1 Nya o, Ọvaar Ibinọkpaabyi oben Mosẹs bẹ́, 2 "Tek anọng p'Israẹl bẹ́, makpa nnam mad-abhing z'ẹkọma ch'Pi-Hahirọt, ny'njeka kw'Migdọl, ọmaana ọraanga kwiden. Tte mabhing anyọma ọraanga kwiden, za ch'okkerẹ Baal-Zẹphọn ititika. 3 Phero m'ochibhẹ bẹ́, damadama kk'anọng p'Israẹl ọsa mattena achina z'ibyi s'anọng nna arukọ. 4 Kaam m'nsi Phero ọgaangẹ ettem ochina ororo okwubh bẹ. Okenaka, kaam m'ntima Phero ọmaana agbongnọng pẹ, ntọka abarada nnang ifor saam, mfha anọng p'Ijip atima azonga bẹ́, kaam wọ nde Ọvaar Ibinọkpaabyi." Anọng p'Israẹl masi mach'Ọvaar Ibinọkpaabyi obenẹ bẹ.

5 Ch'matek Phero kw'ode ọvaarnọng kw'Ijip bẹ́, anọng p'Israẹl kk'afona, kẹ ọmaana adukwa pẹ mabhona achibhẹ, maben bẹ́, "Bọng-odik kw'mosi ma o? Nkk'anọng p'Israẹl ọbọhk ọtta mafona. Nkk'itọhm s'mad-asi anang mina ọgwaana." 6 Ofona nya o, Phero ọtọka ọkpaar kwẹ kw'nnyanya id-itọr, ọmaana agbongnọng pẹ, otima bẹ okwubh anọng p'Israẹl. 7 Wa obira otima ijaar ọkkọkka s'ide ẹnọhna okwuma arọbh ijobh s'nnyanya id-itọr, ọmaana ijaar njoza s'Ijip maphyir s'nnyanya id-itọr, ttara asonọng p'atim bẹ eden. 8 Ọvaar Ibinọkpaabyi osi ettem ch'Phero kw'ode ọvaarnọng kw'Ijip, edinẹ, obina okwubh anọng p'Israẹl. Anọng p'Israẹl atima ottembara mazenga afona. 9 Anọng p'Ijip maphyir, ọmaana nnyanya s'Phero, ọmaana ijaar sẹ s'nnyanya id-itọr, ọmaana ayaar-ọyaar, ọttara agbongnọng pẹ, makwubh anọng p'Israẹl maa, makebha bẹ. Wa makebh bẹ za ch'mabhingẹ atuma ẹraangadim, za ch'ọnyọm Pi-Hahirọt kw'okkerẹ Baal-Zẹphọn ititika.

10 K'ose kw'Phero ozeng ọnyọma bẹ, anọng p'Israẹl atinẹ achen akkerẹ, maze anọng p'Ijip ch'mad-azenga anyọma bẹ z'ifor. Ojora osi be mawuriji. Mabhom akpẹkẹ Ọvaar Ibinọkpaabyi. 11 Maben Mosẹs bẹ́, "Ozeng z'Ijip, wa apekwuk aning za. Osempira atima minna akwu m'ibyi s'anọng nna arukọ bẹ́, mokwu ope ma? Bọng-ọttọhk f'azeng ábẹ̀ atima mina abina z'Ijip? 12 Wa mina nkk'ọ obena bẹ́, ‘Tte mina ọbọhk mosi agbugbuna ọnang anọng p'Ijip’. Wura ojibh ọtam bẹ́, mope z'Ijip, ọyọhnga bẹ́, mokwu ope m'ibyi s'anọng nna arukọ."

13 Mosẹs ọpọhna bẹ bẹ́, "Tte oning bọnga ojor. Màninga bẹ́ sẹẹbh. Menda mm'aze ẹkkaana ch'Ọvaar Ibinọkpaabyi. Anọng mba p'Ijip p'maze ma menda, kwuna m'ọdọk bẹ maze. 14 Màninga bẹ́ sẹẹbh. Ọvaar Ibinọkpaabyi wọ im'osi erima chabọnga."

15 Nya o, Ọvaar Ibinọkpaabyi oben Mosẹs bẹ́, "Osempira mad-abhom ẹmọng akpẹk-m? Ben anọng p'Israẹl bẹ́, machina ororo k'ozenga kwabẹ. 16 Yaangẹ ochikwura kwọ k'ẹrọng atena z'ẹraangadim, ọfha asi abhaangẹ k'ibyi ifa. M'ofona nya, eden m'eninga ch'anọng p'Israẹl mm'azenga k'izek s'igw-ogwu, ajeka. 17 Kaam m'nsi anọng p'Ijip madinẹ nttem, mfha mado anọng p'Israẹl akwubh. Kaam m'nzenga ny'Phero, ọmaana agbongnọng pẹ maphyir, ọmaana ijaar sẹ s'nnyanya id-itọr, ọttara ayaar-ọyaar pẹ, nyena abarada. 18 Anọng p'Ijip mazonga bẹ́, kaam wọ nde Ọvaar Ibinọkpaabyi, k'ogbe kw'im'nzenga ny'Phero, ọmaana agbongnọng pẹ, ọmaana ijaar sẹ s'nnyanya id-itọr, ọttara ayaar-ọyaar pẹ, nyena abarada."

