1 K'ogbe kw'uwa Abraham kk'ọtama mawuriji, obir oruk icho k'ẹkaan, wa Ọvaar Ibinọkpaabyi kk'ẹ ọda k'eden kpenamkpen. 2 Oben oso kw'atọhmnọng p'ẹsọhmmọr chẹ bẹ́, "Yika ọbọhk kwọ m'ntaak saam. 3 Nnorọ bẹ́, anwọhngọ k'eche ch'Ọvaar Ibinọkpaabyi kw'osi ẹrọng ọmaana izek bẹ́, kọ kwanọng kw'ofon m'Kenaan kw'nrukọ màtọka anang Isaak kw'ode nnwa kwaam. 4 Kọ m'atera achina z'obhon kwaam, z'anọng paam, atọka kwanọng anang nnwa kwaam Isaak."

5 Ọtọhmnọng nwo ọbọbh-ẹ bẹ́, "Ó̱de kwanọng nwo ina ocher bẹ́, m'otor-m okwu m'izek nja kẹ? Ma, arorọ bẹ́, ntọka nnwa kwọ ntima nchina z'ibyi s'afon yirẹ?"

6 Abraham oben ọtọhmnọng kwẹ bẹ́, "Mma e, eso ening-ọ ẹkpanẹ bẹ́, atima nnwa kwaam akpa nnam z'ibyi njo o. 7 Ọvaar Ibinọkpaabyi kw'ẹrọng, otim-m obina orik ẹsọhmmọr ch'atte kwaam, ọmaana obhon kwaam maphyir. Ọgbaak-m odik, obir ọnwọhngọ ọnang-m bẹ́, m'ọtọka izek nja s'moning ma ọnang efona chaam. Oben-m bẹ́, iva p'iva paam, bẹ bọ mm'ayena ẹkọma nda. Kẹ Ibinọkpaabyi m'ọtọhm ozeng-eden kwẹ, otim-ọ eden ad-atọka kwanọng za, anang ojinọngnwa kwaam. 8 Ó̱de kwanọng nwo ina ocher bẹ́, otor-ọ makwu, kk'anaanga m'nwọhngọ nja saam. Okenaka, nnwa kwaam nnam za kàtima akpa."

9 Minna kw'ọtọhmnọng nwo, ọtọk ọbọhk kwẹ oyika otte Abraham ny'ntaak, ọnwọhngọ bẹ́, m'osi k'ose kw'otte ikk'ẹ obena.

10 Nya o, ọtọhmnọng kw'Abraham obina ofona, ọtọka nten ijobh s'otte s'mayerẹ kamẹl, ọttara ekpo saabhada k'akira k'akira py'ejibh-ojibh. Ọtọma ozenga ochina z'Aram-Naharaim z'obhon kw'uwa Nahọr kw'ode ọgbaanọkka kw'Abraham orukọ. 11 Opyirẹ za o, ochina z'esipe ch'ening ny'obhon okikaan, osi akamẹl mbo mattima ndudungọ anyọhma ny'esipe ndo. Wa ode k'ẹsọhka k'ogbe kw'panọng mad-ayin esikaabha.

12 Obe nya oze njọm bẹ́, "O Ọvaar Ibinọkpaabyi kw'atte kwaam okpobh, kwu kkaan-m menda akọhka Abraham kw'ode atte kwaam ọdaakẹ kwiden. 13 Kirẹ kaam wọ mbe m'okikaan kw'ekeka nda ch'aminava p'obhon nwoma mad-akwu akaabha asi. 14 Tte ominanwa kw'im'mben bẹ́, ‘Ototo, tte ngwo asi k'isi-zọhka sọ,’ oben-m bẹ́, ‘Gwo, kaam m'mbir nnang akamẹl pọ asi,’ tte ode bẹ́, kẹ ominanwa nwo wọ kw'ikk'atéka asok ọtọhmnọng kwọ Isaak. Minna kw'im'ntima nzonga bẹ́, kọ kk'ọphyaam asa anang atte kwaam."

15 Min'ochera njọm ozize, Rẹbẹka oyin ka, ọmaana isi-zọhka sẹ s'ọnan ny'ebubaang. Wa kẹ ode ominanwa kw'Bẹtuẹl, kw'ode nnwa kw'Milka kw'uwa ode kwanọng kw'Nahọr, ọgbaanọkka kw'Abraham. 16 Wa Rẹbẹka ojibh ominanwa mawuriji, obir ode bẹ́, ojinọng otim ozonga. Minna kw'ọsak z'ekeka ọkaabha asi maa, isi-zọhka ifu, otima ovura.

