1 Jekọb ọbhaang bẹ́, ajinọngva p'Laban kk'atọma ogbugbaak bẹ́, "Jekọb kk'oyena kw'atte kwamina ọtọka maphyir, otima osi ojibhada kwẹ." 2 Jekọb okwu ozonga bẹ́, osisi kw'Laban inod-osi ọmaan-ẹ, ọdọk ọkkọkka kode.

3 Nya o, Ọvaar Ibinọkpaabyi oben Jekọb bẹ́, "Kpa nnam z'izek s'ab'atte, ọttara z'anọng pọ. Kaam m'nninga mmaan-ọ."

4 Nya o, Jekọb ọtọhm ẹkkaabha ọnang Rachẹl ọmaana Lea bẹ́, makebh-ẹ za ch'od-oninga okkerẹ etirakpo. 5 Oben bẹ bẹ́, "Kaam kk'nza bẹ́, osisi kw'atte kwabọnga ọdọk mbengana kode ọmaan-m. Okenaka, Ibinọkpaabyi kw'atte kwaam, oning ka ọmaan-m. 6 Bọnga nkk'zonga bẹ́, kaam ntim ẹfa chaam maphyir nsi ọtọhm nnang atte kwabọnga. 7 Chibhẹ nya, atte kwabọnga kk'aam ottuka, obhona ẹtọhm-phya chaam k'igbedim ijobh. Okenaka, Ibinọkpaabyi kk'ẹ ọbọhk kotte bẹ́, osi-m ọttọhk. 8 Ó̱de oben bẹ́, ‘Nten s'isi ase jọ im'ide ẹphya ch'ọtọhm fọ,’ minna kw'nten maphyir im'isi ase. Ó̱de obir oben bẹ́, ‘Njo s'isi akkẹkkẹk jọ im'ide ẹphya ch'ọtọhm fọ,’ minna kw'nten njo ibir imaan iva p'asi akkẹkkẹk. 9 Ibinọkpaabyi kk'ozenga m'eden nda, ọtọka nten s'atte ọnang-m.

10 "K'ogbe kw'nten id-iyima ayok ábẹ̀, nttaar idachen k'ewu danẹ, nze bẹ́, avudim p'ad-avura avugboka, masi ase, mabir attima akkẹkkẹk. 11 Ny'idachen njo, ozeng-eden kw'Ibinọkpaabyi oyer-m bẹ́, ‘Jekọb.’ Kaam nchera bẹ́, ‘Kirẹ kaam ma.’ 12 Ozeng-eden nwo oben bẹ́, ‘Tinẹ ititika kkerẹ k'ẹrọng, maze bẹ́, avudim maphyir p'asi ase, ọmaana p'attim akkẹkkẹk, mavur avugboka. Kaam kk'okpenamkpen nza f'Laban od-osi ọnang-ọ. 13 Kaam wọ nde Ibinọkpaabyi kw'oyinẹ okebh-ọ z'Bẹtẹl, za ch'abyeng ọta ana k'eso, abir achekẹ anang-m. Ofona nya, bina m'izek nja, kpa nnam z'ọmmaana-bhon kwọ.’ "

14 Nya o, Rachẹl ọmaana Lea mapọhn-ẹ bẹ́, "Ma, mina motim oyen okebh z'oyena kw'atte kwamina yirẹ? 15 Ma, kẹ nọtọk mina mach'akikennọng yirẹ? Kẹ kk'mina ọtọka okpe, obir ọkpa nnam ochi akpuka p'manang-ẹ k'amina k'nso. 16 K'odik ọkkọkka, ojibhada maphyir kw'Ibinọkpaabyi ọtọk z'atte kwamina, oyen mina, ọmaana iva pamina. Nya o, si k'ose kw'Ibinọkpaabyi ikk'ọ obena."

17 Minna kw'Jekọb ọtọk iva pẹ, ttara panọng pẹ, ọnana k'akamẹl, 18 otima etirakpo pyẹ, ọmaana oyena kwẹ maphyir kw'oyen z'Padan-Aram, obina ozenga bẹ́, ochina z'izek s'Kenaan, okebha otte Isaak za.

