1 Nya o, Josẹph obina od-otek Phero bẹ́, "Atte kwaam ọmaana ivotte paam kk'etirakpo pyabẹ ọmaana oyena kwabẹ atima abina z'Kenaan apyirẹ m'Goshẹn." 2 Josẹph ọrọhbha ivotte pẹ anọng achen, otima bẹ ọd-ọkọhka Phero.

3 Phero ọbọbh bẹ bẹ́, "Bọng-ọttọhk vọ ode ọtọhmbọhk fabọnga?"

Mapọhn-ẹ bẹ́, "Ttatta, mina atọhmnọng pọ mode akker-arọkimaan mach'iwa ab'atte pamina ade. 4 Mina nkk'ọkwa ma bẹ́, moruk k'ogbe biribirẹ, okurọ bẹ́, okwo f'oning z'Kenaan okem ẹgaanga. Etirakpo pyamina ọdọk azizaarẹ keyen py'echi. Ototo, tte mina ọbọhk moruk m'Goshẹn."

5 Phero oben Josẹph bẹ́, "Ch'atte ọmaana ivotte nkk'ọ akebha ka, 6 kkerẹ izek s'ijibh-ojibh nang bẹ maruk. Izek s'Ijip ining k'ikọ k'mbọhk. Tte bẹ maruk ny'Goshẹn. Ó̱de abira azonga anọng ny'abẹ k'ottem p'otentọhm ọkaam okkunọ mawuriji, tte etirakpo pyaam ọbọhk nang bẹ makkerẹ."

7 Nya o, Josẹph otima otte ọd-ọkọhka Phero. Jekọb osi Phero ittabọhng. 8 Phero ọbọbh Jekọb bẹ́, "Ma, kọ ade icho iphaang o?"

9 Jekọb ọpọhn-ẹ bẹ́, "Kaam kk'ozenga nsa k'icho arọbh achadanẹ okwuma ijobh. Icho saam kìsaabhẹ, idik ibira igaang-m. Icho saam kipyirẹ mach'icho s'ab'ttatta paam atim asi ozenga kwabẹ." 10 Nya o, Jekọb obir osi Phero ittabọhng, pira nobin ny'ikẹ k'ititika.

11 Minna kw'Josẹph osi k'ose kw'Phero ikk'obena. Ọtọka izek njo s'ijibh-ọtam, z'ẹbhaakẹ ch'Rameses, ọnang otte ọmaana ivotte bẹ́, maruk. 12 Obira ochina ororo ọrọk otte, ọmaana ivotte, ọttara ẹsọhmmọr ch'otte maphyir. Wa ọd-ọnang bẹ ọchattọhk otor k'ose kw'obhik f'iva pabẹ ode.

13 Ny'ogbe nwo, wa ọchattọhk okem ewora ny'izek njo maphyir okurọ ch'iwa ekimẹ-kimẹ ẹyak ọbọhk ẹgaangẹ. Anọng p'Ijip ọmaana p'Kenaan mayọhna k'ifor mawuriji okurọ okwo mvo. 14 Josẹph otobha akpuka maphyir p'ikk'anọng p'Ijip ọttara anọng p'Kenaan ọchattọhk ọkpa, ochena Phero z'odimpa. 15 K'ogbe kw'akpuka ikk'anọng p'Ijip ọmaana anọng p'Kenaan asa, anọng p'Ijip maphyir mabina akebha Josẹph, maben-ẹ bẹ́, "Atte, akpuka kk'mina asa e. Kayen kw'mm'ope m'ikọ k'ititika? Nang mina ọchattọhk! Akpuka pamina kk'asa."

16 Josẹph oben bẹ bẹ́, "Ó̱de akpuka pabọnga kk'asa, màchen-m etirakpo pyabọnga ntima nsi mmona k'ọchattọhk." 17 Minna kw'mafon ad-atọka etirakpo pyabẹ achena Josẹph, osi mmona k'ọchattọhk ọmaana nnyanya sabẹ, ọmaana arọkimaan ọttara avu pabẹ, ọmaana abhaam ọttara nnyanyava. Ọnang bẹ ọchattọhk f'machi ny'icho nwo k'mmona s'etirakpo pyabẹ.