17 Ọtọhmnọng kw'Abraham ọsẹr-ọsẹr od-okebh Rẹbẹka oben-ẹ bẹ́ "Ototo, nang-m asi biribirẹ ny'isi-zọhka sọ, ngwo."

18 Kẹ Rẹbẹka ọpọhn-ẹ bẹ́, "Atte kwaam, kwu gwo." Ọsaka isi-zọhka sẹ ẹbhar-ẹbhar ọnang-ẹ asi ogwo.

19 Ch'ikk'ẹ asi ọnanga ogwo o, oben-ẹ bẹ́, "Kaam m'mbir nkaabha asi nnang akamẹl pọ maa, mabenga bẹ." 20 Minna kw'ọsẹr-ọsẹr owona asi pẹ ny'ẹjọ ch'eber nya, ọkpa nnam ẹbhar-ẹbhar ọd-ọtọhr asi oke ny'isi-zọhka k'ose kw'mm'abenga akamẹl p'ọjinọng nwo. 21 Kẹ ojinọng nwo omyi bẹ́ sẹẹbh, oke otum mawuriji mfha ozonga ode Ọvaar Ibinọkpaabyi ikk'ẹ owujibha ọnanga ny'ozenga nwo kwẹ.

22 K'ogbe kw'akamẹl mbo ikk'asi agwa maphyir, ọtọhmnọng nwo ọrọbha ẹbaanga ch'isung ch'ede gol kw'adọhbhiji made bẹka mawanẹ, ọmaana agol p'mbọhk p'adọhbhiji pabẹ made ashẹkẹl ijobh. 23 Ọbọbh-ẹ bẹ́, "Anyi wọ ode atte kwọ? Ototo, tek-m, nna idongọ ininga z'atte k'ọsọhm s'mm'oyima m'erungọ?"

24 Rẹbẹka ọpọhn-ẹ bẹ́, "Kaam nde nnwa kw'Bẹtuẹl, kw'Milka obhonọ ọnang Nahọr." 25 Obira oben bẹ́, "Moyen ọchattọhk f'nten f'ọsaabh-ọsaabh za ọmaana ibyi s'bọnga mm'ayima m'erungọ."

26 Minna kw'ojinọng nwo ọrak eso okpobha Ibinọkpaabyi, 27 oben bẹ́, "Tte mọtọhnga Ọvaar Ibinọkpaabyi kw'ode Ibinọkpaabyi kw'atte kwaam Abraham! Kẹ otim ochin ororo osi ọphyaam k'ogbe kpenamkpen ọnang atte kwaam, obira ọgbaka ifor ọmaan-ẹ. Ṉ́nòde kaam, Ọvaar Ibinọkpaabyi kk'aam otima m'ozenga nwa bẹ bẹẹm maa, mpyirẹ k'ọsọhm kw'anọng p'atte kwaam."

28 Ominanwa nwo otima ẹbhar od-otek anọng p'ọkka idik nja. 29 Ny'ogbe nwo, Rẹbẹka oyen ọgbaanọkka kw'ejinọng kw'okpen Laban. Laban ọsẹr-ọsẹr od-okebha ọtọhmnọng kw'Abraham z'ekeka. 30 K'ose kw'ozize ẹbaanga ndo ch'isung, ọttara abaanga-chigimẹ ny'ọgbaanọkka k'mbọhkdọngọ, obira ọbhaanga idik s'Rẹbẹka otek-ẹ s'ọnọng nwo ọgbaak-ẹ, od-okebha ojinọng nwo ch'obe ọmaana akamẹl mbo za ch'ọnyọm ekeka. 31 Oben-ẹ bẹ́, "Kwu, kọ kw'Ibinọkpaabyi ikk'ọda. Kọ ad-abe ma asi mbọng? K'ibyi nda nsok-ọ, ọmaana ibyi s'akamẹl pọ."

32 Minna kw'ọtọhmnọng kw'Abraham ochin z'ọsọhm, ọchaarẹ akamẹl mbo ntọhka z'ifor. Pira matọka ọchattọhk achena bẹ, mabira atọka asi achena ọtọhmnọng kw'Abraham ọttara anọng p'matọnọ bẹ́, magbobhọ mmo sabẹ. 33 Nya o, maber-ẹ ọchattọhk. Kẹ oben bẹ́, "Mma e, kaam ọttọhk mìmkponga nchi maa, ntek bọnga ọttọhk f'm'atọhm-m."