19 K'ogbe kw'Laban ikk'obina bẹ́, od-ophyirẹ arọkimaan pẹ iphyabha, Rachẹl obina, od-ofu akpata p'ẹsọhmmọr ch'otte. 20 Obir ode bẹ́, Jekọb ọbọhr Laban kw'ofon Aram, kẹ kotekẹ bẹ́, m'ọrọbh-ọrọbh. 21 Minna wọ kw'ọrọbhọ ọttara oyena kwẹ maphyir, otima ojeka ọraanga kw'Yupharetes, okkerẹ eso z'Gilead, z'ẹbhaakẹ ch'agbe.

22 Ottong iwu ittaan nya, matek Laban bẹ́, Jekọb kk'ọrọbha. 23 Laban otima achimmanọng pẹ, makwubh Jekọb k'iwu ichenọmfa, pira nnakebh-ẹ z'Gilead, z'ẹkọma ch'egbe. 24 Ny'erungọ, Ibinọkpaabyi oyin k'idachen okebha Laban kw'ofon Aram, ọtọr-ẹ itọhng bẹ́, "Kker-ọ ifor o! Jekọb odik kpenamkpen kàben ọ, zaa wura ojibh-ojibh, wanẹma, opyibh-opyibh o."

25 Wa ch'Jekọb ikk'ikkira sẹ ottima z'Gilead, z'ẹkọma ch'egbe, Laban, ọmaana achimmanọng pẹ, makebh-ẹ nya, mabir asi okkira fabẹ, mabhing nya. 26 Nya o, Laban oben Jekọb bẹ́, "Osi yen kw'asi minna? Kk'aam abọhra, atim panọngva paam arọbh mach'anọng p'mabọk k'ẹmmọri. 27 Kayen kw'abọr-m atubh-otubha arọbh? Kayen kw'ina kaam atekẹ, ọfha ntima mbin, ọttara ọkkọhna, nrik bọnga k'eden? 28 Kọ kaam ọbọhk katte bẹ́, mbaaka iva p'iva paam, ọmaana panọngva paam, mbenẹ bẹ bẹ́, mayima. Ọttọhk f'asi ma, ode eturọ. 29 Kaam nyen ẹfa ch'iwura ntim nsọ-ọ ọttọhk. Okenaka, chena k'erungọ, Ibinọkpaabyi kw'atte kwọ, oyinẹ okebh-m, ọtọr-m itọhng bẹ́, ‘Kker-ọ ifor o! Jekọb odik kpenamkpen kàben ọ, zaa wura ojibh-ojibh, wanẹma, opyibh-opyibh o.’ 30 Ma, kk'afona okurọ ch'ọjọkọ bẹ́, akpa nnam z'atte k'obhon. Okenaka, Asi yen afu akpata paam o?"

31 Jekọb ọpọhn-ẹ bẹ́, "Kaam nrọbhọ okurọ ch'ojor-m bẹ́, mana-m panọngva pọ k'ẹfa. 32 Okenaka, óde aze ọnọng kw'otim akpata pọ ma, ọnọng nwo akpen mòruk. Baana m'ititika s'anọng pamina, óde aze ọttọhk kpenamkpen f'ode fọ, tọka." Jekọb kozong bẹ́, Rachẹl kk'akpata mbo, ọfa.

33 Laban ocheden ọfọhngọ ikkira s'Jekọb, pira ochina za s'Lea, ọmaana s'atọhmnọng mbo afa, ọttọhk koze. Ch'ikk'ochera z'ikkira s'Lea, odim z'ikkira s'Rachẹl. 34 Wa Rachẹl kk'akpata mbo odubha z'iwọr-ninga-byi s'kamẹl kwẹ, oninga ẹwọr ọyakẹ bẹ. Laban ọfọhngọ ibyi kpenamkpen z'ikkira s'Rachẹl, ọttọhk koze.

35 Rachẹl oben otte bẹ́, "Ttatta, ototo, oning-ọ ọdọkọ ch'ina m'mbina mbe-obe m'ikọ k'ititika. Kaam ntto ofor." Laban ochina ororo ọfọhngọ ikkira s'Rachẹl, akpata pẹ koze.

36 Ettem epyibh Jekọb, ọbọbh Laban bẹ́, "Njẹ mbọng o? Bọng-epyibha ch'nsi ch'ad-azeng ábẹ̀, akwubh-m ẹfa-ẹfa minna? 37 Ma ch'ikk'ekpo pyaam afọhnga maphyir, bọng ọttọhk fọ f'ikk'aza? Jẹ fẹ m'ititika s'anọng pọ, ọttara paam, tte bẹ makpaara aponga anang mina nnam mfa.

