayim, 6 ọttara anọng p'Họr z'ẹbhaakẹ ch'agbe p'Seir, maa, pyirẹ z'Ẹl-Paran, kw'ọnyọm ibyi s'anọng nna arukọ. 7 Nya o, makpa nnam achina z'Ẹn-Mishpat, kw'ode Kadẹsh, mabira ad-akema anọng p'Amalẹk, ọttara anọng p'Amọr p'uwa marukọ z'Hazazọn-Tama.

8 Nya o, avaarnọng mbo achen p'abaabh Sọdọm, ọmaana Gọmọra, ọmaana Adama, ọmaana Zeboyim, ọttara Bẹla (kw'ode Zoar), mabina ayin egbong z'ilokodo s'Sidim, 9 mad-arima avaarnọng mboza anna ábẹ̀, p'ade ọvaar Kedor-laomer kw'ọbaabh Ẹlam, ọmaana ọvaar Tidal kw'ọbaabh Goyim, ọmaana ọvaar Amaraphẹl kw'ọbaabh Shina, ọttara ọvaar Ariyok kw'ọbaabh Ẹlasa.

10 Ny'ilokodo s'Sidim, wa ape p'ayen ana p'apyi bẹ́ kkang, mabang-ọbanga, masaabh-ọsaabh. K'ogbe kw'avaar p'Sọdọm ọmaana Gọmọra marọbhọ, ayok banẹ matto ny'ape mbo, mboza marọbh machina z'agbe. 11 Nya o, avaarnọng mbo anna, mana ayok p'Sọdọm ọmaana Gọmọra ekpo maphyir, ọttara ẹchakpo pyabẹ maphyir, matima afona. 12 Mabir abọka Lọt kw'ode nnwa kw'ọgbaanọkka kw'Abram, kw'uwa orukọ z'Sọdọm, mabọk-ẹ ọttara oyena kwẹ maphyir matima afona.

13 Ọnọng wanẹ kw'ọrọbhọ ọnaanga, okwu otek Abram kw'ode oHiburu-nọng odik nwa. M'ogbe nwoma, wa Abram orukọ ọnyọma nchi siden s'Mamrẹ kw'ofon Amọr, kw'ode ọgbaanọkka kw'Ẹshkọl, ọmaana Anẹr, kw'bẹ maphyir magbak ifor amaana Abram. 14 Ch'Abram ọbhaang bẹ́, nkk'ọgbaanotte abọka k'ẹmmọri, oyerẹ anọng arọbh ichi okwuma ichi kkanttaan p'mammaan ny'ikẹ k'ẹsọhmmọr p'akpo egbong oririma, otima okwubh bẹ maa, mapyirẹ z'ẹbhaakẹ ch'Dan. 15 Otum ny'erungọ, Abram okebh agbongnọng pẹ k'nkaana k'nkaana, otima orima bẹ ábẹ̀ maa, ọna bẹ mkpaang. Okwubh bẹ maa, opyirẹ z'Hoba, z'ebir-ebir kw'Damaskọs. 16 Abram ọna anọng mbo ekpo maphyir py'matọk, obir ọna bẹ Lọt ọmaana oyena kwẹ, ọmaana panọng, ọttara anọng mboza maphyir.

17 Ch'Abram kk'okwuna za ch'okem Kedor-laomer, ọttara avaar p'agbak ifor amaan-ẹ, ọvaarnọng kw'Sọdọm, okwu okebh-ẹ z'ilokodo, s'Shavẹ, s'mayerẹ "Ilokodo s'Ọvaarnọng."

18 Nya o, Mẹlkizẹdẹk, kw'ode ọvaarnọng kw'Salẹm, obir ode ọfọhn-nja kw'Ibinọkpaabyi kw'Ọyọhng, otima brẹd ọmaana atuk ochena Abram. 19 Osi Abram ittabọhng, oben-ẹ bẹ́,

"Tte Ibinọkpaabyi kw'Ọyọhng, kw'osi ẹrọng ọmaana izek, ọdọ-ọ.

20 Tte ẹtọhnga ede ch'Ibinọkpaabyi kw'Ọyọhng,

kw'ọtọk awawunanọng pọ ọkọ-ọ k'ọbọhk."

Nya o, Abram ọnang-ẹ igboka majanẹ s'ekpo ijobh k'ọttọhk kpenamkpen.

21 Ọvaarnọng kw'Sọdọm, oben Abram bẹ́, "Nang-m ayokinọng, kọ atọka ekpo mbyoza ayena."

22 Abram ọpọhna ọvaarnọng kw'Sọdọm bẹ́, "Kaam kk'ọbọhk nyaanga k'ẹrọng, nchekẹ k'eche ch'Ọvaar Ibinọkpaabyi kw'Ọyọhng, kw'osi ẹrọng ọmaana izek bẹ́, 23 ọttọhk fọ mavanẹ-vanẹ mìntọka, zaabẹ́ ode ẹbarakpa, obir ode edik ch'ntọkọ, ọfha kwuna aning abenẹ bẹ́, ‘Kaam wọ nsi Abram ojibh-ẹ.’ 24 Kaam ọttọhk kpenamkpen fọ mìntọka, kw'ọkpanẹ ọchattọhk mvo f'anọng paam nkk'acha, ọttara okebh f'anọng p'ator-m. Tte Anẹr, ọmaana Ẹshkọl, ọttara Mamrẹ mayena okebh fabẹ."