1 Wa k'ewu danẹ, ch'icho ifa ikk'ikpana, Phero ọttaar idachen. Ny'idachen njo, ọttaar ch'obe ny'araangakonga p'Nile, 2 oze abhaam achenọmfa p'ajibh-ojibh, mabira ade ifor ma dọrọdọrọ p'mayinẹ ny'ẹraangattem, m'atọma azizaarẹ ochi-chi ny'araangakonga. 3 Obira oze ch'abhaam achenọmfa p'makok-okokọ, mabira apyibh k'ifor, mayinẹ ny'ọraanga, makwu abe atuma mboza ny'araangakonga. 4 Nya o, abhaam mbo p'apyibhẹ k'ifor, mabọka mboza p'ade ifor ma dọrọdọrọ machi maphyir. Phero okwu ọphyabha k'ọda.

5 Phero obira oyima, ọttaara idachen ọdọk-ọdọk, oze agwu-bhọr achenọmfa p'ade iforma dọrọdọrọ p'maning k'ochi mawanẹ. 6 Obira oze ch'agwu-bhọr achenọmfa p'akok-okokọ ayinẹ nya. Ofum kw'ofon z'ẹbhaakẹ ch'ewuchen ed-eyin, egwu bẹ k'ifor bẹ́ kẹkẹdẹ. 7 Nya o, agwu-bhọr mbo p'akok-okokọ matera amyi mboza achenọmfa p'ade ifor ma dọrọdọrọ. Phero o, okwu ọphyabha, pira notinẹ bẹ́, idachen jọ s'ọttaar nya.

8 Otum ny'ekpebha, ettem ẹtọm-ẹ odik oyiyak. Oyerẹ abọhnganọng ọmaana adikzonganọng p'Ijip maphyir, ọgbaak bẹ ọdachen mvo. Ọnọng kw'okpo ọdachen mvo ọyaakẹ kode.

9 Nya o, oso kw'anọng p'ad-anang Phero atuk oben Phero bẹ́, "Ttatta, menda asi-m njima epinẹ chaam e. 10 Oyen ogbe wanẹ kw'uwa ọdọk-ọ ọmaana kaam, ọttara oso kw'anọng p'ad-anang-ọ ọchattọhk, pira atọka mina ad-agbak z'ọgbakkọhbhisọhm kw'odidennọng kw'akker-agbakkọhbhinọng. 11 K'orungiwu wanẹ, mina anọng afa mọttaar ọdachen. Idachen kpenamkpen iyen ẹyaakẹ chẹ. 12 Wa oyen oHiburu-dikkobh kw'ode ọtọhmnọng kw'odidennọng kw'od-okkerẹ ọgbakkọhbhisọhm. Kẹ wọ kw'uwa mọgbaak ọdachen famina, pira ọyaakẹ ọnang mina. 13 Idik njo ikwu iyin mbengana k'ose kw'uwa ọyaakẹ ọdachen famina. Minna kw'uwa kaam mkpa nnam z'ọtọhm faam, oyok nwoza mafhẹ-ẹ arena k'echi."

14 Minna kw'Phero ọtọhmọ bẹ́, mayerẹ Josẹph anang-ẹ. Mafona mad-ayerẹ Josẹph ẹbhar-ẹbhar z'ọgbakkọhbhisọhm. Ogwo ẹmma nya maphyir o, obhona ẹnya chẹ, pira okwu obe Phero k'ititika.

15 Josẹph okwu nya, Phero oben-ẹ bẹ́, "Nttaara idachen e. Ọnọng kw'okpo ẹyaakẹ osi ọnang-m kode. Okenaka, nkk'aam ateka bẹ́, óde ọnọng ọttaar idachen ọgbaak-ọ, ad-asi ẹyaakẹ anang-ẹ."

16 Josẹph ọpọhna Phero bẹ́, "Kaam ẹfase ndo kinyen. Ibinọkpaabyi wọ im'osi ẹyaakẹ ọkkọkka ch'idachen njo ọnang-ọ."

17 Nya o, Phero oben Josẹph bẹ́, "Nttaar ch'mbe ny'araangakonga p'Nile, 18 nze ch'abhaam achenọmfa p'ade ifor ma dọrọdọrọ mayinẹ ny'ọraanga, mad-achi azizaarẹ ny'araangakonga. 19 Ogbe kobhirẹ, abhaam achenọmfa p'akkok-okkokọ, mabira apyibh k'ifor mayin ny'ọraanga ọdọk. Ch'obobe ode, ẹbhaam ch'epyibhẹ k'ifor mach'abhaam mba ntima nd-nza m'Ijip. 20 Abhaam mbo p'akkok-okkokọ mabira apyibh k'ifor, mabina akwu achi abhaam mboza achenọmfa p'ajibhẹ k'ifor p'achi eden ayin. 21 Chibhẹ ch'nkk'ayok p'ajibhẹ k'ifor acha, matima apyibhẹ ifor mach'makkikken ade. Minna kw'nkwu mgbe mphyabha.