38 "Kaam kk'nninga mmaan-ọ k'icho minna ẹrọbh, ibhọr arọkimaan pọ, ọmaana avu pọ kiyinẹ, arọkimaandim pọ kimbir nchi. 39 Nten sọ s'mgbatten ifhọ, kk'ọ ntima nd-nchena. Kaam wọ kw'id-idimẹ. Kọ ad-asi-m ntuk eten kpenamkpen ch'orubh ofu: ode k'ẹya o, ode k'erungọ. 40 Wa echekira ẹd-ẹmaan-m k'ẹya, ekok esi-m k'erungọ, mbir ntim ọda. 41 Wa ode minna k'icho ẹrọbh s'nning mmaan-ọ. Nsi ọtọhm k'icho osowanẹ kw'ichi ọfha anang-m panọngva pọ afa, mbir nkkerẹ nten sọ k'icho ichadanẹ. Chibhẹ nya, kọ ayekẹ ẹphya ch'ọtọhm faam igbedim ijobh. 42 Wura ina Ibinọkpaabyi kw'atte kwaam Abraham, ọmaana kw'Isaak ode, wura wa akwubh-m mbọhk-mbọhk. Okenaka, Ibinọkpaabyi kk'irem saam, ọmaana ọtọhm faam ọza. Kẹ wọ osi, chena k'erungọ, opyim-ọ."

43 Laban ọpọhna Jekọb bẹ́, "Panọng mba ade aminava paam, iva pabẹ made iva paam, etirakpo mbya, ede pyaam. Ọttọhk kpenamkpen f'aze ma, ode faam. Kọ achibhẹ bẹ́, kaam m'nsi mbọng mmaana aminava mba paam, wanẹma iva p'nkk'amaana? 44 Kwu, kọ ọmaana kaam mochekẹ ọnang ayok. Tte echekẹ ndo ede nttẹsẹ kwamina."

45 Nya o, Jekọb ọtọka ọta ommin, ọsẹ-ẹ ebe mach'ẹkpọmmachi. 46 Oben anọng pẹ bẹ́, "Màtobha ata." Minna kw'matobh ata k'okkin, maninga anyọma nya, machi ọttọhk.

47 Laban oyerẹ ọtakkin nwo bẹ́, Jegar-Sahaduta*, Jekọb oyerẹ wẹ bẹ́, Galeed.

48 Laban oben bẹ́, "Ọtakkin nwa ode nttẹsẹ ọnang kọ ọttara kaam menda." Kẹ wọ osi, wa mayerẹ wẹ bẹ́, Galeed. 49 Wa ibyi njo ibira ikpena Mizpa* okurọ ch'iwa obenẹ bẹ́, "Tte Ọvaar Ibinọkpaabyi okkerẹ kọ ọmaana kaam k'ogbe kw'nkk'ayok ọbọhk ọta. 50 Ó̱de anang panọngva paam irem, obir ode bẹ́, atọk panọng ọdọk-ọdọk, zaabẹ́ ọnọng mina koning ọmaana, jima bẹ́, Ibinọkpaabyi wọ ode nttẹsẹ kw'ikọ ọmaana kaam."

51 Laban obir oben Jekọb bẹ́, "Kirẹ ọtakkin, kirẹ ẹkpọmmachi ch'ikk'mmina k'njeka kw'ikọ ọttara kaam. 52 Ọtakkin nwa, ọmaana ẹkpọmmachi nda, ede nttẹsẹ bẹ́, kaam ọtakkin nwa mìnjeka nchina z'ikọ k'ẹbhaakẹ nsọ-ọ itama, kọ ọdọk, ọtakkin nwa ọmaana ẹkpọmmachi nda mabir ajeka, asi-m itama. 53 Tte Ibinọkpaabyi kw'Abraham ọmaana kw'Nahọr makpobh, ọkpaara aponga p'mina anọng afa."

Nya o, Jekọb ochekẹ k'eche ch'Ibinọkpaabyi kw'ab'otte makpobh. 54 Jekọb ọfhọ ọrọkimaan otima ọfọhnọ ẹja ny'ogbeso nwo, oyerẹ anọng pẹ ọchattọhk. Ch'nkk'ọttọhk acha maphyir, mabhing nya ny'erungọ ndo. 55 K'ekpikpebha ch'ewu esobh, Laban ọbaaka iva p'iva pẹ ọmaana panọngva pẹ, obir osi bẹ ittabọhng. Ocher nya o, ọbhana z'ikẹ k'obhon.