1 Wa matim agbaaka p'akasiya asi ija-byi s'ẹnanga okwukwọmọ. Agoriji pẹ made ntọkọ ichenọmfa ọmaana akaana achadanẹ, ẹkpa chẹ ede ntọkọ ichadanẹ ọmaana akaana achadanẹ, masẹ-ẹ mbengana k'ẹkpa. 2 Masi abhik anna ny'abongọ mbo, k'ose kw'abhik ọmaana ija-byi njo nnakwu ade ọttọhk mavanẹ, matima bronz abhọrọ ija-byi njo maphyir. 3 Matima bronz asi ekpo py'ija-byi mach'ọzọhka, ọmaana asọvẹl, ọmaana agbangbang, ọmaana agbindara p'ayen asa, ọttara ezengakpa. 4 Matima bronz ayok ọkkẹng asok ny'ibhaang kw'izek-izek kw'ija-byi njo. 5 Matima bronz asi aringẹ p'mabọk mkpọmmachi ny'abongọ anna p'ọkkẹng nwo. 6 Matima akasiya asi mkpọmmachi, matima bronz abubha. 7 Manọhma nchi njo s'idum-odum ny'aringẹ mbo p'aning ny'abongọ p'ija-byi, mfha nd-atima atinẹ jẹ. Matima agbaaka p'awer-owerẹ asi ija-byi njo itte eje ny'ettem.

8 Wa matim abazẹkwubh p'panọng p'ad-asi ọtọhm ny'ebhumma ch'ikkiramma s'etobha, asi ọgbangbang kw'bronz, ọmaana ẹnana chẹ.

9 Wa mabira asi eterttem. Z'ẹwọn-ẹwọna, adum pẹ ade ntọkọ arọbh achenọmfa obhirẹ ijobh, ebir eyena ọbara f'ọmma f'matim mmọradik ọkkọkka ayok. 10 Matima bronz ayok mkpọmmachi ẹrọbh, ọmaana arin pabẹ ẹrọbh. Mabir atima silva asi ager, ọttara mbarakpa ny'mkpọmmachi. 11 Z'ebir-ebir, wa adum ade ntọkọ arọbh achenọmfa obhirẹ ijobh; mkpọmmachi ẹrọbh ibe za, ọmaana arin pabẹ p'bronz. Matima mgbaka ottara ager p'silva arena mbarakpa ny'mkpọmmachi.

12 Z'ẹbhaakẹ ch'ewuchen ed-edimẹ, ọbara f'ọmma obir ode ntọkọ arọbh achenọmfa obhirẹ ijobh; mkpọmmachi ẹrọbh ibe za, ọmaana arin pabẹ p'bronz. Matima mgbaka ottara ager p'silva arena mbarakpa ny'mkpọmmachi. 13 Z'ẹbhaakẹ ch'ewuchen ed-eyin, ẹkpa ch'eterttem ede ntọkọ arọbh attaan obhirẹ ichi. 14 Adum p'ọbara f'ọmma f'oren k'ẹbhaakẹ danẹ ch'ebhumma ede ntọkọ ẹrọbh obhirẹ afa, ọmaana akaana achadanẹ. Mkpọmmachi nttaan ibe za, ọttara arin pabẹ attaan. 15 Z'ẹbhaakẹ ndoza ch'ebhumma, adum p'ọbara f'ọmma obir ode ntọkọ ẹrọbh obhirẹ afa, ọmaana akaana achadanẹ. Mkpọmmachi nttaan, ọttara arin pabẹ attaan mabir abe za. 16 Ọbara f'ọmma maphyir f'ọkọm eterttem ndo, wa matim ọbara ọkkọkka f'mayok-oyok, asi. 17 Wa matim bronz asi arin p'mkpọmmachi njo. Matima silva asi mgbaka ọmaana ager p'mkpọmmachi, mabir atima silva abubha ẹrọng-ẹrọng kwabẹ, mfha mkpọmmachi njo maphyir s'eterttem ndo, eyena mbarakpa s'silva.

