1 Wa k'ẹtọma, Ibinọkpaabyi ọbhaak ẹrọng ọttara izek. 2 Ny'ogbe nwo, ọttọhk kpenamkpen kode, iyagbin itte eje. Ibyi kpenamkpen ipyi ewu bẹ́ kkang. Egwugwuma ch'Ibinọkpaabyi ed-ezenga ẹkọbha asi.

3 Pira Ibinọkpaabyi oben bẹ́, "Tte ọyaanttaana oyin." Ọyaanttaana oyin. 4 Ibinọkpaabyi oze bẹ́, ọyaanttaana nwo kk'ojibha. Tọma ny'ogbe nwo, Ibinọkpaabyi ọbhaangẹ ọyaanttaana z'orungibanga. 5 Oyerẹ ọyaanttaana nwo bẹ́, ẹya, obir oyerẹ orungibanga bẹ́, erungọ. Ewu ndo epyi, esobha. Nya wọ ode echedenwu m'iyagbin.

6 Ibinọkpaabyi obir oben bẹ́, "Tte ẹbhaangẹ eninga ch'im'esok asi k'ibyi ifa." 7 Minna kw'Ibinọkpaabyi ọbhaangẹ asi p'izek-izek z'asi p'ẹrọng. Okwu ode minna. 8 Ibinọkpaabyi oyerẹ ẹbhaangẹ ndo bẹ́, ọrọngkpakpa. Ewu ndo epyi, esobha. Nya wọ ode ewu ch'ettong mfa m'iyagbin.

9 Ibinọkpaabyi obir oben bẹ́, "Tte asi p'aning izek-izek kw'ọrọngkpakpa, makwu atobha k'ibyi majanẹ, mfha ogbin oyin." Okwu ode minna. 10 Ibinọkpaabyi oyerẹ ogbin nwo bẹ́, izek, obir oyerẹ asi mbo p'nkk'atobha bẹ́, araanga piden. Ibinọkpaabyi oze bẹ́, kk'ojibha.

11 Ibinọkpaabyi obir oben bẹ́, "Tte ekpo k'akira k'akira emen m'izek: azizaarẹ p'mm'awọm amọma, ọmaana nchi s'im'iwọm aduk, ọttara eborakpo py'im'ẹwọm amọma k'okira kwabẹ." Okwu ode minna. 12 Izek imen azizaarẹ ọmaana ekpo k'akira k'akira ọttara nchi s'id-iwọm aduk ọttara amọma k'okira kwabẹ. Ibinọkpaabyi oze bẹ́, kk'ojibha. 13 Ewu ndo epyi, esobha. Nya wọ ode ewu ch'ettong ittaan m'iyagbin.

14 Ibinọkpaabyi obir oben bẹ́, "Tte mkpon ininga z'ọrọngkpakpa s'im'ibhaangẹ ẹya z'erungọ. Tte mkpon njo ide ẹkọhka ch'nyọhm s'ididaamawu, ọmaana iwu, ọttara ocho. 15 Tte mkpon njo inna z'ọrọngkpakpa, mfha inang ọyaanttaana k'iyagbin." Okwu ode minna. 16 Ibinọkpaabyi osi mkpon mfa siden: ndo ch'ẹbar-ọbar ẹbaabha ẹya, ch'ẹcham-ọchamẹ ẹbaabha erungọ. Obir osi ndidorọ. 17 Ibinọkpaabyi osok mkpon njo z'ọrọngkpakpa bẹ́, imaanẹ k'izek, 18 ọfha ibaabha ẹya, ọttara erungọ, ibir ibhaangẹ ọyaanttaana z'orungibanga. Ibinọkpaabyi oze bẹ́, kk'ojibha. 19 Ewu ndo epyi, esobha. Nya wọ ode ewu ch'ettong nna m'iyagbin.

20 Ibinọkpaabyi obir oben bẹ́, "Tte nten k'akira k'akira s'ining akpen, ifu ny'asi bẹ́ tap. Tte ọnọhn oninga f'im'okwur z'ẹrọng." 21 Minna kw'Ibinọkpaabyi osi nten siden osok k'araanga, obir osi nten njo maphyir k'akira k'akira s'ifu ny'araanga, ọttara ọnọhn k'akira k'akira. Ibinọkpaabyi oze bẹ́, kk'ojibha. 22 Ibinọkpaabyi osi nten njo maphyir s'ikk'ọsa ittabọhng, oben bẹ bẹ́, "Màmaan k'ọsaabh, mànyaamẹ k'araanga piden maphyir. Tte ọnọhn obir ọsaabh ny'iyagbin." 23 Ewu ndo epyi, esobha. Nya wọ ode ewu ch'ettong ichen m'iyagbin.

24 Ibinọkpaabyi obir oben bẹ́, "Tte nten k'akira k'akira s'ining akpen, iyin z'izek: etirakpo ọmaana nten s'ẹgba, ọttara nten s'itim ẹbhọr izenga." Okwu ode minna. 25 Ibinọkpaabyi osi mgbaten k'okira kwabẹ, obir osi etirakpo k'okira kwabẹ, osi ọttọhk kpenamkpen f'ọd-ọnaangẹ k'izek k'okira kwabẹ. Ibinọkpaabyi oze bẹ́, kk'ojibha.

26 Nya o, Ibinọkpaabyi oben bẹ́, "Tte mosi ayokinọng made mach'mina, mabir akerẹ mina. Tte màbaabha nten s'asi, ọmaana ọnọhn f'ẹrọng, ọmaana etirakpo, ọmaana mgbaten maphyir, ọttara ekpo mbyoza maphyir py'ẹd-ẹnaangẹ k'izek."

27 Minna kw'uwa Ibinọkpaabyi osi ayokinọng made mach'ikẹ,

osi bẹ made mach'ikẹ Ibinọkpaabyi,

osi ojinọng ọmaana kwanọng.

28 Ibinọkpaabyi osi bẹ ittabọhng, oben bẹ bẹ́, "Màmaan iva k'ọsaabh, màfu izek, mabir abaabha iyagbin. Màbaabha nten s'asi, ọmaana ọnọhn f'ẹrọng ọttara ọttọhk kpenamkpen f'ozeng m'izek."

29 Nya o, Ibinọkpaabyi oben bẹ́, "Màyonga itọhng! Kaam kk'bọnga eborakpo maphyir py'ẹd-ẹwọm-ọwọm m'iyagbin nnanga; mbir nnang bọnga nchi maphyir s'iwọmọ aduk ibir iyena amọma z'ẹtaanga. Nnang bọnga mach'ọchattọhk fabọnga. 30 Ṉ́nòde nten maphyir m'izek, ọmaana ọnọhn f'ẹrọng, ọttara ọttọhk kpenamkpen f'ozeng m'izek obir oruk akpen, nnang bẹ okwongitọhng kpenamkpen bẹ́, machi mach'ọchattọhk fabẹ." Okwu ode minna.

31 Ibinọkpaabyi oze bẹ́, ọttọhk kpenamkpen f'ikk'ọsa, kk'ojibha mawuriji. Ewu ndo epyi, esobha. Nya wọ ode ewu ch'ettong ichadanẹ m'iyagbin.