1 M'ogbe nwa, okwo f'ọgaang-ọgaangẹ otim oning z'Kenaan. 2 K'ogbe kw'Israẹl ọmaana ẹsọhmmọr chẹ nkk'ọchattọhk f'madebhẹ z'Ijip acha maphyir, otte oben bẹ bẹ́, "Màbira kpa nnam z'Ijip zọhng debh ọchattọhk tima kwu."

3 Juda oben otte bẹ́, "Ojinọng nwo ọtọhrọ mina itọhng bẹ́, m'ọdọk ititika sẹ moze, oye bẹ́, motim agbaanatte nwoza kwamina okwu. 4 Ó̱de ácher, atte agbaanatte kwamina ọbọhk otor mina, mm'od-odebh ọchattọhk ochen-ọ. 5 Okenaka, óde ina kẹ ọbọhk atte otor mina, m'ọdọk nnam za mọ̀kpa, okurọ bẹ́, ojinọng nwo kk'mina obena bẹ́, m'ọdọk ititika sẹ moze, oye bẹ́, motim agbaanatte nwoza kwamina, okwu."

6 Jekọb, kw'obir okpena Israẹl, ọbọbh bẹ bẹ́, "Ode yen kw'make-m odikse nwa k'ẹdọngọ? Osempira matek ojinọng nwo bẹ́, bọnga mayen agbaanatte ọdọk-ọdọk ka?"

7 Mapọhn-ẹ bẹ́, "Ojinọng nwo, ọsak ifor ọbọbh mina idik s'imaan ẹsọhmmọr chamina bẹ́, ‘Ma, atte kwabọnga otim orukọ akpen za? Ma, mayen agbaanatte ọdọk-ọdọk za?’ Mina mọpọhn-ẹ ambuma mbo maphyir. Yen kw'wura mina mozong bẹ́, kẹ m'oben mina bẹ́, ‘Màtima agbaanatte nwoza kwabọnga kwu’?"

8 Nya o, Juda oben bẹ́, "Tte nnwa nwa ọbọhk nang-m mọtọn ofona, mfha okwo oning kọ ọmaana mina, ọttara iva pamina ọfhọ. 9 Kaam nnwọhngọ nnang-ọ bẹ́, ọttọhk kẹ mòsi. Ó̱de ina kẹ ntim nkwuna, kaam wọ kw'm'agbana. Tte mgbar ibira ide saam ttattampe. 10 Wúra ńna ogbe oter okibhẹ ma, wura nkk'igbedim ifa ọta okwuna."

11 Ofona nya o, otte kwabẹ Israẹl oben bẹ bẹ́, "Ó̱de ode minna, màtọka ekpo byanẹ py'ejibh-ojibh py'efon m'izek nja mach'ana p'ẹchọkọ, ọmaana akọhnsi biribirẹ, ọmaana ana p'alebh eruk, ọmaana myrrh, ọmaana nkọbh s'mayerẹ kashu, ọttara achiduk p'almọn, yika z'mkpa, mfha mápyirẹ za, manang ojinọng nwo mach'ẹnanga. 12 Màtọka asilva p'asaabhẹ ayọhnga mbo p'wendo oyik ny'abọnga k'mkpa, chen-ẹ. Ṉ́nòsi, wendo mapin-opinẹ. 13 Màbir tima agbaanatte kwabọnga ọdọk, kpa nnam z'ojinọng nwo. 14 Tte Ibinọkpaabyi kw'Ẹfa maphyir osi ojinọng nwo oyena ikwosisi ọmaana bọnga, otte agbaanatte nwoza, ọmaana Bẹnjamin ọbọhk, mator bọnga makwuna. Ṉ́nòde kaam, óde iva mbo paam adim-m, oyinẹ bẹ́, nkk'aam adima."

15 Minna kw'ajinọng mbo atọk nnanga njo ọmaana asilva p'ade igbedim ifa p'uwa bẹ matim, ttara Bẹnjamin, maduk-oduka mafona achina z'Ijip, mad-akebha Josẹph za.

16 K'ogbe kw'Josẹph oze Bẹnjamin ttara bẹ, oben ọtọhmnọng kwẹ bẹ́, "Tima anọng mba china z'kaam k'ọsọhm, afhọ eten atima asi ọchattọhk, okurọ bẹ́, bẹ mm'achi ọttọhk amaan-m m'ẹya."