Laban oben-ẹ bẹ́, "Tek mina kẹ."

34 Nya o, otek bẹ bẹ́, "Kaam nde ọtọhmnọng kw'Abraham. 35 Ọvaar Ibinọkpaabyi kk'atte kwaam ọda mawuriji maa, okwu ode ojibhadanọng. Ibinọkpaabyi kk'ẹ arọkimaan ọnanga, ọmaana abhaam, ọmaana asilva ọttara agol, ọmaana atọhmọ k'ejinọng ọttara k'ẹpanọng, ọmaana akamẹl ọttara nnyanya. 36 Sara kw'ode kwanọng kw'atte kwaam ọmaan-ẹ ojinọngnwa k'atam. Ofona nya, otte ọttọhk kpenamkpen f'oyen ọbọhk ọnang nnwa nwo. 37 Kẹ atte kwaam osi-m nchekẹ bẹ́, kaam kwanọng m'ntọka ny'aminava p'Kenaan kw'orukọ, nnang nnwa kwẹ k'ọba. 38 Otek-m bẹ́, nchina z'efona ch'otte kwẹ, ntọka kwanọng za nnang nnwa kwẹ.

39 "Nya kw'kaam n'mbọbhọ atte kwaam bẹ́, ‘Ó̱de kwanọng nwo oben bẹ́, kaam mòtor mokwuna kẹ?’

40 "Kẹ ọpọhn-m bẹ́, ‘Ọvaar Ibinọkpaabyi kw'ntorọ eden chẹ, m'ọtọhm ozeng-eden kwẹ ozenga ọmaan-ọ, ọfha ozenga kwọ ode ọkkọkka ọnang-ọ, abira atọka kwanọng kw'ofon z'efona chaam, ọttara z'anọng p'atte kwaam, anang nnwa kwaam. 41 Ó̱de achin z'efona chaam, echekẹ nda kọ mẹ̀bọka, zaabẹ́ m'ikọ kwanọng nwo kanangẹ.’

42 "Nya o, ch'iwura nkwu m'ekeka nda menda, nze njọm, mben bẹ́, ‘O Ọvaar Ibinọkpaabyi, kw'atte kwaam Abraham okpobh, óde ọdaak-ọ, ototo, nang-m owujibh m'ozenga nwa. 43 Kirẹ kaam mbe m'akeka-konga. Ó̱de mbenẹ ominanwa kw'im'okwu ọkaabha asi ma bẹ́, "Tte ngwo asi biribirẹ ny'isi-zọhka sọ," 44 óde oben-m bẹ́, "Gwo, kaam m'mbira nkaabha asi nnang akamẹl pọ," tte kẹ nwo ode kwanọng kw'Ọvaar Ibinọkpaabyi ikk'oteka ọnang nnwa kw'atte kwaam.’

45 "Pira nkwu nchera njọm ozize z'ettem chaam, Rẹbẹka oyin ka ọmaana isi-zọhka sẹ ny'ebubaang. Minna kw'ọsak z'ekeka ọkaabha asi. Kaam mben-ẹ bẹ ‘Ototo nang-m asi ngwo.’

46 "Minna kw'ọsẹr-ọsẹr ọsaka isi-zọhka sẹ z'ebubaang, oben-m bẹ́, ‘Gwo, kaam m'mbira nkaabha asi nnang akamẹl pọ.’ Minna kw'ngwo asi mbo, obira ọkaabha ọnang akamẹl paam.

47 "Mbọbh-ẹ bẹ́, ‘Kọ ade nnwa kw'anyi?’ Ọpọhn-m bẹ́, ‘Kaam nde nnwa kw'Bẹtuẹl kw'ode ojinọngnwa kw'Nahọr kw'Milka ọmaanẹ ọnang-ẹ.’

"Minna kw'nkk'ẹ ẹbaanga ny'isung, mbira nkk'ẹ abaanga-chigimẹ ny'mbọhkdọngọ, 48 pira nraka eso mkpobha Ọvaar Ibinọkpaabyi kw'ode Ibinọkpaabyi kw'atte kwaam Abraham. Ntọhng-ẹ mawuriji ch'otibh-m eden ch'ntim nkwu ntọka ominanwa kw'ọgbaanotte kw'atte kwaam nnang nnwa kwẹ. 49 Ofona nya o, óde mm'akọhka atte kwaam ọdaakẹ kwiden ọmaana ejibha, màtek-m. Ó̱de nna minna acher, màtek-m, ọfha nzonga ose kw'im'nsi."

