1 Jekọb obir obina ozenga, azeng-eden p'Ibinọkpaabyi ayin akebh-ẹ.

2 Oze bẹ nya, oben bẹ́, "Ma wọ ode ibhinga-byi s'Ibinọkpaabyi." Ofona nya, okpe ibyi njo Mahanayim*.

3 Jekọb ọtọhm azeng-eden pẹ bẹ́, machẹ-ẹ eden akebha ọgbaanọkka Ẹsau z'Seir kw'ode ẹkọma ch'Edom. 4 Oben bẹ bẹ́, "Odik kw'mm'agbaak atte kwaam Ẹsau ode bẹ́, ‘Kaam ọtọhmnọng kwọ Jekọb, mbenẹ bẹ́, tọma za maa, pyirẹ ma, nning mmaana Laban. 5 Kaam kk'abhaam, ọmaana nnyanya, ọmaana arọkimaan, ọmaana avu, ọttara atọhmnọng k'ejinọng, ọttara k'ẹpanọng, nyena. Ntọhmọ ẹkkaabha nda nnang kọ atte kwaam, ọfha nyena ọdaam z'ikọ k'ititika.’ "

6 K'ogbe kw'azeng-eden mbo p'Jekọb makpa nnam za ch'ọtọhmọ bẹ, makebh-ẹ, maben-ẹ bẹ́, "Nkk'agbaanakka kwọ Ẹsau ọd-ọza. Kẹ oter okwuma z'eden ọmaana anọng ẹnọhna bẹ́, okwu okebh-ọ e."

7 Nya o, Jekọb okwu ojor-ẹ, ettem ebir ẹyak-ẹ odik maa, ọtọka anọng p'otim, ọbhaangẹ k'nkwurọ mfa, obir ọbhaangẹ arọkimaan, ọmaana abhaam, ọttara akamẹl. 8 Ochibhẹ bẹ́, "Ó̱de Ẹsau okwu orima ẹkaan danẹ ábẹ̀, ńnòsi ndoza ch'erikẹ, m'ẹrọbh ẹnaanga."

9 Nya o, Jekọb oze njọm bẹ́, "O Ọvaar Ibinọkpaabyi kw'atte kwaam Abraham, ọmaana kw'atte kwaam Isaak, kọ kw'aben-m bẹ́, ‘Kpa nnam z'ẹkọma chọ, ọmaana z'anọng pọ. Kaam m'nsi idik ijibh inang-ọ.’ 10 Kaam ọtọhmnọng kwọ k'ọphyaam fọ, ọmaana ididaaka sọ maphyir-phyir, kimbaan. Kaam wa njek ọraanga kw'Jọrdan mmaana ochikwura kwaam kẹ-kẹ. Menda, kaam n'nde nkkaana mfa. 11 Ototo, kkaan-m arọhbh-m k'mbọhk s'agbaanakka kwaam Ẹsau. Ojor-m bẹ́, kẹ m'okwu orim-m ábẹ̀, obir orima ọmaana iva paam, ọttara ab'ọkka. 12 Okenaka, kọ wa abenẹ bẹ́, ‘Kaam m'nsi idik ijibh inang-ọ, mbir nsi iva p'iva pọ masaabh mach'ofong kw'ẹraangaka kw'ina obhika ode.’ "

13 Ny'erungọ ndo, Jekọb obhing nya, oteka nnanga ny'oyena kwẹ, s'im'ọnang ọgbaanọkka, Ẹsau. Nnanga njo ide: 14 avugboka arọbh ijobh, ọmaana abhọngkpẹ ẹrọbh, ọmaana arọkimaan p'panọng arọbh ijobh, ọttara arọkimaandim ẹrọbh, 15 ọmaana akamẹl p'panọng ẹrọbh obhirẹ ijobh, ọttara iva pabẹ, ọmaana abhaam p'panọng arọbh afa, ọmaana abhaamdim ijobh, ọmaana nnyanya s'panọng ẹrọbh, ọttara adimpẹ pẹ ijobh. 16 Ọtọka ẹkaan kadanẹ-kadanẹ, ọnang atọhmnọng bẹ́, makkerẹ, obir oben bẹ bẹ́, "Màchi-m eden zọhng. Tte ẹkkaan kpenamkpen ezenga erik oyok obhokọ."