17 Ojinọng nwo osi k'ose kw'Josẹph obenẹ, otima ivotte mbo ochina z'Josẹph k'ọsọhm. 18 K'ose kw'mapyirẹ ny'ọsọhm kw'Jọsẹph, ojora osi bẹ, machibhẹ bẹ́, "Ṉ́nosi matim mina akwu ma okurọ asilva p'wendo mayik z'amina k'mkpa k'ochedengbe kw'mokwu. Ma, ọd-ọkam bẹ́, ọna mina nnyanya samina, obira otima mina osi abira pẹ yirẹ?"

19 Nya o, mazenga akebha ọtọhmnọng kw'Josẹph ny'ẹsọhmma, maben-ẹ bẹ́, 20 "Ototo, atte, wendo mokwu odebh ọchattọhk ma k'ochedengbe. 21 K'ogbe kw'mọsak k'ibyi janẹ bẹ́, mobhing nya okurọ ch'ewu ikk'ẹpya, ch'nnowong mkpa samina, moze okpuka-bhikse mawanẹ k'ẹkpamma ch'ọnọng-ọnọng. Nkk'akpuka mbo otima ọkpa nnam. 22 M'ọnọng kozong kw'ọtọk akpuka mbo oyika z'amina k'mkpa. Nkk'akpuka ọdọk-ọdọk otima okwu ma bẹ́, modebh ọchattọhk."

23 Ọtọhmnọng nwo oben bẹ bẹ́, "Oning bọnga ojor, odik kode. Ibinọkpaabyi kwabọnga, kw'ode Ibinọkpaabyi kw'uwa ab'atte akpobh, kẹ wọ oke akpuka mbo z'abọnga k'mkpa. Kaam wendo kk'akpuka pabọnga ntọka." Minna kw'ọd-ọtọka Simeọn ochen bẹ.

24 Ọtọhmnọng nwo otima bẹ ochina z'Josẹph k'ọsọhm, ọnang bẹ asi p'mm'atim agbobhọ mmo, obira ọnang nnyanya sabẹ ọchattọhk. 25 Bẹ mado ifor mabira atobha nnanga sabẹ, atima atik Josẹph ch'im'okwuna ny'ẹya, okurọ ch'nkk'abhaanga bẹ́, mm'aninga nya achi ọttọhk.

26 Josẹph okwun nya o, manang-ẹ nnanga njo s'matim, mabira araka nso anang-ẹ. 27 Josẹph ọbọbh bẹ bẹ́, "Osi bọnga yen? Atte nwo kwabọnga kw'ikk'ọtama, kw'wendo magbaak-m odik kwẹ, otim oning akpen za o?"

28 Mapọhn-ẹ bẹ́, "Ọtọhmnọng kwọ, kw'ode atte kwamina, otim oning akpen za k'ofor-gaangẹ." Minna kw'marak nso, mabir atto ayima z'izek, manang-ẹ ikpukpobha.

29 K'ose kw'Josẹph otinẹ ichen, oze ọgbaanọkka Bẹnjamin, ọbọbh bẹ bẹ́, "Agbaanatte nwo kwabọnga kw'ikarẹ kw'wendo mad-aben wọ ma o?" Oben Bẹnjamin bẹ́, "Nnwa kwaam, tte Ibinọkpaabyi osi ọphyaam ọnang-ọ."

30 Josẹph oze ọgbaanọkka nya o, okwo ọsẹ-ẹ z'ettem maa, obina orik bẹ nya, ọd-ọsọhrọ asen z'idongọ sẹ.

31 Obin nya o, oruma ititika, ọbọka ettem, okebh bẹ za, oben bẹ́, "Màbera ọchattọhk."

32 Manang Josẹph ọchattọhk fẹ nkọmẹ, manang ivotte pẹ ọchattọhk fabẹ nkọmẹ, mabira anang anọng mbo p'Ijip p'aning amaana bẹ nya nkọmẹ. K'ẹmaana ch'anọng p'Ijip, ode ẹpaanga bẹ́, oJipnọng ochi ọttọhk k'ibyi majanẹ ọmaana oHiburu-nọng. 33 Wa ivotte mbo aning ẹwọr ny'Josẹph k'ititika ator k'ose kw'ọgbọ kwabẹ ode, tọma k'ocheden maa, pyirẹ k'okpongannam. Pira nnad-abhakẹ akkerẹ ayok, okkonọ bẹ okkonọ. 34 K'ogbe kw'makebh ọchattọhk f'obin z'Josẹph k'okpokkoro anang ivotte pẹ, okebh f'Bẹnjamin otim igbedim ichen ọyọhnga f'ayok. Minna kw'masi odidaama, mabira anyaana ifor agwu atuk amaana Josẹph.