Ichedendik 30

1 K’ogbe kw’Rachẹl oze bẹ́, iva kọmaanẹ ọnang Jekọb, ọjọhmọ ọgbaanọkka kwẹ. Ofona nya, oben Jekọb bẹ́, "Nang-m iva, ini minna ode, m’mpe-ope!"

2 Jekọb ọdọk-ẹ ọmaana Rachẹl, oben-ẹ bẹ́, "Kaam wọ nde Ibinọkpaabyi kw’ọsọ-ọ iva kamaanẹ o?"

3 Rachẹl oben-ẹ bẹ́, "Kirẹ Bilha kw’ode ọtọhmnọng kwaam ma. Yima maan-ẹ, ọfha ọmaan iva ọnang-m, mbir nzenga ny’ikẹ, nyena echimma."

4 Minna kw’Rachẹl ọtọk Bilha ọnang Jekọb mach’kwanọng kwẹ. Jekọb oyim-ẹ ábẹ̀. 5 Bilha otima ibhọr, ọmaan Jekọb ojinọngnwa. 6 Rachẹl oben bẹ́, "Ibinọkpaabyi kk’aam asen ọfọhna, ọbhaanga njọm saam, ọnang-m ojinọngnwa." Rachẹl okpe nnwa nwo Dan.

7 Bilha kw’ode ọtọhmnọng kw’Rachẹl obir otima ibhọr, ọmaan Jekọb ojinọngnwa kw’ottong afa. 8 Rachẹl oben bẹ́, "Kaam kk’nrima mmaana agbaanakka kwaam mawuriji maa, nkema." Ofona nya, ọkpẹ-ẹ Naphtali*30.8 Naphtali k’eHiburu oyinẹ bẹ́, erima chaam..

9 K’ogbe kw’Lea okwu oze bẹ́, kk’ọmaan ọkpọka, ọtọka Zilpa kw’ode ọtọhmnọng kwẹ ọnang Jekọb mach’kwanọng kwẹ. 10 Zilpa ọmaan Jekọb ojinọngnwa. 11 Lea oben bẹ́, "Kaam kk’owujibha nyena." Ofona nya, okpe nnwa nwo bẹ́, Gad*30.11 Gad k’eHiburu oyinẹ bẹ́, owujibha..

12 Zilpa kw’ode ọtọhmnọng kw’Lea ọmaan Jekọb ojinọngnwa kw’ottong afa. 13 Lea oben bẹ́, "Ettem kk’aam ẹdaama. Panọng mayer-m ottemdaam." Ofona nya, ọkpẹ-ẹ Asha*30.13 Asha k’eHiburu oyinẹ bẹ́, ottemdaam..

14 Otum k’ọphagbe kw’wit, Reubẹn oyin z’owonọ, od-oze amandrek*30.14 mandrek mandrek ode echikira ch’panọng ad-achi mfha matima ibhọr. Akkaara abir ayer-ẹ ochiduk kw’ọdaakẹ. banẹ, ọtọka ọnang Lea kw’ode ọkka kwẹ. Rachẹl oben Lea bẹ́, "Ototo, mek-m amandrek banẹ p’nnwa kwọ otim okwuna."

15 Lea ọpọhn-ẹ bẹ́, "Kọ kk’odim kwaam atọka! Min’abir atọka amandrek p’nnwa kwaam o?"

Rachẹl oben-ẹ bẹ́, "Odik kode. Kẹ m’oyima ọmaan-ọ m’erungọ nda."

16 K’ogbe kw’Jekọb okwun eyina ny’ẹsọhka, Lea obina okebh-ẹ za, oben-ẹ bẹ́, "Menda m’ayima amaan-m okurọ bẹ́, kk’amandrek p’ojinọngnwa kwaam ntima ndebh-ọ." Ofona nya o, Jekọb oyim-ẹ ábẹ̀ ny’erungọ ndo.

17 Ibinọkpaabyi ọbhaanga njọm s’Lea, Lea otima ibhọr, ọmaan Jekọb ojinọngnwa kw’ottong achen. 18 Lea oben bẹ́, "Ibinọkpaabyi kk’aam ọtaama, okurọ ch’ntọk ọtọhmnọng kwaam nnang odim kwaam bẹ́, oyima ọmaan-ẹ." Nya o, okpe nnwa nwo Isaka.

19 Lea obir otima ibhọr, ọmaan Jekọb ojinọngnwa kw’ottong achadanẹ. 20 Oben bẹ́, "Ibinọkpaabyi kk’aam ẹnanga ch’ejibh-ojibh ọnanga. Mọkpanda, odim kwaam min’oke-m otum, okurọ bẹ́, kk’ẹ ajinọngva achadanẹ mmaana." Nya o, ọkpẹ-ẹ Zẹbulun.

21 K’ogbe wanẹ z’ititika, Lea obir ọmaan kwanọngnwa, ọkpẹ-ẹ Daina.

22 Nya o, Ibinọkpaabyi okwu ojima Rachẹl, ọbhaanga njọm sẹ, ogwunga ẹbhọr chẹ. 23 Obir otima ibhọr, ọmaan ojinọngnwa. Oben bẹ́, "Ibinọkpaabyi kk’aam ọrọhbha k’mgbar." 24 Ọkpẹ-ẹ Josẹph. Obir oben bẹ́, "Tte Ọvaar Ibinọkpaabyi ọttar-m ojinọngnwa."