18 Ibara s'maren ny'ebhumma ch'eterttem ndo iyen ase p'ade blu, ọmaana p'akorọ isiso, ọttara p'akorọ izizẹ, ọttara mmọradik ọkkọkka s'okwum-ekpo ikk'oyoka maa, ijibh. Wa adum pẹ ade ntọkọ ẹrọbh obhirẹ ijobh, agoriji pẹ mabir ade ntọkọ ichenọmfa ọmaana akaana achadanẹ, mach'ọbara f'eterttem ndo, 19 ọmaana mkpọmmachi nna s'bronz, ọttara arin pabẹ anna p'bronz. Matima silva asi mgbaka ọmaana ager pabẹ, mabir atima silva abubha ẹrọng-ẹrọng kwabẹ. 20 Wa matim bronz asi abhing p'ikkira s'iruk-byi s'Ibinọkpaabyi maphyir, ọttara eterttem.

21 Ma wọ ode obhik f'ẹtọhmkpo py'iwa matim asi iruk-byi s'Ibinọkpaabyi, kw'ode iruk-byi s'Asana, k'ose kw'uwa Mosẹs obenẹ anọng p'Lẹvi bẹ́, makkẹr. Itamar, kw'ode ojinọngnwa kw'Aarọn, obir ode ọfọhn-nja, ọd-ọtọhn bẹ. 22 Bẹzalẹl kw'ode ojinọngnwa kw'Uri, kw'ode ojinọngnwa kw'Hur, kw'ofon k'efona ch'Juda, wọ osi ọttọhk kpenamkpen f'Ọvaar Ibinọkpaabyi ikk'Mosẹs obena bẹ́, osi. 23 Wa otim Oholiyab kw'ode ojinọngnwa kw'Ahisamak kw'ofon k'efona ch'Dan, obir ode omengkkanọng kw'ọd-ọkkẹr ekpo k'ata, obir od-oduka ekpo, obir od-otima ndik oyok ekpo py'ede blu, ọmaana py'ede isiso, ọmaana py'ekorọ izizẹ, ọttara ọbara ọkkọkka. 24 Kibung-kibungọ, agol p'uwa mabin k'nnanga s'ewokọ p'matim k'ọtọhm f'ibyi s'awuriji maphyir ode atalẹnt ẹrọbh obhirẹ osowanẹ, ọmaana ashẹkẹl ẹnọhna obhirẹ arọbh ichi obhirẹ wanẹ obhirẹ ijobh, atorọ k'shẹkẹl kw'ibyi s'awuriji.

25 Asilva p'uwa matọk k'mbọhk s'anọng p'nkk'abhika p'aning ny'obhon k'ogbe kw'ẹnọngbhika, made atalẹnt arọbh achen, ọmaana ashẹkẹl nnọhna nna okwuma arọbh ochenọnttaan obhirẹ ichi, atorọ k'shẹkẹl kw'ibyi s'awuriji, 26 bẹka mawanẹ, kw'ode igboka s'shẹkẹl k'ọnọng-ọnọng, atorọ k'shẹkẹl kw'ibyi s'awuriji. Ajinọng maphyir p'uwa nkk'abhika, p'apyirẹ icho ẹrọbh makpan, wa made nnọhna arọbh achenọmfa obhirẹ ijobh. 27 Wa matim atalẹnt p'silva arọbh achen arabha arin p'ibyi s'awuriji, mabir atima atalẹnt arọbh achen asi nnana s'ọbara f'ọmma, talẹnt mawanẹ k'ẹnana madanẹ. 28 Wa matim ashẹkẹl nnọhna nna okwuma arọbh ochenọnttaan obhirẹ ichi, asi mgbaka s'mkpọmmachi, ọfha ebubha aso p'mkpọmmachi njo, mabir atima asi mbarakpa.

29 Bronz p'uwa abin z'nnanga s'ewokọ made atalẹnt arọbh attaan obhirẹ ijobh, ọttara ashẹkẹl nnọhna ichadanẹ. 30 Mabir atima bronz nwo asi nnana s'ẹsọhmma s'ikkira s'etobha, ọmaana ija-byi, ọmaana otergba, ttara ekpo py'etor-ẹ, 31 ọmaana nnana s'oterttem, ọmaana nsọhmma, ọttara abhing maphyir p'ikkira s'iruk-byi s'Ibinọkpaabyi, ttara mbyo py'ening ẹkọbha eterttem ndo.