1 Mosẹs oyerẹ anọng p'Israẹl maphyir mattonga. Oben bẹ bẹ́, "Ma wọ ode idik s'Ọvaar Ibinọkpaabyi ikk'obena bẹ́, masi: 2 K'iwu ichadanẹ, mm'ad-asi ọtọhm, okenaka, k'ewu ch'ettong ichenọmfa, màkwoka ọwọhng, mabir asok chẹ mach'Ẹwọhngkwokawu ch'Ọvaar Ibinọkpaabyi ch'ewur-owur. Ọnọng kpenamkpen kw'osi ọtọhm ny'ewu ndo, mm'afhẹ-ẹ. 3 M'ekpon kayenẹ k'ibyi kpenamkpen s'marukọ ny'Ẹwọhngkwokawu ndo."

4 Mosẹs oben obhon kw'Israẹl maphyir bẹ́, "Ma wọ ode odik kw'Ọvaar Ibinọkpaabyi obenẹ bẹ́, masi: 5 Màrọbha ẹnanga ny'ekpo py'mayen, nang Ọvaar Ibinọkpaabyi. Ọnọng kpenamkpen kw'ofon-ẹ z'ettem, tte otima gol, ọmaana silva, ọmaana bronz, okwu ọnang Ọvaar Ibinọkpaabyi. 6 Tte obir otima ndik s'ide blu, ọmaana s'ikorọ isiso, ọmaana s'ikorọ izizẹ, ọmaana mbaradik ọkkọkka, ọmaana avu-phyabha, 7 ọmaana ntenkpa s'arọkimaandim s'mafok asikora, ọmaana ntenkpa s'ichọr-ọchọro, ọttara nchi s'akasiya. 8 Tte obir otima ana p'oliv p'ekpon oyiyenẹ, ọmaana ekpo py'mad-atima asi ana p'mad-abyenga ọnọng k'eso, ọmaana insẹns, 9 ọmaana ata p'oniks, ọmaana ata ọkkọkka mboza p'mm'agbana ny'ẹphọd, ọmaana ny'ẹbarakpa ch'ittemmọma.

10 "Amengkkanọng maphyir p'aning ny'abọnga k'ikpakaana màkwu asi ọttọhk kpenamkpen f'Ọvaar Ibinọkpaabyi ikk'obena bẹ́, masi: 11 kw'ode iruk-byi s'Ibinọkpaabyi, ọmaana ikkira sẹ, ọmaana ebubha chẹ, ọmaana mgbaka sẹ, ọmaana mkpọmmachi sẹ, ọmaana nzemachi sẹ, ọmaana achiva p'adum-odum pẹ, ọttara arin pẹ; 12 ọmaana Ẹkkọhbhọ ch'Echekẹ, ọmaana nchi s'idum-odum sẹ, ọmaana efokọkpa chẹ, ọttara ibara s'ọmma s'ibubh-ẹ; 13 ọmaana okpokkoro, ọmaana nchi s'idum-odum sẹ, ọmaana ekpo pyẹ maphyir, ọttara brẹd kw'awuriji kw'Ibinọkpaabyi; 14 ọmaana etorongkkang-nana ch'ekpon oyiyenẹ ttara ekpo pyẹ, ọmaana atorongkkang ttara ana pabẹ; 15 ọmaana ija-byi s'insẹns, ttara nchi sẹ s'idum-odum, ọmaan ana p'mad-abyenga ọnọng k'eso, ọmaana insẹns kw'olebh eruk, ọttara ibara s'ọmma s'iruk-byi s'Ibinọkpaabyi; 16 ọmaana ija-byi s'ẹnanga okwukwọmọ s'matim bronz asi, ch'ezeng ẹmaana ọkkẹng kwẹ, ọmaana nchi sẹ s'idum-odum, ttara ekpo pyẹ maphyir; ọmaana ọgbangbang kw'ode bronz, ttara ẹnana chẹ, 17 ọbara f'ọmma f'eterttem, ttara mkpọmmachi sẹ, ọmaana arin pabẹ, ọttara ibara s'ọmma kw'ẹmmakwukden ch'eterttem; 18 ọmaana abhing p'ikkira s'iruk-byi s'Ibinọkpaabyi, ọmaana p'eterttem, ọttara ndik sabẹ; 19 ọmaana ẹnya ch'mayok-oyok ch'mmin'atima asi ọtọhm z'ibyi s'awuriji, ch'ede ẹnya ch'awuriji ch'Aarọn kw'ode ọfọhn-nja, ọmaana ch'ajinọngva pẹ mmad-afọra k'ogbe kw'masi ọtọhm f'ẹjafọhnọ."

