1 Ny'ogbe kw'Josẹph ina ọdọk ifor okpo ọbọka, oben anọng p'abe amaan-ẹ nya bẹ́, "Màrik-m obhokọ!" Ọnọng kw'uwa obir oninga ny'ogbe kw'Josẹph ọyaakẹ ifor ọnang ivotte kode.

2 Josẹph obhom ẹmọng k'ẹrọng maa, anọng p'Ijip abhaanga, anọng p'ọvaar-dimpa kw'Phero abira abhaanga.

3 Minna kw'Josẹph oben ivotte bẹ́, "Kaam Josẹph wọ e! Atte kwaam otim orukọ akpen za o?" Ivotte pẹ m'ikẹ odik nwo kakpo apọhna, okurọ opoma f'osi bẹ ny'ikẹ k'ititika.

4 Josẹph obir oben ivotte pẹ bẹ́, "Mazọhkọ tum-m ka." Mazọhkọ atum-ẹ nya o, ọgbaak bẹ bẹ́, "Kaam wọ nde Josẹph, agbaanatte nwo kwabọnga kw'uwa makpe anang aphyanọng p'Ijip. 5 Nttem ining bọnga odik iyakẹ, m'ayok odik kàbir aze ch'iwa makpe-m. Ibinọkpaabyi wọ oter ọtọhm-m ma bẹ́, nchi bọnga eden nkkaana akpen p'ayokinọng. 6 Node ocho ọfa f'okwo fiden ikk'oninga m'izek nja. K'icho ichen z'ititika, ọnọng ọttọhk mòtwubh, ọnọng ọttọhk mòbira ọpha. 7 Okenaka, Ọvaar Ibinọkpaabyi ọtọhm-m bẹ́, nkkikken nkwu nye bọnga ekimẹ-kimẹ m'izek, mfha bọnga ọttara iva pabọnga maruk akpen.

8 "Nya o, bọnga zang masi pira nkwu ma, Ibinọkpaabyi wọ ọtọhm-m. Kẹ wọ osi-m nde ọnọng kw'ọd-ọnang Phero ntọhna. Obira osi-m mbaabha ẹsọhmmọr chẹ, ttara anọng p'Ijip maphyir. 9 Màbhana madidanma kebha atte kwaam za. Màtek-ẹ bẹ́, nnwa kwọ Josẹph obenẹ bẹ́, ‘Ọvaar Ibinọkpaabyi kk'aam oso ọsa z'Ijip, nde ọbaabh kw'Ijip maphyir. Kwu ẹbhar-ẹbhar kebh-m ka. Ogbe kàkibhẹ. 10 Kọ m'aruk k'ẹkọma ch'Goshẹn ch'ẹnyọm-m. M'aruk nya amaana iva pọ, ọmaana iva p'iva, ọmaana etirakpo, ọttara oyena kwọ maphyir. 11 Kaam m'nrọk bọnga ny'Goshẹn, okurọ bẹ́, okwo f'icho ichen okwuma z'ititika. Ini minna ode, ogbor m'ochi kọ ọmaana ẹsọhmmọr chọ, ọmaana anọng maphyir p'ade pọ.’ "

12 Josẹph obira oben ivotte bẹ́, "Bọnga ọttara agbaanakka kwaam Bẹnjamin, nkk'aza k'odik ọkkọkka bẹ́, kaam Josẹph wọ nd-mgbaak odik ma. 13 Màgbaak atte kwaam ikpukpobha s'anọng p'Ijip ad-anang-m, ttara ọttọhk kpenamkpen f'nkk'aza ma. Ṉ́kk'ẹ agbaaka, màtim-ẹ ẹbhar-ẹbhar kwu ma."

14 Nya o, Josẹph ọgaara ọgbaanọkka Bẹnjamin, kẹ Bẹnjamin ọbaak-ẹ ọdọk. Mabhom amọng. 15 Minna kw'obira otima ẹmọng ọbaaka ivotte pẹ maphyir. Nya wọ kw'ivotte, nnayen ettem, agbaak odik amaan-ẹ.

16 K'ose kw'ẹgọhma epyirẹ z'Phero k'odimpa bẹ́, ivotte p'Josẹph kk'apyira ny'Ijip, ọdaam Phero oyenẹ ọmaana adukwa pẹ maphyir. 17 Phero oben Josẹph bẹ́, "Ben ivotte pọ, mànang nnyanya sabẹ ẹtọhka matima akpa nnam z'ẹkọma ch'Kenaan, 18 màbira tima atte kwabọnga ttara isọhmmọr sabọnga achen-m. Kaam m'ntọka izek njo s'ijibh ọtam m'Ijip nnang bẹ, mfha maruk mawuriji.

19 "Kọ màbir aben bẹ bẹ́, ‘Ọttọhk f'mm'asi ode bẹ́, màtima ijaar s'ogbin m'Ijip zọhng, mad-ayika iva pabọnga, ọmaana panọng pabọnga, ọttara atte kwabọnga, màtima bẹ akwu. 20 M'nttem z'oyena kwabọnga kàyika, okurọ bẹ́, ọttọhk kpenamkpen f'ojibhẹ ọtam m'Ijip, m'ode fabọnga.’ "

21 Iva p'Israẹl asi k'ose kw'matọhnọ bẹ. Josẹph osi k'ose kw'Phero ikk'ẹ obena, ọnang bẹ ijaar, obira ọnangẹ bẹ ọchattọhk f'mm'achi z'eden. 22 Ọnang ọnọng-ọnọng ẹfọrakpo ẹbhapyẹ, ọnang Bẹnjamin ashẹkẹl arọbh ichi p'silva, ọttara ẹfọrakpo echen. 23 Wa Josẹph oyika ekpo ọkkọkka py'Ijip k'nnyanya-dimpe ijobh, oyika agwu k'nnyanya-pa pẹ ijobh, ttara ẹchakpo ọdọk-ọdọk, ọnang ivotte bẹ́, machena otte, k'ozenga kw'mm'asi. 24 Nya o, Josẹph oben ivotte pẹ bẹ́, mazọhng! Ch'nkk'abina bẹ́ m'atọma ozenga, oben bẹ bẹ́, "M'ẹkọhr z'eden kasi o!"

25 Nya o, ivotte p'Josẹph mabina ny'Ijip, makpa nnam akebha otte kwabẹ z'Kenaan. 26 Mapyirẹ za o, matek otte bẹ́, "Josẹph otima oruk akpen za e! Kẹ wọ node osonọng z'Ijip maphyir e." Ettem ẹbhaaka Jekọb bẹ́ waa, odik nwo maphyir-phyir kocher. 27 K'ogbe kw'nkk'ẹ idik njo agbaaka maphyir s'Josẹph ikk'bẹ oteka, obira oze ijaar njo s'Josẹph ọtọhmọ bẹ́, mayik-ẹ atima abhana z'Ijip, ifor iphyabh-ẹ. 28 Ofona nya o, Jekọb oben bẹ́, "Kaam kk'nchera k'odik ọkkọkka bẹ́, nnwa kwaam Josẹph otima oning akpen za. Kaam m'nd-nzẹ-ẹ pira obo ọtọk-m."