19 Nya o, ozeng-eden kw'Ibinọkpaabyi kw'ọtọm za ochi agbongnọng p'Israẹl eden, nokwu okponga bẹ nnam. Ebonọ ch'ebe odudum, ebira ebina z'ititika ekwu ekponga bẹ nnam, 20 eninga ny'njeka kw'agbongnọng p'Ijip, ọmaana p'Israẹl. Minna kw'ebunọ ndo etim orungibanga ekwu k'ẹbhaakẹ danẹ, ẹnang ọyaanttaana k'ẹbhaakẹ ndoza. Ofona nya, bẹ nnam mfa, m'ayok kanyọm ny'orungiwu nwo maphyir.

21 Nya o, Mosẹs onemẹ ọbọhk kwẹ otena z'ẹraangadim ndo. Ọvaar Ibinọkpaabyi otima ebum ch'ẹgaang-ọgaangẹ ch'ebin za ch'ewuchen ed-eyin, osi ẹraangadim ndo ẹbhaangẹ k'ibyi ifa. Izek s'igw-ogwu iyin. 22 Minna kw'anọng p'Israẹl mazeng ny'ọgbaarẹ kw'ogw-ogwu kw'ẹraangadim ndo, asi mbo p'nkk'abhaanga, mabe mach'etumọ z'abẹ k'odimbọhk, ọmaana z'obhurubọhk.

23 Anọng p'Ijip matima nnyanya, ọmaana ijaar s'Phero s'nnyanya id-itọr, ọttara ayaar-ọyaar pẹ, makwubh bẹ maa, madim z'ẹraangadim ndo. 24 Otum k'ekpikpebha, Ọvaar Ibinọkpaabyi ozenga ny'ekpon ch'ebe odudum ọmaana ny'ebonọ ch'ebe odudum, oze agbongnọng p'Ijip, oke bẹ k'damadama. 25 Pira ọgbaka mmo s'ijaar s'Phero. Ofona nya, ọyaara nọkaar bẹ ọkaara. Anọng p'Ijip aben bẹ́, "Abayi, matte mobina orik anọng mba p'Israẹl o! Ọvaar Ibinọkpaabyi wọ od-orima ọmaana mina ma, k'abẹ k'nso."

26 Nya o, Ọvaar Ibinọkpaabyi oben Mosẹs bẹ́, "Nemẹ ọbọhk kwọ tena z'ẹraangadim ndo, ọfha asi mbo mabir akpa nnam mabhọrọ anọng p'Ijip, ọmaana ijaar sabẹ, ọttara ayaar-ọyaar pabẹ." 27 Mosẹs onemẹ ọbọhk kwẹ otena z'ẹraangadim ndo. Ny'owusobh, ẹraangadim ndo ẹkpa nnam z'eninga chẹ. Anọng p'Ijip makonga k'ose kw'mm'arọbh. Okenaka, Ọvaar Ibinọkpaabyi onyunọ bẹ maphyir oke z'ẹraangadim ndo. 28 Asi mbo mabhobh akpa nnam, mabhọrọ ijaar njo s'nnyanya id-itọr, ọmaana ayaar-ọyaar, ọttara agbongnọng p'Phero maphyir p'makwubhọ anọng p'Israẹl maa, madim z'ẹraangadim ndo. Ọnọng mawanẹ-wanẹ kw'ọnaang kode.

29 Ńnòde anọng p'Israẹl, bẹ mazenga ny'ọgbaarẹ kw'ogwu-ogwu ny'ẹraangadim ndo majeka, asi mabe mach'etumọ z'odimbọhk kwabẹ, ọmaana z'obhurubọhk. 30 Ny'ewu ndo, Ọvaar Ibinọkpaabyi ọrọhbha anọng p'Israẹl z'mbọhk s'anọng p'Ijip. Anọng p'Israẹl maze ose kw'anọng p'Ijip mape ayima ny'araangakonga. 31 Ch'anọng p'Israẹl maze ose kw'Ọvaar Ibinọkpaabyi ọkọhk edidenfa chẹ ch'otim osi anọng p'Ijip itama, Ọvaar Ibinọkpaabyi ojora bẹ, mabir aphe nnam k'ikẹ, ọmaana k'Mosẹs kw'ode ọtọhmnọng kwẹ.