1 Nya o, Josẹph oben ọtọhmnọng kwẹ bẹ́, "Tọka ọchattọhk f'ọsaabh-ọsaabh ke anọng mbo ny'mkpa sabẹ k'ose kw'mm'akpo atọhka. Abira ayika asilva p'ọnọng-ọnọng ny'ẹkpamma chẹ. 2 Akwu atọka ọkkọbh kwaam kw'ode silva ayika ny'ẹkpa ch'oyok kw'ikarẹ, ọttara asilva pẹ p'otim odebh ọchattọhk." Ọtọhmnọng nwo, osi k'ose kw'Josẹph obenẹ.

3 K'ose kw'ewu esobh, ny'ekpikpebha, matọhm ajinọng mba k'eden ọmaana nnyanya sabẹ, mafona. 4 Ogbe kobhirẹ, Josẹph oben ọtọhmnọng kwẹ bẹ́, "Sẹr-ọsẹr kwubh anọng mbo z'eden. Ó̱de ákebh bẹ, ben bẹ bẹ́, ‘Ó̱de yen kw'matim epyibha atera ejibha ch'masi anang bọnga o? 5 Ọkkọbh kw'atte kwaam od-otima ogwo asi, obira od-otima ọbharẹ ọsẹ zang ma? Ọttọhk f'masi ma, maphyir-phyir, kojibhẹ.’ "

6 Ọtọhmnọng nwo okebhẹ bẹ nya o, ọgbaak odik nwo-nwo ọnang bẹ. 7 Mapọhn-ẹ bẹ́, "Osempira odikse nwo oyin ttatta kwamina k'ẹmma? Mina mm'osi yen osi ọttọhkse mvo? 8 Mina moter otima asilva p'moze z'amina k'mkpa z'Kenaan okwu orik. Kayen kw'mina mm'ofu silva, obir ode gol kw'atte o? 9 Ọnọng kpenamkpen kw'maze ọkkọbh nwo z'ikẹ k'ẹkpa, m'opupe. Tte mina ayok mboka maphyir, mode abira p'atte kwọ."

10 Ọtọhmnọng nwo ọpọhn-ẹ bẹ́, "Iya, tte ode mach'mabenẹ. Ọnọng kw'mm'nzẹ ọkkọbh nwo k'ikẹ k'ẹkpa, m'ode obira kwaam. Bọnga ayok mboza, mbọhk sabọnga iwur-owur."

11 Minna kw'ọnọng-ọnọng ọsak ẹkpa chẹ ny'izek, ọchaarẹ ẹkpamma. 12 Ọtọhmnọng nwo o, ọtọma ny'odidennọng kwabẹ, ogbokọ maa, opyirẹ z'oyok kw'ikarẹ. Nnaze ọkkọbh nwo z'Bẹnjamin k'ẹkpa. 13 Maze nya o, ivotte ayaakẹ ẹfọrakpo py'abẹ k'ifor. Matọka ntọhka sabẹ anana nnyanya, makpa nnam z'obhon kw'uwura mafon.

14 Wa Josẹph otim oning z'ọsọhm k'ogbe kw'Juda ọmaana ivotte mapyirẹ za. Minna kw'matto z'izek, matọma nkwukọ. 15 Josẹph oben bẹ bẹ́, "Bọng-ọttọhk-kira f'masi ma? Oye bọnga nkazong bẹ́, ọnọngkira mach'kaam oze iyaan s'm'okpo ozonga odik kw'im'oyin z'ogbe ororo?"

16 Juda ọpọhn-ẹ bẹ́, "Atte, bọng-odik kw'mm'obira ọgbaak ọdọk o? Yen kw'mm'ozenga okona ifor samina? Ibinọkpaabyi kk'itama s'mina atọhmnọng pọ ọyaaka k'ọyaankpa. Tọma menda, mina ọttara oyok nwo kw'maze ọkkọbh nwo z'kẹ k'ẹkpa, nnode abira pọ."

17 Okenaka, Josẹph oben bẹ́, "Tcha! Kaam minna mìnsi e. Ọnọng nwo kw'ofu ọkkọbh kwaam wọ im'ode obira kwaam e. Bọnga mboza maphyir, mabhana kebha atte za k'ọdaam."

