1 Okwu opyirẹ k'ogbe wanẹ, Ibinọkpaabyi ọnang Abraham eyoma. Oyer-ẹ bẹ́, "Abraham!"

Abraham ọpọhn-ẹ bẹ́ "Kirẹ kaam ma."

2 Ibinọkpaabyi oben-ẹ bẹ, "Tọka ojinọngnwa kwọ Isaak, kw'ode ojinọngnwa kwọ manchenẹ kw'asokọ ettem, tim-ẹ china z'ẹbhaakẹ ch'Moriya. Tim-ẹ fọhnọ ẹja ch'ẹkwọmọ ny'egbe danẹ ch'im'ntibh-ọ nang-m."

3 Ewu esobh nya, k'ekpikpebha, Abraham obina, ọtọka ẹtọhka ọdabh ẹnyanya chẹ, ọtọka atọhmọ pẹ afa ọttara nnwa kwẹ, Isaak, ọkpaara ommenẹ f'im'obeng-ẹ k'ẹja ch'ẹkwọmọ, ọtọma ozenga ochina z'ibyi s'Ibinọkpaabyi ikk'ẹ otibha.

4 Ottong iwu ittaan nya o, Abraham otinẹ achen k'ẹrọng, oze ibyi njo s'Ibinọkpaabyi oben-ẹ z'ororo. 5 Oben atọhmọ pẹ bẹ́, "Màbe ma maana ẹnyanya nda; kaam ọttara ojinọngnwa nwoma, mm'ochina kina ororo, mod-okpobha Ibinọkpaabyi. Ode nkk'ochera, mm'ọkpa nnam okebha bọnga ma."

6 Abraham ọtọka ommenẹ f'im'otima ọfọhnọ ẹja ch'ẹkwọmọ, ọnana Isaak, kẹ oyenẹ otima ekpon ọttara imaana. 7 Ch'nd-azenga ny'eden o, Isaak ọbọbh otte Abraham bẹ́, "Ttatta kwaam?"

Otte ochera bẹ́, "Owee, nnwa kwaam."

Isaak oben-ẹ bẹ́, "Ommen ọttara ekpon ening ma. Okenaka, ọrọkimaan kw'mm'otima ọfọhnọ ẹja ch'ẹkwọmọ kẹ?"

8 Abraham ọpọhn-ẹ bẹ́, "Nnwa kwaam, Ibinọkpaabyi ny'ikẹ k'ifor m'ọnang mina ọrọkimaan kw'mm'otima ọfọhnọ ẹja ndo ch'ẹkwọmọ."

Minna kw'bẹ anọng afa machin ororo k'ozenga kwabẹ.

9 Mapyirẹ ny'ibyi s'Ibinọkpaabyi otibh-ẹ nya o, Abraham ottima ija-byi nya, obir ọtọka ommen otobha nya. Okwu ọtọka nnwa kwẹ, Isaak ọdabh-ẹ mbọhk ọttara mmo, otin-ẹ orurọ ny'ommen ẹrọng. 10 Okwu onemẹ ọbọhk ọtọka imaana bẹ́, ọfhọ nnwa kwẹ.

11 Pira ozeng-eden kw'Ọvaar Ibinọkpaabyi oninga z'ẹrọng oyer-ẹ bẹ́, "Abraham! Abraham!" Kẹ ọpọhna bẹ́, "Kirẹ kaam ma."

12 Ozeng-eden nwo oben-ẹ bẹ́, "Nnwa nwo ọttọhk kpenamkpen kàsi o! Kaam kk'nza bẹ́, kọ ayen ojora f'Ibinọkpaabyi mawuriji, okurọ ch'ina abhumọ bẹ́, anang-m nnwa kwọ manchenẹ."

13 Minna kw'Abraham otinẹ ichen oze ọrọkimaandim kw'ikk'abhik otima ọdama ny'ẹdabhẹ. Ọtọka ọrọkimaandim nwo otima ọfọhnọ ẹja ch'ẹkwọmọ, k'eso ch'nnwa kwẹ. 14 Nya o, Abraham oyerẹ ibyi njo bẹ́, "Ọvaar Ibinọkpaabyi wọ im'ọnang." Tọma za maa pyirẹ menda, anọng ad-aben bẹ́, "Ny'egbe ch'Ọvaar Ibinọkpaabyi, Kẹ m'ọnang-ọnang."

15 Ozeng-eden kw'Ọvaar Ibinọkpaabyi obir oninga z'ẹrọng oyerẹ Abraham ttonga igbedim ifa, 16 oben bẹ́, "Nchekẹ k'eche ch'kaam Ọvaar Ibinọkpaabyi bẹ́, okurọ ch'ina abhumọ bẹ́, anang-m ojinọngnwa kwọ manchenẹ, 17 kaam m'ndọ-ọ k'odik ọkkọkka, mbir nsi iva p'iva pọ masaabh mach'ndidorọ s'ọrọngkpakpa, mabir asaabh mach'ofong kw'ẹraangapa. Iva p'iva pọ mm'ana awawunanọng pabẹ ibhondim sabẹ. 18 M'ofona ny'iva p'iva pọ, nkọma s'iyagbin maphyir iyena ẹda chaam, okurọ bẹ́, akpobh idik saam."

19 Nya o, Abraham ọkpa nnam od-okebha atọhmnọng pẹ za, matọn abhana z'Beershẹba. Wa Abraham osi oruk kwẹ ny'Beershẹba.

20 K'ogbe wanẹ, matekẹ Abraham bẹ́, Milka kk'ajinọngva ọmaana ọnang Nahọr, kw'ode ọgbaanọkka kw'Abraham. Wa iva mbo made

21 Uz kw'ode ochedennwa,

ọmaana Buz kw'otor-ẹ nnam,

ọmaana Kẹmuẹl (kw'ode otte kw'Aram),

22 ọmaana Kẹsẹd,

ọmaana Hazo,

ọmaana Pildash,

ọmaana Jidlaph,

ọttara Bẹtuẹl. 23 Bẹtuẹl wọ uwa ode otte kw'Rẹbẹka. Wa Milka ọmaanẹ iva mba ochenọnttaan ọnang Nahọr kw'ode ọgbaanọkka kw'Abraham.

24 Wa kwanọng ọdọk-ọdọk kw'Nahọr kw'okpen Reuma, obir ọmaan-ẹ ajinọngva, p'ade Tẹba, ọmaana Gaham, ọmaana Tahash, ọttara Maaka.