1 K'ogbe wanẹ, Ọvaar Ibinọkpaabyi oben Abram bẹ́, "Bina rik ẹkọma chọ, ọmaana echimma chọ, ọttara oter kw'atte, achina z'ẹkọma ch'ikaam m'ntibh-ọ.

2 Kaam m'nsọ-ọ ade otte kw'ẹkọma chiden.

Kaam m'ndọ-ọ, mbira nsọ-ọ ayin eche.

Kaam m'nzenga ny'ikọ, ndo anọng saabhada.

3 Ọnọng kpenamkpen kw'osi ejibha ọnang-ọ, kaam m'mbira nsi ejibha nnang-ẹ.

Ọnọng kw'ọsọ-ọ itama, kaam m'mbir ndim-ẹ kibung-kibungọ.

Kaam m'nzenga ny'ikọ ndo nkọma s'iyagbin maphyir."

4 Minna kw'Abram obin ozenga k'ose kw'Ọvaar Ibinọkpaabyi ikk'ẹ obena bẹ́, osi. Lọt otor-ẹ mafona. Wa Abram ode icho arọbh attaan okwuma ichi k'ogbe kw'obin z'Haran. 5 Wa otim kwanọng kwẹ Sarai, ọttara Lọt kw'ode nnwa kw'ọgbaanọkka, obir otima oyena kwabẹ maphyir, ọttara anọng pẹ maphyir p'ikk'oyena z'Haran, mabina, matọma ozenga achina z'ẹkọma ch'Kenaan maa, mapyirẹ za.

6 Abram ozenga ny'Kenaan, okwu opyirẹ nya ch'echi chiden ch'Morẹ ening, z'Shẹkẹm. Ny'ogbe nwo, wa anọng p'Kenaan, matim arukọ ny'izek njo. 7 Nya wọ kw'Ọvaar Ibinọkpaabyi oyinẹ okebha Abram, oben-ẹ bẹ́, "M'ntte izek nja ọbọhk nnang ẹnọmma chọ." Ofona nya o, Abram ommin ija-byi s'Ọvaar Ibinọkpaabyi kw'ikk'oyina okebh-ẹ nya.

8 Tọma nya, Abram obina ochina z'ẹbhaakẹ ch'agbe p'Bẹtẹl, za ch'ewuchen ed-eyin, ommin ikkira sẹ nya. Bẹtẹl oning ẹwọn-ẹwọna kw'ikkira njo, za ch'ewuchen ed-edimẹ, Ayi oninga ebir-ebir, za ch'ewuchen ed-eyin. Abram ommin ija-byi s'Ọvaar Ibinọkpaabyi, obir okpobha Ọvaar Ibinọkpaabyi ny'ibyi njo.

9 Minna kw'Abram obin ozenga, okkerẹ ititika z'ẹbhaakẹ ch'Nẹgẹv.

10 Wa ny'ogbe nwo, okwo fiden oning ny'ẹkọma ndo. Ofona nya o, Abram obina, ochina z'Ijip bẹ́, od-oninga nya k'ogbe biribirẹ, okurọ bẹ́, wa ọchattọhk oworọ mawuriji. 11 K'ogbe kw'min'odim z'Ijip, Abram oben kwanọng kwẹ bẹ́, "Sarai, kaam nzong bẹ́, ajibhẹ kwanọng mawuriji. 12 Ó̱de anọng p'Ijip azọ-ọ, mm'aben bẹ́, kwanọng kwẹ wọ ma. M'ofona nya mm'afhọ-m, matte kọ ọbọhk aruk. 13 Nya o, ben bẹ bẹ́, kaam ọttara kọ, mode ivọkka, mfha mazenga kọ ábẹ̀, matim-m mawuriji, mabir atte-m ọbọhk nruk akpen okurọ kọ."

14 K'ogbe kw'Abram opyirẹ z'Ijip, anọng p'Ijip maze bẹ́, Sarai ojibh kwanọng mawuriji. 15 K'ose kw'asonọng p'Phero* maze Sarai nya, matọhng-ẹ ny'ititika s'Phero, mabir atim-ẹ achina z'odimpa. 16 Wa Phero ozeng Sarai ábẹ̀, osi ejibha mawuriji ọnang Abram. Ọnang-ẹ arọkimaan, ọmaana abhaam, ọmaana nnyanya s'ejinọng ọmaana s'ẹpanọng, ọttara abira k'ejinọng, ọmaana k'ẹpanọng, ọttara nten siden s'mayerẹ akamẹl.

17 Okenaka, Ọvaar Ibinọkpaabyi ọnang Phero ọttara ẹsọhmmọr chẹ ikọhmaana okurọ ch'Phero ọtọk Sarai kw'ode kwanọng kw'Abram. 18 Minna kw'Phero oyerẹ Abram ọbọbh-ẹ bẹ́, "Bọng-ọttọhk f'asi-m ma? Osempira kaam katekẹ bẹ́, Sarai ode kwanọng kwọ? 19 Kayen kw'atek-m bẹ́, kẹ ọttara kọ, made ivọkka, abira achera bẹ́, kaam ntọk-ẹ k'ọba? Kirẹ kwanọng kwọ ma. Tọk-ẹ tima zọhng!" 20 Phero ọnang anọng pẹ ẹfa bẹ́, matọka Abram mad-arik. Minna kw'matọk Abram ọmaana kwanọng kwẹ, ttara oyena kwẹ maphyir, mad-arik.