1 Nya o, Ọvaar Ibinọkpaabyi oben Mosẹs bẹ́, 2 "Kirẹ, kaam kk'Bẹzalẹl nteka, kw'ode nnwa kw'Uri, nnwa kw'Hur. Ofon ẹkọma ch'Juda. 3 Kaam kk'ẹ Egwugwuma ch'Ibinọkpaabyi nnanga, ọmaana ezonga, ọmaana ọyaanttaana, ọmaana edikzonga, ọttara akona p'emengkkakira kpenamkpen, 4 ọfha od-otima gol, ọmaana silva, ọttara bronz, osi ekpo py'ejibh-ojibh, 5 obir ọd-ọkkẹbh ata otima osi ekpo, ọgwa nchi, obira osi mmengkkakira kpenamkpen. 6 Kaam kk'Oholiyab mbira nteka, kw'ode ojinọngnwa kw'Ahisamak, kw'ofon k'efona ch'Dan bẹ́, ọkẹ-ẹ ọbọhk. Kaam kk'amengkkanọng maphyir ezonga ch'emengkka mbira nnanga bẹ́, matima asi ọttọhk kpenamkpen f'ikk'bọnga mbena bẹ́, masi. 7 Mm'asi ikkira s'etobha, ọmaana Ẹkkọhbhọ ch'Echekẹ, ttara efokọkpa ch'mm'anana ny'ẹrọng, ọttara ekpo mbyoza maphyir py'ezeng ẹmaana edoka chẹ. 8 Masi okpokkoro, ọttara ekpo maphyir py'ezeng ẹmaan-ẹ, ọmaana etorongkkang-nana ch'matim gol ọkkọkka asi, ttara ekpo maphyir py'ezeng ẹmaan-ẹ, ọmaana ija-byi s'insẹns, 9 ọmaana ija-byi s'ẹnanga okwukwọmọ, ttara ekpo maphyir py'ezeng ẹmaan-ẹ, ọmaana ọgbangbang kwiden, ttara ẹnana chẹ, 10 ọmaana nnya s'awuriji s'mayok-oyok, s'Aarọn min'ọd-ọfọra mach'ọfọhn-nja, ọttara nnya s'ajinọngva pẹ mmin'ad-afọra k'ogbe kw'masi ọtọhm mach'afọhn-nja, 11 ọmaana ana p'ẹbọhk-nana, ọttara insẹns kw'Ibyi s'Awuriji. Tte masi ekpo mbyo mbengana k'ose kw'ikk'ọ mbena."

12 Nya o, Ọvaar Ibinọkpaabyi oben Mosẹs bẹ́, 13 "Ben anọng p'Israẹl bẹ́, ‘Bọnga mm'akpobha Iwọhngkwokawu saam. Nya wọ im'ode ẹkọhka ch'kaam ọttara bọnga epemaanitor, mfha mazonga bẹ́, kaam wọ nde Ọvaar Ibinọkpaabyi kw'od-osi bọnga mawur.

14 " ‘Màkpobha Ẹwọhngkwokawu, okurọ bẹ́, ede ewu ch'ewur-owur ẹnang bọnga. Ọnọng kw'olukọ ewu ndo, mm'afhẹ-ẹ. Ọnọng kw'obir osi ọtọhm ny'ewu ndo, mm'akpaar-ẹ z'ẹkaan ch'anọng pẹ. 15 Bọnga mmin'asi ọtọhm k'iwu ichadanẹ. Ny'ewu ch'ettong ichenọmfa, mm'akwoka ọwọhng, okurọ bẹ́, ewu ndo ede Ẹwọhngkwokawu ch'ewur-owur ẹnang Ọvaar Ibinọkpaabyi. Ọnọng kpenamkpen kw'osi ọtọhm ny'ewu ndo, mm'afhẹ-ẹ. 16 Anọng p'Israẹl m'akpobha Ẹwọhngkwokawu nda epemaanitor, mach'echekẹ ch'ttattampe. 17 Ewu ndo m'ede ẹkọhka ch'kaam ọttara anọng p'Israẹl ttattampe, okurọ bẹ́, wa Ọvaar Ibinọkpaabyi osi ẹrọng ọmaana izek k'iwu ichadanẹ, ch'ottong iwu ichenọmfa, okwoka ọwọhng.’ "

18 K'ogbe kw'Ọvaar Ibinọkpaabyi ikk'idik njo ọgbaaka ny'egbe ch'Sinai maphyir ọnang Mosẹs, ọtọka ata afa p'asana p'ikẹ Ibinọkpaabyi ozeng mmo ọkkẹr, ọnang Mosẹs.