1 "Ó̱de ọnọng offu ẹbhaam, wanẹma, ọrọkimaan, ọtọka ọfhọ, obir ode bẹ́, okpe-okpe, kẹ m'otuk abhaam achen k'ẹbhaam madanẹ, obir otuk arọkimaan anna k'ọrọkimaan mawanẹ.

2 "Ó̱de mabọk orurubha ch'od-offu orubh k'erungọ, mattem-ẹ maa ope, ọnọng nwo kw'ọfhẹ-ẹ, k'ọsana kotto. 3 Okenaka, óde ọnọng ọfhẹ-ẹ k'ogbe kw'echekira ikk'eyina, nya kw'ọnọng kw'ọfhẹ-ẹ ikk'ọtta k'ọsana kw'inọng-fhufha.

"Ọnọng kpenamkpen kw'offu orubh, m'otutuk. Ó̱de ina ọttọhk oyen, màkpẹ-ẹ tima tera ọttọhk mvo f'ofu. 4 Ó̱de eten ch'offu etim ening akpen ny'ikẹ k'mbọhk, zaabẹ́ ode ẹbhaam o, ode ẹnyanya o, obir ode ọrọkimaan o, m'otuk orubh mvo igbedim ifa.

5 "Ó̱de ọnọng otte etirakpo pyẹ ọbọhk bẹ́, echi azizaarẹ z'owonọ kwẹ, pira otte pyẹ ọbọhk ettena, ed-echi ekpo k'owonọ kw'ọnọng ọdọk-ọdọk, oyen-etirakpo mbyo m'otima ekpo ọkkọkka py'owonọ kwẹ, wanẹma, owonọ kwẹ kw'grep, otera ekpo mbyo.

6 "Ó̱de ọnọng oke ekpon z'ikẹ k'owonọ, ekpon ndo ẹnyaamẹ ẹd-ẹkwọmọ ekpo py'etim ebe-obe, wanẹma, ekpo py'nkk'apha matobha, wanẹma, owonọ kibungọ, ọnọng kw'oke ekpon ndo k'ẹtọma, m'otera ekpo mbyo py'ẹkwọm-ọkwọmọ.

7 "Ó̱de ọnọng ọnang oyok asilva bẹ́, oye, obir ode ekpo mbyoka, pira makwu afu ekpo mbyo ny'ọsọhm kw'ọnọng nwo, óde m'abọk orurubha nwo, kẹ m'otuk ekpo mbyo igbedim ifa. 8 Okenaka, óde nna orurubha nwo abọk, kẹ oyen-ọsọhm, m'od-okkona ifor sẹ z'ititika s'akpaar-aponga. Akpaar-aponga m'adọn odik nwo azonga, óde oyen-ọsọhm nwo ikk'ekpo py'oyok ọtọka osok mach'ekpo pyẹ. 9 K'aponga maphyir p'amaan bẹ́, ọnọng offu ẹbhaam, wanẹma ẹnyanya, wanẹma ọrọkimaan, wanẹma ọfọrattọhk, wanẹma ekpo mbyoza py'ọnọng oyinẹ oben bẹ́, ‘Faam vọ,’ bẹ nnam njo mfa, mm'atima odik nwo akebha akpaar-aponga. Oyok kw'aponga apyibh-ẹ, m'otuk ọnang oyok igbedim ifa.

10 "Ó̱de ọnọng otirẹ oyok ẹnyanya, wanẹma, ẹbhaam, wanẹma, ọrọkimaan, obir ode otirattọhk kpenamkpen, óde ope, wanẹma, mamum-ẹ ọttọhk ch'ọnọng ina otum oke, 11 bẹ nnam njo mfa, mm'achekẹ k'ititika s'Ọvaar Ibinọkpaabyi bẹ́, ọnọng kw'otwu ọttọhk f'oyok ọbọhk kode. Oyen-ọttọhk mvo m'ochera ọmaana echekẹ ndo. Ọnọng kw'im'otuk ọnang oyok kode. 12 Okenaka, óde ọnọng offu otirattọhk mvo z'mbọhk s'ikẹ kw'matirẹ, kẹ m'otuk ọnang oyenẹ. 13 Ó̱de ẹgbaten ch'ẹkkaam-ọkkaam ẹyaakẹ eten ndo k'akpa-k'akpa, kẹ kw'matirẹ eten ndo m'otima ayaara p'eten ndo okwu ọkọhka. Kẹ k'otuka kw'eten ndo moninga.