18 Nya o, Juda obina okebha Josẹph, oben-ẹ bẹ́, "Ttatta, nyen odik kw'nd-nkam bẹ́, mgbaak-ọ. Ototo, oning-ọ ọdọkọ. Nzong za bẹ́, kọ ade mbengana mach'Phero. 19 Ttatta, k'ogbe kw'abọbh mina bẹ́, ‘Ma, bọnga mayen atte ọttara agbaanatte ọdọk-ọdọk za yirẹ?’ 20 Mọpọhn-ọ bẹ́, ‘Moyen atte kw'ikk'ọtama, ọmaana ojinọngnwa wanẹ kw'obhonọ k'atam. Wa ọgbaanọkka kwẹ kk'ọpa. Kẹ-kẹ wọ inorikẹ ch'ọkka ọmaanẹ bẹ. Kẹ ọdaak otte mawuriji.’

21 "Nya o, aben mina atọhmnọng pọ bẹ́, ‘Màzọhng tọk-ẹ tima kwu, nzẹ-ẹ k'ichen.’ 22 Motek kọ ttatta kwamina bẹ́, ‘Nnwa nwo, otte ọbọhk mòkpo otte. Ó̱de ọttẹ-ẹ ọbọhk, otte m'ope-ope e.’ 23 Okenaka, aben mina atọhmnọng pọ bẹ́, ‘Oye bẹ́, agbaanatte kwabọnga kw'ikarẹ otorọ bọnga makwu ma, ọdọk bọnga otum mìnke.’ 24 K'ogbe kw'mọkpa nnam okebha atte kwamina kw'ode ọtọhmnọng kwọ za, motek-ẹ k'ose kw'kọ ttatta kwamina, agbaakẹ.

25 "Minna kw'atte kwamina obenẹ mina bẹ́, ‘Mm'abira ad-adebh ọchattọhk akwu attara.’ 26 Mina moben-ẹ bẹ́, ‘Nza mokpo ọta. Ó̱de agbaanatte kwamina kw'ikarẹ otorọ mina, nya wọ kw'mm'ọta za. M'ititika s'ọnọng nwo moze, ode agbaanatte kwamina kw'ikarẹ ina mina otorọ.’

27 "Nya o, ọtọhmnọng kwọ kw'ode atte kwaam, oben mina bẹ́, ‘Mba nkk'azonga bẹ́, kwanọng kwaam ọmaan-m ajinọngva afa bẹ-bẹ. 28 Oyok wanẹ ofona orik-m. Ntọka bẹ́, "Ẹgbaten-tama danẹ kk'ẹ ẹyaaka k'akpa-k'akpa." Tọma za maa, pyirẹ ma, kẹ k'ichen kinze. 29 Ó̱de mabira atima oyok nwoma afona, itama iyinẹ ikebh-ẹ, m'iwọhkọ, ntima isen mpe k'atam.’

30 "Ofona nya, óde mkpa nnam nd-nkebha ọtọhmnọng kwọ kw'ode atte kwaam ch'nnwa nwo nna ọtọnọ, 31 óde otte oze bẹ́, mina kotorọ mokwuna, m'ope-ope. Zonga bẹ́, mina atọhmnọng pọ mm'ọwọhkọ atte kwamina ope ọmaan isen k'ichen. 32 Kaam ọtọhmnọng kwọ nchekẹ nnang atte kwaam bẹ́, ‘Ó̱de kaam ina nnwa nwo ntim mkpa nnam, tte epyima ede chaam ttattampe!’

33 "Ofona nya, nkwuk-ọ bẹ́, atte kaam ọbọhk ntera eso ch'ojinọngnwa nwo mach'obira kwọ, ọfha attẹ-ẹ ọbọhk otor ivotte mabhana. 34 Yen kw'm'nzenga nd-nkebha atte kwaam, óde ojinọngnwa nwo nna ọtọnọ? Mma e! Kaam akpen mìnninga nze itama s'im'ikebha atte kwaam e."