50 Laban ọmaana Bẹtuẹl mapọhn-ẹ bẹ́, "Odik nwoma ofon z'Ọvaar Ibinọkpaabyi, Mina m'odik koyen kw'mm'ọpọhna. 51 Kirẹ Rẹbẹka ma. Tọk-ẹ tima zọhng. Tte ode kwanọng kw'nnwa kw'atte, k'ose kw'Ọvaar Ibinọkpaabyi ikk'ophyika."

52 Ọtọhmnọng kw'Abraham ọbhaang odik kw'magbaakẹ nya o, ọraka eso k'ikpukpobha ọnang Ọvaar Ibinọkpaabyi. 53 Pira ọrọhbha ekpo py'ẹdọngọ py'matim gol ọmaana silva asi, ọttara ọbara, ọnang Rẹbẹka; obira ọtọka nnanga s'igaangẹ ẹphya mawuriji ọnang ọgbaanọkka ọttara ọkka kwẹ. 54 Pira kẹ ọttara ajinọng mbo p'matọnọ nnachi ọttọhk mabira agwo asi, mayima nya.

Maphyabh ny'ekpebha o, oben bẹ bẹ́, "Màzọhng rik-m k'eden, ọfha mkpa nnam ntor atte kwaam."

55 Okenaka, ọgbaanọkka kw'Rẹbẹka ọmaana ọkka mapọhn-ẹ bẹ́, "Tte Rẹbẹka ọbọhk oninga ọmaana mina k'iwu ijobh pira matọn afona."

56 Ọtọhmnọng nwo ọpọhna bẹ bẹ́, "Ototo, m'kaam ma kàsok. Ọvaar Ibinọkpaabyi kk'aam owujibha ọnanga m'ozenga nwa. Màtte-m obọhk, màd-arik-m k'eden, ọfha mkpa nnam ntor atte kwaam."

57 Maben ayok bẹ́, "Tte moyerẹ Rẹbẹka oyenẹ mọbọbh-ẹ." 58 Minna kw'mayerẹ Rẹbẹka mabọbh-ẹ bẹ́, "Ina achera ator ọnọng nwa mafona yirẹ?"

Ọpọhn bẹ bẹ́, "Iye, kaam kk'nchera bẹ́, m'ntọr-ẹ mofona."

59 Minna kw'mazeng ad-arik ọgbaanọkka kwabẹ Rẹbẹka k'eden, ọmaana kwanọng kw'od-okker-ẹ, ọmaana ọtọhmnọng kw'Abraham, ọttara anọng pẹ. 60 Minna kw'masi Rẹbẹka ittabọhng, maben-ẹ bẹ́,

"Agbaanakka kwamina, moze njọm bẹ́,

asi ọmaan k'ọsaabh, k'nnọhna k'nnọhna;

tte iva p'iva pọ makwu atọka

ibhon s'awawunanọng pabẹ."

61 Rẹbẹka okwu obina ọttara aminava p'aruk-ẹ ábẹ̀, mavura k'akamẹl, mator ojinọng nwo mafona. Ọtọhmnọng kw'Abraham ọtọka Rẹbẹka otima ofona.

62 Ny'ogbe nwo, wa Isaak kk'obina z'Beer-Lahai-Roi, od-oruk z'ẹkọma ch'Nẹgẹv. 63 K'ẹsọhka danẹ, ọraanga ochina za ch'etirakpo ed-echi azizaarẹ bẹ́, oninga za osi achibhẹ. K'ose kw'otin-ẹ ititika k'ẹrọng, oze akamẹl p'ad-akwu za. 64 Rẹbẹka obira otinẹ ititika k'ẹrọng oze Isaak za. Ọsaka z'kamẹl kwẹ, 65 ọbọbh ọtọhmnọng kw'Abraham bẹ́, "Bọng-ojinọng wọ kina wọ od-ozenga ọnyọma mina k'ifor o?"

Ọtọhmnọng nwo ọpọhn-ẹ bẹ́, "Atte kwaam wọ e." Minna kw'Rẹbẹka ọtọk ọphyọng obubha ifor sẹ maphyir.

66 Nya o, ọtọhmnọng nwo otek Isaak ọttọhk kpenamkpen f'ikk'ọsa. 67 Otima Rẹbẹka odim z'iruk-byi s'iwa ọkka kwẹ Sara orukọ, maba ayok. Rẹbẹka okwu ode kwanọng kwẹ, ọdaak-ẹ mawuriji, okwu oyena ottem-fukọ ch'iwa ọkka kw'kk'ẹ Isaak ikk'ọpa.