1 Nya o, Ọvaar Ibinọkpaabyi oben Mosẹs bẹ́, "Zonga bẹ́, kaam kk'ọ nsa bẹ́, ade mach'Ibinọkpaabyi k'ititika s'Phero. Aarọn kw'ode agbaanakka, kẹ wọ im'ọd-ọgbaak ettem chọ. 2 Kọ m'agbaak odik kpenamkpen kw'mben-ọ bẹ́, agbaak. Aarọn wọ im'otek Phero bẹ́, otte anọng p'Israẹl ọbọhk mabina ny'ẹkọma chẹ. 3 Okenaka, kaam m'nsi Phero ọgaangẹ ettem. Zaabẹ́ nsi ikkonọ-kkonọdik kk'ọsaabha ny'Ijip, ọmaana idik s'ipe anọng ifor, 4 Phero bọnga itọhng moyonga. Minna kw'kaam m'ntima ẹfa ch'ọbọhk kwaam nsi Ijip itama, mbir nsi bẹ adik-dim, pira ntima nkaana s'anọng paam p'ade Israẹl, nyin k'iyaan. 5 Nya kw'anọng p'Ijip m'azonga bẹ́, kaam wọ nde Ọvaar Ibinọkpaabyi, ch'm'ntima ẹfa chaam nrọhbha anọng p'Israẹl ny'Ijip."

6 Mosẹs ọmaana Aarọn masi mbengana k'ose kw'Ọvaar Ibinọkpaabyi ọtọhnọ bẹ. 7 Wa Mosẹs ode icho arọbh anna, Aarọn ode icho arọbh anna okwuma icho ittaan, k'ogbe kw'magbaakẹ odik anang Phero.

8 Wa Ọvaar Ibinọkpaabyi oben Mosẹs ọmaana Aarọn bẹ́, 9 "K'ogbe kw'Phero obenẹ bọnga bẹ́, ‘Màsi okkonọ-kkonọttọhk kọhk-m,’ nya kw'im'aben Aarọn bẹ́, ‘Tọka ochikwura kwọ bharẹ ny'izek, ny'ititika s'Phero,’ ochikwura nwo m'ọbhakẹ ozeng ijọhk."

10 Minna kw'Mosẹs ọmaana Aarọn machin z'Phero, mad-asi mbengana k'ose kw'Ọvaar Ibinọkpaabyi obenẹ. Aarọn ọbharẹ ochikwura kwẹ ny'izek ny'ititika s'Phero ọmaana adukwa pẹ. Ochikwura nwo ọbhakẹ ozeng ijọhk. 11 Nya o, Phero oyerẹ adikzonganọng, ọmaana abọhnganọng ọttara anọng p'Ijip p'ad-asi mbọn, bẹ mabir atima nchiranga asi minna ọdọk. 12 K'ose kw'ọnọng-ọnọng ọbharẹ ochikwura kwẹ ny'izek, minna kw'achikwura mbo mabhakẹ azeng ọjọhk. Ochikwura kw'Aarọn omyi achikwura pabẹ maphyir. 13 Chibhẹ nya, ettem ch'Phero kẹ kpuk-kpuk kesi. Bẹ itọhng kobir oyonga, k'ose kw'Ọvaar Ibinọkpaabyi ikk'obena.

14 Nya o, Ọvaar Ibinọkpaabyi oben Mosẹs bẹ́, "Phero ettem kocher ọbhakẹ. Kẹ otim obhum-obhum bẹ́, otte anọng p'Israẹl ọbọhk mafona. 15 Zọhng kebha Phero k'ogbe kw'im'ochina z'ọraanga ny'ekpebha. Tima ochikwura nwo kw'wendo ọbhakẹ ozeng ijọhk, be ny'araangakonga p'Nile atik-ẹ. 16 Ben-ẹ bẹ́, ‘Ọvaar Ibinọkpaabyi, kw'ode Ibinọkpaabyi kw'aHiburu, ọtọhm-m bẹ́, nkwu mben-ọ bẹ́, atte anọng paam ọbọhk mafona, mfha mad-akpobh-m z'ibyi s'anọng nna arukọ. Okenaka, itọhng kacher ayonga. 17 Ma wọ ode odik kw'Ọvaar Ibinọkpaabyi ọgbaakẹ: M'eden nda ch'mm'atima azonga bẹ́, kaam wọ nde Ọvaar Ibinọkpaabyi: M'ntima ochikwura nwoma kw'ntim m'ọbọhk mbin ny'ọraanga kw'Nile, ọraanga nwo m'ọbhakẹ ozeng izẹ. 18 Nten s'ining ny'Nile m'ipe, ọraanga nwo m'obir osom eruk maa, anọng p'Ijip m'ọdọk asi mbo màkpo agwo.’ "

19 Nya o, Ọvaar Ibinọkpaabyi oben Mosẹs bẹ́, "Tek Aarọn bẹ́, ọtọka ochikwura kw'otim ny'ọbọhk, otena z'nkeka s'Ijip, ọmaana z'araangava, ọmaana z'nsipe, ọttara z'asi p'maye-oye, mfha mabhakẹ azeng izẹ. Izẹ m'ininga k'ibyi kpenamkpen ny'Ijip, ozeng k'akkora p'matim nchi, ọttara ata masi."

20 Mosẹs ọmaana Aarọn masi k'ose kw'Ọvaar Ibinọkpaabyi obenẹ. Aarọn ọyaangẹ ochikwura kwẹ ny'ititika s'Phero, ọmaana adukwa pẹ, pira nobinẹ wẹ ny'asi p'Nile. Asi mbo maphyir mabhakẹ azeng izẹ. 21 Nten s'ining z'Nile ipe, ọraanga osom ma tamatama, anọng p'Ijip mọdọk asi pẹ kakpo agwo. Ibyi kpenamkpen ny'Ijip ikwu ide izizẹ.

22 Okenaka, anọng p'Ijip p'ad-asi mbọn, matima nchiranga sabẹ abir asi ekpose mbyo ọdọk. Nya o, ettem ch'Phero, ẹgaangẹ mach'ẹgaangẹ nya, Mosẹs ọmaana Aarọn itọhng kocher oyonga, k'ose kw'Ọvaar Ibinọkpaabyi ikk'obena. 23 Phero otera ọkpa nnam z'ikẹ k'odimpa, ettem kẹ odik-odik kesi. 24 Anọng p'Ijip maphyir matum ape z'akonga p'Nile, mfha mayena asi p'ẹgwa, okurọ ch'bẹ nna ọdọk asi p'ọraanga akpo agwo.

25 Iwu ichenọmfa ikwu ikpan, s'Ọvaar Ibinọkpaabyi ọbhakẹ ọraanga kw'Nile ozeng izẹ.