1 Ma wọ ode ache p'ajinọngva p'Israẹl kw'obir okpena Jekọb p'uwa machin z'Ijip, ọnọng-ọnọng ọttara ẹsọhmmọr chẹ: 2 Reubẹn ọmaana Simeọn, ọmaana Lẹvi, ọttara Juda, 3 Isaka ọmaana Zẹbulun, ọttara Bẹnjamin, 4 Dan ọttara Naphtali, Gad ọttara Asha. 5 Efonamma ch'Jekọb kibungọ-kibungọ wa ede anọng arọbh attaan okwuma ijobh. Wa Josẹph okkikken oninga z'Ijip.

6 Wa Josẹph ọmaana ivotte pẹ mape maphyir. Eyokinọng-kaan ndo ch'iwa etor-ẹ ny'ogbe nwo ebira epe maphyir. 7 Okenaka, wa anọng p'Israẹl makwu asaabh, mabir abhakẹ abhon ayok, manyaamẹ, mafu izek.

8 Ny'ogbe nwo, ẹkọma ch'Ijip ekwu eyena ọvaarnọng ọbhakwẹ kw'ina Josẹph ozong. 9 Ọvaarnọng nwo oben anọng pẹ bẹ́, "Nkk'aza ose kw'anọng p'Israẹl nkk'asaabha, mabira agaangẹ ọtam ayọhnga mina. 10 Màkwu motima ekkoji ọkpọka ọsaabh mva fabẹ. Ó̱de nna minna osi, égbong étto, bẹ mm'ator awawunanọng pamina marima mina ábẹ̀, pira marọbh arik ẹkọma chamina."

11 Ofona nya, anọng p'Ijip anang anọng p'Israẹl akker-atọhmnọng p'mad-atima atọhm-gbọhka anang bẹ irem. Masi ibhondim z'Pitọm ọmaana Rameses mach'ibhon s'mad-asok ekpo py'Phero. 12 Okenaka, k'ose kw'manang bẹ irem, minna kw'ọsaabh fabẹ odo ọttar-ọttara. Anọng p'Ijip makwu aninga k'ojora f'anọng p'Israẹl. 13 Nya wọ kw'nna ado anọng p'Israẹl irem anang mawuriji. 14 Mabir asi akpen agbẹrẹ bẹ, okurọ k'atọhm-gbọhka p'isọhm oyiyika, ọmaana ata p'isọhm orirọbha, ọttara agbugbuna k'akira k'akira z'iwonọ. Ny'atọhm-gbọhka mbo pabẹ maphyir, wa anọng p'Ijip mad-asi bẹ ẹyaaka mach'abira.

15 Nya o, ọvaarnọng kw'Ijip oyerẹ panọng p'ad-akkerẹ aHiburu-panọng ọmaan, p'akpen Shiphra ọmaana Pua. Oben bẹ bẹ́, 16 "Ogbe kw'makkerẹ aHiburu-panọng ọmaan, óde maze bẹ́, ọmaanẹ ojinọngnwa, màfhẹ-ẹ. Okenaka, óde ọmaanẹ kwanọngnwa, m'ikẹ kàfhọ." 17 Okenaka, akker-panọng-ọmaan mbo m'ntọhna s'ọvaarnọng kw'Ijip ọnang bẹ katọk okurọ ch'mayen ojora f'Ibinọkpaabyi. Wa mad-atte ajinọngva ọbọhk maruk. 18 Ofona nya, ọvaarnọng kw'Ijip oyerẹ akker-panọng-ọmaan mbo, ọbọbh bẹ bẹ́, "Kayen kw'masi minna? Osempira matte ajinọngva ọbọhk maruk?"

19 Akker-panọng-ọmaan mbo mapọhna Phero bẹ́, "AHiburu-panọng mach'panọng p'Ijip kade e. Bẹ mad-agaangẹ ettem amaan iva pabẹ, pira akker-anọng-ọmaan napyirẹ."

20 Minna wọ kw'Ibinọkpaabyi osi akker-anọng-ọmaan mbo ejibha, anọng p'Israẹl akwu asaabh mawuriji, mabira ayena ẹfa. 21 Ibinọkpaabyi ọnang akker-anọng-ọmaan mbo isọhmmọr sabẹ oyenẹ okurọ ch'mayen ojora fẹ.

22 Nya o, Phero ọnang anọng pẹ maphyir ọsana bẹ́, "Ojinọngnwa kpenamkpen kw'oHiburu-kwanọng im'ọmaan, màtọk-ẹ bharẹ z'ọraanga kw'Nile, màtte panọngva ọbọhk maruk."