1 Wa Ọvaar Ibinọkpaabyi oben Mosẹs bẹ́, "Kkẹbh ata afa p'ade mach'mboza p'echeden. Nya kw'im'nkkẹr idik njo s'iwa ining z'achedenta mbo p'avọhkọ. 2 Do ifor k'ekpebha, avura akebh-m z'ogbeso kw'Sinai. Kebh-m z'ogbeso nwo. 3 Tte ọnọng oning-ọ otorọ mavura egbe ndo o. Tte maning ọnọng aze ọnyọma egbe ndo. Ozeng k'otirattọhk, oning ọchattọhk ny'ititika s'egbe ndo, ochi." 4 Minna kw'Mosẹs ọkkẹbh ata afa p'made mach'mboza p'echeden. K'ekpikpebha, otima ata mbo afa ny'mbọhk, ovura egbe ch'Sinai k'ose kw'Ọvaar Ibinọkpaabyi ikk'ẹ obena. 5 Nya o, Ọvaar Ibinọkpaabyi otima ebonọ ọsaka okwu obe ọmaan-ẹ nya, osi ẹyaakẹ ch'eche chẹ. 6 Okwu ọkpan Mosẹs ny'ititika, osi ẹyaakẹ bẹ́, "Ọvaar Ibinọkpaabyi, Ọvaar Ibinọkpaabyi, Ibinọkpaabyi kw'ikwosisi, ọmaana kw'ọphyaam, kw'ọd-ọtọka ogbe pira ọdọk-ẹ, kw'oyen ọdaakẹ kw'ọsaabh-ọsaabh, obir od-obe ọmaana ọgbaakadik kwẹ, 7 ọd-ọkọhka anọng k'nnọhna k'nnọhna ọdaakẹ kwẹ, od-obina ọnang anọng p'avọhkọ ọsana kwẹ, ọmaana ayok p'asi itama ọttara mpyibha. Okenaka, anọng p'aponga apyibhẹ ọbọhk kod-otte, ọd-ọnang iva pabẹ, ọttara iva p'iva, irem k'ipemaanitor nttaan ọmaana nna."

8 Mosẹs ogbe kokibhẹ, ọraka eso ọnang-ẹ ikpukpobha. 9 Oben bẹ́, "O Ọvaar Ibinọkpaabyi, óde ikk'ọdaam fọ nza, tte Ọvaar Ibinọkpaabyi otor mina k'ozenga. Zaabẹ́ anọng mboma made aso-gaangẹnọng, bina nang mina k'itama ọttara mpyibha s'mosi, abir atọka mina mach'anọng pọ."

10 Nya o, Ọvaar Ibinọkpaabyi oben bẹ́, "Kaam nsi echekẹ mmaan-ọ. Anọng pọ maphyir m'aze ch'im'nsi ikkonọ-kkonọdik s'ina ntima nd-nsa k'ẹkọma kpenamkpen m'iyagbin. Anọng mba p'aruk amaana, mm'aze ikkonọ-kkonọdik s'kaam Ọvaar Ibinọkpaabyi m'nsi nnang bọnga. 11 Màkpobha asana mba p'nnang bọnga menda. Kaam m'nkwubh anọng p'Amọr p'aning bọnga z'ititika mmarẹ k'iyaan, ọmaana anọng p'Kenaan, ọmaana p'Het, ọmaana p'Periz, ọmaana p'Hiv, ọttara p'Jebus. 12 Màkkerẹ bọnga ifor o, m'echekẹ kpenamkpen kàsi amaana anọng p'marukọ ny'izek njo s'nd-achina nya, mfha màning k'ọmma atto. 13 Màvọhkọ ọja-byi fabẹ, manyunọ ata pabẹ p'ekpobha, mabir akpaara mkpọmmachi s'ọka f'Ashẹra abharẹ za. 14 M'ọttọhk ọdọk-ọdọk kàkpobha, kirẹ Ọvaar Ibinọkpaabyi kw'eche chẹ ede Ẹjọhmọ, ode Ibinọkpaabyi kw'ẹjọhmọ.

15 "Màkkerẹ bọnga ifor o, m'nttọhna kpenamkpen kàsi amaana anọng mbo p'arukọ ny'izek njo o, mfha k'ogbe kw'mm'asi ẹzazamaana amaana aka pabẹ, mabir afọhnọ nja anang aka mbo, maning bọnga ayerẹ matọn achi ẹchakpo pyabẹ py'matim afọhnọ nja. 16 Ó̱de ajinọngva pabọnga matọk aminava pabẹ k'ọbada, ch'aminava mbo mm'asi ẹzazamaana amaana aka pabẹ, m'ọwọhkọ ajinọngva pabọnga m'ator bẹ masi ẹmmaana chabẹ.

17 "M'ọkpata kpenamkpen kasi.

18 "Bọnga mmad-asi Odidaama kw'Brẹd kw'ina obibir obirẹ. Màchi brẹd kw'nna yist ake k'iwu ichenọmfa k'ose kw'ikk'bọnga mbena. Mm'ad-asi minna k'ogbe kwẹ ny'ophe kw'Abib, okurọ bẹ́, ny'ophe nwo wọ kw'bọnga mabin z'Ijip.