22 "Mbir nyim nya, nttaara ch'nze agwu-bhọr achenọmfa p'ajibh-ojibh, p'abin k'ochi mawanẹ. 23 Pira agwu-bhọr achenọmfa p'achamẹ ifor mayin. Ofum kw'ofon z'ẹbhaakẹ ch'ewuchen ed-eyin, esi bẹ mayọhna. 24 Nya o, agwu-bhọr mbo p'acham-ọchamẹ, mamyi mboza achenọmfa p'majibh-ojibh. Ntek anọng p'ad-asi mbọn ọdachen mva, ọnọng kw'okpo ẹyaakẹ osi ọnang-m kode."

25 Josẹph oben Phero bẹ́, "Ọdachen mvo ọfa oyinẹ ose mawanẹ. K'odik ọkkọkka, Ibinọkpaabyi kk'ẹyaakẹ ọsa ọnang-ọ k'ọttọhk f'im'osi. 26 Abhaam mbo achenọmfa p'ajibh-ojibh, ọmaana agwu-bhọr p'abira ajibh-ojibh, mayinẹ ocho ochenọmfa. 27 Abhaam mbo achenọmfa p'akpong nnam ayin, p'apyibh-opyibh, mabira akkok-okkokọ, mayinẹ icho ichenọmfa s'okwo fiden. Agwu-bhọr mbo achenọmfa p'ofum kw'ofon za ch'ewuchen ed-eyin, magwu k'ifor, mabira ayin icho ichenọmfa s'okwo fiden.

28 "Ttatta, ode k'ose kw'mgbaak-ọ nya bẹ́, Ibinọkpaabyi kk'ọ ọttọhk ọkọhka f'ọkamẹ bẹ́, m'osi. 29 K'icho ichenọmfa, ẹkọma ch'Ijip maphyir m'eyena ọchattọhk f'ọsaabh-ọsaabh. 30 Ó̱gbe nwo ọkpanẹ nya, okwo fiden m'okwu m'izek s'Ijip k'icho ichenọmfa. M'ọgaangẹ maa, anọng m'azaama nyọm njoza s'ọchattọhk olor-olorọ. 31 Okwo mvo m'ọgaangẹ minna maa, anọng m'ọdọk ogbe kw'ochi-chi màjima. 32 K'odik ọkkọkka, pira attaara ọdachen mva igbedim ifa, Ibinọkpaabyi kk'ọttọhk ophyika f'im'osi. Ogbe mòbhir, m'osi-osi.

33 "Madidanma, tte Phero oror ọnọng kw'oyen ezonga ọmaana ekkoji, ọnang-ẹ ẹfa ch'im'okkerẹ izek s'Ijip maphyir. 34 Tte Phero obir ọrọhbha adidennọng ny'obhon, p'mm'ad-akebh ipha s'Ijip k'ibyi ichen, matọka igboka janẹ aye k'ẹyọm kpenamkpen ny'ocho mvo ochenọmfa f'ọchattọhk m'olor-olorọ. 35 Tte matobha ẹchakpo maphyir py'mm'ayena ny'ocho mvo f'm'okwu f'ọchattọhk m'olor-olorọ, m'aye z'ibhondim, k'ẹfa Phero. 36 Mm'aye ẹchakpo mbyo, m'anang anọng z'ogbe kw'ocho f'owora im'okwu ny'Ijip, mfha anọng aning ape k'okwo."

37 Achibhẹ mbo makwu adaakẹ Phero ọmaana anọng p'otim ọbaabha obhon. 38 Ofona nya, Phero ọbọbh bẹ bẹ́, "Ma, anyi wọ kw'mm'oze kw'ode mach'ojinọng nwoma, kw'oyen egwugwuma ch'Ibinọkpaabyi yirẹ?"

39 Nya o, Phero oben Josẹph bẹ́, "Ch'Ibinọkpaabyi kk'ẹyaakẹ ch'idik nja maphyir ọsa ọnang-ọ, oyinẹ bẹ́, ọnọng kw'oyen ekkoji ọmaana ezonga mach'ikọ kode. 40 Kaam kk'ọ nrọhbha bẹ́, ade osonọng kw'ọvaardimpa kwaam. Anọng paam maphyir m'akpobha ọgbaakadik kwọ. Ikpukpobha s'ẹvaar chaam dẹ-dẹ im'ikọhka bẹ́, kaam mbarẹ nyọhng-ọ."

