1 K'ogbe kw'Mosẹs ọmaana Aarọn matim aning z'Ijip, Ọvaar Ibinọkpaabyi oben bẹ bẹ́, 2 "Ophe nwa wọ im'ode ocheden-phe kw'icho ọnang bọnga. 3 Tek anọng p'Israẹl maphyir bẹ́, k'ewu ch'ettong ijobh s'ophe nwoma, ojinọng kpenamkpen m'otima ọrọkimaannwa k'eso ch'ẹsọhmmọr chẹ. 4 Ó̱de ẹsọhmmọr ẹchamẹ kidaam k'ose kw'ina ọrọkimaannwa kibungọ mèkpo echi, tte ebhuna mbọhk ọmaana ẹsọhmmọr ch'ening ẹnyọm-ẹ, matọn achi. M'ode k'ogbe kw'nkk'obhik f'anọng p'aninga nya atọka, mfha mazonga f'ọnọng-ọnọng im'ochi. 5 Eten ndo ch'mm'ateka m'ede odimkwẹ kw'otim ode icho mawanẹ, ekebh kebir eyena. Okpo-okpo ode ọrọkimaannwa, wanẹma, ovunwa. 6 Màkkerẹ arọkimaanva mbo maa, opyirẹ iwu osowanẹ kw'ichi, s'ophe nwo. Ny'ẹsọhka ndo wọ kw'ọnọng kpenamkpen kw'obin ẹkọma ch'Israẹl im'ọfhọ ọrọkimaanwa kwẹ. 7 Màyekẹ izẹ s'arọkimaanva mbo màfoka z'ammakwukchi, ọmaana z'ammakwuksọ p'isọhm s'mm'aninga achi nten njo. 8 Ny'erungọ ndo, ọnọng kpenamkpen m'ochi eten ch'm'abhaabh-ọbhaabh, ọmaana akwongitọhng p'ajobh-ojobhọ, ọttara brẹd kw'ina yist ake. 9 M'eten ndo ekikebhẹ kachi, nkàbir awọhn. Màbhaabh-ẹ ttara eso, ttara mmo, ọttara abhọrọ maphyir. 10 M'ẹyaara kpenamkpen karik maa, ewu esobha. Ó̱de ẹ́yaara kpenamkpen erikẹ, màkwọmọ chẹ maphyir. 11 Eden ch'mm'azenga achi ede bẹ́, màtima odikpa abọka nwurọ sabọnga, màke ntọkọ s'adikpa z'mmo, màtima achikwura z'mbọhk. Màchi ọchattọhk mvo ẹbhar-ẹbhar, okurọ bẹ́, Pasova kw'Ọvaar Ibinọkpaabyi wọ.

12 "Ny'erungọ ndo, kaam m'nzenga ny'ẹkọma ch'Ijip, mfhọ acheden-jinọngva maphyir, ọmaana adimpẹ p'nten maphyir s'ichi eden imaana. Kaam m'mbir mpyibh aka p'anọng p'Ijip maphyir aponga. Kaam wọ nde Ọvaar Ibinọkpaabyi. 13 Izẹ s'mm'afoka ny'ammakwuk pabọnga, jẹ jọ im'ikọhk-m isọhm s'bọnga maning. Ny'ogbe kw'im'nze izẹ njo, kaam m'nkwur bọnga njeka. Nkwurọ njo s'obo, bọnga mìkpẹkẹ k'ogbe kw'im'nsi anọng p'Ijip itama.

14 "Bọnga mm'ad-ajima ewu nda ttattampe, m'abir atima dẹ mach'edidaamawu ch'mm'atima anang Ọvaar Ibinọkpaabyi ikpukpobha k'icho kpenamkpen. 15 K'iwu ichenọmfa, bọnga mm'achi brẹd kw'nna yist ake. Ny'echedenwu, bọnga mm'arọhbha yist z'isọhm sabọnga maphyir. Tọma ny'echedenwu ndo maa, pyirẹ iwu ichenọmfa, ọnọng kpenamkpen kw'ochi brẹd kw'make yist, mm'akpaar-ẹ z'ẹkaan ch'anọng p'Israẹl. 16 K'echedenwu, ọttara ny'ewu ch'ettong ichenọmfa, mm'attonga k'ibyi majanẹ, m'asi odidaama kw'mm'atima akpobha Ọvaar Ibinọkpaabyi. M'ọtọhm kpenamkpen ny'iwu njo kàsi, kw'ọkpanẹ ọchattọhk f'mm'awọhn anang anọng maphyir machi.

