1 Nya o, Mosẹs ọmaana anọng p'Israẹl makkọhn ẹmọng ndoma anang Ọvaar Ibinọkpaabyi bẹ́,

"Kaam m'nkkọhn ẹmọng nnang Ọvaar Ibinọkpaabyi,

okurọ abarada pẹ.

Kk'nnyanya ọttara ayaar-ọyaar

onyuna ọbharẹ z'ẹraangadim.

2 "Ọvaar Ibinọkpaabyi wọ ode ẹfa chaam, obir ode ẹmọng ch'nkkọhnọ,

kẹ wọ ode ẹnaanga chaam.

Kẹ wọ ode Ibinọkpaabyi kwaam, kaam m'ntọhng-ẹ.

Kaam m'ntinẹ eche ch'Ibinọkpaabyi kw'atte kwaam okpobh k'ẹrọng.

3 Ọvaar Ibinọkpaabyi ode okkikkaama;

Eche chẹ ede, Ọvaar Ibinọkpaabyi.

4 Kẹ kk'ijaar s'Phero s'nnyanya id-itọr, ọmaana agbongnọng pẹ

onyuna ọbharẹ z'ẹraangadim.

Obira osi agbongsonọng ọkkọkka p'Phero

madimẹ z'Ẹraanga-kora.

5 Asi p'adong-odong nkk'bẹ abhọra maphyir,

mattem z'esiwọr mach'ẹtakpa.

6 O Ọvaar Ibinọkpaabyi,

odimbọhk kwọ oyen ẹfa chiden.

O Ọvaar Ibinọkpaabyi, atim odimbọhk kwọ asi

awawunanọng ma e.

7 "K'ediden ch'ẹvaar chọ,

kk'anọng p'akaang-ọ odik anyuna abharẹ.

Kọ atte ottempyibha kwọ ọbọhk,

ọkwọmọ bẹ mach'azizaarẹ-bukọ.

8 Agwum iwọhng sọ ny'asi,

asi atobha, mabe bẹ́ pyir,

asi p'abhobh-obhobh makwu abe mach'etumọ.

Asi mbo p'akem edonga, mabhakẹ adan-ọdan ny'ettem kw'ọraanga.

9 Ọwawunanọng osi ẹmma, oben bẹ́,

‘Kaam m'nkwubh bẹ, mbọka bẹ.

Kaam m'nna bẹ ekpo pyabẹ

nchi ẹgwọhr-ẹgwọhra.

Kaam m'ntima ọkkangkkang kwaam,

mfhọ bẹ maphyir.’

10 Okenaka, iwọhng sọ jẹ-jẹ s'agwum,

ẹraangadim ẹbhọrọ bẹ maphyir.

Minna kw'matemẹ

z'esiwọr mach'opo.

11 "O Ọvaar Ibinọkpaabyi, ny'ekpo py'anọng akpobh maphyir, bọng-ọttọhk vọ ode mach'ikọ?

Anyi wọ ode mach'ikọ?

Kọ ade Ọvaarnọng kw'awuriji,

abarada pọ major-ojora,

abir ad-asi idik s'ipe anọng ifor.

12 "Kọ anemẹ odimbọhk kwọ,

izek imyi awawunanọng pọ maphyir.

13 Ọdaakẹ kwọ kw'ina ẹkpọka oyen, kẹ kw'atim

achi anọng p'ikk'arọbha k'ebira eden.

Kọ kk'ẹfa chọ atima akkerẹ bẹ

maa, mapyirẹ z'iruk-byi sọ s'awuriji.

14 Ifufọnọ m'ibọka nkọma njoza ch'im'ibhaanga idik nja.

Anọng p'Philistiya m'aninga k'ojora.

15 Ojora m'ọbọka avaar p'obhon kw'Edom,

ifufọnọ m'ibọka asonọng p'Moab,

anọng p'abaabh Kenaan m'ape k'ifor maphyir.

