1 Nya o, Jekọb oyerẹ ajinọngva pẹ maphyir, oben bẹ bẹ́, "Màkwu ninga ma, ọfha mgbaak bọnga idik s'im'iyin ọmaana bọnga z'ogbe ororo.

2 "Bọnga iva p'Jekọb, màttonga ma,

màyonga kaam Israẹl kw'ode atte kwabọnga itọhng.

3 "Reubẹn, kọ wọ ade ochedennwa kwaam,

abira ade ẹfa chaam,

kọ wọ abir ade ẹkọhka ch'ejinọng chaam,

abira ayin eche k'ikpubhakka ọmaana ẹfa ayọhnga iva paam maphyir.

4 K'ose kw'esi-bogada ede, minna kw'im'ode ọmaan-ọ k'akpen,

okurọ ch'achin z'kaam atte k'ebin,

alẹk-m, ayima oyok-nọng kwaam ábẹ̀.

5 "Simeọn ọmaana Lẹvi made ivọkka p'ayen ẹmmaana madanẹ.

Akkangkkang pabẹ ade p'idik okikibhẹ.

6 Tte nning ẹkaan chabẹ ntorọ,

tte nning k'ekwurọ chabẹ nttar,

okurọ bẹ́, bẹ nkk'ottempyibha kwabẹ atima afhọ anọng saabhada,

mabira asi etirakpo ẹyaaka, mabọka pyẹ agbana k'ose kw'ọdaakẹ bẹ.

7 Tte opyibh ọnang ottempyibha kwabẹ,

ọmaana akkaamiji pabẹ!

Kaam m'mfurọ bẹ ny'ẹkọma ch'Jekọb,

mm'araamẹ z'ẹkọma ch'Israẹl.

8 "Ṉ́nòde Juda, ivotte pọ m'atọhng-ọ mawuriji;

kọ m'arima awawunanọng pọ, akema bẹ.

Ivotte pọ maphyir, m'araka eso anang-ọ.

9 Kọ nnwa kwaam Juda, ade mach'oche-dim

kw'okwun za ch'ọd-ọbọka ayok-nten ochi,

mach'eche ẹd-ẹbaam maa, ẹkpẹ z'izek,

mach'oche-kwa ode, ọnọng oning za kw'im'okpo ọmyaan-ẹ yirẹ?

10 Ẹvaar ny'Juda mèbina,

ẹvaarchi ny'ntaak sẹ mèbira ẹrọbha,

maa, etto k'ọnọng kw'ẹbaan.

Nkọma maphyir m'iraka eso inang-ọ.

11 Kẹ m'ọgbana ẹnyanya chẹ k'echi ch'grep,

m'ọgbana ọnyanyanwa kwẹ k'echi-bọhnga ch'ẹdaak-ẹ;

m'od-otima atuk ogbobhọ ọbara fẹ,

obira otima asi p'grep ogbobhọ anọhma-baba pẹ.

12 Kẹ m'ọgaangẹ ichen, ọyọhnga etuk-kpan,

asa pẹ m'awur ayọhnga abasi.

13 "Zẹbulun, m'osi oruk kwẹ z'akonga p'ọraanga kwiden,

ẹka chẹ m'ebir ede obhon kw'akkaara-kpaar m'asaka akwoka ọwọhng.

Enem chẹ m'etima maa epyirẹ z'ẹbhaakẹ ch'Sidon.

14 "Isaka ọgaangẹ mach'ẹnyanya ch'eyen ẹfa,

ch'eyim k'njeka kw'mkpa s'ẹtọhka efu z'ẹtaanga.

15 K'ogbe kw'oze ose kw'iwọhngkwoka-byi ijibhẹ,

ọmaana ose kw'izek sẹ ibir idaam eninga,

ọraka ebubang chẹ ọtọhka ẹtọhka,

obir ochera bẹ́, m'osi ọfa-ọtọhm mach'obira.

16 "Dan, m'ode ọkpaar-aponga kw'im'ọbaabha anọng pẹ k'eden ọkkọkka

k'efonamma danẹ ch'Israẹl.

