1 Minna kw'Israẹl ọtọk ekpo py'oyen maphyir otima obina ozenga. Opyirẹ z'Beershẹba, ọfọhnọ nja ọnang Ibinọkpaabyi kw'uwa Isaak kw'ode otte kwẹ okpobh. 2 Otum k'erungọ, Ibinọkpaabyi oyin okebh-ẹ k'ọda, oyer-ẹ bẹ́, "Jekọb! Jekọb!"

Jekọb ọpọhna bẹ́, "Kirẹ kaam ma."

3 Ibinọkpaabyi oben-ẹ bẹ́ "Kaam wọ nde Ibinọkpaabyi, Ibinọkpaabyi kw'atte kwọ okpobh. Oning-ọ ojor bẹ achina z'Ijip, okurọ bẹ́, za wọ kw'kaam m'nsọ-ọ ade ẹkọma chiden. 4 Kaam m'ntim-ọ nta z'Ijip, mbira ntim-ọ mkpa nnam. Íkk'apa, Josẹph wọ im'ọnọhng-ọ."

5 Nya o, Jekọb obina orik Beershẹba. Iva pẹ mayik-ẹ k'ijaar s'ogbin s'Phero ikk'ọtọhma, mabir ayika panọng pabẹ nya, ọttara iva pabẹ, mafona. 6 Mabira atima etirakpo pyabẹ ọmaana oyena kw'nkk'asa ny'Kenaan, ọttara ẹsọhmmọr chẹ maphyir, mazeng z'Ijip. 7 Minna kw'Jekọb otim ajinọngva pẹ, ọmaana iva p'iva maphyir, ọmaana iva p'panọng ọttara ẹsọhmmọr chẹ maphyir ochina z'Ijip.

8 Ma wọ ode ache p'ajinọngva p'Israẹl, p'uwa achin z'Ijip:

Reubẹn kw'ode ochedennwa kw'Jekọb.

9 Ajinọngva p'Reubẹn made:

Hanọk ọmaana Palu,

Hẹzrọn ọmaana Karmi.

10 Ajinọngva p'Simeọn made:

Jemuyẹl, ọmaana Jamin, ọmaana

Ọhad, ọmaana Jakin, ọmaana Zoha

ọttara Shaul kw'ode ojinọngnwa kw'kwanọng wanẹ kw'ofon Kenaan ọmaanẹ.

11 Ajinọngva p'Lẹvi made:

Gershon ọmaana Kohat

ọttara Mẹrari.

12 Ajinọngva p'Juda made:

Ẹr ọmaana Ọnan ọmaana Shẹla,

ọmaana Pẹrẹz ọttara Zẹra.

(Ẹr ọttara Ọnan wa mape z'Kenaan).

Ajinọngva p'Pẹrẹz made:

Hẹzrọn ọttara Hamul.

13 Ajinọngva p'Isaka made:

Tola, ọmaana Pua, ọmaana Jashub,

ọttara Shimrọn.

14 Ajinọngva p'Zẹbulun made:

Sẹrẹd ọmaana Ẹlọn ọttara Jalẹl.

15 Ma wọ ode ajinọngva p'uwa Lea ọmaanẹ ọnang Jekọb z'Padan-Aram, agbaarẹ Daina kw'ode ominanwa kwẹ abharẹ. Wa iva mba pẹ maphyir made ẹrọbh okwuma ijobh kkanttaan.

16 Ajinọngva p'Gad, wa made:

Ziphon, ọmaana Haggi,

ọmaana Shuni, ọmaana Ẹzbọn,

ọmaana Eri, ọmaana Arodi,

ọttara Areli.

17 Ajinọngva p'Asha made:

Imna, ọmaana Ishva,

ọmaana Ishvi, ọttara Beriya.

Sera wọ uwa ode ọgbaanọkka kwabẹ k'ẹpanọng.

Ajinọngva p'Beriya made:

Heber ọmaana Malkiyẹl.