19 "Iva p'ichedenbhọr kpenamkpen m'ade paam, ozeng k'acheden-dimpe p'etirakpo pyabọnga: zaa ode arọkimaan, obir ode abhaam. 20 Tima ọrọkimaanwa bhek ichedenbhọr s'ẹnyanya, okenaka, ini wẹ màbhek, phyak-ẹ ẹdọngọ. Màbhek acheden-jinọngva pabọnga maphyir.

"Tte ọnọng oning mbọhk-mbọhk otim okwu obe-m k'ititika.

21 "Bọnga mm'ad-asi ọtọhm k'iwu ichadanẹ. Okenaka, ny'ewu ch'ettong ichenọmfa, màkwoka ọwọhng; zaabẹ́ ode k'ọyaabhagbe, obir ode k'ẹphawu.

22 "Màsi Odidaama kw'Ipha s'acheden-chiduk p'ekpo py'matubhọ z'abọnga k'iwonọ, ọmaana Odidaama kw'Ipha s'wit, ọttara Odidaama kw'Ekpo otitobha k'ẹkpọka ch'icho. 23 Igbedim ittaan k'icho, ajinọng maphyir mm'ad-akwu k'ititika s'Ọvaar Ibinọkpaabyi kw'Ẹfa maphyir, kw'ode Ibinọkpaabyi kw'Israẹl. 24 Kaam m'nkwubh nkọma s'ining bọnga k'ititika, mbir nsi ibhon sabọnga imaama ikpan nnem sabọnga. K'ogbe kw'mm'akwu k'ititika s'Ọvaar Ibinọkpaabyi kwabọnga ny'igbedim njo ittaan s'icho, ọnọng kode kw'im'okkerẹ izek sabọnga ichen.

25 "M'ọttọhk kpenamkpen f'make yist kàttara k'izẹ s'mm'atima afọhnọ ẹja anang-m. Nkàtte eten ch'matim afọhnọ ẹja ch'Odidaama kw'Pasova eninga maa, ewu esobha.

26 "Acheden-chiduk p'ajibh ọtam ny'abọnga k'izek, bẹ p'mm'atima akwu z'ọsọhm kw'Ọvaar Ibinọkpaabyi kwabọnga.

"M'ovunwa k'abasi p'ọkka kawọhn."

27 Nya o, Ọvaar Ibinọkpaabyi oben Mosẹs bẹ́, "Kkẹr idik njoma ọkkẹr, kirẹ idik nja jọ s'ntim nsi echekẹ nnang kọ ọttara anọng p'Israẹl." 28 Wa Mosẹs oning nya ọmaana Ọvaar Ibinọkpaabyi k'iyawu arọbh afa ọmaana irungiwu arọbh afa, ọttọhk kochi, asi kobir ogwo. Ny'ata mbo bọ p'uwa ọkkẹrẹ igbaakadik njo s'echekẹ, kw'ode asana mbo ijobh p'Ibinọkpaabyi.

29 K'ogbe kw'Mosẹs kk'ọsaka z'egbe ch'Sinai ttara ata mbo afa ny'ikẹ k'mbọhk p'ọkkẹr asana, kozong bẹ́, ititika sẹ ninna mawere-were, okurọ ch'ikẹ ọmaana Ọvaar Ibinọkpaabyi nkk'ayok odik agbaaka. 30 Ch'Aarọn ọmaana anọng p'Israẹl maphyir nnaze Mosẹs, ititika sẹ ninna mawere-were. Ofona nya o, ojor bẹ bẹ́, manyọm-ẹ z'ifor. 31 Okenaka, Mosẹs oyerẹ bẹ. Minna kw'Aarọn ọttara asogbọhkọnọng p'obhon nwo maphyir makpa nnam akebh-ẹ. Ọgbaak odik ọnang bẹ. 32 Ọgbaak bẹ nya o, anọng p'Israẹl maphyir mazenga anyọm-ẹ. Mosẹs o, ọnang bẹ asana maphyir p'Ọvaar Ibinọkpaabyi ọnang-ẹ z'egbe ch'Sinai.

33 Ch'Mosẹs kk'bẹ idik nja ọgbaaka maphyir o, otima ẹbarakpa obubha ititika sẹ. 34 K'ogbe kpenamkpen kw'odimẹ okebh Ọvaar Ibinọkpaabyi bẹ́, magbaak odik, od-owonga ẹbarakpa ndo z'ititika. Íkk'oyina k'iyaan, otek anọng p'Israẹl asana maphyir p'Ibinọkpaabyi ikk'ẹ obena, 35 maze bẹ́, ititika sẹ ninnamawere-were. Minna kw'Mosẹs m'obir obubha ẹbarakpa ndo z'ikẹ k'ititika maa, opyirẹ k'ogbe kw'im'obir ochina za ch'ikẹ ọmaana Ọvaar Ibinọkpaabyi mm'agbaak odik.