1 K'ogbe kw'anọng p'Israẹl makwu aze bẹ́, Mosẹs kk'okponga ọkpan z'ogbeso, makọbha Aarọn ake k'ettem, maben-ẹ bẹ́, "Kwu si akpata nang mina p'mm'atima mina eden. Ṉ́nòde Mosẹs nwa kw'otim mina obina z'Ijip, m'odik kw'ikk'oyina ọmaan-ẹ za, kozong."

2 Nya o, Aarọn oben bẹ bẹ́, "Màwọra ekpo py'itọhng py'panọng pabọnga py'matim gol asi, ọmaana py'ajinọngva pabọnga, ọttara py'aminava pabọnga, chen-m." 3 Minna kw'anọng mbo maphyir mawọr ekpo py'itọhng pyabẹ, machena Aarọn. 4 Aarọn otima ekpo mbyo py'nkk'ẹ ananga, osi ọkpata kw'okerẹ ọbhaamnwa. Nya o, maben bẹ́, "O Israẹl, ma wọ ode akpata pabọnga, p'atim bọnga eden abina z'Ijip."

5 Aarọn oze odik nwa nya o, ottima ija-byi ny'ititika s'ọkpata nwo. Owon ẹmọng oben bẹ́, "Ophyinẹ mm'osi odidaama ọnang Ọvaar Ibinọkpaabyi." 6 Minna kw'anọng mbo mapọm-ọpọm aphyabha ny'owusobha, mad-afọhnọ ẹja ch'nnanga okwukwọmọ, mabir anang nnanga s'ẹgbaka. Macher nya o, maninga ẹwor achi ọttọhk, mabir agwo atuk, pira nnabin atọma izazadik osisi.

7 Nya o, Ọvaar Ibinọkpaabyi oben Mosẹs bẹ́, "Saka z'izek, kirẹ anọng pọ p'atim eden abina z'Ijip, maning za asi adiktama. 8 Bẹ nkk'aduka maa, makpa nnam abọra ose kw'mbenẹ bẹ bẹ́, masi. Mabir arabha ọkpata kw'okerẹ ọbhaamnwa anang ifor sabẹ. Nkk'nso araka anang-ẹ, mabir afọhnọ ẹja anang-ẹ, mabir aben bẹ́, ‘O Israẹl, ma wọ ode akpata pabọnga, p'atim bọnga eden abina z'Ijip.’ "

9 Ọvaar Ibinọkpaabyi obira oben Mosẹs bẹ́, "Kaam kk'nza bẹ́, anọng mba agaangẹ nso. 10 Tte-m ọbọhk, ọfha nkọhka bẹ ottemkọma kwaam, mbira ndimẹ bẹ. Pira nsọ-ọ ẹkọma chiden."

11 Mosẹs okwukọ Ọvaar Ibinọkpaabyi kwẹ, oben-ẹ bẹ́, "O Ọvaar Ibinọkpaabyi, kayen kw'im'ọdọkọ minna ọmaana anọng pọ p'ikk'ẹfa chiden, ọttara ọbọhk kwọ kw'ẹfa atima abina z'Ijip o? 12 Kayen kw'm'atte anọng p'Ijip maben bẹ́, ‘Wa ọkamẹ bẹ́, osi bẹ itama, kẹ wọ osi ọtọka bẹ bẹ́, ọd-ọfhọ z'agbe, obir odimẹ bẹ kibungọ m'iyagbin’? Ototo, kpa nnam bọra ottempyibha kwọ. Tọr ifor, anọng pọ itama kàsi. 13 Jima atọhmnọng pọ Abraham, ọmaana Isaak, ọttara Jekọb, p'uwa achekẹ k'ikọ k'ifor anang bẹ́, ‘Kaam m'nsi iva p'iva pabọnga masaabh mach'ndidorọ s'ọrọngkpakpa, m'mbira nnang bẹ izek nja maphyir s'ikk'ncheka bẹ, m'ibira ide ebocha chabẹ ttattampe.’ "

14 Nya o, Ọvaar Ibinọkpaabyi ọtọr ifor, ọdọk anọng pẹ itama njo s'iwa ọkamẹ kosi.

15 Mosẹs otima ata mbo afa p'makkẹrẹ asana ny'mbọhk, ọbhakẹ nnam, ọsaka ny'egbe ndo. Wa makkẹrẹ asana mbo ny'ẹbhọr, ọmaana ny'nnam s'ata mbo. 16 Wa ata mbo p'makkẹrẹ asana, ọmaana ọkkẹra ọyenẹ, ede ọtọhmbọhk f'Ibinọkpaabyi.

17 K'ogbe kw'Joshua ọbhaang izozo s'anọng mbo mad-achona k'ẹrọng, oben Mosẹs bẹ́, "Agbong-mọng atto z'ibhinga-byi."

18 Mosẹs ọpọhna bẹ́,

"Ẹmọng ch'ekema azang,

ebomọng azang ọdọk;

ẹmọng ch'ọkkọhna ch'nter mmaanga e."

