1 Wa Ọvaar Ibinọkpaabyi osi ejibha ọnang Sara k'ose kw'uwa ikk'ocheka. 2 Sara okwu otima ibhọr, ọmaan Abraham ojinọngnwa k'ogbe kw'Abraham ikk'ọtama. Wa nnwa nwo ọmmaan k'ogbe kw'Ibinọkpaabyi ochekẹ bẹ́, m'ọmmaana. 3 Abraham ọkpẹ-ẹ Isaak.

4 Okwu opyirẹ iwu ochenọnttaan s'nnwa nwo ọmmaan, Abraham obhir-ẹ ọnọm k'ose kw'Ibinọkpaabyi ikk'ẹ oteka. 5 Ny'ogbe kw'Isaak ọmmaan, Abraham ode icho arọbh achen.

6 Sara oben bẹ́, "Ibinọkpaabyi kk'aam ọsa bẹ́, mma asa. Ọnọng kpenamkpen kw'ọbhaang odik nwa, m'otor-m mọmma asa." 7 Obir oben bẹ́, "Bọng-ọnọng wọ iwura oben Abraham bẹ́, Sara m'ọmaan iva? Chibhẹ nya, kk'ojinọngnwa mmaana nnang-ẹ k'atam."

8 Minna kw'nnwa nwo obeng maa, matim-ẹ ẹba. Okwu opyirẹ ny'ewu ch'makwur-ẹ, Abraham osi odidaama kwiden.

9 Ewu danẹ, Sara oze nnwa kw'Hagar nwo kw'ofon Ijip ọmaanẹ ọnang Abraham, ch'ọd-ọmma Isaak asa. 10 Sara oze nya o, oben Abraham bẹ́, "Kwubh obirakwanọng nwoma ọttara nnwa kwẹ mafona. Kọbaan bẹ́, nnwa kw'obira nwoma oyen okebh k'ojibhada kwọ kw'nnwa kwaam Isaak im'ochi obo."

11 Odik nwo ọyakẹ Abraham odik z'ettem mawuriji, okurọ bẹ́, Ishimayẹl obir ode nnwa kwẹ ọdọk. 12 Okenaka, Ibinọkpaabyi okwu oben Abraham bẹ́, "Ettem ening-ọ odik ẹyakẹ okurọ nnwa nwo kwọ ọmaana ọkka kwẹ. Si ọttọhk kpenamkpen f'Sara oben-ọ bẹ́, asi, okurọ bẹ́, m'ofona k'Isaak, kọ ayena iva k'ọsaabh k'ose kw'uwa ikk'ncheka nnang-ọ. 13 Kaam m'nsi nnwa nwo kw'obiranọng nwo ọmaanẹ, obir oyena iva k'ọsaabh p'mm'asi ẹkọma chiden, okurọ bẹ́, kẹ obir ode nnwa kwọ ọdọk."

14 Minna kw'Abraham obin k'ekpikpebha, ọtọka ọchattọhk ọnang Hagar, obir oke asi k'ẹkpa ch'matim etenkpa asi, ọnang-ẹ, ọtọka ekpo mbyo ọnan-ẹ k'ebubaang, okwubh-ẹ ọttara nnwa kwẹ. Kwanọng nwo ofona, od-owena z'ibyi s'anọng nna arukọ, z'ẹbhaakẹ ch'Beershẹba.

15 K'ogbe kw'asi mbo nkk'asa maphyir, Hagar ọtọka nnwa nwo osok ny'ofokodo kw'echi danẹ, 16 ofona orik-ẹ nya, ozenga makikaarẹ od-oninga ẹwọr, oben ifor sẹ bẹ́, "Kaam mìmkpo nninga nze ch'nnwa nwo im'ope." K'ose kw'oning ẹwọr nya, osorọ asen.

