1 Nya o, Ọvaar Ibinọkpaabyi oben Mosẹs bẹ́, "Zọhng kebha Phero. Kaam kk'ettem chẹ ọttara ch'adukwa pẹ nsa ẹgaangẹ mawuriji. Minna kw'im'ntima nsi ikkonọ-kkonọdik nja saam, ny'abẹ k'ikpakaana. 2 Ikkonọ-kkonọdik nja s'im'nsi ny'abẹ k'ikpakaana, jẹ s'ikwuna im'ad-agbaak iva pọ, ọmaana iva p'iva pọ, ose kw'uwa nyak ọbọhk, nnang anọng p'Ijip irem, ọmaana nkọhka saabhada s'bọnga mm'atima azonga bẹ́, kaam wọ nde Ọvaar Ibinọkpaabyi."

3 Minna kw'Mosẹs ọttara Aarọn mad-akebh Phero, maben-ẹ bẹ́, "Ọvaar Ibinọkpaabyi kw'ode Ibinọkpaabyi kw'aHiburu, obenẹ bẹ́, ‘Ma, ogbe m'obhir otuma yen, pira asaka ifor sọ anang-m? Tte anọng paam ọbọhk mafona, mfha mad-akpobh-m. 4 Ó̱de ina bẹ ọbọhk atte mafona, ophyinẹ kaam m'ntọhm agurubhebhe ny'ẹkọma chọ. 5 Agurubhebhe mbo m'afu izek bẹ́ gbing, ọnọng ọdọk izek mòze. Mm'achi ọttọhk kpenamkpen f'orikẹ ny'ogbe kw'arọngta etebhẹ, ozeng k'echi kpenamkpen ch'ening z'abọnga k'iwonọ. 6 Mm'afu ny'isọhm sọ, ọmaana z'isọhm s'adukwa pọ, ọttara z'isọhm s'anọng p'Ijip maphyir. M'ode ọttọhk f'ab'atte, ọttara ab'atte p'atte pọ, nna atima ad-aza k'akpen, ch'iwa mabe-be ammaana m'izek nja.’ " Nya o, Mosẹs obina orik Phero.

7 Adukwa p'Phero maben Phero bẹ́, "Ojinọng nwa m'oke mina eso otuma yen o? Tte anọng mbo ọbọhk mafona, mfha mad-akpobha Ọvaar Ibinọkpaabyi kwabẹ. Ma, kọ atim azonga bẹ́, anọng p'Ijip nnaning k'irem o?"

8 Nya o, Phero oyerẹ Mosẹs ọttara Aarọn makpa nnam, oben bẹ bẹ́, "Màzọhng kpobha Ọvaar Ibinọkpaabyi kwabọnga. Matek-m, bọng-anọng bọ mm'afon-ofona?"

9 Mosẹs ọpọhn-ẹ bẹ́, "Mina maphyir bọ mm'ofona, acham-ọchamẹ, abar-ọbar, iva pamina k'ejinọng, ọmaana k'ẹpanọng, ọttara etirakpo pyamina, okurọ bẹ́, mm'od-osi odidaama ọnang Ọvaar Ibinọkpaabyi."

10 Phero oben bẹ bẹ́, "Kk'nza bẹ́, bọnga makamẹ itama. Ma, bọnga machibhẹ bẹ́, Ọvaar Ibinọkpaabyi oning ọmaana bọnga k'odik ọkkọkka? Eden kede ch'im'ntte bọnga ọbọhk matima panọng pabọnga, ọttara iva pabọnga, mafona! 11 Mma e! Tìma ajinọng bẹ-bẹ zọhng kpobha Ọvaar Ibinọkpaabyi. Ọttọhk f'mad-atọma za aphyem-m vọ nya." Ofona nya, makwubh Mosẹs ọmaana Aarọn z'Phero k'ititika.

12 Nya o, Ọvaar Ibinọkpaabyi oben Mosẹs bẹ́, "Nemẹ ọbọhk kwọ tena z'Ijip, ọfha agurubhebhe ayin akibhẹ eborakpo kpenamkpen py'arọngta ikk'ekibha erik."