17 "Màsi Odidaama nwa kw'brẹd kw'nna yist ake, okurọ bẹ́, m'ewu nda dọ ch'ntim bọnga k'ọsaabh fabọnga, ọmaana k'nkaan sabọnga, mbina z'Ijip. Màsi odidaama kw'ewu ndoma mach'odidaama kw'im'oninga k'epemaanitor. 18 Ny'ochedenphe kw'icho, tọma ny'ẹsọhka ch'iwu osowanẹ kw'ichi maa, pyirẹ k'ẹsọhka ch'iwu ẹrọbh okwuma madanẹ, màchi brẹd kw'nna yist ake. 19 K'iwu ichenọmfa, tte yist kpenamkpen oning z'abọnga k'isọhm oning. Ó̱de ọ́nọng kpenamkpen ochi brẹd kw'make yist, màkpaar-ẹ z'ẹkaan ch'anọng p'Israẹl, zaabẹ́ ode okikennọng, obir ode ọmmaana. 20 K'ibyi kpenamkpen s'marukọ, m'brẹd kw'make yist kàchi. Màchi brẹd kw'ina yist ake kẹ-kẹ."

21 Nya o, Mosẹs oyerẹ asogbọhkọnọng p'Israẹl maphyir mattonga. Oben bẹ bẹ́, "Màzọhng bẹ́ kpaar màteka arọkimaanva p'isọhmmọr sabọnga, màfhọ, matima asi odidaama kw'Pasova. 22 Màyekẹ izẹ s'eten kpenamkpen ch'mafhọ, ke k'ọgbangbang. Màtọka eke ch'azizaarẹ p'hisop, manọhma ny'izẹ njo, màfoka z'ammakwuksọ, ọmaana z'ammakwukchi. Tte ọnọng kpenamkpen oning k'iyaan oyinẹ maa, ewu esobha. 23 K'ogbe kw'Ọvaar Ibinọkpaabyi im'ozenga ny'izek njo ọfhọ anọng p'Ijip, óde oze izẹ njo ny'abọnga k'isọhm, m'okwur ojeka. Ozeng-eden kw'obo ọbọhk mòtte bẹ́, odim z'abọnga k'isọhm, ọfhọ bọnga.

24 "Bọnga, ọmaana iva p'iva pabọnga mm'akpobha apaanga mba, ttattampe. 25 Ó̱de mapyirẹ z'izek njo s'Ibinọkpaabyi ọnwọhngọ bẹ́, m'ọnang bọnga, màchina ororo si odidaama nwa kw'Pasova. 26 Íkwuna iva pabọnga mabọbhọ bọnga bẹ́, ‘Odidaama nwa oyinẹ yen?’ 27 Bọnga mm'apọhna bẹ bẹ́, ‘Ode odidaama kw'motim ọfọhnọ ẹja ch'Pasova ọnang Ọvaar Ibinọkpaabyi, ch'iwa ojek isọhm s'anọng p'Israẹl ny'Ijip, ọkkaana isọhmmọr samina, osi anọng p'Ijip itama.’ " Nya o, anọng p'Israẹl maphyir, maraka nso makpobha Ọvaar Ibinọkpaabyi. 28 Mabina, masi k'ose kw'Ọvaar Ibinọkpaabyi ikk'Mosẹs, ọmaana Aarọn obena.

29 Opyirẹ ny'orungittem, Ọvaar Ibinọkpaabyi ọfhọ acheden-jinọngva p'anọng p'Ijip, tọma z'ochedenwa kw'Phero, kw'oning z'ẹvaarkkọhbhọ, tto z'acheden-jinọngva p'ayim mgbakkọhbhọ. Wa obir ọfhọ acheden p'etirakpo py'anọng p'Ijip. 30 Ny'erungọ, Phero ọmaana adukwa pẹ, ọttara anọng p'Ijip maphyir, mabina k'erungọ, matima amọng p'mabhomọ k'ẹrọng maphyabha ny'ẹkọma ch'Ijip. Wa ọsọhm kode kw'ọnọng ina ope.

31 Ny'erungọ, Phero oyerẹ Mosẹs ọmaana Aarọn oben bẹ bẹ́, "Bọnga maphyir, màbina! Bọnga ọttara anọng p'Israẹl màtte anọng paam ọbọhk, màzọhng kpobha Ibinọkpaabyi mach'nkk'aphyema. 32 Màtọka etirakpo pyabọnga maphyir, mazọhng afona k'ose kw'nkk'aphyema. Màbir si-m ittabọhng."

