1 Ọvaar Ibinọkpaabyi oben Mosẹs bẹ́, 2 "Kọ m'atte ojinọng kpenamkpen kw'ochi eden ọmmaana ọbọhk anang-m. Ochedennwa kpenamkpen kw'ọmmaan ny'Israẹl, zaabẹ́ ode ojinọng, wanẹma, eten, kaam wọ nyen."

3 Nya o, Mosẹs oben anọng p'Israẹl bẹ́, "Màjima ewu nda, ewu ch'Ọvaar Ibinọkpaabyi otim ẹfa ch'ọbọhk kwẹ, ọrọhbha bọnga k'ebira z'Ijip. M'ọchattọhk f'make yist, kàchi. 4 Menda, m'ophe kw'Abib wọ kw'bọnga mm'abina. 5 K'ogbe kw'Ọvaar Ibinọkpaabyi m'otima bọnga opyirẹ z'izek s'anọng p'Kenaan, ọmaana s'anọng p'Het, ọmaana s'anọng p'Amọr, ọmaana s'anọng p'Hiv, ọttara s'anọng p'Jebus, izek njo s'iwa ochekẹ ọnang ab'ttatta pabọnga, izek s'abasi, ọmaana ọkọhn olor-olorọ, bọnga mm'ad-asi odidaama nwa m'ewu nda ch'ophe nwa. 6 K'iwu ichenọmfa, màchi brẹd kw'nna yist ake. Ny'ewu ch'ettong ichenọmfa, màsi odidaama nang Ọvaar Ibinọkpaabyi. 7 Màchi brẹd kw'nna yist ake ny'iwu njo ichenọmfa. Ny'ogbe nwo, tte yist kpenamkpen oning ny'abọnga k'njeka oning, tte oning ny'abọnga k'ẹkọma maphyir-phyir obir oninga. 8 Ny'ewu ndo, màtek iva pabọnga bẹ́, ‘Nsi minna okurọ ọttọhk f'uwa Ọvaar Ibinọkpaabyi osi ọnang mina k'ogbe kw'otim mina obina z'Ijip.’ 9 Odidaama nwa m'ode mach'ẹkọhka ch'mm'ake k'mbọhk sabọnga, màbir akpa k'ititika sabọnga mach'ejima bẹ́, ọpaanga kw'Ọvaar Ibinọkpaabyi oning k'ẹmma chabọnga, okurọ bẹ́, Ọvaar Ibinọkpaabyi wọ otim ẹfa chẹ chiden, ọrọhbha bọnga z'Ijip. 10 K'icho k'icho, bọnga min'ad-akpobha ọpaanga nwa, k'ogbe kwẹ.

11 "K'ogbe kw'Ọvaar Ibinọkpaabyi m'ọnang bọnga izek njo s'aKenaan k'ose kw'uwa ochekẹ ọnang bọnga ọmaana ab'atte pabọnga, 12 bọnga mm'atọka achedenva p'ibhọr kpenamkpen, adibha anang Ọvaar Ibinọkpaabyi. Achedenva p'etirakpo pyabọnga maphyir k'ejinọng, mm'abir ade paam. 13 Màtima ọrọkimaannwa bhek achedenva p'ẹnyanya kpenamkpen. Ó̱de mabenẹ bẹ́, m'ọnyanyanwa nwo màbhek, phyak-ẹ ẹdọngọ. Bọnga mm'abhek achedenva kpenamkpen pabọnga k'ejinọng.

14 "Íkwuna ájinọngva pabọnga mabọbhọ bọnga bẹ́, ‘Mvoma oyinẹ yen?’ Màpọhna bẹ́, ‘Wa Ọvaar Ibinọkpaabyi otim ẹfa chẹ chiden, otima mina obina z'Ijip, ọrọhbha mina z'izek s'moning k'ebira. 15 K'ogbe kw'uwa Phero ọgaang ettem obhum bẹ́, otte mina ọbọhk mofona, wa Ọvaar Ibinọkpaabyi ọfhọ acheden-jinọngva, ọmaana achedenva p'etirakpo maphyir k'ejinọng z'Ijip. Nya wọ osi, ntima achedenva p'etirakpo k'ejinọng maphyir, mfọhnọ ẹja nnang Ọvaar Ibinọkpaabyi, mfha ntima mbhek achedenva paam k'ejinọng.’ 16 M'ode mach'ẹkọhka ny'ọbọhk kwọ, obir ode ejima bẹ́, wa Ọvaar Ibinọkpaabyi wọ otim ẹfa chẹ chiden ọrọhbha mina z'Ijip."

17 K'ogbe kw'uwa Phero notte anọng p'Israẹl ọbọhk mafona, Ibinọkpaabyi bẹ ọbọhk kotte bẹ́, mazenga z'ẹkọma ch'aPhilistiya, chibhẹ ch'iwa ode bẹ́, eden ndo dọ ekpumọ ọtam. Wa Ibinọkpaabyi obenẹ bẹ́, "Ó̱de anọng p'Israẹl makebh egbong z'eden, makpokpo abhona achibhẹ pabẹ makpa nnam z'Ijip." 18 Ofona nya, Ibinọkpaabyi otima bẹ ọkọbha z'eden ch'ibyi s'anọng nna arukọ, za ch'echin z'Ẹraanga-kora. Wa ch'anọng p'Israẹl mabin z'Ijip, mado ifor s'egbong mawuriji.

19 Ny'ozenga nwo, wa Mosẹs otim akọbhọ p'Josẹph obina, okurọ ch'iwa Josẹph ikk'anọng p'Israẹl ọsa machekẹ, ch'obenẹ bẹ bẹ́, "K'odik ọkkọkka, Ibinọkpaabyi m'ọkkaana bọnga. Ógbe íkk'obenga, màtima akọbhọ paam bina m'ibyi nja."

20 Ch'iwa nkk'abina z'Sukọt, makwu abhing z'Ẹtam, ny'okikaan kw'ibyi s'anọng nna arukọ. 21 Wa ny'ozenga nwo, Ọvaar Ibinọkpaabyi otim ebonọ ch'ebe odudum ochi bẹ eden k'ẹya. K'erungọ, otima ekpon ch'ebe odudum ọnang bẹ ọyaanttaana k'erungọ. 22 Ebonọ ndo ch'ebe odudum k'ẹya, ọmaana ekpon ndo ch'ebe odudum k'erungọ, ibyi sabẹ kebin erik. Ening ny'ititika s'anọng mbo mach'ening nya.