1 "M'arọhbha agbaanakka Aarọn, ọmaana ajinọngva pẹ p'ade Nadab, ọmaana Abihu, ọmaana Eleaza, ọttara nkwurọr, z'ikpakaana s'anọng p'Israẹl, mfha makwu ade afọhn-nja paam. 2 M'akwum ẹnya ch'awuriji ch'afọhn-nja anang Aarọn kw'ode agbaanakka kwọ, ọfha ẹnang-ẹ abarada ọmaana ikpukpobha. 3 Amengkkanọng maphyir p'ikk'ezonga nnanga, bẹ p'm'aben makwum nnya anang Aarọn s'mm'atima anan-ẹ ọbọhk k'eso, ọfha ode ọfọhn-nja kwaam. 4 Nnya s'mm'akwum m'ide ẹbarakpa ch'ittemmọma, ọmaana ẹphọd, ọmaana ọnọhma-baba, ọmaana ọkpaar-mbọhk kw'opyirẹ ny'ndudungọ, ọmaana ibara s'eso odidabh, ọttara odikpa. Nnya s'awuraji njoma jọ s'mm'akwum anang agbaanakka Aarọn, ọttara ajinọngva pẹ, ọfha bẹ masi ọtọhm mach'afọhn-nja paam. 5 Ndik s'ide gol, ọmaana blu, ọmaana s'ikorọ isiso, ọmaana s'ikorọ izizẹ, ọttara mbaradik ọkkọkka, jẹ s'mm'atima akwum nnya njo.

6 "Tte omengkkanọng otima ndik s'ide gol, ọmaana s'ide blu, ọmaana s'ikorọ isiso, ọmaana s'ikorọ izizẹ, ọttara mbaradik ọkkọkka, oyok ẹphọd. 7 M'eyena abarakpava afa ny'mbubaang, p'im'ẹgbaka ayok ny'abongọ pẹ afa, ọfha ẹbọka ayok. 8 Odikpa kwẹ kw'matim emengkka ayok, m'ode ose mawanẹ, mabir akwum attara ny'ẹphọd, matima ndik s'ide gol yok, ọmaana ndik s'ide blu, ọmaana s'ikorọ isiso, ọmaana s'ikorọ izizẹ, ọttara mbaradik ọkkọkka.

9 "Tọka ata afa p'oniks, akkẹr ache p'ajinọngva p'Israẹl nya. 10 Ache achadanẹ m'aninga k'ẹta danẹ, mboza achadanẹ aninga z'ẹta ndoza. Kkẹr ache mba tor k'ẹmaanawu chabẹ. 11 Kkẹr ache p'ajinọngva p'Israẹl ny'ata mbo afa, k'ose kw'omengkkanọng ọd-ọkkẹr ekpo k'ata. Pira nabẹ gol akọbha ny'abem p'ata mbo, 12 abir agbaka bẹ ny'mbarakpa s'mbubaang s'ẹphọd, mfha mad-atima ajima ajinọngva p'Israẹl. Aarọn mod-otima ache mbo ny'mbubaang sẹ mach'ejima ọnang Ọvaar Ibinọkpaabyi. 13 Bẹ gol kọhbha ny'abem p'ata mbo afa, 14 ọmaana agbakkọhbhọva afa p'gol ọkkọkka p'mabhọhrọ mach'edik, magbaka bẹ ny'ata mbo.

15 "Tte omengkkanọng otima ndik s'ide gol, ọmaana s'ide blu, ọmaana s'ikorọ isiso, ọmaana s'ikorọ izizẹ, ọttara mbaradik ọkkọkka, okwum ẹbarakpa ch'ittemmọma ch'ochibhẹ kw'kaam Ibinọkpaabyi ozizonga, obir osi dẹ mach'ẹphọd. 16 Adum ọmaana ẹkpa chẹ m'ede mbengana mach'ẹbọhkpattem, abir anyọhng-ẹ igbedim ifa. 17 Pira nake ata p'ajibh-ojibh nya, k'akaana anna. Ny'ocheden-kaana, m'ake ata p'ruby, ọmaana p'topaz, ọttara p'bẹril. 18 Ọkaana ttong afa, m'ake ata p'tọkwọis, ọmaana p'saphira, ọmaana p'ẹmẹral. 19 Ọkaana ttong attaan, m'ake ata p'jasint, ọmaana p'agate, ọttara p'amẹtist. 20 Ọkaana ttonga anna, m'ake ata p'krisolita, ọmaana p'oniks, ọttara p'jaspa. Ke ata mbo nya ch'matim gol adoka. 21 Ata mbo m'ade ijobh kkamfa. Ẹta kpenamkpen m'ebe k'eche ch'ojinọngnwa mawanẹ kw'Israẹl. Kkẹr eche madanẹ mach'ẹkọhka k'ẹta kpenamkpen ch'im'ebe k'eso ch'ẹnọmma kpenamkpen ny'nnọmma njo ijobh kkamfa.

