1 "Idik s'ide afọra kàkpaanga agbaak. Obyibyanọng kàkkaana abẹ-ẹ nttẹsẹ k'ẹfọraden.

2 "Ọsaabh kàtor masi itama. Ó̱de abe nttẹsẹ z'esobh, afọra kàgbaak ator ọsaabh atima akibhẹ aponga. 3 Ogbugbora k'odik katorọ z'esobh k'ẹfọraden.

4 "Ó̱de akebh adamogbodo, obir ode ẹnyanya ch'ọwawunanọng kwọ ch'etten-ottena, bọka chena oyenẹ. 5 Ó̱de aze ẹnyanya ch'ọwawunanọng kwọ ch'ẹtọhka chẹ etto ẹkpẹk-ẹ, kkaan-ẹ, atin-ẹ. Ẹnyanya ndo nya kàfona arik.

6 "M'agbugbora pabọnga aponga p'ator-otor karam k'ogbe kw'mabe esobh. 7 Ọnọng kpenamkpen odik kàbọhma. Ọnọng kw'mbọhk sẹ iwur-owur, ọttara nwo kw'od-osi idik s'itor-otor, kàfhọ, kirẹ kaam ọnọng kw'opinẹ ny'eden ndo mìmbina nnang.

8 "Kọ ngwu kàchi, okurọ bẹ́, ngwu ọd-ọkpa ọnọng ichen, obir ọwọhkọ ọnọng kw'otor-otor ọbhakẹ ẹdaak.

9 "Bọnga m'okikennọng irem kànang. Bọnga nkk'azonga ose kw'ekkikken ede k'ogbe kw'uwa maning ekkikken z'Ijip.

10 "K'icho ichadanẹ, bọnga mm'atubh iwonọ, mabira asi ipha s'ekpo mbyo. 11 Okenaka, ny'icho s'ittong ichenọmfa, mm'asok izek njo ikwur ẹgba. M'ọttọhk nya kabir asi, mfha agbugbora p'arukọ amaana bọnga mayena ọchattọhk nya, nten s'ẹgba ibir iyena ọchattọhk ọdọk.

12 "K'iwu ichadanẹ jọ s'mm'asi itọhm sabọnga. Ó̱ttong iwu ichenọmfa, m'ọtọhm kàsi, mfha adamogbodo ọmaana nnyanya sabọnga, iyena ẹwọhngkwoka, abira p'mamaanẹ ny'abọnga k'ẹsọhmbhọr ọmaana akikennọng, mabir anemẹ ifor.

13 "Màtọka ogbe si idik nja maphyir s'ikk'bọnga mgbaaka ma. M'eche ch'ọka kpenamkpen kàyerẹ, tte ọnọng oning eche ch'ọka ny'ẹmma chabọnga ọbhaang.

14 "K'icho kpenamkpen, bọnga mmàd-asi odidaama igbedim ittaan anang-m.

15 "Màsi Odidaama kw'Brẹd kw'nna yist ake✝. K'iwu ichenọmfa, màchi brẹd kw'nna yist ake, k'ose kw'mbenẹ bọnga. Màsi odidaama nwa k'ogbe kwẹ, ny'ophe kw'Abib, kirẹ ny'ophe nwo wọ kw'bọnga mabin z'Ijip.

"Ọnọng oning abọhk-kpakpa otim okwu obe-m k'ititika.

16 "Màsi Odidaama kw'Ipha s'acheden-chiduk py'ekpo py'matubhọ.

"K'ẹkpọka ch'icho, k'ogbe kw'nkk'ipha maphyir asa, màsi Odidaama kw'Ipha Otitobha.

17 "K'igbedim ittaaan k'icho, ajinọng pọ maphyir mm'ad-akwu abe k'ititika s'Ọvaar Ibinọkpaabyi.

18 "M'izẹ s'matim afọhnọ ẹja anang-m kàgbaka ọmaana ọttọhk kpenamkpen f'make yist.

