1 Nya o, Ọvaar Ibinọkpaabyi oben Mosẹs bẹ́, "Tima Aarọn, ọmaana Nadab, ọmaana Abihu, ọttara asonọng arọbh attaan okwuma ijobh p'Israẹl, vura kebh-m ka. Bọnga màninga z'ororo kpobh-m. 2 Mosẹs kẹ-kẹ wọ im'ọnyọma Ọvaar Ibinọkpaabyi; ayok mboza aning Ibinọkpaabyi anyọm. Anọng mboza maning-ẹ abir ator mavura."

3 Mosẹs okwu otek anọng p'Israẹl idik njo maphyir, obira otek bẹ apaanga p'Ọvaar Ibinọkpaabyi. Idik njo igba bẹ maphyir ẹmma, maben bẹ́, "Mina mm'osi ọttọhk kpenamkpen f'Ọvaar Ibinọkpaabyi obenẹ." 4 Nya o, Mosẹs ọkkẹr odik kpenamkpen kw'Ọvaar Ibinọkpaabyi obenẹ.

Ewu esobh nya, k'ekpikpebha, obina od-osi ija-byi ny'igbemmo, obira omin ata ijobh kkamfa, p'ater mfonamma ijobh kkamfa s'Israẹl. 5 Nya o, ọtọhm adikkobhva p'Israẹl bẹ́, matima abhaamva afọhnọ nja s'ẹkwọmọ, ọttara nnanga s'ẹgbaka manang Ọvaar Ibinọkpaabyi. 6 Mosẹs ọtọka ẹzẹkwum oke k'agbangbang, obira ọtọka ekwum ndoza ọchakẹ ny'ija-byi. 7 Pira nọtọk Nnwẹr kw'Echekẹ, oyerẹ k'ẹrọng ọnang anọng p'Israẹl. Bẹ maphyir mapọhna bẹ́, "Mina mm'okpobha Ọvaar Ibinọkpaabyi, mm'obir osi okpenamkpen f'obenẹ mina."

8 Pira Mosẹs ọtọka izẹ njo s'agbangbang ọchakẹ anọng mbo, oben bẹ́, "Ma wọ ode izẹ s'Ọvaar Ibinọkpaabyi otim osi echekẹ ọnang bọnga, otor m'igbaakadik nja maphyir."

9 Nya o, Mosẹs ọmaana Aarọn, ọmaana Nadab, ọmaana Abihu, ọttara asonọng mbo arọbh attaan okwuma ijobh p'Israẹl, mavura z'egbe, 10 mad-aze Ibinọkpaabyi kw'Israẹl. Ny'izek-izek kw'mmokpatọkọ sẹ, ode mach'obhukakpa kw'matim ata p'saphira asi, ọttaanẹ mach'ọrọngkpakpa ọyenẹ. 11 Asonọng mbo p'Israẹl maze Ibinọkpaabyi k'ichen, machi ọttọhk, mabira agwo. Okenaka, Ibinọkpaabyi bẹ ọttọhk kosi.

12 Ọvaar Ibinọkpaabyi oben Mosẹs bẹ́, "Vura kebh-m k'ogbeso aninga amaan-m. Kaam m'nnang-ọ ata p'ikk'apaanga ọttara asana nkkẹra p'm'akpebhẹ bẹ."

13 Nya o, Mosẹs ọttara Joshua kw'ode otumọ kwẹ, mado ifor. Mosẹs ovura z'egbe ch'Ibinọkpaabyi. 14 Oben asonọng p'anọng p'Israẹl bẹ́, "Bọnga màninga ma tik mina maa, m'ọkpa nnam. Aarọn ọmaana Hur maning ma amaana bọnga. Ọnọng kpenamkpen kw'oyen odik, tte otima okebha bẹ."

15 K'ose kw'Mosẹs ovur ny'egbe ndo, ebonọ ebubha nya bẹ́ buubh 16 abarada p'Ọvaar Ibinọkpaabyi mabir asaka ny'egbe ch'Sinai. Ebonọ ndo ebubha ny'egbe ndo k'iwu ichadanẹ. Ttong iwu ichenọmfa, Ọvaar Ibinọkpaabyi oyerẹ Mosẹs ny'ebonọ ndo ẹtaanga. 17 Abarada p'Ọvaar Ibinọkpaabyi z'ogbeso nwo, makerẹ anọng p'Israẹl mach'ekpon ch'ẹd-ẹkwọmọ ọttọhk. 18 Minna kw'Mosẹs odimẹ ny'ebonọ ndo, ovura od-oninga ny'ogbeso nwo k'iyawu arọbh afa, ọmaana irungiwu arọbh afa.