33 Anọng p'Ijip mawọkọ anọng p'Israẹl, maben bẹ bẹ́, "Màbina ẹbhar-ẹbhar rik ẹkọma nda, mfha moning maphyir ope!" 34 Ofona nya o, anọng p'Israẹl mabina, matinẹ abuma p'nna yist atima aka, make k'agbangbangva p'nd-atima asi brẹd, mabhọrọ k'ọbara fabẹ, manana z'mbubaang. 35 Mabir asi k'ose kw'Mosẹs ọtọhnọ bẹ, mabọbh anọng p'Ijip bẹ́, manang bẹ ekpo py'matim silva ọmaana gol asi, ọttara ọbara. 36 Ode ch'Ọvaar Ibinọkpaabyi ikk'anọng p'Ijip ọtwa bẹ́, masi ọphyaam anang anọng p'Israẹl. Ofona nya o, anọng p'Israẹl macha ekpo py'anọng p'Ijip atima afona.

37 Wa anọng p'Israẹl abin ozenga z'Rameses, machina z'Sukọt. Anọng p'uwa masi ozenga nwo mazengẹ anọng ẹnọhna nnọhna arọbh anna, ágbaarẹ panọng ọmaana ivava abharẹ. 38 Wa anọng ọdọk-ọdọk k'ọsaabh, mabir ator anọng p'Israẹl ny'ozenga nwo, ttara abhaam, ọmaana arọkimaan, ọttara avu k'ẹkaan. 39 K'ogbe kw'anọng p'Israẹl mabin, matte Ijip ọbọhk, m'ogbe kayen mawọhn ọchattọhk anang ifor sabẹ, okurọ ch'anọng p'Ijip makwubh bẹ okwubh. Minna kw'matim abuma mbo masi brẹd kw'ina obibir obirẹ.

40 Kibungọ-kibungọ, wa anọng p'Israẹl arukọ ny'Ijip k'icho ẹnọhna okwuma icho ẹrọbh okwuma ijobh. 41 Ny'ekpongannamwu ch'icho njo ẹnọhna okwuma icho ẹrọbh okwuma ijobh, nya wọ kw'uwa anọng p'Ọvaar Ibinọkpaabyi, matte Ijip ọbọhk, k'nkaana sabẹ. 42 Wa Ọvaar Ibinọkpaabyi okkerẹ erungọ bẹ́, ọrọhbha anọng p'Israẹl z'Ijip. Nya wọ osi, anọng p'Israẹl maphyir, mm'ad-atim ọda, matima akpobha Ọvaar Ibinọkpaabyi k'epemaanitor.

43 Ọvaar Ibinọkpaabyi oben Mosẹs ọmaana Aarọn bẹ́, "Apaanga p'amaan Odidaama kw'Pasova made bẹ́: tte okikennọng kpenamkpen oning ọchattọhk mvo ochi. 44 Obira kpenamkpen kw'nkk'adebha, mabir abhir-ẹ ọnọm, m'ochi. 45 Ṉ́nòde akikennọng p'arukọ amaana bọnga, ọmaana atọhmnọng p'mad-akpe akpuka k'ọtọhm fabẹ, tte maning achi.

46 "Mm'aninga z'ọsọhm ẹtaanga achi eten ndo, ẹyaara ening k'iyaan eyinẹ. M'ọkọbhọ kpenamkpen kw'eten ndo kabir avọhkọ. 47 Tte anọng p'Israẹl maphyir, masi odidaama nwa.

48 "Ó̱de okikennọng kw'orukọ ọmaana bọnga ororọ bẹ́, osi Odidaama nwa kw'Pasova ọmaana bọnga, tte ajinọngva p'ẹsọhmmọr chẹ maphyir abhirẹ inọm sabẹ, mfha matọk-ẹ mach'ọmmaana wanẹ kwabọnga. M'ọnọng kw'ina ọnọm obhirẹ ọbọhk kàtte ochi. 49 Ozeng k'ammaana, ọmaana akikennọng, apaanga mba, mabaabh bẹ ọttara."

50 Minna kw'uwa anọng p'Israẹl maphyir masi k'ose kw'Ọvaar Ibinọkpaabyi ikk'Mosẹs ọmaana Aarọn obena. 51 Ny'ewu ndo madanẹ-danẹ, Ọvaar Ibinọkpaabyi otima anọng p'Israẹl k'nkaana sabẹ, mabina z'Ijip.