"M'iyaak s'nnanga s'edidaamawu chaam kàbir asok maa, opyirẹ k'ekpebha.

19 "Achiduk p'ajibh ọtam p'machi eden apha ny'abọnga k'izek, bẹ p'mm'atima akwu z'ọsọhm kw'Ọvaar Ibinọkpaabyi kwabọnga.

"M'ovunwa k'abasi p'ọkka kawọhn.

20 "Kirẹ e, kaam m'ntọhm ozeng-eden kwaam ochi bọnga eden, ọfha okkerẹ bọnga ch'mazenga ny'eden maa, mapyirẹ z'ibyi s'ikk'nda. 21 Màyong-ẹ itọhng, màbhaanga odik kw'ọgbaakẹ. M'kẹ odik kàkaanga; kirẹ, bọnga mòbina ọnang ny'edikkaanga chabọnga, okurọ bẹ́, eche chaam ening ẹmaan-ẹ. 22 Ó̱de mayong-ẹ itọhng mawuriji k'odik kw'ọgbaakẹ, mabir asi okpenamkpen f'mbenẹ, kaam m'nde ọwawunanọng kw'awawunanọng pabọnga; anọng p'ake bọnga ẹkọhr, m'nke bẹ ẹkọhr. 23 Ozeng-eden kwaam m'ochi bọnga eden, otima bọnga ozeng z'izek s'anọng p'Amọr, ọmaana s'anọng p'Het, ọmaana s'anọng p'Periz, ọmaana s'anọng p'Kenaan, ọmaana s'anọng p'Hiv, ọttara s'anọng p'Jebus. Kaam m'ndimẹ nkọma njo maphyir. 24 M'eso kàraka akpobha aka pabẹ. M'osisi kwabẹ kàbira ator. Màvọhkọ bẹ maphyir, màbir avọhkọ ata p'aka mbo ma tukutuku. 25 Màkpobha Ọvaar Ibinọkpaabyi kw'ode Ibinọkpaabyi kwabọnga, ọfha odo ọchattọhk ọmaana asi pabọnga. Kaam m'nrọbha ọkọhmaana ny'abọnga k'ikpakaana mbharẹ, 26 ibhọr kwanọng miyin, ọnọng mòbir ọkpaana. Kaam m'nnang bọnga akpen p'adum-odum.

27 "Kaam m'ntọhm ojora faam fiden ochi bọnga eden. Ẹkọma kpenamkpen ch'mm'akebha, kaam m'nke chẹ k'damadama. Kaam m'nsi awawunanọng pabọnga maphyir makpa nnam arọbh. 28 Kaam m'ntọhm abhonso machi bọnga eden mad-akwubh anọng p'Hiv ọmaana anọng p'Kenaan, ọttara anọng p'Het bẹ́, mabina arik bọnga eden. 29 Okenaka, kaam icho mawanẹ mìntima nkwubh bẹ, ọfha izek njo ining ẹgba ikwurọ, mgbaten ining ibira isaabh ina bọnga ẹfa. 30 Kaam m'nkwubh bẹ ma kẹrẹm-kẹrẹm maa, ọsaabh fabọnga opyirẹ k'ose kw'mm'atọka izek njo.

31 "Kaam m'nke enem chabọnga, tọma z'Ẹraanga-kora maa, pyirẹ z'Ọraanga kw'Meditereniya*, mbir tọma ny'ibyi s'anọng nna arukọ maa, mpyirẹ z'ọraanga kw'Yuphrates. Kaam m'nke anọng mbo p'arukọ ny'izek njo k'abọnga k'mbọhk, mabir akwubh bẹ kibungọ-kibungọ. 32 M'echekẹ kàsi amaana bẹ, ọttara aka pabẹ. 33 M'bẹ ọbọhk katte maruk ny'abọnga k'izek, kirẹ bẹ mm'asi bọnga makpobha aka pabẹ, ofona nya, mapinẹ amaan-m."