20 Nya o, anọng p'Israẹl maphyir mabina z'Mosẹs k'ititika. 21 Ọnọng kpenamkpen ọdaak-ẹ z'ettem, obir ofon-ẹ z'ettem, ọkpa nnam ochena Ọvaar Ibinọkpaabyi ẹnanga k'ose kw'ọtọhm f'ikkira s'etobha ọmaana f'nnya s'awuriji im'ochina ororo. 22 Nya o, ajinọng ọmaana panọng maphyir p'ofon bẹ z'nttem, makwu. Ayok banẹ atima ẹfangkpo k'akira k'akira py'matim gol asi, py'ede abaangakpa, ọmaana ekpo py'itọhng, ọttara mbaanga s'ẹnọhna. Bẹ maphyir matima ekpo py'gol achena Ọvaar Ibinọkpaabyi mach'ẹnanga ch'ewokọ. 23 Ọnọng kpenamkpen kw'oyen ndik s'ide blu, wanẹma s'ikorọ isiso, wanẹma s'ikorọ izizẹ, wanẹma ndik ọkkọkka s'mayok-oyok, wanẹma avu-phyabha, wanẹma ntenkpa s'arọkimaandim s'mafok asikora, wanẹma ntenkpa njoza s'ichọhr-ọchọhrọ, otima jẹ okwu. 24 Ayok mbo p'anang ẹnanga ch'silva, wanẹma ch'bronz, matọk achena Ọvaar Ibinọkpaabyi mach'ẹnanga. Ọnọng kpenamkpen kw'obir oyena nchi s'akasiya p'itọhmgbaakẹ kpenamkpen, otima okwu. 25 Kwanọng kpenamkpen kw'oyen emengkka ch'ọttọhk oyiyok, otima mbọhk sẹ oyok ndik s'ide blu, ọmaana s'ikorọ isiso, ọmaana s'ikorọ izizẹ, ọttara ndik ọkkọkka, otima okwu nya. 26 Panọng maphyir p'ofon bẹ z'nttem, matima emengkka chabẹ ayok avu-phyabha. 27 Ata p'oniks, ọmaana ata ọkkọkka mboza p'mm'agbana ny'ẹphọd, ọmaana ny'ẹbarakpa ch'ittemmọma, bẹ bọ p'asonọng atim akwu. 28 Ekpo py'mabir atima akwu, ede ekpo py'ed-esi ọttọhk olebh eruk, ọmaana ana p'oliv p'ekpon oyiyenẹ, ọmaana ana p'nd-abyenga ọnọng k'eso, ọttara insẹns. 29 Anọng p'Israẹl k'ejinọng ọttara k'ẹpanọng maphyir, matima nnanga sabẹ k'ose kw'ofon bẹ z'nttem, machena Ọvaar Ibinọkpaabyi k'ọtọhm f'ikk'ozenga k'Mosẹs oben bẹ bẹ́, masi.

30 Nya o, Mosẹs oben anọng p'Israẹl bẹ́, "Màkirẹ e, Ọvaar Ibinọkpaabyi kk'Bẹzalẹl kw'ode ojinọngnwa kw'Uri, nnwa kw'Hur, oteka. Kẹ ofon k'efona ch'Juda. 31 Ibinọkpaabyi kk'ẹ egwugwuma chẹ ọnanga, ọmaana ezonga, ọmaana ọyaanttaana, ọmaana edikzonga, ọttara mmengkkakira maphyir. 32 Kẹ m'od-otima gol, ọmaana silva, ọttara bronz odoka ekpo. 33 Kẹ m'ọd-ọkkẹbh ata otima osi ekpo, ọgwa nchi, obir osi mmengkkakira maphyir. 34 Ibinọkpaabyi kk'Bẹzalẹl ọmaana Oholiyab kw'ode ojinọngnwa kw'Ahisamak, kw'ofon k'efona ch'Dan ẹfa ọnanga bẹ́, m'akpebhẹ ayok mboza. 35 Kẹ kk'bẹ emengkka ọnanga ch'mm'atima ndik s'ide blu, ọmaana s'ikorọ isiso, ọmaana s'ikorọ izizẹ, ọttara ndik ọkkọkka, asi itọhmkira maphyir s'omengkkanọng od-osi, mach'ekpo okkikkẹr k'ata, ọmaana ekpo odidoka, ọmaana ekpo oyiyok. Bẹ maphyir m'ade amengkkanọng ọmaana adok-ekpo.