18 Nya wọ ode ajinọngva p'uwa Zilpa ọmaanẹ ọnang Jekọb. Zilpa nwa wọ ode obira kw'uwa Laban otte ọbọhk ọnang ominanwa kwẹ, Lea. Wa iva mba ade ichi kawanẹ p'uwa Zilpa ọmaanẹ ọnang Jekọb.

19 Ajinọngva p'Jekọb obhonọ k'kwanọng kwẹ Rachẹl made:

Josẹph ọttara Bẹnjamin. 20 Z'Ijip, wa Josẹph obhonọ Manasẹ ọmaana Ephraim k'kwanọng kwẹ Asenat, kw'ode ominanwa kw'Potiphera kw'ode ọfọhn-nja kw'On.

21 Ajinọngva p'Bẹnjamin made:

Bẹla, ọmaana Beker, ọmaana Ashbẹl, ọmaana Gera, ọmaana Naaman, ọmaana Ehi, ọmaana Rosh, ọmaana Mupim, ọmaana Hupim, ọttara Ard.

22 Wa ajinọngva mba ade osowanẹ kw'ichi p'uwa Rachẹl ọmaanẹ ọnang Jekọb.

23 Ojinọngnwa kw'uwa Dan obhonọ okpen, Hushim.

24 Ajinọngva p'Naphtali made: Jazel, ọmaana Guni, ọmaana Jezer, ọttara Shilẹm.

25 Ajinọngva mba achenọmfa bọ p'uwa Bilha ọmaanẹ ọnang Jekọb. Bilha ode obira kw'uwa Laban ọnang Rachẹl.

26 Anọng p'Jekọb maphyir p'uwa matọnọ achina z'Ijip p'ade iva p'iva pẹ, ágbaarẹ panọng p'iva pẹ abharẹ, wa made anọng arọbh attaan okwuma achadanẹ. 27 Kibung-kibungọ, óde attar ajinọngva afa p'uwa makkikken ammaan anang Josẹph ny'Ijip, ọnọng-bhik kw'ẹsọhmmọr ch'Jekọb ch'echin z'Ijip ode anọng arọbh attaan okwuma ijobh.

28 Nya o, Jekọb ọtọhm Juda bẹ́, ochi eden ọd-ọbọbh Josẹph eden ch'echin z'Goshẹn. K'ose kw'mapyirẹ ny'ẹbhaakẹ ch'Goshẹn, 29 Josẹph oben bẹ matima ijaar sẹ s'nnyanya id-itọr ayin ka, ofona od-oze otte. K'ose kw'oyiyin ny'otte k'ititika, ọbharẹ mbọhk, ọgaara otte, ọsọhrọ asen k'ogbe kw'okem ebhira.

30 Israẹl oben Josẹph bẹ́, "Iya! Obo oning ch'ọtọk-m yina, ch'ikk'achen paam ntima nze bẹ́, aruk akpen ka."

31 Josẹph ọgbaak odik ọnang ivotte pẹ, ọmaana ẹsọhmmọr ch'otte maphyir, oben bẹ bẹ́, "Kaam m'nd-mgbaak Phero bẹ́, ẹsọhmmọr ch'atte kwaam, kk'ebina z'Kenaan kw'uwa marukọ, ekebh-m ka. 32 Bẹ made akker-arọkimaan, mabir ad-atir nten. Ofona nya, nkk'etirakpo ọmaana ọttọhk kpenamkpen f'ode fabẹ atima akwu. 33 Ó̱de Phero ọbọbh bọnga bẹ́, ‘Bọng-ọttọhk vọ ode ọtọhmbọhk fabọnga?’ 34 màpọhn-ẹ bẹ́, ‘Mina atọhmnọng pọ, mode akker-arọkimaan tọma k'ẹvava chamina, k'ose kw'uwa ab'atte pamina ad-asi.’ Minna kw'mm'atima atte bọnga ọbọhk maruk ny'ẹbhaakẹ ndo ch'Goshẹn, okurọ ch'akker-arọkimaan abọkọ anọng p'Ijip idik minna."