13 Minna kw'Mosẹs onemẹ ochikwura otena z'Ijip, Ọvaar Ibinọkpaabyi osi ofum obina z'ẹbhaakẹ ch'ewuchen ed-eyin, ogwuma ny'obhon, ny'ewu ndo kibungọ, ọmaana ny'erungọ. Ewu esobh nya o, ofum nwo kk'agurubhebhe otima ofu ibyi bẹ́ gbing. 14 Agurubhebhe mbo manyaamẹ k'ibyi kpenamkpen ny'Ijip, mabak obhon maphyir k'ọsaabh. Ch'obobe ode, nkwurọse njo s'agurubhebhe itima id-iyina. Zaabẹ́ z'ogbe ororo wọ, kwuna ọdọk minna mòde. 15 Agurubhebhe mbo mafu ny'izek bẹ́ gbing maa, izek ipyi ewu bẹ́ kkang. Machi ọttọhk kpenamkpen f'arọngta nkk'akibha arik, ọmaana ekpo py'emenẹ z'iwonọ, ọttara achiduk. Wa ọttọhk-kikebhẹ kpenamkpen ọdọk ny'Ijip maphyir, korikẹ, ode echi, obir ode ozizaarẹ kw'osen-osenẹ.

16 Phero ọsẹr-ọsẹr oyerẹ Mosẹs, ọmaana Aarọn, oben bẹ́, "Kaam kk'epyibha nsa mmaana Ọvaar Ibinọkpaabyi kwabọnga, ọttara bọnga oyenẹ. 17 Ototo, màbir abina nang-m, akwukọ Ọvaar Ibinọkpaabyi kwabọnga bẹ́, ọrọhbha nkwurọ nja m'kaam k'ifor, ọbharẹ."

18 Mosẹs obina orik Phero, od-oze njọm ọnang Ọvaar Ibinọkpaabyi. 19 Minna kw'Ọvaar Ibinọkpaabyi ọbhakẹ ofum nwo, nobina ẹfa-ẹfa z'ẹbhaakẹ ch'ewuchen ed-edimẹ, okwu ogwuma agurubhebhe mbo maphyir ọbharẹ z'Ẹraanga-kora. Ofona nya o, wa ogurubhebhe mawanẹ-wanẹ ọdọk ny'Ijip, korikẹ. 20 Ọvaar Ibinọkpaabyi osi Phero ochina ororo ọgaangẹ ettem, anọng p'Israẹl ọbọhk kotte mafona.

21 Nya o, Ọvaar Ibinọkpaabyi oben Mosẹs bẹ́, "Yaangẹ ọbọhk kwọ tena z'ọrọngkpakpa, ọfha orungibanga obubha Ijip maphyir, k'ose kw'im'otwu ọnọng z'ifor." 22 Ofona nya o, Mosẹs ọyaangẹ ọbọhk kwẹ otena z'ọrọngkpakpa, orungibanga kw'opyi ewu bẹ́ kkang, obubha ny'Ijip maphyir k'iwu minna ittaan. 23 Ọnọng kw'okpo oyok oze, obir obina orik ibyi sẹ, kode. Chibhẹ ch'ode minna, wa anọng p'Israẹl maphyir, mayen ọyaanttaana k'ibyi kpenamkpen s'bẹ marukọ.

24 Nya o, Phero oyerẹ Mosẹs oben-ẹ bẹ́, "Màtima panọng, ọttara iva pabọnga zọhng kpobha Ọvaar Ibinọkpaabyi kwabọnga. Okenaka, màtte etirakpo pyabọnga ọbọhk eninga ka."

25 Okenaka, Mosẹs ọpọhn-ẹ bẹ́, "Màtte mina ọbọhk mọd-ọfọhnọ nja ọnang Ọvaar Ibinọkpaabyi kwamina, mobir ọfọhnọ nja s'ẹkwọmọ ọnang-ẹ. 26 Mina mm'otima etirakpo pyamina maphyir, mofona, mavanẹ-vanẹ mòrik. Mm'otima janẹ okpobha Ọvaar Ibinọkpaabyi. Ó̱de nkk'opyira za, nya kw'mm'ozonga otenkira kw'mm'otima okpobha Ọvaar Ibinọkpaabyi."

27 Okenaka, Ọvaar Ibinọkpaabyi osi Phero ochina ororo ọgaangẹ ettem, kocher bẹ́, otte anọng p'Israẹl ọbọhk mafona. 28 Phero o, oben Mosẹs bẹ́, "Bina m'kaam k'ititika! Kwuna nning-ọ ọdọk nze m'ikaam k'ititika o! Ewu ch'abir aze ititika saam, m'ape-ope e."

29 Mosẹs ọpọhn-ẹ bẹ́, "Ode k'ose kw'abenẹ nya. Kwuna ọdọk kaam ma, màze."