1 Wa Ọvaar Ibinọkpaabyi oyin okebha Abraham za ch'ọnyọm nchi siden s'Mamrẹ. Wa ode k'ọyakpattem, k'ogbe kw'Abraham oning ẹwọr ny'ẹsọhmma ch'ikkira sẹ. 2 Abraham otinẹ ichen oze anọng minna attaan p'abe anyọm-ẹ nya. Oze bẹ nya o, obina ẹbhar-ẹbhar ny'ẹsọhmma ch'ikkira sẹ, od-okebha bẹ, ọraka eso ọnang bẹ.

3 Oben bẹ́, "Ttatta, óde ndaak-ọ idik, ọsọhm kw'ọtọhmnọng kwọ, kàkpan. 4 Tte mochena bọnga asi biribirẹ mfha magbobhọ mmo, mabir akwoka ọwọhng m'ofokodo kw'echi nda. 5 Tte ntima ọchattọhk nchena bọnga machi, mfha mayena ẹfa machina ororo k'ozenga kwabọnga, ch'nkk'achera bẹ́, mm'asaka ọtọhmnọng kwabọnga."

Mapọhn-ẹ bẹ́, "Ojibh-ojibh. Si k'ose kw'abenẹ nya."

6 Minna kw'Abraham ọsẹr-ọsẹr okebha Sara z'ẹtaanga, oben-ẹ bẹ́, "Tọka nrakpa nttaan s'agwu-buma ọkkọkka, atima si brẹd ẹbhar-ẹbhar."

7 Abraham obir ọsẹr-ọsẹr ochina z'etirakpo pyẹ, otéka ọbhaamnwa kw'ode ifor ma dọrọdọrọ, ọtọka ọnang ọtọhmnọng wanẹ kwẹ bẹ́, ọfhọ ẹbhar-ẹbhar otima osi ọchattọhk. 8 Pira ọtọka abasi, ọmaana eten ndo obera bẹ. Ch'maning nya achi o, Abraham obe otuma bẹ ny'ofokodo kw'echi ndo.

9 Pira anọng mbo mabọbh Abraham bẹ́, "Sara kw'ode kwanọng kwọ kẹ?" Kẹ ọpọhna bẹ bẹ́, "Oning z'ikkira ẹtaanga."

10 Ọnọng wanẹ ny'anọng mbo attaan, oben bẹ́, "K'odik ọkkọkka, ím'od-opyirẹ icho ogbese nwa, kaam m'mkpa nnam nkebha bọnga ma. Kwanọng kwọ Sara, m'ọmaan ojinọngnwa."

M'ogbe nwa, wa Sara obe ny'ẹsọhmma ch'ikkira njo s'ọnọng nwo ọkpa nnam ọbọra, od-oyong-ẹ itọhng. 11 Wa Abraham ọmaana Sara, nkk'atama mawuriji, Sara ọdọk ofor kotto. 12 Ofona nya, Sara ọmma asa, oben z'ettem bẹ́, "Kaam kw'ikk'ntama, odim kwaam obir ọtam, kaam m'mbir nyena olebh f'eyima?"

13 Ọvaar Ibinọkpaabyi, oben Abraham bẹ́, "Kayen kw'Sara ọmma asa, obir oben bẹ́, ‘Ma, ina mbir mmaan nnwa kk'atama o?’ 14 Ọttọhk oning za f'Ọvaar Ibinọkpaabyi ini mòkpo osi o? Ó̱de ogbe nwo ikk'opyira, kaam m'mkpa nnam nkebha bọnga ma. Sara m'ọmaan ojinọngnwa."

15 Sara ọbhaang idik njo nya o, ojor-ẹ. Kẹ okona, oben bẹ́, "Ttophyẹrẹ! Kaam asa kimma."

Ibinọkpaabyi oben-ẹ bẹ́, "K'odik ọkkọkka, kk'asa amma."

16 K'ogbe kw'anọng mbo attaan abin bẹ́, mafona, mad-abe k'ibyi janẹ, maze obhon kw'Sọdọm bẹ́ ttaan. Abraham otor bẹ, od-orik bẹ z'eden. 17 Nya o, Ọvaar Ibinọkpaabyi ọbọbh ifor sẹ bẹ́, "Ma, ọbaan za bẹ́, ndubh Abraham odik nwa kw'nd-nkaam bẹ́, nsi ma yirẹ? 18 K'odik ọkkọkka, kwuna iva p'iva p'Abraham mm'akwu ade ẹkọma chiden ch'im'ebir eyena ẹfa. Nkọma s'iyagbin maphyir m'ibir izenga ny'ikẹ, iyena ẹda. 19 Kẹ wọ kw'ikk'nteka bẹ́, okkerẹ iva pẹ, ọttara ẹsọhmmọr chẹ maphyir, otibh bẹ ose kw'mm'azenga k'eden ch'Ọvaar Ibinọkpaabyi k'ogbe kw'ikẹ ikk'ọpa. Osi bẹ masi idik ọkkọkka, ọmaana idik s'itor-otor, ọfha Ọvaar Ibinọkpaabyi osi idik njo maphyir s'ochekẹ ọnang-ẹ."