22 "Ṉ́nòde ẹbarakpa ch'ittemmọma, bhọhr agbakkọhbhọva p'gol ọkkọkka mach'edik. 23 Tima gol si aringẹ afa pẹ, agbaka ny'abongọ mbo afa p'ẹbarakpa ch'ittemmọma. 24 Gbaka agbakkọhbhọva mbo afa p'gol ny'aringẹ p'aning ny'abongọ p'ẹbarakpa ch'ittemmọma, 25 abir atọka aso mboza afa p'agbakkọhbhọva mbo agbaka ny'ititika-itititika kw'mbarakpa s'ebubaang s'ẹphọd. 26 Màtima gol si aringẹ afa, magbaka ny'abongọ mboza afa p'ẹbarakpa ch'ittemmọma, ny'okonga kw'ẹtaanga kw'ọnyọm ẹphọd. 27 Màbir tima gol si aringẹ afa magbaka ny'izek-izek kw'mbarakpa s'mbubaang, z'ititika-ititika kw'ẹphọd. Màsi chẹ ẹnyọma z'ẹbọhra ch'ẹrọng-ẹrọng kw'odikpa kw'ẹphọd. 28 Màtima edik ch'ede blu makpa aringẹ p'ẹbarakpa ch'ittemmọma z'aringẹ p'ẹphọd, ẹbọka z'odikpa kw'erin, ọfha ẹbarakpa ch'ittemmọma ening owuwokọ d'ewokọ z'ẹphọd.

29 "Ogbe kpenamkpen kw'Aarọn odimẹ z'Ibyi njo s'Awuriji, kẹ mod-otima ache p'ajinọngva p'Israẹl ny'ittemmọma sẹ, ny'ẹbarakpa ch'ittemmọma ch'ochibhẹ kw'kaam Ibinọkpaabyi ozizonga, ọfha Ọvaar Ibinọkpaabyi od-otima ojima anọng pẹ. 30 Màbir yika Urim* ọttara Tumim ny'ẹbarakpa ch'ittemmọma, ọfha Aarọn od-otima ny'ittemmọma k'ogbe kpenamkpen kw'obe Ọvaar Ibinọkpaabyi k'ititika. Minna kw'Aarọn min'od-otima ekpo mbya ny'ittemmọma sẹ, k'ogbe kw'obe k'ititika s'Ọvaar Ibinọkpaabyi bẹ́, osi achibhẹ p'amaan anọng p'Israẹl.

31 "Màtima ibara s'ide blu kẹ-kẹ, kwum ọnọhma-baba kw'ẹphọd 32 kw'oyen ọmma ny'ottem, kw'eso im'edim. Màbir tọhbh ọmma nwo ọtọhbh mach'ẹnọhmadọngọ, ọfha oning ọyaakẹ. 33 Màtima ndik s'ide blu, ọmaana s'ikorọ isiso, ọmaana s'ikorọ izizẹ, yok aduk p'pomegrenet ọmaana akkaningkka p'gol, p'mm'arena k'njeka kw'ayok, ny'ammabọhra p'ọnọhma-baba nwo. 34 Màsi akkaningkka p'gol, ọmaana pomegrenet py'ed-ejeka ayok ny'ammabọhra p'ọnọhma-baba nwo maphyir. 35 Aarọn m'ọd-ọfọra ẹnya nda k'ogbe kw'oning k'ọtọhm. Mmin'abhaanga akkaningkka mbo k'ogbe kw'odimẹ z'Ibyi s'Awuriji s'Ọvaar Ibinọkpaabyi oning, ọttara k'ogbe kw'oyinẹ k'iyaan, ọfha oning ope.

36 "Màtima gol ọkkọkka, si ẹchangkpa, akkẹr nya mach'ẹkọhka bẹ́, AWURIJI AYEN ỌVAAR IBINỌKPAABYI. 37 Màkpa edik ch'ede blu ẹbọka z'ibara s'eso, eninga ny'ititika-ititika kw'ibara njo s'eso. 38 M'ẹd-ẹnana Aarọn ny'ititika, obir ọwọhka mpinẹ s'anọng p'Israẹl k'nnanga s'awuriji, zaa wura nnanga sabẹ ide yen. M'ẹnana Aarọn ny'eso k'ogbe kpenamkpen, ọfha Ọvaar Ibinọkpaabyi ọdaam ettem ọtọka nnanga s'anọng p'Israẹl.

39 "Màtima ọbara ọkkọkka yok ọkpaar-mbọhk kw'opyirẹ ny'ndudungọ, mabir atima ayok ibara s'eso odidabh. Odikpa m'obir ode ọtọhmbọhk f'okwum-ẹnya ikk'odoka. 40 Màkwum akpaar-mbọhk p'apyirẹ ny'ndudungọ, ọmaana adikpa, ọttara okpo manang ajinọngva p'Aarọn, ọfha ẹnang bẹ abarada ọmaana ikpukpobha. 41 Ó̱de íkk'agbaanakka Aarọn, ọmaana ajinọngva pẹ nnya njoma afọra, byenga bẹ ana k'eso, abir anana bẹ mbọhk k'eso. Si bẹ mawur, mfha masi ọtọhm mach'afọhn-nja anang-m.

42 "Màtima ọbara ọkkọkka kwum mkpin kw'ẹtaanga kw'obubh ifor, tọma ny'erin pyirẹ z'ntaak. 43 Aarọn ọmaana ajinọngva pẹ mmad-afọra nnya nja k'ogbe kpenamkpen kw'mm'adim z'ikkira s'etobha, wanẹma, manyọma ija-byi bẹ́, masi ọtọhm z'Ibyi s'Awuriji, mfha maning apinẹ, mape.

"Ọsana nwa m'ọbaabha Aarọn ọmaana iva p'iva pẹ, ttattampe.