16 Bẹ mm'aninga k'ojora ọmaana k'opoma fiden.

O Ọvaar Ibinọkpaabyi, k'ẹfa chọ,

bẹ mm'aninga mach'ẹtakpa bẹ́ sẹẹbh,

maa anọng p'ikk'akkaana, makpan afona,

anọng mbo p'arọbh k'ebira makpan afona.

17 Kọ m'atima bẹ achina z'ogbeso kwọ kw'awuriji,

ammin bẹ ny'ibyi s'ikọ Ọvaar Ibinọkpaabyi asi iruk-byi sọ,

iruk-byi sọ s'awuriji, s'ikọ Ọvaar Ibinọkpaabyi

atim mbọhk sọ, asi.

18 "Ẹbaabha ch'Ọvaar Ibinọkpaabyi m'eninga maa,

ttattampe."

19 K'ogbe kw'nnyanya s'Phero, ọmaana ijaar sẹ s'nnyanya id-itọr, ọttara ayaar-ọyaar pẹ masak z'ẹraangadim, Ọvaar Ibinọkpaabyi osi asi p'ọraanga nwo mabhọrọ bẹ. Okenaka, anọng p'Israẹl mazenga ny'ettem ch'ọraanga nwo kw'ogwu-ogwu, ajeka. 20 Nya o, Miriyam kw'ode ọgbaak-ettem ch'Ibinọkpaabyi, obir ode ọgbaanọkka kw'Aarọn, ọtọka ogim-ogim okir. Panọng maphyir mabira akir agim-agim, matubh ator-ẹ. 21 Miriyam ọkkọhn ẹmọng ọnang bẹ bẹ́,

"Màkkọhn ẹmọng nang Ọvaar Ibinọkpaabyi

kirẹ ediden chẹ ẹyọhng-ọyọhnga.

Kẹ kk'ẹnyanya, ọmaana ọyaar-ọyaar onyuna maphyir

ọbharẹ z'ẹraangadim."

22 Nya o, Mosẹs otima anọng p'Israẹl eden obina z'Ẹraanga-kora, machina z'ibyi s'anọng nna arukọ, z'Shur. Mazenga ny'ibyi s'anọng nna arukọ k'iwu ittaan, m'asi kaze. 23 Ch'nnapyirẹ z'Mara, m'asi p'ibyi njo kakpo agwo, okurọ ch'majobh-ojobhọ. Nya wọ osi mayerẹ ibyi njo bẹ́, Mara*. 24 Ofona nya, anọng mbo manwọhnọ, maben Mosẹs bẹ́, "Mm'ogwo mbọng o?"

25 Minna kw'Mosẹs obhomọ ọkpẹkẹ Ọvaar Ibinọkpaabyi, pira Ọvaar Ibinọkpaabyi otibh-ẹ ochinwa. Mosẹs o, ọtọka ochinwa nwo ọbharẹ z'asi, asi mbo makwu alebh.

Nya wọ kw'Ọvaar Ibinọkpaabyi ọnang ọsana, obira ọnang anọng p'Israẹl eyoma. 26 Oben bẹ bẹ́, "Ó̱de bọnga mm'atọka ogbe, mayonga itọhng k'ọgbaakadik kw'kaam Ibinọkpaabyi kwabọnga, mabira asi idik s'itor-otor k'kaam k'achen, mabira akpobha ọgbaakadik kwaam, ọmaana asana paam maphyir, kaam bọnga ikọhmaana s'nnang anọng p'Ijip mìnang. Kaam wọ nde Ọvaar Ibinọkpaabyi kw'od-obina bọnga k'ikọhmaana."

27 Nya o, mabina, makwu apyirẹ z'Elim, za ch'nkeka ijobh kkamfa ining, arọhngaji arọbh attaan okwuma ijobh mabir aninga nya. Minna kw'mabhingẹ nya ch'ọnyọm nkeka njo.