1 K'iwu ichi s'ophe kw'ottong afa, k'ogbe kw'anọng p'Israẹl nkk'abina z'Ijip, bẹ maphyir mabina ozenga z'Elim, makwu apyirẹ z'ibyi s'anọng nna arukọ, z'Sin kw'oning k'njeka kw'Elim ọmaana Sinai. 2 Ny'ibyi njo, anọng p'Israẹl maphyir maninga nya anwọhnọ anang Mosẹs ọmaana Aarọn. 3 Maben bẹ bẹ́, "Wura ojibh ọtam bẹ́, mope k'mbọhk s'Ọvaar Ibinọkpaabyi z'Ijip. Z'Ijip, mod-oninga ẹwọr ọkọbha ọzọhka f'nten, mochi ekpo py'ẹdaakẹ minna maa, mọdọhbh. Okenaka, bọnga nkk'mina atima ayin k'iyaan akwu m'ibyi s'anọng nna arukọ bẹ́, okwo ọfhọ anọng mba maphyir."

4 Ọvaar Ibinọkpaabyi oben Mosẹs bẹ́, "Kaam m'ntọhm brẹd kw'im'otebh mach'ẹrọng, nnang bọnga. K'ewu kpenamkpen, anọng màd-ayin k'iyaan, màd-akpokọ k'ose kw'im'obenga bẹ k'ewu. Minna kw'im'ntima nyoma bẹ, ọfha nzonga óde mm'ator ntọhna saam, mbir nzonga óde mm'abhum-obhum. 5 Ó̱ttong iwu ichadanẹ, màkpokọ brẹd nwo igbedim ifa, ọsaabh ọyọhnga nwo kw'mad-akkikken akpokọ z'iwu njoza."

6 Ofona nya, Mosẹs ọmaana Aarọn maben anọng p'Israẹl maphyir bẹ́, "Za k'ẹsọhka, bọnga mm'azonga bẹ́, Ọvaar Ibinọkpaabyi wọ otim bọnga obina z'Ijip. 7 Ó̱tum k'ekpebha, mm'aze abarada p'Ọvaar Ibinọkpaabyi, okurọ bẹ́, kẹ kk'bọnga ọbhaanga ch'mad-anwọhnọ anang-ẹ. Mina mode mbọng kw'bọnga mad-anwọhnọ anang mina?" 8 Mosẹs obira oben bẹ bẹ́, "Bọnga mm'azonga bẹ́, Ọvaar Ibinọkpaabyi wọ ọnang bọnga eten ch'machi k'ẹsọhka, ọmaana brẹd maphyir kw'marorọ k'ekpebha, okurọ bẹ́, kẹ kk'bọnga ọbhaanga ch'mad-anwọhnọ anang-ẹ. Mina mode mbọng? Mina azang p'bọnga mad-anwọhnọ, Ọvaar Ibinọkpaabyi kw'mad-anwọhnọ."

9 Nya o, Mosẹs, oben Aarọn bẹ́, "Tek anọng p'Israẹl maphyir bẹ́, makwu abe k'ititika s'Ọvaar Ibinọkpaabyi, okurọ bẹ́, kẹ kk'ẹnwọhnọ chabọnga, ọbhaanga."

10 Nya ch'Aarọn otim ọgbaak odik ọnang anọng p'Israẹl maphyir, minna kw'mabin ichen akkerẹ z'ibyi s'anọng nna arukọ, maze abarada p'Ọvaar Ibinọkpaabyi ch'mad-ayin ny'ebonọ.

11 Ọvaar Ibinọkpaabyi oben Mosẹs bẹ́, 12 "Kaam kk'ẹnwọhnọ ch'anọng p'Israẹl mmaanga. Tek bẹ bẹ́, k'ẹsọhka, mm'ayena nten s'mm'achi, k'ekpebha mabira ayena brẹd kw'mm'achi maa, madọhbh. Nya kw'mm'azonga bẹ́, kaam wọ nde Ọvaar Ibinọkpaabyi, kw'ode Ibinọkpaabyi kwabọnga."

13 Ny'ẹsọhka, ọnọhn f'ẹgba ọsaka maa, ofu ibhinga-byi sabẹ. Opyirẹ k'ekpebha, ifọhng isaka, ibhọrọ ibyi s'mabhingẹ. 14 K'ogbe kw'ifọhng njo ikk'isa o, ekpo mach'mfhọfhọ, eyin ebubha izek njo s'anọng nna arukọ. 15 Anọng p'Israẹl maze nya o, ch'ọttọhk mvo ina bẹ ọttaanẹ, mabọbh ayok bẹ́, "Bọng-ọttọhk vọ nya?"

Mosẹs ọpọhna bẹ bẹ́, "Ọchattọhk f'Ọvaar Ibinọkpaabyi ọnang bọnga bẹ́, machi vọ nya e. 16 Ọvaar Ibinọkpaabyi kk'ẹfa ọnanga bẹ́, ọnọng-ọnọng okpokọ k'ose kw'im'obeng-ẹ. K'ọnọng kpenamkpen kw'oning ny'ikkira sọ, m'akpokọ fẹ k'ogbobhmbọhk."

