Nnwẹr kw'Ozenga 9

Nkwurọ s’obo kw’etirakpo

1 Nya o, Ọvaar Ibinọkpaabyi oben Mosẹs bẹ́, "Zọhng kebha Phero, aben-ẹ bẹ́, Ọvaar Ibinọkpaabyi kw’aHiburu obenẹ bẹ́, ‘Tte anọng paam ọbọhk mafona, mfha mad-akpobh-m. 2 Ó̱de achin ororo abhum bẹ́, bẹ ọbọhk matte mafona, 3 kaam Ọvaar Ibinọkpaabyi m’nkọhka nkwurọ k’etirakpo pyọ, ọmaana k’nnyanya sọ, ọmaana k’abhaam pọ, ọmaana k’akamẹl, ọmaana k’adamogbodo, ọmaana k’arọkimaan, ọttara k’avu pọ. 4 Okenaka, ose kw’Ọvaar Ibinọkpaabyi im’osi etirakpo py’Israẹl m’ode nkọmẹ k’ose kw’im’osi etirakpo py’Ijip, ọfha otirattọhk minna vanẹ f’Israẹl, oning ope.’ "

5 Minna kw’Ọvaar Ibinọkpaabyi oke ogbe, oben bẹ́, "Ophyinẹ wọ kw’kaam Ọvaar Ibinọkpaabyi m’nsi odik nwa m’izek nja." 6 Ewu esobh nya, Ọvaar Ibinọkpaabyi osi minna k’odik ọkkọkka. Etirakpo py’Ijip epe maphyir, okenaka, otirattọhk mavanẹ f’Israẹl kope. 7 Phero ọtọhm ajinọng banẹ bẹ́, mad-abaana. Mapyirẹ za, maze bẹ́, otirattọhk mavanẹ f’Israẹl f’ikk’ọpa, kode. Chibhẹ nya, Phero ochina ororo ọgaangẹ ettem, anọng p’Israẹl ọbọhk kotte mafona.

Nkwurọ s’aphyi

8 Nya o, Ọvaar Ibinọkpaabyi oben Mosẹs ọmaana Aarọn bẹ́, "Màtọka ititọhngkọma z’itakwuka. Tte Mosẹs ọnyaanẹ sẹ z’iwokọ, ny’ititika s’Phero. 9 Ititọhng njo m’ibhakẹ izeng ebonọ ny’ẹkọma ch’Ijip maphyir. M’ofona nya, aphyi p’atim ibhan m’asi ayokinọng ọmaana nten ny’ẹkọma ndo maphyir."

10 Nya o, makpokọ ititọhngkọma z’nkwuka, matima ad-akebha Phero. Mosẹs o, ọnyaanẹ ititọhngkọma njo z’iwokọ. Minna kw’aphyi p’matim ibhan ayinẹ ayokinọng ọttara nten k’ifor. 11 Wa anọng p’ad-asi mbọn ọdọk Mosẹs k’ititika kakpo abe, okurọ ch’aphyi asi bẹ ọmaana anọng p’Ijip k’ifor maphyir. 12 Okenaka, Ọvaar Ibinọkpaabyi osi ettem ch’Phero ẹgaangẹ, Mosẹs ọmaana Aarọn itọhng koyong, k’ose kw’Ọvaar Ibinọkpaabyi ikk’obena.

Nkwurọ s’ẹrọng-ch’atava

13 Nya o, Ọvaar Ibinọkpaabyi oben Mosẹs bẹ́, "Bina zọhng gwunga Phero ọmma k’ekpikpebha, aben-ẹ bẹ́, ‘Ọvaar Ibinọkpaabyi, kw’ode Ibinọkpaabyi kw’aHiburu obenẹ bẹ́, Tte anọng paam ọbọhk mafona, mfha mad-akpobh-m. 14 Ó̱de ina acher m’ogbe nwa, kaam m’nkọhka kọ, ọmaana adukwa pọ, ọttara anọng pọ, nkwurọ siden, mfha mazonga bẹ́, ọnọng kw’ode mach’kaam m’iyagbin maphyir, kode. 15 M’ogbe nwa, wura k’ọbọhk kwaam nnema, nkọhka bọnga nkwurọ s’iwura ifhọ kọ ọmaana anọng pọ maphyir m’iyagbin. 16 Okenaka, ntte bọnga ọbọhk bẹ́, maruk akpen, mfha nkọhka ẹfa chaam, anọng abir akpobha eche chaam m’iyagbin maphyir. 17 Chibhẹ nya, kọ atim age-oge bẹ́, anọng paam ọbọhk matte mafona. 18 Ofona nya, ophyinẹ ogbese nwa, kaam m’ntebh arọngta, ekira ch’anọng p’Ijip nna atima ad-aza, ch’iwa mabe-be ammaana maa, pyirẹ ma. 19 Tọhm ẹkkaabha ẹbhar-ẹbhar bẹ́, matima etirakpo pyọ, ọttara ọttọhk kpenamkpen f’ode fọ z’owonọ, madim z’ikkira, okurọ bẹ́, óde árọngta mba matebh ọnọng, ọmaana otirattọhk f’ina k’ikkira oning, m’epe-ope.’ "