17 Oben oyok kw'ochi eden bẹ́, "K'ogbe kw'attem amaana agbaanakka kwaam Ẹsau, óde ọbọbh-ọ bẹ́, ‘Kọ ade kw'anyi? M'ata men? Anyi wọ oyen nten nja s'ining-ọ m'ititika?’ 18 Kọ m'apọhn-ẹ bẹ́, ‘Ọtọhmnọng kwọ Jekọb wọ oyen e. Ẹnanga ch'ọtọhmọ ọnang atte kwaam Ẹsau, dọ nya e. Kẹ oyenẹ okwuma z'eden e.’ "

19 Minna kw'Jekọb obir ọtọhn ẹkaan ch'ettong mfa, ọmaana ch'ettong nttaan, ọttara ayok p'atorọ nten njoza maphyir bẹ́, "Bọnga mm'agbaak edikdaak ndo madanẹ k'ogbe kw'mattem amaana Ẹsau. 20 Nkàzaama bẹ́, matek-ẹ bẹ́, ‘Ọtọhmnọng kwọ Jekọb, okwuma z'eden.’ " Jekọb oben z'ettem bẹ́, "Kaam m'ntima nnanga nja s'ikk'eden icha, nsi ettem elebh-ẹ, ọfha k'ogbe kw'mm'oze ayok, ọtọk-m k'ettem ọkkọkka." 21 Nya o, atọhmnọng p'Jekọb, matima nnanga achi eden afona. Kẹ oyenẹ, oyima ny'ibhinga-byi ny'erungọ ndo.

22 Ny'erungọ ndo, Jekọb obina, ọtọka panọng pẹ afa, ọmaana atọhmnọng pẹ afa p'panọng, ọttara ajinọngva pẹ ijobh kawanẹ, ozenga ny'ibyi s'igbẹr-ọgbẹrẹ ojeka ọraanga kw'Jabọk. 23 Ojek bẹ nya o, obir ọtọhm oyena kwẹ maphyir ojeka z'okwubha. 24 Okwu orik Jekọb kẹ-kẹ nya. Ojinọng wanẹ okwu orim-ẹ ábẹ̀ maa, ewu esobha. 25 K'ogbe kw'ojinọng nwo oze bẹ́, kẹ kokpo okema, otwu Jekọb ny'ogbok, ogbok-kọbhọ kw'Jekọb ọpyaarẹ. 26 Nya o, ojinọng nwo oben-ẹ bẹ́, "Tte-m ọbọhk mfona, kirẹ ewu k'esobha." Jekọb ọpọhn-ẹ bẹ́, "Kaam kọ ọbọhk mìntte, oye bẹ́, kk'aam ada."

27 Ojinọng nwo ọbọbh-ẹ bẹ́, "Kọ akpen yen?" Kẹ ọpọhn-ẹ bẹ́, "Mkpen Jekọb."

28 Ojinọng nwo oben-ẹ bẹ́, "Kọ ọdọk Jekọb màkpena, nakpen Israẹl, okurọ bẹ́, kk'arima amaana Ibinọkpaabyi, ọttara ayokinọng, akema."

29 Nya o, Jekọb oben-ẹ bẹ́, "Ototo, tek-m eche chọ." Kẹ ọpọhn-ẹ bẹ́, "Kayen kw'abọbhọ eche chaam?" Minna kw'ozeng odo Jekọb nya.

30 Ofona nya, Jekọb okpe ibyi njo bẹ́, Pẹniẹl*, oben bẹ́, "Kaam kk'Ibinọkpaabyi nza ttara achen paam afa, chibhẹ nya, ntim nrukọ akpen ka."

31 Nya ch'ewu nebe k'eso, Jekọb ọkpan Pẹniẹl, od-ogbekẹ okurọ ogbok-kọbhọ kwẹ. 32 Kẹ wọ osi, tọma z'ogbe nwo maa, pyirẹ ma, anọng p'Israẹl m'eten ch'ẹbọk ọkọbhọ kw'ogbok kw'eten kpenamkpen kad-achi, okurọ bẹ́, ny'ogbok wọ kw'uwa mamumọ Jekọb ọttọhk.