17 Dan m'ojora mach'ijọhk s'ining k'adenkonga,

m'ode mach'ititaama

s'im'igaakẹ ẹnyanya ny'abhokọrọ,

ọfha ọyaar-ẹnyanya ndo otto abherekpa-afa z'izek.

18 "O Ọvaar Ibinọkpaabyi, kaam nning ntik ẹnaanga chọ.

19 "Ẹkaan ch'arurubha m'erima Gad ábẹ̀,

okenaka, kẹ m'omuma bẹ ekpo ny'abhokọrọ ch'mmad-arọbh.

20 "Asha m'oyena ọchattọhk ọkkọkka k'ọsaabh,

m'obera ọchattọhk f'm'ọbaana bẹ́, avaar mad-achi.

21 "Naphtali ode mach'ochimẹ kw'magbur edik ozenga k'ikẹ k'ifor,

mach'ochimẹ-kwa kw'ọmaan achimẹva p'ajibh-ojibh.

22 "Josẹph ode mach'echi ch'ẹd-ẹwọm aduk p'grep

ch'emenẹ k'akeka-konga,

ẹsaabh abọhnga mawuriji.

23 Akkikkaama atim ottempyibha arim-ẹ ábẹ̀,

matima iwawuna attẹ-ẹ.

24 Odo oyuk kwẹ otima,

mbọhk kẹ kilebhẹ,

ofona k'Ọvaar Ibinọkpaabyi kw'Jekọb, kẹ kw'oyen ẹfa,

kẹ kw'ode Okker-arọkimaan kw'Israẹl, obir ode Ẹtakpa ch'Israẹl.

25 Ibinọkpaabyi kw'atte kwọ okpobh wọ ọd-ọkkaan-ọ,

Tte Ibinọkpaabyi kw'Ẹfa maphyir ọdọ-ọ,

tte otima ẹda ch'efon z'ẹrọng ọdọ-ọ,

ọmaana ẹda ch'ening z'izek ẹtaanga,

ọmaana ẹda ch'ọmmaan osisi ọttara ch'ẹba.

26 Nda s'atte kwọ iyọhng nda s'agbe p'ẹtama,

ibir isaabh iyọhnga ekpo ọkkọkka py'agbe p'ẹtama.

Tte nda nja maphyir, inana Josẹph ny'eso, ọmaana ny'akwukwungọ, kẹ kw'node oso kw'ivotte pẹ.

27 "Bẹnjamin ode ochenyang

kw'ochi ayok-nten; k'ekpebha ochi bẹ,

k'ẹsọhka, ochi bẹ kibung-kibungọ."

28 Ajinọngva mba maphyir bọ masi mfona ijobh kkamfa s'Israẹl. Idik s'otte ọgbaak bẹ k'ogbe kw'osi ọnọng-ọnọng ittabọhng s'ibaan-ẹ jọ ma.

29 Nya o, Jekọb oben iva pẹ bẹ́, "Ogbe kk'ọnyọma kw'kaam min'ntor ab'ttatta paam. Màtọk-m nọhnga za ch'iwa manọhng ab'atte paam, z'ọtakpa-sọhm kw'Ẹpharọn kw'anọng p'Het. 30 Ọtakpa-sọhm nwo oning z'izek s'Makpẹla kw'oning ọnyọma Mamrẹ, z'Kenaan. Wa Abraham odebhẹ ọtakpa-sọhm nwo, ọttara izek njo k'mbọhk s'Ẹpharọn kw'ofon Het bẹ́, mad-anọhnga affuranọng. 31 Nya wọ kw'manọhng Abraham ọttara kwanọng kwẹ Sara. Nya kw'manọhng Isaak ọttara kwanọng kwẹ Rẹbẹka. Nya kw'mbir nnọhnga Lea. 32 Wa madebhẹ izek njo ọttara ọtakpa-sọhm nwo z'mbọhk s'anọng p'Het."

33 K'ogbe kw'Jekọb kk'iva pẹ ntọhna ọnanga maphyir, otinẹ mmo ọnana z'ebin, ọsaka ettem, ofona okebha ab'otte za.