41 Phero ochina ororo oben Josẹph bẹ́, "Tọma menda, kk'ọ ẹfa nnanga bẹ́, abaabha Ijip maphyir."

42 Phero ọwọra ẹvaarbaanga z'ẹnọhna chẹ, oke Josẹph, ọsẹ-ẹ ọfaang kw'ojibh-ojibh, pira nọkẹ-ẹ ọmaan f'gol ny'ẹdọngọ. 43 Ọtọk-ẹ ọnana k'ọkpaar kwẹ kw'nnyanya id-itọr, mach'odukwa kwẹ. Anọng mad-akwọrọ k'ẹrọng bẹ́, "Màbhong-ẹ eden o!" Minna kw'Phero ozeng ọnang Josẹph ediden ch'Ijip maphyir.

44 Phero obir oben Josẹph bẹ́, "Kaam Phero wọ nde ọvaarnọng, okenaka, ọgbaakadik kwọ wọ im'ọbaabha ọttọhk kpenamkpen f'ọnọng osi m'Ijip." 45 Phero okpe Josẹph bẹ́, Zaphenat-Panea, obira ọnang-ẹ ominanwa kw'okpen Asenat k'ọbada, kw'otte kwẹ okpen Potiphera, ọfọhn-nja kw'On.

Josẹph obina, od-osi ọtọhm fẹ, ozenga ọbaana Ijip maphyir.

46 Wa Josẹph ode icho ẹrọbh okwuma ijobh ny'ogbe nwo kw'ọtọm ọtọhm osisi ọmaana Phero kw'ode ọvaarnọng kw'Ijip maphyir. Josẹph obina orik Phero, ọkpaanga Ijip maphyir. 47 Ny'ocho mvo ochenọmfa f'ochi-chi, wa izek ijibhẹ ekpo mawuriji. 48 Josẹph otobha ẹchakpo py'mapha ny'nyọm ọkkọkka njo ichenọmfa ny'Ijip, od-oye z'ibhondim. Wa od-oye ọchattọhk f'obhon kpenamkpen otor k'ọchattọhk f'matubhọ anyọma ny'obhon nwo. 49 Wa Josẹph oye agwu p'asaabhẹ mach'offong kw'ọraanga. Wa masaabhẹ maa, m'ọdọk obhik fabẹ kazong.

50 Pira wa ocho f'okwo fiden okwu, wa Josẹph kk'ajinọngva afa obhona k'ikwanọng kwẹ, kw'ode Asenat, nnwa kw'Potiphera, ọfọhn-nja kw'On. 51 Wa Josẹph okpe ochedennwa kwẹ bẹ́, Manasẹ*, oben bẹ́, "K'odik ọkkọkka, Ibinọkpaabyi kk'aam ọsa bẹ́, nzaama irem saam, ọttara echimma ch'atte kwaam." 52 Josẹph okpe ojinọngnwa kw'ottong afa Ephraim*, oben bẹ́, "Ibinọkpaabyi kk'aam ọsa nyena iva m'izek nja s'ntọk irem."

53 Nya o, ocho mvo ochenọmfa f'ochi-chi ny'Ijip okwu ọkpọka, 54 ocho ochenọmfa f'owora ọtọma, mbengana k'ose kw'uwa Josẹph ikk'ọgbaaka. Wa ọchattọhk oworọ mawuriji z'nkọma njoza maphyir. Z'Ijip kẹ-kẹ kw'uwa ọchattọhk ọsaabh-ọsaabh. 55 K'ogbe kw'ọchattọhk ọtọm owuwor ny'Ijip, okwo fiden ọtọma anọng okikaama, minna kw'mabhomọ akpẹkẹ Phero. Ofona nya, Phero oben bẹ bẹ́, "Màzọhng kebha Josẹph za, màsi k'ose kw'obenẹ bọnga."

56 K'ogbe kw'uwa okwo kk'ọgaanga maa, ọnyaamẹ ny'Ijip maphyir, Josẹph ogwunga isọhm njo s'iwa maye ẹchakpo, okpe fẹ ọnang anọng p'Ijip. 57 Wa anọng mad-abina z'nkọma ọdọk-ọdọk makwu ny'Ijip, madebh ọchattọhk ny'Josẹph k'mbọhk, okurọ bẹ́, wa okwo okem ẹgaanga k'ibyi kpenamkpen.