20 Adukwa mbo p’Phero p’ayen ojora kw’ọgbaakadik kw’Ọvaar Ibinọkpaabyi, masẹr-ọsẹr, mad-atọka abira pabẹ, ọmaana etirakpo pyabẹ atima adim z’ẹtaanga. 21 Ayok mbo p’nna ọgbaakadik kw’Ọvaar Ibinọkpaabyi mach’ọttọhk atọk, matte abira pabẹ, ọmaana etirakpo pyabẹ ọbọhk z’iwonọ.

22 Minna kw’Ọvaar Ibinọkpaabyi obenẹ Mosẹs bẹ́, "Nemẹ ọbọhk kwọ tena z’ọrọngkpakpa, ọfha arọngta mbo matebh ayokinọng, ọmaana etirakpo, ọttara ọttọhk kpenamkpen f’matubh-otubh k’iwonọ s’Ijip."

23 K’ose kw’Mosẹs onemẹ ochikwura kwẹ otena z’ọrọngkpakpa, minna kw’Ọvaar Ibinọkpaabyi ọtọhmọ ẹbhaangkpon, ọmaana arọngta. Ẹbhaangkpon ẹmaanẹ z’izek. Minna kw’Ọvaar Ibinọkpaabyi otebhẹ arọngta ny’izek s’Ijip. 24 Arọngta mbo matebh, mmangkpon imanẹ ẹwọr mach’imaanẹ nya. Tọma z’ogbe kw’Ijip obobe ode obhon, ẹrọng ch’etim epyibhẹ minna, kede. 25 Arọngta mbo mafhọ ayokinọng, ọttara etirakpo ny’Ijip, ọmaana nchi, ọttara eborakpo py’ening z’iwonọ s’anọng p’Ijip. 26 Ibyi bungọ-bungọ s’iwa arọngta nna atebhẹ, ode Goshẹn, kw’ode ibyi s’anọng p’Israẹl marukọ.

27 Nya o, Phero oyerẹ Mosẹs, ọmaana Aarọn oben bẹ bẹ́, "Kaam kk’epyibha nsa m’ogbe nwa. Ọvaar Ibinọkpaabyi wọ otor-otor. Kaam ọmaana anọng paam, nkk’opina. 28 Màze njọm nang Ọvaar Ibinọkpaabyi o, kirẹ mmaangkpon ọmaana arọngta mba, kk’asaabha ọkpan o! Kaam m’ntte bọnga ọbọhk otte, mafona. M’ọdọk ma kàninga maphyir-phyir."

29 Mosẹs ọpọhn-ẹ bẹ́, "Ó̱de kaam kk’mbina nrik obhon nwa, kaam m’mmaama mbọhk saam, nze njọm nnang Ọvaar Ibinọkpaabyi. Mmaangkpon ọmaana arọngta m’ettik-ottika, mfha matima azonga bẹ́, iyagbin nja, ining k’mbọhk s’Ọvaar Ibinọkpaabyi. 30 Kaam nzong za bẹ́, kọ ọmaana adukwa pọ, m’ojora f’Ọvaar Ibinọkpaabyi atima ayena e."

31 (Wa owu, ọmaana abarli makibhẹ maphyir, okurọ ch’abarli nkk’akora, owu obir osi agbok. 32 Okenaka, wa awit kakibhẹ, okurọ ch’nna atima akora ny’ogbe nwo.)

33 Minna kw’Mosẹs obin orik Phero nya, otte obhon ọbọhk, ọd-ọmmaama mbọhk sẹ, oze njọm ọnang Ọvaar Ibinọkpaabyi. Mmaangkpon, ọmaana arọngta, ettika, ẹrọng ebir ettika otitebh ny’izek. 34 K’ogbe kw’Phero oze bẹ́, ẹrọng, ọmaana arọngta, ọttara mmaangkpon kk’ettika, minna kw’kẹ, ọmaana adukwa pẹ mabir apinẹ, machina ororo agaangẹ nttem. 35 Nya o, Phero ọgaangẹ ettem bẹ́, anọng p’Israẹl ọbọhk motte mafona, k’ose kw’Ọvaar Ibinọkpaabyi ikk’ozenga kk’Mosẹs, oben.