17 Ibinọkpaabyi ọbhaanga ẹmọng ch'nnwa nwo, ozeng-eden kw'Ibinọkpaabyi oninga z'ẹrọng, owon Hagar, oben-ẹ bẹ́, "Hagar, ode yen? Oning-ọ ojor, Ibinọkpaabyi kk'ẹmọng ch'nnwa kwọ ọbhaanga ch'oyim nya. 18 Bina, zọhng bọk-ẹ ny'ọbọhk. Kirẹ kaam m'nsẹ-ẹ ode otte kw'ẹkọma chiden."

19 Nya o, Ibinọkpaabyi owonga Hagar achen, oze esipe, ọd-ọtọka ẹkpa ndo chẹ, ọkaabha asi oke nya maa, mafu, ọtọka ọnang nnwa, ogwo.

20 Wa Ibinọkpaabyi oning ọmaana nnwa nwo k'ose kw'od-obenga. Kẹ wa orukọ z'ibyi s'anọng nna arukọ, okwu ode ọgbaaji kwiden. 21 Nya ch'iwa orukọ za ch'anọng nna arukọ z'Paran, ọkka ọd-ọtọka kwanọng z'Ijip, ọnang-ẹ k'ọba.

22 Ny'ogbe nwo, Abimẹlẹk otima Phikol kw'ode osonọng kw'asoja pẹ, oben Abraham bẹ́, "Mina nkk'ọza bẹ́, Ibinọkpaabyi oning ọmaan-ọ k'idik maphyir s'ikọ asi. 23 Nya o, kaam mben-ọ bẹ́, achekẹ anang-m k'Ibinọkpaabyi k'ititika bẹ́, kọ kaam mabọhra, ọmaana iva paam, ọttara iva p'iva p'ikwuna iva paam mm'abhon. K'ose kw'nd-nsi ẹmmaana ọkkọkka ntima ntor-ọ, ọbaan bẹ́, kọ abir agbaka ifor amaana kaam ọttara ẹkọma nda ch'arukọ ma mach'okikennọng."

24 Abraham ọpọhn-ẹ bẹ́, "Kaam kk'ncheka minna."

25 Nya o, Abraham otek Abimẹlẹk odik kw'esipe ch'atọhmnọng p'ikẹ Abimẹlẹk nkk'ẹ ana. 26 Abimẹlẹk oben-ẹ bẹ́, "Ọnọng kw'osi ọttọhkse mva kinzong, kọ kaam odik nwoma katekẹ. Ma wọ ode ocheden-gbe kw'ikaam mmaang odik nwa."

27 Nya o, Abraham ọtọka arọkimaan ọttara adamogbodo ọnang Abimẹlẹk, bẹ anọng afa machekẹ anang ayok. 28 Abraham ọrọhbha arọkimaanpa pẹ achenọmfa, ọkọm osok. 29 Abimẹlẹk ọbọbh Abraham bẹ́, "Arọkimaanpa pẹ achenọmfa mba p'akọm asok ma, ayinẹ yen?" 30 Abraham ọpọhn-ẹ bẹ́, "Kọ chera bẹ́, m'atọka arọkimaanva mba achenọmfa m'kaam k'ọbọhk mach'nttẹsẹ bẹ́, kaam wọ ntumọ esipe nda."

31 Ofona nya o, mayerẹ ibyi njo bẹ́, Beershẹba, okurọ bẹ́, nya wọ kw'anọng mbo afa maning achekẹ anang ayok.

32 Ch'nkk'echekẹ ndo achera z'Beershẹba, Abimẹlẹk ọmaana Phikol kw'ode oso kw'asoja mabina abhana z'ẹbhaakẹ ch'aPhilistiya. 33 Nya o, Abraham ogbon echi ch'mayerẹ tamarisk ny'Beershẹba, oninga nya okpobha Ọvaar Ibinọkpaabyi kw'ode Ibinọkpaabyi kw'ttattampe. 34 Wa Abraham orukọ mach'okikennọng ny'ẹbhaakẹ ch'aPhilistiya k'icho k'ẹkaan.