14 "Ó̱de ọnọng ọyaamẹ otirattọhk f'oyok, ọttọhk omum-ẹ, obir ode bẹ́, ope-ope k'ogbe kw'oyenẹ ina ode, kẹ nwo kw'ọyaamẹ otirattọhk mvo, m'otuk ọttọhk f'ode mbengana mach'mvo f'okibh-okibhẹ. 15 Okenaka, óde oyenẹ nwo oning k'eninga ch'odik nwo oyinẹ, oyok kw'ọyaamẹ otirattọhk mvo, ọttọhk mòtuk k'ose kw'otirattọhk mvo ope akpuka. Ó̱de oyok kw'ọyaamẹ otirattọhk mvo k'akpuka ikk'oyenẹ akpuka ọnanga, akpuka mbo bọ mmin'abe k'eso ch'eten ndo ch'ikk'ẹ edima.

16 "Ó̱de ojinọng ọdaabh ominanwa kw'ina ojinọng otima ozonga maa, oyim-ẹ ábẹ̀, ch'ina kẹ omina ọrọkọ, kẹ m'ọnang abakpuka k'ikẹ k'eso, ọtọk-ẹ k'ọbada. 17 Ó̱de otte kw'ominanwa nwo obhumọ ọbada nwo obhum, ojinọng nwo m'ọnang abakpuka mbengana k'ose kw'mad-anang k'ominanwa kw'nna ntaak atima aphaaka.

18 "M'kwanọng kw'osi ẹbọhk ọbọhk kàtte bẹ́, oruk akpen.

19 "Ọnọng kpenamkpen kw'oyim eten ábẹ̀, ọbaan bẹ́, mafhẹ-ẹ.

20 "Ọnọng kpenamkpen kw'ọgbaarẹ Ọvaar Ibinọkpaabyi ọjẹ, otera ọfọhnọ ẹja ọnang ọka, ọbaan bẹ́, mafhẹ-ẹ.

21 "M'okikennọng itama kàsi, m'kẹ kabir attukọ, okurọ bẹ́, wa bọnga made akikennọng z'Ijip.

22 "M'opokwa kàttukọ. M'offunwa kàbira attukọ. 23 Ó̱de m'asi bẹ tama-tama, pira bẹ mabhom akpẹk-m, kaam m'mbhaanga ẹmọng chabẹ k'odik ọkkọkka. 24 Ottempyibha kwaam m'ọphyabha, kaam m'ntima ọkkangkkang mfhọ bọnga. Panọng pabọnga m'ade apokwa, iva pabọnga abir ade affuva.

25 "Ó̱de abhor ogbugbora wanẹ kwaam kw'orukọ ọmaan-ọ akpuka, kẹ kàtima azenga ẹphya, inana ny'akpuka mbo p'abhor-ẹ kabir atọka. 26 Ó̱de atọk ibara s'oyok k'nwọhngọ s'osi, rik jẹ pira opyirẹ k'ẹsọhka, 27 okurọ bẹ́, ibara bung-bungọ s'oyen jọ nya. Ó̱de ina arikẹ, mbọng f'im'obubha otima oyima? Ó̱de obhomọ oyer-m, kaam m'mmaanga ẹmọng chẹ, okurọ bẹ́, kaam nyen ikwosisi.

28 "M'eche ch'Ibinọkpaabyi kàkibhẹ. M'ọnọng kw'ọbaabh bọnga ẹmma kàbir anang.

29 "M'kaam nnanga ọkkọkka s'ibin z'abọnga k'iwonọ karam, ozeng k'atuk p'achiduk p'abira abina nya.

"Bọnga mm'atte achedenva pabọnga k'ejinọng ọbọhk, manang-m.

30 "Minna kw'mm'abir asi amaana abhaam, ọmaana arọkimaan pabọnga. Tte iva p'nten njo ininga imaana ab'ọkka k'iwu ichenọmfa. Ó̱ttong iwu ochenọnttaan, màtọka jẹ nang-m.

31 "Bọnga mm'ade anọng paam p'awur-owur. Ó̱de ẹgbaten ch'ẹkkaam-ọkkaam ẹyaakẹ eten k'akpa-k'akpa, m'eten ndo kàchi. Màtọka nang mfa.