Etirakpo py’Jekọb edo ẹsaabh

25 K’ogbe kw’Rachẹl ikk’Josẹph ọmaana, Jekọb oben Laban bẹ́, "Tte-m ọbọhk mkpa nnam z’ọmmaana-bhon kwaam. 26 Nang-m panọng paam ọttara iva paam p’nzeng ábẹ̀, nsi ọtọhm nnang-ọ. Kọ azong ọtọhm f’ikk’nsa nnang-ọ ma."

27 Laban oben-ẹ bẹ́, "Ó̱de kk’aam kk’ọ idik ndaaka, ototo, ninga ma pira. Kaam kk’ọsẹ mmara kw’ntim nzonga bẹ́, Ọvaar Ibinọkpaabyi kk’aam ọda okurọ kọ." 28 Laban obir oben-ẹ bẹ́, "Gbaak-m ẹphya ch’ọtọhm f’asi anang-m, kaam m’nnang-ọ ọnang."

29 Jekọb ọpọhn-ẹ bẹ́, "Kọ azong ọtọhm f’ikk’nsa nnang-ọ ma, abir azonga ose kw’etirakpo pyọ ikk’ejibha k’kaam k’ọbọhk. 30 Pira kaam nkwu ma, wa ayen etirakpo py’ina ẹsaabhẹ. Ma, etirakpo mbyo kk’ẹsaabha mawuriji. Ibinọkpaabyi kk’ọ ọda k’ibyi kpenamkpen s’nchin. Okenaka, bọng-ogbe kw’ikaam im’ntima nsi ọttọhk f’im’ntima mbaabha ẹsọhmmọr chaam o?"

31 Laban ọbọbh-ẹ bẹ́, "M’nnang-ọ mbọng?" Jekọb ọpọhn-ẹ bẹ́, "Kaam ọttọhk kpenamkpen kànang. Ó̱de im’asi ọttọhk mva mavanẹ anang-m, kaam m’nchina ororo nkkerẹ etirakpo pyọ. 32 Tte mbaana ẹrọkimaan-kaana nda chọ maphyir menda, ọfha nteka arọkimaan p’asi ase, wanẹma, p’attim akkẹkkẹk, ọmaana arọkimaanva p’apyi bẹ́, kaang, ọttara avugboka p’asi ase, wanẹma, p’attim akkẹkkẹk. Bẹ bọ mm’ade ẹtọhm-phya chaam. 33 Ọkkọkka kwaam m’osi ẹyaakẹ z’ogbe z’ororo, k’ogbe kw’im’akwu abaana etirakpo py’anang-m. Evu kpenamkpen ch’ening ẹmaan-m ch’ina ase esi, wanẹma, ọbhaamnwa kw’ina bẹ́ kaang opyi, tọka bẹ́, mfu-ofu."

34 Laban ochera, oben bẹ́, "Tte ode k’ose kw’ikk’abena."

35 Ny’ewu ndo madanẹ-danẹ, Laban ọrọhbha avudim, ọmaana avupa p’asi ase, ọmaana p’attim akkẹkkẹk, ọmaana p’ade awurọ maphyir, ọttara arọkimaanva p’apyi-opyi, ọtọka ọnang ajinọngva pẹ bẹ́, makkerẹ. 36 Otima bẹ osi ozenga k’iwu ittaan. Jekọb okkerẹ mboza p’Laban. 37 Jekọb ọtọka achibọhnga kikebhẹ p’nchi s’mayerẹ pọpla, ọmaana almọn, ọttara p’nchi njoza ọkkọkka, oborọ achikpakpa p’achibọnga mbo, pira nọtaarẹ akpaama-wurọ. 38 Ọtọka achibọhnga mbo ọjẹ ọnyọma ny’akkora p’esigwa maphyir p’arọkimaan ad-agwo asi, ọfha eninga ny’ititika kw’arọkimaan mbo k’ogbe kw’mm’akwu agwo asi, mabir avura ayok. 39 Nya o, k’ogbe kw’nten njo ivur ayok ny’ititika s’achibọhnga mbo, mamaan ayok p’asi ase, ọmaana p’asi akkẹkkẹk. 40 Jekọb ọbhaangẹ ẹkaana ch’atenva ọkọm osok, osi njoza ikkerẹ ititika z’nten s’isi ase, ọmaana s’ipyi-opyi, s’ide nten s’Laban. Minna kw’otim ọbhaangẹ etenkaana chẹ z’nten s’Laban. 41 K’ogbe kw’ifor ibin nten s’ide panọng p’ifor igaangẹ ọtam, Jekọb m’ọtọka achibọhnga mbo oyika ny’akkora p’esigwa ny’ititika s’nten njo, ọfha mavura ayok anyọma ny’achibọhnga mbo. 42 Ó̱de nten imọm ifor, bẹ ny’akkora p’esigwa mòsok. Nten s’imọm ifor, osok Laban, s’igaangẹ ifor, kẹ ọtọka. 43 Ofona nya, Jekọb okwu ojibh-ẹ mawuriji, oyena atọhmnọng k’ẹpanọng ọttara k’ejinọng, ọmaana akamẹl ọttara nnyanya.