Ichedendik 13

Ẹbhaangẹ ch’Abram ọmaana Lọt

1 Minna kw’Abram otte Ijip ọbọhk, otima kwanọng kwẹ ọttara oyena kwẹ maphyir, obina orik obhon nwo, ọkpa nnam z’ẹbhaakẹ ch’Nẹgẹv, Lọt matọn afona. 2 Abram nokwu ojibh-ẹ mawuriji; oyena etirakpo, ọmaana asilva, ọttara agol k’ọsaabh.

3 Tọma ny’ẹbhaakẹ ch’Nẹgẹv, Abram ochina ororo k’ozenga kwẹ, od-obhing k’ibyi k’ibyi, maa, okwu opyirẹ z’ẹbhaakẹ ch’Bẹtẹl, ny’njeka kw’Bẹtẹl ọmaana Ayi, za ch’iwa ochi eden obhing. 4 Nya wọ kw’uwa Abram ochi eden osi ija-byi. Nya wọ kw’uwa obir oyerẹ eche ch’Ọvaar Ibinọkpaabyi.

5 Lọt kw’uwa od-ozenga ọmaana Abram, obir oyena arọkimaan ọttara abhaam saabhada; anọng p’ator-ẹ, mabira asaabh. 6 Okenaka, wa izek njo ọdọk bẹ kibeng k’ose kw’mm’atọn aninga, okurọ oyena kwabẹ kw’uwa okem ẹsaabha. 7 Ẹkọhr okwu etto akker-etirakpo py’Abram ọmaana akker-etirakpo py’Lọt. Ny’ogbe nwo, wa anọng p’Kenaan, ọmaana anọng p’Periz, matim arukọ ny’izek njo.

8 Minna kw’Abram oben Lọt bẹ́, "Kọ ọttara kaam, mode ivotte. Kojibhẹ bẹ́, mosi ẹkọhr. Kobir ojibh bẹ́, akker-etirakpo pọ ọttara paam, maninga k’ẹkọhr. 9 Izek nja maphyir samina jọ. Tte mọbhaangẹ ayok. Ó̱de atọk ẹbhaakẹ ch’odimbọhk, kaam m’ntọka ch’obhurubọhk. Ó̱de atọk ẹbhaakẹ ch’obhurubọhk, kaam m’ntọka ch’odimbọhk."

10 Lọt okkerẹ, oze bẹ́, ẹkpẹmẹ ndo ch’Jọrdan k’ibungọ eyen asi mach’owonọ kw’Ọvaar Ibinọkpaabyi, ebir ede mach’izek s’Ijip, z’ẹbhaakẹ ch’Zoar. (Wa ode ch’Ọvaar Ibinọkpaabyi ina ibhon s’Sọdọm ọmaana Gọmọra otim odima m’iyagbin.) 11 Minna kw’Lọt ochem ẹkpẹmẹ ch’Jọrdan k’ibungọ, z’ẹbhaakẹ ch’ewuchen ed-eyin. Nya o, bẹ anọng afa mabhaangẹ ayok. 12 Wa Abram, orukọ z’Kenaan, Lọt oruk z’ibhon siden s’ining ny’ẹkpẹmẹ ndo, ottima okkira fẹ ọnyọma Sọdọm. 13 Wa anọng p’Sọdọm, made anọng p’asi ẹyaaka mawuriji, mabira ad-asi mpyibha siden z’Ọvaar Ibinọkpaabyi k’ititika.

14 K’ogbe kw’Abram ọmaana Lọt nkk’ayok abhaanga, Ọvaar Ibinọkpaabyi okwu oben Abram bẹ́, "Tinẹ achen pọ k’ẹrọng nya ch’abe nya, akkerẹ z’ebir-ebir, akkerẹ z’ẹwọn-ẹwọna, akkerẹ za ch’ewuchen ed-eyin, ọmaana za ch’ewuchen ed-edimẹ. 15 Izek njo maphyir s’aze nya, kaam m’ntọka nnang kọ ọttara iva pọ, ọttara iva p’iva pọ bẹ́, mayena ttattampe. 16 Kaam m’nsi iva p’iva pọ masaabh mach’oyiyeng kw’ina obhika ode. Ó̱de ọ́nọng m’okpo oyiyeng obhik, oyinẹ bẹ́, ọnọng m’okpo iva p’iva pọ obhik-obhik. 17 Bina, zenga baana adum ọttara ẹkpa ch’izek njo, okurọ bẹ́, sẹ jọ s’im’nnang-ọ."

18 Minna kw’Abram otinẹ okkira fẹ, od-oruk ọnyọma nchi siden s’Mamrẹ, z’Hẹbrọn. Nya wọ kw’ottim ija-byi s’Ọvaar Ibinọkpaabyi.