17 Anọng p'Israẹl masi k'ose kw'matekẹ bẹ. Wa ayok banẹ akpokọ k'ọsaabh, banẹ akpokọ makarẹ. 18 K'ogbe kw'mayom ekpo mbyo k'ogbobhmbọhk, ọnọng kw'okpokọ k'ọsaabh koyen ọyọhng-ọyọhnga. Oyok kw'okpokọ makarẹ obira oyena py'ebeng-ẹ. Ọnọng-ọnọng okpokọ k'ose kw'ebeng-ẹ.

19 Nya o, Mosẹs oben bẹ bẹ́, "Ọnọng kpenamkpen oning ọchattọhk mvo oye maa, ewu esobha."

20 Okenaka, wa ayok banẹ m'Mosẹs itọhng kayong. Matọk byanẹ asok maa, ewu esobha. Minna kw'ezeng etto nzirẹ, ẹtọma eruk osisom. Ofona nya, wa ọdọkọ Mosẹs otima otor bẹ.

21 K'ekpebha kpenamkpen, ọnọng-ọnọng od-okpokọ k'ose kw'obeng-ẹ. K'ogbe kw'echekira ẹgaangẹ nya, ẹyaana maphyir. 22 Ny'ewu ch'ettong ichadanẹ, mad-akpokọ agbobhmbọhk afa, kw'ode ọchattọhk f'iwu ifa. Asonọng p'Israẹl mabina, makwu atek Mosẹs odik nwo. 23 Mosẹs oben bẹ bẹ́, "Ọvaar Ibinọkpaabyi ọnang ẹfa bẹ́, ‘Ophyinẹ m'ode ẹwọhngkwokawu, ewu ch'Ọvaar Ibinọkpaabyi ch'ewur-owur. Ofona nya, màbhaabh f'mm'abhaabh, mabira awọhn f'mm'awọhn. Okpenamkpen f'obekẹ, màtọka ye maa, opyirẹ k'ekpebha.’ "

24 Minna kw'masi k'ose kw'Mosẹs obenẹ bẹ, maye py'erikẹ maa, ewu esobha, eruk kesomọ, nzirẹ kebir etto. 25 Mosẹs oben bẹ bẹ́, "Màchi fẹ menda, okurọ bẹ́, menda ode ẹwọhngkwokawu ch'Ọvaar Ibinọkpaabyi. Menda m'ọchattọhk mvo ny'izek, maze. 26 Bọnga mm'atima iwu ichadanẹ akpokọ ọchattọhk mvo. Ó̱ttong íwu ichenọmfa, kw'ode ẹwọhngkwokawu, ọchattọhk mvo mòninga."

27 Chibhẹ nya, wa ayok banẹ ayinẹ k'iyaan ny'ewu ndo ch'ettong ichenọmfa, mad-aror ọchattọhk mvo. Okenaka, m'ọttọhk kaze. 28 Nya kw'Ọvaar Ibinọkpaabyi nobenẹ Mosẹs bẹ́, "Ogbe mòbhir otuma yen pira bọnga makpobha asana paam, ọttara ntọhna saam? 29 Màjima bẹ́, Ọvaar Ibinọkpaabyi kk'bọnga ẹwọngkwokawu ọnanga. Kẹ wọ osi ọnang bọnga brẹd k'iwu ifa ny'ewu ndo ch'ettong ichadanẹ. Kọbaan bẹ́ ọnọng kpenamkpen ọta ibyi ny'ewu ch'ettong ichenọmfa." 30 Nya o, anọng mbo makwoka ọwọhng ny'ewu ndo ch'ettong ichenọmfa.

31 Wa anọng p'Israẹl mayerẹ brẹd nwo bẹ́, manna. Wa manna nwo owur-owur mach'achimọma p'korianda, obir ode z'ẹdaak mach'ayokpa p'matim akọhnsi asi. 32 Mosẹs oben bẹ bẹ́, "Ọvaar Ibinọkpaabyi kk'mina obena bẹ́, ‘Màtọka ogbobhmbọhk wanẹ kw'manna màye, mfha kwuna matọka akọhka epemaanitor bẹ́, brẹdkira nwoma kw'uwa nnang bọnga z'ibyi s'anọng nna arukọ k'ogbe kw'ntim bọnga mbina z'Ijip.’ "

33 Mosẹs o, oben Aarọn bẹ́, "Tọka ẹsẹbin awona manna kw'ofu ogbobhmbọhk nya. Tọka bera ny'ititika s'Ọvaar Ibinọkpaabyi, asok epemaanitor."

34 Aarọn osi k'ose kw'Ọvaar Ibinọkpaabyi ikk'Mosẹs obena. Ọtọka manna nwo osok ny'ititika s'Ẹkkọhbhọ ch'Echekẹ, oye nya. 35 Wa anọng p'Israẹl machi manna nwo k'icho arọbh afa, maa mapyirẹ z'izek s'anọng arukọ. Machi manna nwo maa, mapyirẹ ny'enem ch'Kenaan.

36 Omer ode ogbobhmbọhk mawanẹ k'agbobhmbọhk ijobh p'asi ẹpha madanẹ.