18 K'ogbe kw'icho nwo kk'ọsa, makwu akebha Josẹph ch'icho kk'ọbhaka, maben-ẹ bẹ́, "Atte, m'ọdọk kọ odik mokpo odubh. Akpuka kk'mina asa, etirakpo pyamina nede pyọ. M'ọttọhk ọdọk-ọdọk koyen kw'ọkpanẹ ifor ọttara izek samina jẹ-jẹ. 19 Kayen kw'm'akkerẹ mina nya mope ttara izek samina m'ikọ k'ititika? Debh mina ọttara izek samina, mfha m'oyena ọchattọhk f'mm'ochi. Mina ọmaana izek samina mm'oninga k'ebira ch'Phero. Bira nang mina akpomọma, mfha izek samina ining ilukọ."

20 Minna kw'Josẹph ozeng odebh izek s'Ijip maphyir ọnang Phero. Anọng p'Ijip makpe ozek fabẹ kawanẹ-kawanẹ maa, ọsa, okurọ ch'iwa okwo ọyak ọbọhk ọgaangẹ. Izek njo ikwu ide s'Phero. 21 Nya o, Josẹph osi anọng mbo made abira z'ẹkọma ch'Ijip maphyir. 22 Okenaka, wa Phero izek s'afọhn-nja kodebhẹ, okurọ bẹ́, wa Phero oyen okebh f'ọd-ọnang bẹ k'ogbe k'ogbe. Nya wọ osi m'izek sabẹ kakpe.

23 Josẹph oben anọng mbo bẹ́, "Bọnga nkk'aza bẹ́, kk'bọnga ọttara izek sabọnga ndebha nnang Phero. Màtọka akpomọma mba zọhng gbon z'abọnga k'iwonọ. 24 Ṉ́kk'ipha asa, màkebh ekpo mbyo k'nkwurọ ichen, matọka ekwurọ danẹ anang Phero. Nkwurọ njoza nna, màsok k'ẹtubha, mabir asok mach'ọchattọhk f'isọhmmọr sabọnga ọttara f'iva pabọnga."

25 Bẹ maben bẹ́, "Kọ kk'akpen pamina akkaana! Tte ettem ẹdaam ttatta kwamina. Nkk'ochera bẹ́, mode abira p'Phero."

26 Minna kw'uwa Josẹph osok ọsana kw'ọmaan izek s'Ijip bẹ́, anọng min'ad-akebh ekpo py'mapha k'nkwurọ ichen, matọka ekwurọ danẹ anang Phero. Ọsana nwo otim obe za maa, pyirẹ menda. Izek bung-bungọ s'iwa ina s'Phero ide, ide izek s'afọhn-nja.

27 Minna kw'uwa anọng p'Israẹl marukọ ny'Ijip ny'ẹbhaakẹ ch'Goshẹn. Makwu ayena izek nya. Idik ijibh inang bẹ, mayena iva k'ọsaabh.

28 Wa Jekọb orukọ ny'Ijip k'icho ichi kkamfa. K'akpen pẹ kibung-kibungọ, wa orukọ icho arọbh achenọmfa okwuma achenọmfa. 29 K'ogbe kw'kẹ min'ope, Jekọb oyerẹ nnwa kwẹ Josẹph, oben-ẹ bẹ́, "Ó̱de ikk'ọ idik ndaaka, si ọkkaan nwa nang-m. Yika ọbọhk kwọ m'kaam k'ntaak, chekẹ bẹ́, kọ m'asi ọphyaam anang-m, abira asi ọkkọkka anang-m bẹ́, kaam m'Ijip manọhnga. 30 Tin-m m'Ijip ad-anọhng-m za ch'ab'ttatta paam manọhng."

Josẹph ọpọhn-ẹ bẹ́, "Kaam m'nsi-osi k'ose kw'abenẹ."

31 Jekọb oben-ẹ bẹ́, "Chekẹ nang-m." Josẹph o, ochekẹ ọnang-ẹ. Minna kw'Israẹl ọrak eso ọnana agba ny'ochikwura kwẹ, ọnang Ibinọkpaabyi ikpukpobha.