19 Ch'Mosẹs ikk'ibhinga-byi ọnyọma, oze ọkpata nwo kw'okerẹ ọbhaamnwa, ọttara otubha kw'mad-atubh. Ettem epyibh-ẹ maa, ọtọka ata mbo p'makkerẹ asana p'otim ny'mbọhk, ọbharẹ, ọvọhkọ pẹma tukutuku ny'igbemmo. 20 Obira ọtọka ọkpata nwo kw'anọng mbo nkk'asa, ọkwọmọ k'ekpon; pira nokkokọ wẹ maa, ọpẹra. Ọtọka ọlọhbh k'asi, ọnang anọng p'Israẹl, magwo.

21 Mosẹs oben Aarọn bẹ́, "Anọng mba asọ-ọ mbọng kw'atim bẹ asi epyibha-dimse nda?"

22 Aarọn ọpọhn-ẹ bẹ́, "Ttatta kwaam, tte oning-ọ ọdọkọ. Kọ azong ose kw'itama osisi id-idaak anọng mba ma. 23 Bẹ maben-m bẹ́, ‘Si akpata nang mina p'mm'atim mina eden. Ṉ́nòde Mosẹs nwa kw'otim mina obina z'Ijip, m'odik kozong kw'ikk'oyina ọmaan-ẹ za.’ 24 Ofona nya, mben bẹ bẹ́, ‘Ọnọng kpenamkpen kw'oyen ọttọhk f'ẹdọngọ f'matim gol asi, ọwọra ọnang-m.’ Mawọr anang-m nya o, ntọka nke k'ekpon. Nya kw'ọkpata nwoma, ofon!"

25 Mosẹs okwu oze bẹ́, anọng mba nasi dingidingẹ, obir oze bẹ́, Aarọn kk'bẹ ọbọhk ọtta mattena eden, nnakwu ade ọsammattọhk z'achen p'awawunanọng pabẹ. 26 Ofona nya, Mosẹs obe ny'ebhumma ch'ibhinga-byi oben bẹ́, "Ọnọng kpenamkpen kw'ochẹr k'Ọvaar Ibinọkpaabyi, tte okwu obe ma ọmaan-m." ALẹvi maphyir mabina, mad-abe amaan-ẹ.

27 Mosẹs oben bẹ bẹ́, "Ọvaar Ibinọkpaabyi kw'Israẹl obenẹ bẹ́, ‘Ọnọng-ọnọng ọkpa ọkkangkkang kwẹ z'erin, ozenga ochina nnam-nnam, obir ozenga ichina ititika m'ibhinga-byi, tọma k'eso danẹ, pyirẹ z'eso ndoza. Tte ọnọng-ọnọng ọfhọ ọgbaanotte kwẹ, ọmaana oyok-ẹkaan, ọttara oyok-oter.’ " 28 ALẹvi mbo masi k'ose kw'Mosẹs obenẹ bẹ. Ny'ewu ndo, anọng p'apyirẹ nnọhna ichenọmfa obhirẹ arọbh ijobh, mape. 29 Nya o, Mosẹs oben bẹ́, "Menda nkk'bọnga arọbha asok nkọmẹ mach'anọng p'Ọvaar Ibinọkpaabyi, okurọ ch'bọnga nna ajinọngva ọttara ivotte pabọnga oyenẹ, ajọhkọ. Ofona nya, kẹ kk'bọnga ọda m'ewu ch'menda."

30 Ewu esobh nya, Mosẹs oben anọng mbo bẹ́, "Bọnga nkk'epyibha chiden asa. Okenaka, kaam m'nd-nkebha Ọvaar Ibinọkpaabyi. Ṉ́nòsi, m'mkpo-okpo nsi efokọ chabọnga k'mpyibha."

31 Nya o, Mosẹs ọkpa nnam z'Ọvaar Ibinọkpaabyi, od-oben-ẹ bẹ́, "Epyibha ch'anọng mba asi kk'ẹbara e! Bẹ nkk'gol atima asi akpata anang ifor sabẹ. 32 Ototo, bina nang bẹ k'mpyibha sabẹ. Okenaka, ini bẹ mabina anang, rọbha eche chaam z'nnwẹr nwo kw'akkẹrẹ ache pabẹ."

33 Ọvaar Ibinọkpaabyi ọpọhna Mosẹs bẹ́, "Eche ch'ọnọng kpenamkpen kw'ikk'epyibha ọsa ọmaan-m dọ ch'im'nrọbha z'nnwẹr kwaam. 34 Zọhng madidanma, atima anọng mbo eden achina z'ibyi njo s'mgbaak odik mmaana. Ozeng-eden kwaam m'ọchọ-ọ eden. Okenaka, óde ogbe kk'obenga kw'im'nnang bẹ irem, kaam m'nnang bẹ irem k'mpyibha sabẹ."

35 Minna kw'Ọvaar Ibinọkpaabyi ọtọhm itama ọnang anọng mbo okurọ osisi kwabẹ ọmaana ọkpata nwo kw'okerẹ ọbhaamnwa kw'Aarọn osi.