20 Nya o, Ọvaar Ibinọkpaabyi oben bẹ́, "Anọng kk'adiktama p'Sọdọm ọmaana Gọmọra achona makpaar. Mpyibha sabẹ kk'ibir isaabha mawuriji. 21 Kaam min'nsaka nd-nze óde epyibha ch'bẹ masi, ede k'odik ọkkọkka k'ose kw'anọng abenẹ. Ó̱de ina minna ode, m'nzong-ozonga."

22 Pira ajinọng mbo mafona, machina z'ẹbhaakẹ ch'Sọdọm, marik Abraham ch'obe nya ọmaana Ọvaar Ibinọkpaabyi. 23 Nya o, Abraham ozenga otuma Ibinọkpaabyi z'ifor, ọbọbh-ẹ bẹ́, "Ma, kọ m'agbaama anọng p'ator-otor, ọmaana anọng p'asi ẹyaaka afhọ o? 24 Ó̱de ode bẹ́, anọng arọbh afa okwuma ijobh maning ny'obhon nwo p'ator-otor, ma, kọ m'agbaama bẹ afhọ maphyir o? Anọng mbo arọbh afa okwuma ijobh màzenga ábẹ̀ akkaana obhon nwo o? 25 Tcha! Minna mòde, bẹ́, kọ m'agbaama anọng p'ator-otor, ọmaana anọng p'asi ẹyaaka, asi ose mawanẹ. Kayen kw'Ọkpaar-aponga kw'ayagbin maphyir ina ọttọhk f'otor-otor mòsi?"

26 Ọvaar Ibinọkpaabyi oben bẹ́, "Ó̱de nze anọng arọbh afa okwuma ijobh p'ator-otor ny'obhon kw'Sọdọm, kaam m'nzenga bẹ ábẹ̀, ntte obhon nwo kibungọ ọbọhk, ọdọk bẹ ọttọhk mìnsi."

27 Minna kw'Abraham obir ọgbaak odik, oben Ọvaar Ibinọkpaabyi bẹ́, "Ch'ikk'ettem ngaanga bẹ́, mgbaak odik nnang-ọ, chibhẹ ch'nzong bẹ́, nkenka nde ididọhbh ọmaana ititọhng, 28 ńnòsi obhon nwo m'owor anọng achen p'iwura otim ottonga anọng arọbh afa okwuma ijobh p'ator-otor. Ma, kọ mafhọ ebhondim ndo k'ibungọ okurọ anọng achen o?"

Ibinọkpaabyi ọpọhn-ẹ bẹ́, "Mma e, óde oyen anọng arọbh afa okwuma achen p'ator-otor nya, kaam obhon nwo mìnkibhẹ."

29 Abraham ochina ororo okwukọ Ibinọkpaabyi, oben bẹ́, "Ó̱de ode bẹ́, anọng arọbh afa bẹ-bẹ bọ ator-otor, m'asi yen?"

Ibinọkpaabyi ọpọhn-ẹ bẹ́, "Ó̱de nze anọng arọbh afa ny'obhon nwo p'ator-otor, m'nzenga bẹ ábẹ̀, obhon nwo mìnkibhẹ."

30 Abraham obir oben bẹ́, "Ttatta, ototo, oning-ọ ọdọkọ, tte-m ọbọhk nchina ororo mgbaak odik nwa. Ó̱de ode bẹ́ anọng ẹrọbh okwuma ijobh bẹ-bẹ bọ ator-otor ny'obhon nwo kẹ?"

Ibinọkpaabyi ọpọhn-ẹ bẹ́, "Zaabẹ́ anọng p'ator-otor made anọng ẹrọbh okwuma ijobh bẹ-bẹ, kaam m'ntte obhon nwo ọbọhk."

31 Abraham oben bẹ́, "Tte mbọbh, ch'ikk'ottem gaangẹ nyena bẹ́, mgbaak odik nang Ọvaar Ibinọkpaabyi. Ó̱de aze anọng ẹrọbh bẹ-bẹ kẹ?"

Ibinọkpaabyi ọpọhn-ẹ bẹ́, "Ó̱de nze anọng ẹrọbh bẹ-bẹ, m'nzenga bẹ ábẹ̀ obhon nwo mìnkibhẹ."

32 Nya o, Abraham oben bẹ́, "Ọvaar Ibinọkpaabyi, tte oning-ọ ọdọkọ, kenaka tte-m ọbọhk mgbaak okpongannamdik nwa. Ó̱de ode anọng ijobh bẹ-bẹ bọ aning nya kẹ?"

Ọvaar Ibinọkpaabyi ọpọhn-ẹ bẹ́, "M'nzenga anọng mbo ijobh ábẹ̀, obhon nwo mìnkibhẹ."

33 K'ogbe kw'Ọvaar Ibinọkpaabyi kk'idik njo ọgbaaka maphyir ọmaana Abraham, ofona. Abraham o, ọkpa nnam z'iruk-byi sẹ.